14
Ban ied suer ye ba gbanꞌe Yesu la yela
(Mateo 26.1-5; Luuk 22.1-2; Joon 11.45-53)
1 Li daa kpelim daba ayi ne kuꞌum malek gaadug maluŋ tienr dabisir la, ne bodobodo line ka ba pu niŋ dabin la maluŋ dabisir. Ka Winaꞌam maalmaan kpeenmnam ne gbauŋmiꞌidib ied sueya ye ba suaꞌ gbanꞌe Yesu n kuu o.
2 Ka ba yel ye, “Kaꞌa maluŋ tienr saŋa laa, ka nidib na ti zabid o zug.”
Poꞌa soꞌ kpaꞌe kpaam niŋ Yesu zug la yela
(Mateo 26.6-13; Joon 12.1-8)
3 Yesu daa be Simon one a kukom la yin n be Betani teŋin. Ban daa be anina dit la, ka poꞌa kena n mor alabasta kugir kolibir ka li peꞌel ne naad kpasoondim, ka li ligidi zuꞌe bedego. Ka o nwaꞌe kolibir la ka kpaꞌae kpaam la niŋ Yesu zugin.
4 Ka ninsieba bane be anina la sunf due. Ka ba yel taaba ye, “Bo ka poꞌa la saꞌam kpasoondim la wala?
5 Ba naan nyaŋen kuosini li, ka li ligidi gaadin tumtum yuum mum yood, ka nokin ligidi la tisin noŋ dim.” Ka ba zerig poꞌa la hale.
6 Ka Yesu yeli ba ye, “Keli no baanlim. Bo ka ya daamid o? O maali bunsuŋ tis man.
7 Noŋ dim bee ya saꞌan saŋa wusa. Dinzug saŋkan wusa ka ya bood ya tunꞌe suŋi ba, bozugo mam ku be ya saꞌan saŋa wusaa.
8 Ka o niŋ on tunꞌe siꞌel, one kpaꞌae kpasoondim niŋ m niŋgbina ni ye o deŋim tiꞌebi m, ban na ti mum man siꞌem.
9 Asida ka m yeti ya ye, dunia nwa zinꞌikan wusa ka ba na ti mool labasuŋ la, ba me na yel poꞌa la niŋ siꞌel la, ka li a o tienr yela.”
Judas n gbanꞌe ye o na zam Yesu la yela
(Mateo 26.14-16; Luuk 22.3-6)
10 Ka Judas Iskariot, one a Yesu nyaꞌandolib piinayi la nid yinni, keŋ Winaꞌam maalmaan kpeenmnam saꞌan ye o zam Yesu.
11 Ban daa wum on yel siꞌela ka ba sunf maꞌae. Ka ba siak ye ba na tis o ligidi. Ka Judas yuꞌun ied suekan ka o na zam o.
Yesu n di maluŋ diib ne o nyaꞌandolib la yela
(Mateo 26.17-25; Luuk 22.7-14, 21-23; Joon 13.21-30; 1 Kor. 11.23-26)
12 Li daa kpelim daba ayi ne kuꞌum malek gaadug maluŋ tienr dabisir ne bodobodo line ka ba pu niŋ dabin la maluŋ pinꞌilug daar. Ka li a ba malima ye soꞌ wusa ku peꞌog. Ka Yesu nyaꞌandolib la buꞌos o ye, “Fu bood ye ti keŋ yaa ni n tiꞌeb, ka fu di dabisir nwa diide?”
13 Ka Yesu tum o nyaꞌandolib ayi ka yeli ba ye, “Kem teŋ poogin la, ka ya na tuꞌos dau ka o zeed yuur ne kuꞌom, doli no.
14 Ka keŋ kpenꞌ yikan ka o kpenꞌed la, ka yel yidaan la ye, ‘Paꞌan la ye, saam doog la be yaani ka mam ne m nyaꞌandolib na di maluŋ la dabisir diibo?’
15 O na paꞌali ya dotitaꞌar ka ba me sunꞌul li tiraan zug. Ka siꞌel mekama be anina. Tiꞌebimi anina guri ti.”
16 Ka o nyaꞌandolib la yi keŋ teŋ poogin la n nye ka siꞌel mekama a wuu Yesu yeli ba siꞌem la. Ka ba tiꞌeb maluŋ la ani.
17 Zaami maꞌae la, ka Yesu ne o nyaꞌandolib piinayi la kena.
18 Ka bane zinꞌi n dit la, ka Yesu yeli ba ye, “Asida ka m yeti ya ye ya nid yinni one dit ne man kpela na zam man.”
19 Ka ba sunya saꞌam. Ka ba buꞌosid o yinni yinni ye, “Li ane mam?”
20 Ka o lebis ye, “Li ane ya nidib piinayi la ni yinni, one nuꞌugi tum siaꞌal man nuꞌug laan la.
21 Ninsaal Biig na kpi wuu lin da sob Winaꞌam gbauŋin siꞌem la. Amaa yel toog be one zam Ninsaal Biig la zugin. Dinzug li naan a suꞌum ba yaꞌa pu duꞌan dau kaŋaa.”
