3
Paul n tum tis bane kaꞌ Jew dim la yela
1 Dinzug ka mam Paul n be sarega ni Yesu Kiristo zug yanam buudbane kaꞌ Jew dim la yela.
2 M tenꞌesid ye ya wum ye Winaꞌam tisi m tuuma line yi o popielimin ya yela,
3 ne on nie o yelsuaꞌadir tisi m ye m baŋi li gbin, wuu man deŋim sobi li giŋa siꞌem la.
4 Ka ya yaꞌa karem lina ya na nye mam baŋ yelsuaꞌadir la gbini a siꞌem line a Kiristo la.
5 Ka Winaꞌam da pu nie li n tis kudimin dima, ka o Siig la yuꞌun nie li paꞌal o Tumtumnib ne o nodiꞌesidib.
6 Ka yelsuaꞌadir la yela ane ye labasuŋ moolug la ket ka buudi wusa laꞌamid ne taaba pudugid Winaꞌam piini ka laꞌam diꞌed line ka o ziꞌel noor tisi ti, tinam a yinni ne Yesu Kiristo la zug, ka laꞌam lem be niŋgbiŋ yinni ni.
7 Li da ane Winaꞌam paŋ tuuma niŋir ka o gaŋi piinsuŋ n tisi m line ke ka m lieb labasuŋ la moon moon.
8 Ka mam one a Winaꞌam nidib wusa kpaanr la diꞌe piinkaŋa, ye m mool labasuŋ la tis buudi bane kaꞌa Jew dim la, piintitaꞌar one a Yesu Kiristo la yela line kaꞌa ben ne,
9 ka ke ka nidib wusa nye yelsuaꞌadir suer line ka Winaꞌam one maal bun wusa la da suaꞌ yuum pokudug ni.
10 O nidib na ke ka naꞌanam ne paŋ dim bane be saazug baŋ Winaꞌam yaꞌam line kaꞌa ben la.
11 Winaꞌam niŋ neꞌenam ka li dolne on gbanꞌe siꞌem, saŋkan ka dunia nam pu pinꞌile, ka li yine ti Zugsob Yesu Kiristo saꞌan ka li niŋ sida.
12 Ka tinam siak o la ke ka ti nyees ka mor suer ye ti keŋ Winaꞌam saꞌan.
13 Dinzug ka m sosidi ya ye ya da ke ka ya sunya saꞌam mane namisidi ya yela la zugo, ka m namisug ane ya sumalisim.
Paul Winaꞌam sosug
14 Dinzug ka m igin duma zug ti Baꞌ Winaꞌam tuon,
15 on kane tisid buudi wusa bane be saazug ne dunia ni ba yuda la.
16 M sosid Winaꞌam ye o Siig Suŋ na tisi ya paŋi ya sunya ni line doli o naꞌam paŋ titaꞌar,
17 ye Kiristo bee ya sunya ni, ka ya yadda niŋir zug, ka ya noŋilim kpiꞌem ka pu tiakeda.
18 Ye ka yanam laꞌam ne Winaꞌam nidib wusa na paam paŋ n na nyaŋe baŋ Yesu noŋilim waꞌam ka labis ka du ka zulum siꞌem,
19 ka baŋ o noŋilim line gat nidibi na tunꞌe baŋi li siꞌem. Hale bun line wusa yit Winaꞌam saꞌan na la na peꞌel ya.
20 One tunꞌe maal siꞌelnam bedego, hale gat tiname na sos bee tenꞌes siꞌem la line zemisi o paŋ kane tumi ti ni la.
21 Winaꞌam na nye naꞌasi Kiristo nidib saꞌan saŋa dine kaꞌ naare. Ami.