☰ LUUK 3
3
Joon one suud nidib Winaꞌam kuꞌom labasuŋ moolug la yela
(Mateo 3.1-12; Maak 1.1-8; Joon 1.19-28)
1 Ka naꞌab Tiberius daa dit Room naꞌam la yuma piiga ne anu saŋa la, Pontus Pilate daa ane Juuda gomena. Ka Herod a Galilee naꞌab. Ka o baꞌabiig Filip, me a Ituria ne Trakonitis naꞌab. Ka Lisanius a Abilene naꞌab. 2 Ka Annas ne Kaifas a Winaꞌam maalmaan kpeenmnam. Saŋkan la ka Joon, Zekaria biig la, daa be moogin, ka diꞌe Winaꞌam pianꞌad, 3 n keŋ teens bane be Joodan moꞌar ben wusa, moon ye, “Tiakimi ne ya sunya ka diꞌe Winaꞌam kuꞌom suub, ka Winaꞌam tisi ya suguru ka yiisi ya tuumbeꞌed n bas.” 4 Ka Winaꞌam nodiꞌes Azaya da sob gbauŋin ye,
“Soꞌ moon moogin n tansid ye,
‘Maalimi suer suꞌuŋa n tiꞌebi gur Zugsob la.
Keli ka suer a suꞌum n tis o,
5 ka peꞌel bombuꞌa la wusa,
ka birig zueya wusa,
ka maal suegoluŋ ka li due sapi
ka pinꞌ suer bombuꞌa ka li niŋ suꞌuŋa.
6 Ka ninsaalib wusa na nye Winaꞌam Faangir.’ ”
7 Ka nidib bedego laꞌas n kenne o saꞌan na ye o suu ba ne kuꞌom. Ka o yeli ba ye, “Yanam bane wenne wiigi nwa, anoꞌon yeli ya ye ya zom yi Winaꞌam supeen line kenna la ni? 8 Tumi tuuma bane paꞌan ye ya tiake ya sunya, ka da tenꞌesid n tisi ya meŋ ye, Abraham ane ya yaaba. Ka m yeti ya ye, Winaꞌam tunꞌe zaŋ kuga nwa maal yaas n tis Abraham. 9 Nannanna lieŋ be tiis gbina ni, ka tikan wusa n pu wel welsuma la, ba na nwaꞌe li n lob bugumin.”
10 Ka nidib la bedego buꞌos o ye, “Ti na niŋ wala?”
11 Ka Joon lebisi ba ye, “One mor fuud ayi, on pudugum tis one kaeꞌ la. Ka one mor diib on me niŋim ala.”
12 Ka lampodiꞌesidib me kena ye o suu ba ne Winaꞌam kuꞌom, ka buꞌos o ye, “Paꞌana, ti na niŋ wala?”
13 Ka o lebisi ba ye, “Da diꞌe ligidi dine gaad ban yeli ya siꞌem la.”
14 Ka sogianam me buꞌos o ye, “Ka tinama, ti na niŋ wala?”
Ka o yeli ba ye, “Da diꞌe soꞌ bun ne paŋa, bee gbanꞌe nidib zaalim zaalim, ka diꞌe siꞌela. Keli ka ya yood la siakiya.”
15 Ka nidib bane da gur Kiristo one a Faangid ken na la, pinꞌile tenꞌesidi ba sunya ni ye Joon paꞌati ane Kiristo la. 16 Ka Joon lebisi ba ye, “M suudi ya ne Winaꞌam kuꞌom, amaa soꞌ be mor paŋ gat man, one kenna ka m pu nar ye m pidig o taꞌadaa. O na suu ya ne Winaꞌam Siig Suŋ ne bugum. 17 O zanl nwam kane yelegid ki o nuꞌusin, ka na yeleg o ki line be zieŋin la n vaae su buorin ka nyuꞌe udug ne bugum line pu kpiigida.” 18 Pianꞌad bedego nwa ka Joon da zaŋ n saꞌal nidib on da moon Winaꞌam labasuŋ la.
