5
1 Ti baꞌabiise, li lem kaeꞌ ye ti sob siꞌel tisi ya Zugsob ken la saŋa ne dabisa la yelaa.
2 Ka yanam meŋ miꞌ suꞌuŋa, ye Zugsob dabisir la na kena wuu naꞌayiigi na kenn yuꞌuŋ na siꞌem la.
3 Nidib yaꞌa ti yet ye, “Laafe ne niŋmaꞌasim be” saŋkan la ka toog na kpelim lu ba zugin, wuu poꞌa yiti saꞌae duꞌam siꞌem la. Ka ba ku nyaŋe yi li nii.
4 Ti baꞌabiise, yanam kaꞌ lik dima, ka Zugsob la dabisir na kpelim diꞌigi ya wuu naꞌayiiga.
5 Ya wusa ane neesim nidib, ka be line a nyain la ni, ka ti kaꞌ yuꞌuŋ ne lik nidiba.
6 Dinzugo, ti da gbisid wuu bama laa, ka nei ka da aa wuu one nu daam koole.
7 Bane gbisid la, gbisidne yuꞌuŋ. Ka bane nu daam kool la, kool ne yuꞌuŋ.
8 Ka tiname a neesim nidib la zug, ti da kool ka yaꞌam kaeꞌ. Li nar ka ti a wuu sogia bane yeꞌ zaba laꞌad line a kunt la ye li guꞌu ba meŋ, zaba ni. Ti yeem yadda niŋir ne noŋilim n guꞌu ti nyoꞌod, ka pid kunt balaŋir line a tiꞌir ye ti nye faangir la n guꞌu ti zut.
9 Winaꞌam pu gaŋi ti ye ti nye o supeene, ka lee ye ti diꞌe faangir line yi ti Zugsob Yesu Kiristo ni na la.
10 On da kpi ti zug, ye saŋkan ka o ti ken la na, ti yaꞌa voe bee ti yaꞌa kpi ne, ti na laꞌam be ne o.
11 Dinzugo kpemisimi ya taaba sunya, ka suŋ taaba ya yadda niŋir ni, wuu yaname niŋid siꞌem la.
Saꞌalug ne puꞌusug
12 Ti baꞌabiise, ti belimi ya ye ya naꞌas bane ka Zugsob la gaŋi ba ye ba guri ya ka tum o tuuma ya soogin ka paꞌani ya la,
13 ka tisi ba naꞌasi bedego, ka noŋi ba ba tuuma la zug, ka ya mor sumalisim ne taaba.
14 Ti baꞌabiise, ti kpemisidi ya sunya ye ya saꞌal bane mor gbanyaꞌam la, ka kpemis bane pu mor sukpiꞌem la sunya, ka suŋ bane kaꞌ paŋ ba yadda niŋir poogin la, ka mor sumbugusum ne ba wusa,
15 ka guꞌus ka ya soꞌ da lebis o tiraan beꞌed one tum beꞌed la zugo, ka kpemis ya meŋ ye ya tum tuumsuma n tis taaba ne nidib wusa.
16 More sumalisim daar wusa,
17 ka puꞌus Winaꞌam saŋa wusa,
18 ka puꞌus o bareka siꞌel mekama ni; ka li ane Winaꞌam boodim line yi Yesu Kiristo ni na, ye ya niŋid ala.
19 Da zanꞌasi Winaꞌam Siig Suŋ laa,
20 ka me da neꞌes pianꞌad line ka soꞌ diꞌe Winaꞌam ni tisi ya.
21 Kpansimi siꞌel wusa, ka more dine a suꞌum,
22 ka luak bunbeꞌed buudi wusa.
23 Ti sosid Winaꞌam one tisidi ti sumalisim la ye o ke ka ya aa suꞌum nyain. Ka lem sos o ye o na more ya suꞌuŋa, ka Zugsob Yesu Kiristo la yaꞌa ti kena, ka ya siis ne niŋgbina a suꞌum ka ya di buod.
24 Winaꞌam one gaŋi ya la a sida sob, ka na niŋ ala.
25 Ti baꞌabiise, sosimi Winaꞌam tisi ti,
26 ka puꞌus ya baꞌabiis wusa suꞌuŋa.
27 M yeti ya ne Zugsob paŋ ye ya karem gbauŋ kaŋa tisi ya baꞌabiis zanꞌasa.
28 Ti Zugsob Yesu Kiristo yelsum na bee ya saꞌan. Ami.