Paul n sob gbauŋ siꞌa n tis
FILIPI DIM
la nwa
1
Mam Paul ne Timoti bane a Yesu Kiristo tumtumnib n sob gbauŋ kaŋa nwa. Ti sobid tisid Winaꞌam nidib bane a yinni ne Yesu Kiristo ka be Filipi teŋin laꞌam ne Winaꞌam nidib bane a tuongatib ne suŋidib la.
Ti Baꞌ Winaꞌam ne ti Zugsob Yesu Kiristo na tisi ya yelsum ne sumalisim.
Paul n sosid Winaꞌam la yela
M yaꞌa tenꞌesi ya yela m yiti puꞌus Winaꞌam bareka saŋa wusa. Ka m yaꞌa yiti sosid Winaꞌam tisidi ya wusa m sosidne ne sumalisim, tiname a tumtumnib ne taaba hale pinꞌilugin sa ti paae saŋa nwa la. M miꞌ hale ye one pinꞌil tuumsuŋo ya sunya ni la, na tum li naae Yesu Kiristo ken dabisir la.
Li a suꞌum ka m tenꞌesi ya wusa yela ala, mam more ya potenꞌer la zug. Dinzug m yaꞌa be ne sarega ni bee ti laꞌam paꞌan ne nidib ye labasuŋ la a sida ya na laꞌam diꞌed Winaꞌam popielim piini la ne man. Ka Winaꞌam baŋ ye m yaꞌam boodi ya wusa ne noŋilim line yi Yesu Kiristo ni na.
Ka m sosid Winaꞌam ye ya noŋilim na peꞌes hale ne miꞌilim ne baŋir ameŋa, 10 ye ya gaŋ line a suꞌum la ka a nyain ka dianꞌad kaeꞌ n gur Yesu Kiristo lebig na dabisire, 11 ka peꞌel ne popielim tuuma line yi Yesu Kiristo saꞌan na n tisid Winaꞌam yuꞌur zunꞌor ne naꞌasi.
Paul sarega ni beilim la yela
12 M baꞌabiise, m bood ye ya baŋ ye line niŋi m la, sid suŋ ka labasuŋ la ken tuon. 13 Li ke ka gomena yin sogianam wusa ne soꞌ mekama baŋ ye m sarega ni beilim la ane Kiristo yela, 14 ka baꞌabiis la titaꞌam sa mor kpiꞌeuŋ ne ti Zugsob la, m sarega beilim la zug, ka ba mor kpiꞌuŋo peꞌes hale ye ba pianꞌad Winaꞌam labaar la ka dabiem kaeꞌ.
15 Sieba moon Kiristo yela la ne fufum ne nennim ka sieba tum ne potenꞌesuŋ. 16 Ka potenꞌesuŋ dim la mooni li noŋirin ka baŋ ye Winaꞌam ziꞌeli man ye m guꞌe bane zanꞌas labasuŋ la. 17 Ka sieba pu moon Kiristo yela ne popielim, amaa ba mooni li ne nennim ka tenꞌesid ye m namisug la paꞌas, mam be sarega ni la. 18 Li pu pake. Line gaad li wusa ane Kiristo labaar la moolug hale li yaꞌa dolne potenꞌesuŋin bee potenꞌebeꞌedin ne, li kpelim malis man.
19 Ka m miꞌ ye li yit ne ya Winaꞌam puꞌusum ni na ne Yesu Kiristo Siig suŋir ni, ka line naam la na tisi m faangir. 20 Lin ka man bood hale ka mor tiꞌir li yela ane ye m ku di nyan ne ka lee mor sukpiꞌeuŋ ka Kiristo nye naꞌasi man ni nannanna, wuu on yiti nye siꞌem saŋa wusa la, m yaꞌa kpi bee m yaꞌa voe. 21 Ne mane, m yaꞌa voe ne, m voe ne Kiristo zug, ka m yaꞌa lem kpi ne, li ane nyood tis im. 22 Ka m yaꞌa voe ka na tum tuumsuma li a suꞌum. Amaa man bood baꞌ ne ma la zug, m ku nyaŋe gbanꞌe line ka m na gaŋi. 23 M bood ye m yi beilim kaŋa nwa ka bei ne Kiristo; ka line a suꞌum hale. 24 Amaa yanam yela, li a suꞌum ka m kpelim voe. 25 M mor sukpiꞌeuŋ ne man yel siꞌel la ka linzug ka m miꞌ ye m na kpelim be ne ya wusa, ka yaname niŋ Yesu Kiristo yadda la na tugus ne sumalisim. 26 Ka m yaꞌa ti be ne ya yaꞌas, ya na tunꞌe nweꞌ nyoꞌog ne m hale Yesu Kiristo ni.
27 Lin a siꞌem wusa keli ka ya beilim tual ne Kiristo labasuŋ la, ka m yaꞌa keenn ya saꞌan na bee m yaꞌa pu kenaa, m na wum ye ya gbanꞌe potenꞌer yinni kiŋ kiŋ, ka mood ne yadda yinni ne noor yinni ye labasuŋ la siakir na keŋ tuon. 28 Da zoti ya dataas dabiem baa biꞌelaa, ka ya sukpiꞌeuŋ na paꞌali ba ye ba na baꞌas beꞌed. Amaa ka lee paꞌal ye yanam na nye faangir line yi Winaꞌam saꞌan na la. 29 Ka li ane Winaꞌam tisid ka li kaꞌ ya yadda niŋir la maꞌanee, asee ya laꞌam namis Kiristo zug. 30 Ka ya namisug wenne yaname da nye man namisid siꞌem la, ka wumid ka ya nan kpelim bee li puugin nannanna la.