19 Amaa Joon pianꞌ zerig naꞌab Herod, on dii o meŋ pitu poꞌa one yuꞌur buon Herodias ka tum tuumbeꞌed sieba bedego la zug. 20 Herod n daa gbanꞌe Joon n kpenꞌes sarega ni la, daa maligim paꞌas o tuumbeꞌed la.
Yesu kuꞌom suub la yela
(Mateo 3.13-17; Maak 1.9-11)
21 Joon n da su nidib wusa ne kuꞌom la, o daa su Yesu men. Ka Yesu n daa puꞌusid Winaꞌam la, ka arazana yoꞌog, 22 ka Winaꞌam Siig Suŋ la sig o zugin na, ka ba nye o ka o wenne dawan ne. Ka kukor yi arazana na ye, “Fune a man meŋ bikan ka m noŋ hale, ka m sunf malis ne uf.”
Yesu yaanam la yela
(Mateo 1.1-17)
23 Ka Yesu n da pinꞌil o tuuma la, o da ane yuma piistanꞌ, ka nidib da tenꞌes ye o ane Josef biig. Josef saam da ane Heli, 24 ka Heli saam da ane Matat, ka Matat saam da ane Levi, ka Levi saam da ane Melki, ka Melki saam da ane Janai, ka Janai saam da ane Josef, 25 ka Josef saam da ane Matatias, ka Matatias saam da ane Amos, ka Amos saam da ane Nahum, ka Nahum saam da ane Esli, ka Esli saam da ane Nagai, 26 ka Nagai saam da ane Maat, ka Maat saam da ane Matatias, ka Matatias saam da ane Semein, ka Semein saam da ane Josek, ka Josek saam da ane Joda, 27 ka Joda saam da ane Joanan, ka Joanan saam da ane Resa, ka Resa saam da ane Zerubabel.
Ka Zerubabel saam da ane Sealtiel, ka Sealtiel saam da ane Neri, 28 ka Neri saam da ane Melki, ka Melki saam da ane Addi, ka Addi saam da ane Kosam, ka Kosam saam da ane Elmadam, ka Elmadam saam da ane Er, 29 ka Er saam da ane Josua, ka Josua saam da ane Elieza, ka Elieza saam da ane Jorim, ka Jorim saam da ane Matat, ka Matat saam da ane Levi, 30 ka Levi saam da ane Simeon, ka Simeon saam da ane Juda, ka Juda saam da ane Josef, ka Josef saam da ane Jonam, ka Jonam saam da ane Eliakim, 31 ka Eliakim saam da ane Melea, ka Melea saam da ane Mena, ka Mena saam da ane Matata, ka Matata saam da ane Natan, ka Natan saam da ane David.
32 Ka David saam da ane Jese, ka Jese saam da ane Obed, ka Obed saam da ane Boaz, ka Boaz saam da ane Sala, ka Sala saam da ane Nahson, 33 ka Nahson saam da ane Aminadab, ka Aminadab saam da ane Admin, ka Admin saam da ane Arni, ka Arni saam da ane Hezron, ka Hezron saam da ane Perez, ka Perez saam da ane Juda, 34 ka Juda saam da ane Jakob, ka Jakob saam da ane Isaak, ka Isaak saam da ane Abraham.
Ka Abraham saam da ane Terah, ka Terah saam da ane Nahor, 35 ka Nahor saam da ane Serug, ka Serug saam da ane Reu, ka Reu saam da ane Peleg, ka Peleg saam da ane Eber, ka Eber saam da ane Sela, 36 ka Sela saam da ane Keinan, ka Keinan saam da ane Arfaksad, ka Arfaksad saam da ane Sem, ka Sem saam da ane Noa, ka Noa saam da ane Lamek, 37 ka Lamek saam da ane Metusela, ka Metusela saam da ane Enok, ka Enok saam da ane Jared, ka Jared saam da ane Mahalaleel, ka Mahalaleel saam da ane Keinan, 38 ka Keinan saam da ane Enos, ka Enos saam da ane Set, ka Set saam da ane Adam, ka Adam saam da ane Winaꞌam.
☰