9
Yesu n tiꞌeb zunzoŋ la yela
1 Ka on ken la, o nye dau ka o zuꞌomi o biilimin sa.
2 Ka o nyaꞌandolib buꞌos o ye, “Paꞌana, dau kaŋa tum tuumbeꞌed bee o baꞌ ne o ma n tumi li, ka duꞌa o ka o a zunzoŋa?”
3 Ka Yesu lebis ye, “O zuꞌoŋ la kaꞌane ye o tumne beꞌede bee o baꞌ ne o ma tum. Amaa li a ye, Winaꞌam paꞌali o paŋ tuuma zunzoŋ la ni.
4 Lin nan a nintaŋ la, asee ti tum one tum man na la tuuma. Yuꞌuŋ na sob ka soꞌ ku nyaŋe tum yaꞌase.
5 Mam nan be dunia ni la, mane a dunia neesim.”
6 Ka Yesu n yel neꞌeŋa la o tubis nintoond n bu tan n bulig zuꞌom la nini,
7 ka yel o ye, “Kem Siloam bulugin n pie fu nini.” (Siloam gbin ane ye, Atum soꞌ.) Ka o keŋ pie o nini ka leb na nyet.
8 O kpiꞌes ne bane deŋim miꞌ o ka o a sos la yel ye, “Kaꞌa dau kaŋa daa yiti sosid laa?”
9 Ka sieba yel ye, “Li ane on la.”
Ka sieba me yel ye, “Ayei, li wen o ne ka li kaꞌa one.”
Ka o meŋ yel ye, “Mane la.”
10 Ka ba buꞌos o ye, “Li niŋ wala ka fu yuꞌun nyeta?”
11 Ka o lebisi ba ye, “Dau kane ka ba buon Yesu la bu tan n buligi m nini ka yeli m ye m kem Siloam bulugin pie. Ka m keŋ pie ka yuꞌun nyet.”
12 Ka ba buꞌos ye, “O be yaani?”
Ka o lebis ye, “M ziꞌ.”
13 Ka ba dol one daa a zuꞌom la keŋ Farisee dim saꞌan.
14 Ka daakan ka Yesu bu tan ke ka zuꞌom la nyet la, daa ane Jew dim vuꞌusum daar.
15 Ka Farisee dim la buꞌos o yaꞌas ye, “Li niŋ wala ka fu nyeta?” Ka o lebisi ba ye, “O bu ne tan n buligi m nini, ka m pie ka nyet.”
16 Ka Farisee dim sieba yel ye, “Dau kaŋa nwa pu dol vuꞌusum daar la wadaa, linzug ka ti baŋ ye o pu yi Winaꞌam saꞌan naa.”
Ka sieba ye, “Dau kane a tuumbeꞌed sob na niŋ wala tum tuumnyalim bama?” Ka bakir kenn Farisee dim la ni.
17 Ka ba lem buꞌos dau la ye, “Fu na yeli o yela ye bo, on ke ka fu nyet la?”
Ka o lebisi ba ye, “O ane Winaꞌam nodiꞌes.”
18 Ka Jew dim la pu siak ye o daa zuꞌom ne ka yuꞌun nyeta, asee ba buol o baꞌ ne o ma n buꞌos.
19 Ka ba buꞌosi ba ye, “Ya biig la nwa? On ka ya ye ya duꞌa o ka o a zuꞌom laa? Ka li niŋ wala ka o yuꞌun nyeta?”
20 Ka ba lebis ye, “Ti miꞌ ye o ane ti biig, ka lem miꞌ ye, ti duꞌa o ka o a zuꞌom,
21 amaa lin niŋ siꞌem ka o nyet la, ti ku baŋi, ka ti me lem ziꞌ one ke ka o nyeta. Buꞌosimi ne o, ka o ane dau, o lem kaꞌa biiga. O meŋ na pianꞌ.”
22 Ban zot Jew dim kpeenmnam dabiem la zug, ke ka ba yel ala. Jew dim daa pun deŋim gbanꞌe ye soꞌ yaꞌa siak ye Yesu ane Kiristo la, ba na kad o ba laꞌasug doogin la.
23 Linzug, ka o baꞌ ne o ma la yeli ba ye, “Buꞌosimi ne o, ka o kaꞌa biiga.”
24 Ka ba buol dau one daa a zuꞌom la noora ayi daan n yel o ye, “Pianꞌam Winaꞌam yuꞌur fu laafe nyeeb la yela. Ti miꞌ ye dau kaŋa ane tuumbeꞌed sob.”
25 Ka o lebis ye, “O yaꞌa ane tuumbeꞌed sob bee o kaꞌa tuumbeꞌed soba m ziꞌ. Mam miꞌ siꞌel ane ye, m daa ane zuꞌom ka yuꞌun nyet.”
26 Ka ba buꞌos o ye, “O niŋ uf bo? O niŋ wala laki fu nini?”
27 Ka o lebisi ba ye, “M pun deŋim yeli ya ka ya pu bood ye ya kelise, ka bo ka ya bood ye ya wum yaꞌase? Ya me bood ye ya liebi o nyaꞌandoliba?”
28 Ka ba tuꞌud o ye, “Fune aa o nyaꞌandol, ka tinam ane Moses nyaꞌandolib.
29 Ti miꞌ ye Winaꞌam da pianꞌ tisne Moses, amaa dau kaŋa nwa, ti ziꞌ on yi zinꞌisiꞌa naa.”
30 Ka dau la yel ye, “Nwa ane lidigir. Ya ziꞌ on yi siꞌel naa, ka laꞌam ne wala o lakim nini ka m nyet.
31 Ti miꞌ ye, Winaꞌam ku kelis one a tuumbeꞌed sob sosugo, amaa ka soꞌ yaꞌa puꞌusid Winaꞌam ka niŋidi o boodim, o na wumi o sosug.
32 Dunia pinꞌilugin sa soꞌ nan ziꞌ wum ye ba ke ka on ka ba duꞌa o ka o a zuꞌom nini nyeta.
33 Dinzugo dau kaŋa yaꞌa pu yiin Winaꞌam saꞌan naa, o ku nyaŋe niŋin siꞌe siꞌel la.”
34 Ka ba lebis o ye, “Ba duꞌa uf ne tuumbeꞌedin, ka fu lee bood ye fu paꞌali tii?” Ka ba kad o yiis.
35 Ka Yesu n wum ye ba kad dau la yiis la, ka nye o la, o buꞌos o ye, “Fu niŋ Ninsaal Biig la yaddaa?”
36 Ka o lebis ye, “M Zugsoba, Ninsaal Biig la a anoꞌon ka m na niŋ o yadda?”
37 Yesu yel o ye, “Fu nye o ka li ane one pianꞌad ne fu la.”
38 Ka dau la yel ye, “M Zugsob, m niŋ uf yadda.” Ka naꞌas Yesu.
39 Yesu yel ye, “Saria kadib yela ka m keenn dunia ni, ka zunzoos na nyet, ka bane nyet la na lieb zunzoos.”
40 Ka Farisee dim sieba bane kpiꞌe ne o la n wum neꞌeŋa la, ba buꞌos o ye, “Din la tinam me ane zunzoosee?”
41 Ka Yesu lebisi ba ye, “Ya yaꞌa aan zunzoos ya ku moren taale. Ka yaname sadigim yel ye ya nyet la, ya taal kpelim be.”