3
Zilim la yela
1 M baꞌabiise, da bood ye ya titaꞌam a paꞌaniba. Bozugo ya miꞌ ye tinam bane a paꞌanib la ba na ti kadi ti saria ka li kpiꞌem.
2 Ti wusa tum line pu tuꞌale bedego. Soꞌ yaꞌa pu pianꞌ line pu tuꞌale, o sid ane ninsuŋ ameŋa. O na nyaŋ ke ka o niŋgbiŋ wusa tum line a suꞌum.
3 Ti yaꞌa lia widi ne saliba ye ba niŋi ti boodim, ti nyaŋedi ba niŋgbina wusa ka ba niŋ tiname bood siꞌel.
4 Gosim aaruma titada a siꞌem, hale laꞌam ne ban bedim la ka pebisim daꞌadi ba ka ba ken la, ba tunꞌe nweligi li ne dabil ka li keŋ one gaꞌad la n bood zinꞌisiꞌa.
5 Ninsaal zilim me wenne ala, li a fiinn nwa niŋgbiŋin, amaa ka nyaŋed pianꞌad nyeesim pianꞌad.
Gosim bugum biꞌela na nyaŋe laꞌaŋ sianꞌatitaꞌar.
6 Zilim wenne bugum ne. Li mor tuumbeꞌed buudi wusa ti niŋgbina ni, ka ket ka tuumbeꞌed saꞌame ti niŋgbiŋ wusa. Sutaana ket ka zilim pianꞌad beꞌed ne tuumbeꞌed wusa.
7 Ninsaal na nyaŋe milis niis ne bunkonbid bane ken ne noba, ne bane vuud ne bane be kuꞌomin wusa. Saalib pun nyaŋ milis bama sa.
8 Amaa ninsaal kaeꞌ na nyaŋe milis o zilim ne. Li peꞌel ne pianꞌabeꞌed wenne yabig ne.
9 Ti more zilim puꞌusidi ti Zugsob one a ti Baꞌ la bareka, ka lem more li po noor tisid taaba, bane ka Winaꞌam maal wenne o meŋ la
10 Nid yinni naꞌasid Winaꞌam ka lem po noor tisidi o tiraan. M baꞌabiise, li pu suꞌum ka li a ala.
11 Kuꞌosuŋ ne kuꞌotoog na nyaŋe yi bulnoor yinni ni naa? M baꞌabiise, ka kekaŋ na nyaŋe wel taꞌama?
12 Bee ganya tiig na nyaŋe wel kekama? Ala zug bulig kane bul kuꞌotoog me ku nyaŋe bul kuꞌosuŋo.
Yaꞌam line yi Winaꞌam saꞌan la na yela
13 Anoꞌone tenꞌes ye o mor yaꞌam ne baŋire ya sooginee? On paꞌalimi li ne o tuumsuŋ line ka o tum ne sumbugusum ne yaꞌam la.
14 Amaa ya yaꞌa mor fufum ne nennim ya da nweꞌe ya nyoꞌog ka maꞌa ziri n zanꞌas yelsida laa.
15 Neꞌeŋa kaꞌ yaꞌam kane yi arazana ni na. Li ane dunia ne Sutaana bun. Ka li kaꞌ Winaꞌam bunne.
16 Fufum ne nennim yaꞌa be zinꞌisiꞌa, daamug ne tuumbeꞌed ne li buudi wusa na be anina.
17 Amaa niŋkane ka o yaꞌam yi Winaꞌam saꞌan la, na a nyain, ka lem mor sumbugusum ka a baanlim, ka zot nidib nimbaanlig, ka suŋid nidib bedego, ka tum tuumsoma bedego, ka pu gaansida ka a sida sob.
18 Zabpansid bane but ne sumalisim la, bun ne popielim biis.