Zugsob diib la yela
(Mateo 26.26-30; Luuk 22.14-20; 1 Kor. 11.23-25)
22 Ka ban daa dit la, ka Yesu nok bodobodo ka puꞌus Winaꞌam bareka ka gbenꞌes n tis o nyaꞌandolib la, ka yeli ba ye, “Diꞌem nwa di, ka li ane m meŋ niŋgbiŋ.”
23 Ka nok nwam, ka puꞌus Winaꞌam bareka, ka tisi ba, ka ba wusa nuu li.
24 Ka o yeli ba ye, “Nwa ane m ziim kane a nonaar ziim line na yi nidib bedego zug.
25 Asida ka m yeti ya ye, m ku lem nu daam nwa yaꞌase, asee daar kan ka li na a bun paal Winaꞌam soꞌolim ni ka m na lem nuu li.”
26 Ka ba yuum yuuma n zunꞌod Winaꞌam, ka yi keŋ Olives zuerin.
Yesu deŋim pianꞌa Piita kiꞌisug la yela
(Mateo 26.31-35; Luuk 22.31-34; Joon 13.36-38)
27 Ka Yesu yeli ba ye, “Ya wusa na zo ka bas m. Ka li sob Winaꞌam gbauŋin ye,
‘Winaꞌam na ku konbkem la, ka konbid la widig.’
28 Ka m yaꞌa ti vuꞌug kumin, m na deŋi ya tuon keŋ Galilee.”
29 Ka Piita yel o ye, “Hale baa ba wusa yaꞌa zo ka bas uf, man ku bas fuu.”
30 Ka Yesu lebis ye, “Asida ka m yet uf ye, yuꞌuŋ kaŋa, fu na kiꞌis man noor atanꞌ ka noraug naan kaas noor ayi.”
31 Ka Piita lebis o ye, “Li yaꞌa pun ane ye m kpi ne fo, m ku maligim kiꞌis fo.” Ka ba wusa me yel ala.
Yesu n sos Winaꞌam Gesemane zinꞌigin la yela
(Mateo 26.36-46; Luuk 22.39-46)
32 Ka ba daa paae zinꞌi siꞌa ka li yuꞌur buon Gesemane. Ka Yesu yel o nyaꞌandolib la ye, “Zinꞌinimi kpeꞌ ka m sos Winaꞌam.”
33 Ka o dol Piita ne Jemes ne Joon n keŋ. Ka o sunf saꞌam bedego.
34 Ka o yeli ba ye, “M sunf saꞌam hale, ka li wenne m kpi ne. Din la kpelimi kpeꞌ ka guꞌus.”
35 Ka o keŋ tuon biꞌela, ka igin teŋin sos Winaꞌam ye, “Yel kaŋa yaꞌa na nyaŋen gaad ka bas m, fun ke ka li gaad.”
36 Ka yel ye, “M Baꞌ siꞌel wusa ane naꞌana ne fun. Yiisim namisug kaŋa n bas ka kee man. Amaa li kaꞌa ne man boodim, dinzug kel ka fun boodim gullim niŋ.”
37 Ka o leb ti nye ka nyaꞌandolib atanꞌ la gbisid, ka o buꞌos Piita ye, “Simon, fu gbisidne? Fu ku nyaŋe nei ka li yuug biꞌela?”
38 Ka yeli ba ye “Nei ka sos Winaꞌam, ka makir da nyaŋe yaa. Siig la boodim be, amaa niŋgbiŋ la kaꞌa paŋa.”
39 Ka o len leb ye o sos Winaꞌam, ka yel wuu on paꞌa pianꞌa siꞌem la.
40 Ka o len leb na nye ka o nyaꞌandolib la gbis, ka gbenn um more ba hale. Ka ba ziꞌ ban na lebis o siꞌel la.
41 Ka o keŋ ka len leb noor atanꞌ daan na, ka buꞌosi ba ye, “Ya kpelim vuꞌusid ka gbisidaa? Li saŋa paae na. Ba zam Ninsaal Biig la ka zaŋ o niŋ tuumbeꞌed dim nuꞌusin.
42 Duomi ka ti keŋ. Gosimi, one zam man la nwa.”
(Mateo 26.47-56; Luuk 22.47-53; Joon 18.2-11)
43 On daa nam kpelim pianꞌad la, ka Judas one a o nyaꞌandolib piinayi la ni yinni paae na. Ka nidib bedego dol o mor suꞌuraad ne balaya. Ban ka Winaꞌam maalmaan kpeenmnam ne gbauŋmiꞌidib ne kpeenmnam tum la.
