4
Beilim suŋ line maꞌed Winaꞌam sunf la yela
1 To, ti baꞌabiise, ya daa zamisid ti saꞌan yaname na a siꞌem ka li maꞌae Winaꞌam sunf. Ya kpelim aa ala. Ka ti saꞌali ya ka belimi ya ne ti Zugsob Yesu yuꞌur ye ya niŋ ka li gaad ala.
2 Ya miꞌ noyelug bane ka ti daa tisi ya ne Zugsob Yesu paŋ la,
3 ye Winaꞌam bood ye ya a suꞌum nyain, ka luak dianꞌad tuuma,
4 ka ya yinni yinni baŋ yanam na niŋ siꞌem di poꞌa ne naꞌasi, ka ya sunya a nyain.
5 Ka li kaꞌane ne beꞌed yaꞌamleog wuu baꞌamaanib bane pu dol Winaꞌam niŋid siꞌem laa.
6 Ka neꞌ poogin, mit ka dau tum tuumbeꞌed ka maal beꞌed tis o baꞌabiig. Ti daa deŋim yeli ya, ka saꞌali ya ne paŋ ye, Zugsob na namis bane tum tuumbeꞌed bama.
7 Winaꞌam daa pu gaŋi ti ye ti sunya a dianꞌade, amaa ye li a nyain.
8 Dinzugo one zanꞌas paꞌalug kaŋa, o pu zanꞌas ninsaala, o zanꞌasne Winaꞌam one tisi ti o Siig Suŋ la.
9 Li lem kaeꞌ ye ti sob tisi ya ya baꞌabiis noŋilim yelaa. Winaꞌam pun zamisi yanam ye ya noŋ taaba.
10 Ka li a sida ye ya noŋ ya baꞌabiis wusa bane be Masedonia soꞌolimin la. Ti baꞌabiise, ti belimi ya ye ya ke ka noŋilim la gaad lin a siꞌem la,
11 ka ya kpeꞌeŋ ya meŋ n a baanlim, ka gosi ya meŋ tuuma, ka tum ne ya meŋ nuꞌus n diisi ya meŋ, wuu tinam daa yeli ya siꞌem la,
12 ye ya nye naꞌasi bane kaꞌ yadda niŋidib la ni. Ka da tiaꞌ soꞌ ka ye o tisi ya, yanam bood siꞌel la.
Zugsob ken la na yela
13 Ti baꞌabiise, ti bood ye ya baŋ yelsida ne bane kpi la yela, ka ya sunya da saꞌam wuu bane pu mor tiꞌir laa.
14 Ti siak ye Yesu kpiya ka lem vuꞌug kumin, ka me siak ye bane daa a Yesu nidib ka da kpi la, Winaꞌam na more ba ne Yesu na.
15 Lina ane Zugsob paꞌalug ka ti yeli ya ye, saŋkan ka Zugsob la na ti kena la, tinam bane kpelim voe la, ku deŋ bane kpi la n laꞌas ne Zugsob la yiigaa.
16 Zugsob la meŋ na ti yi arazana ni sig na ka tis noor tansug ka ti wum malek kpeenm kukor ne Winaꞌam naꞌatan piebug. Ka bane a Yesu nidib ka kpi la, na vuꞌug kumin yiiga.
17 Ka Winaꞌam yuꞌun na nok tinam bane kpelim voe la n laꞌas ne ba n tuꞌos Zugsob la saŋgbana ni. Ka ti yuꞌun na be Zugsob la saꞌan saŋa wusa.
18 Dinzugo, kpemisimi taaba sunya ne pianꞌabama.