10
Konbkem siiliŋ la
1 Ka Yesu ye, “Asida ka m yeti ya ye, one pu dol peꞌes zaꞌanoorin la n kpenꞌ buluugin laa ka du zaŋguomi kpenꞌ ane one faand bee naꞌayiig.
2 Amaa one dol zaꞌanoorin la kpenꞌ ane peꞌes la konbkem.
3 Ka one gur zaꞌanoor la na yoꞌogi tis o. Ka o peꞌes la miꞌ o kukor la zug, o buoni ba yuda ka gaad tuon ka ba dol o.
4 Ka on more o peꞌes wusa yi na la, o gaadi ba tuon ka ba dol o, bozugo ba miꞌ o kukor.
5 Ba ku dol saana, ba na zo ka bas o, bozugo ba ziꞌ o kukore.”
6 Siiliŋ kaŋa ka Yesu zaŋi siilimi ba, amaa ba pu gbanꞌe o pianꞌad la gbin ne.
Yesu n a konbkem suŋ la yela
7 Ka Yesu yeli ba yaꞌas ye, “Asida ka m yeti ya ye, mane aa peꞌes la zaꞌanoor.
8 Ban wusa deŋi m tuon ane bane faand bee naꞌayiis, ka peꞌes la pu kelisidi baa.
9 Mane a zaꞌanoor la. Ka one dol zaꞌanoor kan la kpenꞌ na nye faangir. O na kpenꞌ ka yi na n nye diib n di.
10 Naꞌayiig la kenne ye o zu ka ku, ka saꞌam maꞌaa, ka mam kena ye ba nye nyovur line kaꞌa naare.”
11 “Mane a konbkem suŋ la. Konbkem suŋ la pesigi o nyovur peꞌes la yela.
12 One kaꞌ konbkem meŋire, ka gur peꞌes bane kaꞌ o meŋ dine ka li ane ligidi yela ka o guri ba la, o yaꞌa nye ka kunduŋ ken na ka o bas peꞌes la, ka zo. Ka kunduŋ la gbanꞌe ba ka widigi ba.
13 Ban kaꞌ o meŋ peꞌese ka ane ligidi yela maꞌaa la zug, ka o zo.
14 “Mane lee a konbkem suŋ la, ka miꞌ m meŋ konbid ka ba me miꞌ man
15 wenne m Baꞌ Winaꞌam miꞌi man ka man me miꞌ o siꞌem la. Mane pesigi m nyovure tisi m peꞌes la.
16 M mor peꞌesieba bane kaꞌ buluug nwa nii. Li nar ka m me more ba na ka ba kelisi m kukor, ka laꞌase ba wusa gumm ka mor konbkem yinni.
17 Ka man pesigi m nyovur la zug ka m Baꞌ la noŋi m. Ka m na lem diꞌe li yaꞌas.
18 Soꞌ ku nyaŋe zaŋi m nyovure. M meŋ lee pesigi m nyovur. M mor paŋ ye m pesigi m nyovure kpi, ka lem mor paŋ ye m lem diꞌe li yaꞌas. M Baꞌ tisi m noziꞌel kaŋa.”
19 Ka pianꞌ bama zug ke ka bakir yaꞌan daa be Jew dim la soogin.
20 Ka ba titaꞌam sa yel ye, “Bo ka ya kelisid o, o ane geeŋ ka kikirig dol o.”
21 Ka sieba yel ye, “Li kaꞌa on ka kikirig dol o pianꞌade nwaa. Kikirig na nyaŋe ke ka one zuꞌom nyeta?”
Jew dim n zanꞌas Yesu la yela
22 Ka diꞌema saŋa line ka ba tiend Winaꞌam puꞌusum yir pier Jerusalem teŋin la paae, ka li da a sapal.
23 Ka Yesu ken Winaꞌam puꞌusum yir zinꞌikan ka ba buon Solomon zaꞌambeŋ la.
24 Ka Jew dim laꞌase gilig o ka yel o ye, “Bo ka fu ke ka ti biꞌesid hale ne anwa? Fu yaꞌa ane Kiristo la, one ka Winaꞌam gaŋ la, fun yelimi ti nyain nyain.”
25 Ka Yesu lebisi ba ye, “M daa yeli ya, ka ya pu niŋi m yaddaa. Tuumban ka m tum m Baꞌ yuꞌurin la paꞌal mam a siꞌem.
26 Amaa yaname kaꞌ m peꞌes la zug ka ya pu niŋi m yaddaa.
27 M peꞌes wumi m kukor, ka m miꞌ ba, ka ba doli m,
28 ka m tisidi ba nyovur line kaꞌ benne, ka ba kulum ku bodige, ka soꞌ kaeꞌ na nyaŋe faann ba m nuꞌugine.
29 M Baꞌ one noki ba tisi m la mor paŋ hale gaad siꞌel wusa, ka soꞌ kaeꞌ na nyaŋe faann ba m Baꞌ la nuꞌugine.
30 Mam ne m Baꞌ la ane yinni.”
31 Ka Jew dim lem ye ba lob o ne kuga n ku.
32 Ka Yesu yeli ba ye, “M paꞌali ya tuumsuma bedego line yi m Baꞌ la ni, ka tuumsuŋban yela ka ya lobidi m ne kugaa?”
33 Ka Jew dim la lebis o ye, “Li kaꞌane tuumsuma yelaa amaa Winaꞌam yuꞌusaꞌuŋ la yela, bozugo fu ane ninsaal amaa fu ye fu ane Winaꞌam.”
34 Ka o lebisi ba ye, “Li sobi ya wada ni ye, ‘Mam, Winaꞌam yel ye, ya ane Winaa.’
35 Ti miꞌ ye Winaꞌam gbauŋ la a sida saŋa wusa, ka bane ka o zaŋ o labaar la tis la, o buoni ba ye ba ane wina.
36 Ka laꞌam ne wala ka ya yet ye, mam kane ka Winaꞌam gaŋ la ka tumi m dunia nwa ni la saꞌamid Winaꞌam yuꞌur, mam yet ye, mam a Winaꞌam Biig la zug.
37 M yaꞌa pu tumi m Baꞌ tuuma, da niŋine m yadda.
38 Amaa m yaꞌa tumi li hale ka ya pu niŋi m yadda, siakimi m tuuma la, ka ya na nye ka baŋ ye, m Baꞌ la a yinni ne mam ka m me a yinni ne o.”
39 Ka ba lem zigid ye ba gbanꞌ o, ka o toomi ba ni.
40 Ka o toomi anina n keŋ loꞌoŋ Joodan moꞌar n paae zinꞌikan ka Joon da deŋim suud nidib kuꞌom la n kpelimi ani.
41 Ka nidib bedego kenn o saꞌan na ka yel ye, “Joon pu tum tuumnyalima, ka lin wusa ka o da pianꞌ dau kaŋa yela la ane sida.”
42 Ka nidib bedego niŋ o yadda anina.