2
Winaꞌam more ti kumin keŋ vuꞌumin la yela
1 Saŋsiꞌen la ya da ane kuꞌum ya tuumbeꞌed ne ya taal yela line ka ya da niŋid,
2 yaname da dol dunia nwa suer, ka me dol Sutaana one soꞌe bane mor paŋ agol, ka a one be bane zanꞌas Winaꞌam noor la ni n tum ne ba.
3 Tiname daa laꞌam be ne ba la, ti da niŋidi ti ninsaal yaꞌamleog line a ti niŋgbina boodim ne ti yaꞌamboodim. Ka tiname da a siꞌem ke ka ti da nar ye Winaꞌam namisi ti, wuu dunia dim wusa ne.
4 Ka Winaꞌam n noŋi ti bedego la zug ka o zoo ti nimbaanlig bedego.
5 Hale baa ti tuumbeꞌedi da ke ka ti nwaas wuu ti kpi ne la, o laꞌam vuꞌugi ti ne Kiristo. Li ane o popielim zug ka o faann ya.
6 Ka Kiristo maꞌasim zug ka Winaꞌam laꞌam vuꞌugi ti ne Kiristo n ke ka ti zinꞌin ne o arazana ni,
7 ye saŋa line na ti kena la, o na nie paꞌali o popielim line kaꞌ ben la a siꞌem, ne on tisidi ti yelsum, tiname a yinni ne Kiristo la zug.
8 Ka o popielim zug ka o tisi ya faangir ka li yine ya yadda niŋir Kiristo ni na, ka li kaꞌane ya meŋ tuuma zugo. Li wusa ane Winaꞌam piini niŋir,
9 ka kaꞌane ninsaal tuuma yela, ka ya nweꞌedi nyoꞌogo.
10 Li ane Winaꞌam maali ti ka ti a yinni ne Yesu Kiristo ye ti tum tuumsuma line ka o pun deŋim digil ye ti yuꞌun niŋid la.
Ti laꞌas a yinni Kiristo zug la yela
11 Ya da a bane kaꞌ Jew dim buudi ne ninsaalib duꞌam poogin, ka Jew dim bane kpenꞌed baŋo la buoni ya ye Apukpenꞌbaŋo dim, ka li ane ninsaalib din maꞌaa.
12 Dinzugo tenri ye saŋsiꞌen la ya da kaꞌ yinni ne Kiristo, ka ya baꞌa da pu peꞌes ne Israel teŋgbauŋ ne nonaar kan ka Winaꞌam da ziꞌeli tisi ba la. Ya da be dunia nwa ni ka pu mor tiꞌire, ka ziꞌ Winaꞌam,
13 ka da lal ne o. Amaa nannanna yanam a yinni ne Kiristo la zug, ka o ziim la ke ka ya yuꞌun liꞌel ne o.
14 Ka Kiristo aa ti zabpansid ka noki ti buudi ayi la ka ti lieb yinni, ka nwaꞌe zaba zaŋguom la
15 line a Jew dim maluŋ ne ba wada la. O kum la kpiis maluŋ la ye o kpanb buudi ayi la o saꞌan ka ba a buudi yinni ka mor sumalisim ne taaba.
16 Ka o kuꞌum dapuudir zug la naal noor ne tinam buudi ayi nwa ne Winaꞌam ka ti a buudi yinni ka zabir naae.
17 Ka Kiristo kena mool sumalisim labasuŋ la n tis yanam bane lal, ne bane be yaꞌamin la.
18 Ka o zug ka ti buudi ayi la wusa mor suer ne Siig Suŋ yinni la ni, ye ti liꞌel ti Baꞌ Winaꞌam saꞌan.
19 Linzug ka ya kudum lem kaꞌ saam bee zoomaa, ka ane Winaꞌam nidib ka be o soꞌolimin ka aa o yidim.
20 Ka ba eenb ne ya, eenbkan ka Winaꞌam Tumtumnib ne o nodiꞌesidib da eenb la zug. Ka Yesu Kiristo n a doog la eenbir kugir la,
21 one ke ka yir la wusa maal ka li gbanꞌe kiŋkiŋ, ka yaligidi n liebid Winaꞌam puꞌusum yir line a nyain ka a yinni ne Zugsob la.
22 Ka yanam a yinni ne o la zug ka Winaꞌam Siig Suŋ mee ya n maali ya Winaꞌam yir ye o be anina la.