Paul n sob gbauŋ siꞌa n tis
EFESUS DIM
la nwa
1
1 Mam Paul one ka Winaꞌam gaŋ ka m a Yesu Kiristo Tumtum la sobid gbauŋ kaŋa tisid Winaꞌam nidib bane be Efesus teŋin ka a yadda niŋidib Yesu Kiristo ni la.
2 Ti Baꞌ Winaꞌam ne ti Zugsob Yesu Kiristo yelsum ne sumalisim na be ne ya.
Winaꞌam bareka tisib la yela
3 Winaꞌam one a ti Zugsob Yesu Kiristo Baꞌ diꞌem bareka puꞌusum, tiname a Kiristo nidib ka a yinni ne o la zug, ka Winaꞌam tisi ti yelsum line aa o piini wusa ka yii o saꞌan arazana ni la.
4 Dunia da nam pu pinꞌil la, Winaꞌam da pun deŋim gaŋi ti ye ti aa o nidib n a yinni ne Kiristo ka a nyain o tuon ka gbada kaeꞌ.
5 On noŋi ti la zug ka o gbanꞌe ye o zaŋi ti ka ti lieb o biis, ka li yine Yesu Kiristo meŋ ni na. O gbanꞌe line ne o meŋ yaꞌamboodim,
6 ye o popielim piintitaꞌar line ka o tisi ti, tinam a yinni ne o Binoŋir la zug nye zunꞌor,
7 one ka o ziim tisi ti yolisim ka yiisi ti tuumbeꞌedi bas. Ka li wusa doli o popielim titaꞌar
8 kan ka o tisidi ti la,
9 ka ke ka ti mor yaꞌamsuŋ ne baŋir wusa, ye ti baŋ o potenꞌer line da a yelsuaꞌadir ka yi o boodim suŋ kan ka o gbanꞌe ti yela ka li yine Kiristo ni la.
10 Winaꞌami n gbanꞌe saŋsiꞌa la yaꞌa ti paae li ben o na laꞌas bunam bane wusa be arazana ne dunia ni ka Kiristo a Zugsob.
11-12 Winaꞌam one ke ka siꞌel wusa niŋid wuu o boodim a siꞌem la, gaŋi ti ye ti aa o nidib ka a yinni ne Kiristo. Ka li dol o potenꞌer kan ka o deŋim gbanꞌe ye tinam bane deŋim mor tiꞌir ne Kiristo la, na ke ka nidib duꞌos o yuꞌur titaꞌar la.
13 Yaname wum sida labasuŋ line ke ka ya nye faangir la, ya siak Kiristo ka a yinni ne o, ka Winaꞌam tisi ya o Siig Suŋ wuu on ziꞌel siꞌem. Ka Siig Suŋ la a zanbin
14 ka li paꞌal ye ti na nye line wusa ka o ziꞌeli tisi ti, n ti paae saŋkan ka ti na diꞌe li wusa.
Paul Winaꞌam sosug
15 Neꞌenam zug, ne mam wum ye ya niŋ ti Zugsob Yesu Kiristo yadda ka mor noŋir ne Winaꞌam nidib wusa la,
16 m pu guꞌe ka kpelim puꞌusid Winaꞌam bareka ya zug ka tenri sosid Winaꞌam ya yela.
17 Ye ti Baꞌ Winaꞌam one mor yuꞌur titaꞌar ka ti Zugsob Yesu Kiristo be o saꞌan la na tisi ya yaꞌamsuŋ line paꞌani ya Winaꞌam a siꞌem ka ya baŋ o.
18 Ka nie ya potenda ka ya baŋ yelsida ne tiꞌir lin yela ka o gaŋi ya la. Ka lem baŋ ziꞌelsuŋ kane ka o tis o nidib la malisim a siꞌem,
19 ka me baŋ o paŋ line a buntitaꞌar ka kaꞌ makire ka be tinam bane siak o ni la.
20 Paŋ titaꞌakaŋa ane yinni ne paŋ titaꞌakan ka o zaŋi vuꞌug Kiristo kumin n zinꞌil o o datiuŋ arazana ni la.
21 Ka Kiristo naꞌam gat naꞌanam wusa naꞌam ne paŋdim wusa, ka o a yuꞌur daan n gat soꞌ wusa, ka li kaꞌane dunia kaŋa maꞌanee, amaa laꞌam ne dunia kane na ti kena la.
22 Winaꞌam gaŋ Kiristo ka o a Winaꞌam nidib la Zugsob n soꞌe siꞌel wusa, ka ke ka bunam wusa na zinꞌini o tuon.
23 Winaꞌam nidib la ane Kiristo niŋgbin, ka o ni ka siꞌel wusa maali naae.