4
Dunia dim suer dolim la yela
1 Bo ka ya zabid ka nwaꞌasidi ne taaba? Li ane ya niŋgbina yaꞌamleog boodim.
2 Ya bood siꞌelnam ka pu paam. Ya kuud nidib ka mor fufum ne ya taaba bunam, ka pu paam. Dinzug ka ya zabid ka nwaꞌasid ne taaba. Ya pu mora, yaname pu sos Winaꞌam la zug.
3 Ya sos ka pu paam, yaname pu sos ka li dol suer la zug. Ya sosidne siꞌelnam ye ya dii li ne ya yaꞌamleog.
4 Yanam bane pu tum line ka Winaꞌam bood la! One wusa gaŋ ye o maal zuod ne dunia, o na lieb dataa ne Winaꞌam. Dinzugo on mekama bood ye o maal zuod ne dunia, on maali o meŋ ne Winaꞌam dataa.
5 Bee ya tenꞌes ye line sob Winaꞌam gbauŋin la ane zaalim ye, Winaꞌam Siig kan ka o niŋi ti ni la, guri ti ne dasuŋ kpiꞌema?
6 O tisidi ti popielim piini bedego. Li sob ye,
“Winaꞌam zanꞌasid nyeesim dim,
ka tisid bane siedi ba meŋ la popielim piini.”
7 Dinzugo, zaŋimi ya meŋ n pesigi Winaꞌam. Zanꞌasimi Sutaana, ka o na zo ka basi ya.
8 Liꞌelimi Winaꞌam saꞌan na ka o me na liꞌeli ya saꞌan. Tuumbeꞌed dim ne potenda ayi yi dima! Piemi ya nuꞌus ne ya sunya.
9 Kaasimi ka fabil ne susaꞌaŋ. Tiakimi ya laꞌab ka li lieb kaasig, ka ya sumalisim lieb susaꞌaŋ.
10 Sigisimi ya meŋ Winaꞌam tuon ka o na duꞌosi ya.
Baꞌabiis tuuma geligir la yela
11 M baꞌabiise, da pianꞌade beꞌed n tisidi taaba. One pianꞌ beꞌed n tisid o tiraan bee kat o saria, o pianꞌad beꞌed n tisid wada la ka kat li saria. Fu yaꞌa kat wada la saria, fu pu dol wada laa, amaa fu ane wada la saria kat.
12 Winaꞌam maꞌaa a one tisid wada ka a sariakat. On maꞌaa na nyaŋe tis nyovur ka saꞌam li. Ka fu tenꞌes ka fu aa anoꞌone n na kati fu tiraan saria?
Nyoꞌog nweꞌeb la yela
13 Kelisimi! Yanam bane yet ye, “Zina bee beog ti na keŋ teŋ kaŋa n di yuum anina ka tolum n nye nyood la.”
14 Hale ya ziꞌ ya nyovur n saa na a siꞌem beogo. Ya wenne kpaandug n nyeti yina ka li niŋ biꞌela ka li leb la.
15 Li suꞌum ka ya yiti yel ye, “Winaꞌam yaꞌa bood, ti na voe ka tum neꞌeŋa ne neꞌeŋa.”
16 Amaa ya paꞌane ya meŋ ka mor nyeesim. Titaꞌalim bama wusa ane bunbeꞌed.
17 On mekama miꞌ line a tuumsuma, ka pu niŋi lii, o tum tuumbeꞌed.