2
Baragaŋ la yela
1 M baꞌabiise, da dol ti Zugsob Yesu Kiristo, ka lem mor baragaŋaa.
2 Li yaꞌa wenne arazak daan one pid salima baans ka ye fusuma n kpenꞌ ya laꞌasugin na, ka noŋdaan me ye kparikeend n kpenꞌe na,
3 ka ya tis one ye fusuma la naꞌasi ka yel o ye, “Naa, zinꞌinim kpela,” amaa ka yel noŋdaan la ye, “Ziꞌenim anina” bee “Zinꞌinim teŋin.”
4 Ya pu mor baragaŋi ya soogine? Ka ya pu mor potenꞌebeꞌed n lieb saria katibaa?
5 M baꞌabinoŋa, kelisimi. Winaꞌam gaŋ bane a noŋdim dunia kaŋa nwa ni, ye ba niŋ o yadda suꞌuŋa ka na diꞌe naꞌam kan ka o da ziꞌel bane noŋ o la.
6 Amaa ya neꞌesid noŋdim. Kaꞌa arazaꞌas dimi namisidi ya ka gbanꞌadi ya n ken saria katib tuone?
7 Li kaꞌ bane saꞌamid Winaꞌam yuꞌusuŋ kane ka o tisi ya laa?
8 Ya yaꞌa siaki tum Winaꞌam soꞌolim wada line sob Winaꞌam gbauŋin ye, “Noŋim fu tiraan wuu fu noŋi fu meŋ siꞌem la” fu tum line a suꞌum.
9 Amaa ya yaꞌa mor baragaŋ, ya tum tuumbeꞌed. Ka wada la na paꞌali ya ye ya tum taal.
10 On wusa siak n tum wada la yel siꞌel wusa, ka saꞌam wada la yinni, o saꞌami li wusa.
11 Winaꞌam one yel ye, “Da saꞌam poꞌa la,” on me lem ye, “Da ku nida.” Hale fu yaꞌa pu saꞌam poꞌa ka ku nid, fu ane one saꞌam wada la.
12 Pianꞌami ka tum wen wuu nimban ka ba na kadi ba saria n dol wada la suer line tisid yolisim la.
13 Winaꞌam yaꞌa ti kad saria, o ku zo nimbaanlig ne niŋkane pu zot o taaba nimbaanliga. Bozugo nimbaanlzoor nyaŋed saria kadib.
Yadda niŋir ne li tuuma la yela
14 M baꞌabiise, li suꞌum a bo n tis dau kane yel ye o niŋid Winaꞌam yadda ka o tuuma pu paꞌali lii? Yadda niŋir kan na tilig o bee?
15 Li yaꞌa wenne ya baꞌabiig be ka kaꞌ fuugo, ka pu mor diib na dii,
16 li suꞌum a bo ka ya yinni yel o ye, “Kem ne sumalisim, n di suꞌuŋa ka pil fuug ka waad da kpenꞌ fu” ka lee pu tis o, o niŋgbiŋi bood siꞌel la. Li suŋir a bo?
17 Ala men ka yadda niŋir gullim ka tuuma kaeꞌ me a zaalim.
18 Ka soꞌ na yel ye, “Fun mor yadda ka mam mor tuuma.” Paꞌalim man fu yadda niŋir ka li tuuma kaeꞌ, ka man na paꞌal uf man yadda niŋir ne m tuuma.
19 Ya siak ye Winaꞌam yinni maꞌaa be. Li a suꞌum. Hale kikiris me siak li ka kirid ne dabiem.
20 Yalim nwa. Fu bood ye fu baŋ ye yadda niŋir maꞌaa ka tuuma kaeꞌ pu mor nyoode?
21 Ti yaab Abraham da niŋ wala n lieb popielim sob Winaꞌam tuone? Li ane o tuuma poogin, on da zaŋ o biig Isaak ye o ku maal maan n tis Winaꞌam la.
22 Fu nye o yadda niŋir ne o tuuma laꞌam tum ne taaba. O tuuma la ke ka o yadda niŋir la paae li ben.
23 Ka line sob Winaꞌam gbauŋin niŋ ameŋa ye, “Abraham da niŋ Winaꞌam yadda ka Winaꞌam gosi o yadda niŋir ka ye o ane popielim sob o tuon.” Ala zug ka Winaꞌam buol o ye o zua.
24 Nid tuuma na ke ka o lieb popielim sob Winaꞌam tuon ka li kaꞌ o yadda niŋir maꞌane.
25 Ala mene, li da ane wala ne poꞌagoondir one ka ba buon Rahab la. O tuuma zug ka o da lieb popielim sob Winaꞌam tuon, on daa diꞌe Jew dimi daa tum nidib ye ba keŋ labis baŋ teŋ la, ka o suꞌa ba o yin. Ka yiisi ba ka ba toom suer n kul la.
26 Niŋgbiŋ naan be ka siig kaeꞌ ka li a zaalim la, ala men ka yadda niŋir yaꞌa be ka tuuma kaeꞌ, li ane zaalim men.