44 Ka one na zam o la paꞌa pun paꞌali ba ye, “On ka m muak o noor la, one la. Gbanꞌam o ka mor o n keŋ baanlim.”
Yesu gbanꞌar la yela
(Mateo 26.47-56; Luuk 22.47-53; Joon 18.3-12)
45 Ka Judas paae na ka kpen keŋ Yesu saꞌan n yel o ye, “Paꞌana” ka muak o noor
46 Ka ba gbanꞌ o ne paŋ.
47 Ka nimbane daa ziꞌe kpiꞌe o la yinni fue o suꞌuraug kiaꞌ Winaꞌam maalmaan kpeenm tumtum yinni tobir fiꞌig.
48 Ka Yesu buꞌosi ba ye, “Ya ken ne suꞌuraad ne balaya ye ya gbanꞌ man wen wuu one a naꞌayiiga?
49 Ka daar wusa m daa be ne ya, Winaꞌam puꞌusum yin n paꞌani ya, ka ya daa pu gbanꞌe ma. Lin da sob Winaꞌam gbauŋin siꞌem la, na niŋ ameŋa.”
50 Ka o nyaꞌandolib la wusa zo ka bas o.
51 Ka dasaŋ soꞌ ye fuug yinni maꞌaa n dol o. Ka ba daa ye ba gbanꞌ o.
52 Ka o bas o fuug la, ka zo biel.
Yesu n be maalmaan kpeenmnam tuon la yela
(Mateo 26.57-68; Luuk 22.54-55, 63-71; Joon 18.12-14, 19-24)
53 Ka ba mor Yesu keŋ Winaꞌam maalmaan kpeenm la yin. Ka Winaꞌam maalmaan kpeenmnam ne kpeenmnam ne gbauŋmiꞌidib zanꞌasa laꞌas na.
54 Ka Piita be nyaꞌaŋ dol n ti paae Winaꞌam maalmaan kpeenm la yin ka kpenꞌ zakin, ka zinꞌi ne tumtumnib bane gur Yesu la n uosid bugum.
55 Ka maalmaan kpeenmnam ne nimbane yiti gbanꞌed noor Jew dim yela la wusa ied nidib bane na maꞌ ye Yesu tum tuumbeꞌed, ka nye suer kuu o, amaa ba pu nye o tuumbeꞌede.
56 Ka ziri kasetib bedego maꞌ tis Yesu. Ka ban maꞌ siꞌel la pu dol taabaa.
57 Ka ninsieba due n maꞌ ye,
58 “Ti wum ka o ye, ‘M na nwaꞌ Winaꞌam puꞌusum yikan ka ninsaal meꞌ la bas, ka mee li daba atanꞌ poogin. Ka li ku a ninsaal meebo.’ ”
59 Hale ban meŋ yel siꞌel la pu dol taabaa.
60 Ka Winaꞌam maalmaan kpeenm due ziꞌen ba tuon ka buꞌos Yesu ye, “Fu pu mor lebisug na yel bane yeti fu yela siꞌem laa?”
61 Ka o sin ka pu lebis siꞌela.
Ka kpeenm la lem buꞌos o ye, “Fune a Kiristo, Winaꞌam one ka ba duꞌosid o yuꞌur la Biig laa?”
62 Ka Yesu lebis ye, “Eenn mane la.” Ka ye, “Ya na nye Ninsaal Biig la ka o zinꞌi Winaꞌam one soꞌe paŋ la datiuŋ, ka yi saŋgbana zug na.”
63 Ka kpeenm la aaenn o meŋ fuug ka yel ye, “Ti lem bood kasetib bo yaꞌase?
64 Ya wum on tuꞌ Winaꞌam siꞌem laa.” Ka buꞌosi ba ye, “Ya gbanꞌe li wala?”
Ka ba wusa gbanꞌe ye o nar ne kuꞌum.
65 Ka ba sieba tubis nintoond n mad o ka ligil o nindaa ka nweꞌ o ka yel o ye, “Yelim one nweꞌ uf la.” Ka tumtumnib bane gur o la diꞌe o, ka buꞌ o.
Piita n kiꞌis ye o miꞌ Yesu la yela
(Mateo 26.69-75; Luuk 22.56-62; Joon 18.15-18, 25-27)
66 Piita daa nam be zakin ka Winaꞌam maalmaan kpeenm tumtum poꞌak kena
67 nye o ka o uosid bugum, ka gos o kii, ka yel o ye, “Fu me daa be ne Yesu one yi Nazaret na la.”
68 Ka Piita kiꞌis ye, “M ziꞌ o, ka me pu gbanꞌe fu pianꞌad la gbin ne.” Ka Piita yi ziꞌen zaꞌanoorin. Ka noraug kaas.
69 Ka bipuŋ la len nye o, ka yel bane ziꞌe ani la ye, “Dau kaŋa ane Yesu nid yinni.”
70 Ka Piita lem kiꞌis. Ka li pu yuuge, ka nimbane ziꞌe la yel Piita ye, “Sida fu ane ba nid yinni. Fu me yine Galilee na.”
71 Ka Piita yel ye, “M pone ye m ziꞌ dau kane ka ya pianꞌadi o yela nwaa.”
72 Yim, ka noraug lem kaas noor ayi daan. Ka Piita tienn Yesu daa yel o siꞌel la ye, “Fu na kiꞌis ye fu miꞌ man noor atanꞌ ka noraug naan kaas noor ayi.” Ka modigi guꞌuŋ, ka kaas.