2
Kiristo meŋsier la yela
1 Ya beilim Kiristo yela yaꞌa sadigim kpeꞌeŋi ya, ka o noŋilim belisi ya, ka ya a bane laꞌam diꞌe Winaꞌam Siig Suŋ la, ka ya mor noŋilim ne nyoog ne taaba,
2 keli ka m sumalisim peꞌel, ne yaname mor potenꞌer yinni ne noŋilim yinni ne taaba ne yaꞌam yinni ne sunf yinni la.
3 Da niŋ siꞌel line yi nennimin ne titaꞌalimine, amaa lee siemi ya meŋ ka tenꞌesi ye ya taaba a suꞌum gati ya.
4 Keli ka ya wusa potenꞌer be ne taaba suŋir ni, ka kaꞌane ya meŋ din maꞌanee.
5 Potenꞌer kane nar ye ya mor ane Yesu Kiristo potenꞌer.
6 Winaꞌam a siꞌem la, ala men ka Kiristo ae,
amaa o pu tenꞌes ye on zemis ne Winaꞌam la, o na kpelim gbanꞌe kiŋ kiŋ nee,
7 ka lee siene o meŋ ka lieb wuu yamugi a siꞌem la,
ka ba duꞌa o ka o lieb ninsaal.
8 Ka on nie wuu ninsaali a siꞌem la,
o sie o meŋ ka siak kuꞌum wuu tuumbeꞌed sobne hale n kpi dapuudir zug.
9 Linzug ka Winaꞌam duꞌos o hale,
ka tis o yuꞌur line gat yuda wusa.
10 Ka Yesu yuꞌur zugo bun line wusa voe ka be zinꞌig wusa bee saazug bee teŋ zug bee teŋ teŋir,
na igini o tuon ka duꞌos o yuꞌur.
11 Ka soꞌ mekama na yel ye, Yesu Kiristo a Zugsob la,
ka li zunꞌe ti Baꞌ Winaꞌam la yuꞌur.
Tinam a suꞌum nyain dunia beꞌed nwa ni la yela
12 Dinzugo m zuanoŋa, mam daa bene ya ka ya siakidi m yelug siꞌem la, niŋimi ka li gati ala m yaꞌa kaꞌa ya saꞌane, ka tumi tuuma line yi ya faangir ni na la suꞌuŋa ne dabiem zotim.
13 Winaꞌam be ya ni n tum ye ya potenꞌer doli o boodim suŋ, ka ya sid na tumi li.
14 Niŋimi siꞌel mekama ka nyunyolug ne noŋgban nwaꞌar kaeꞌ,
15 ye ya a nyain ka taal kaꞌasige, ka a Winaꞌam biis bane kaꞌa gbadaa ka bei nimbeꞌednam ne ninyood soogin, ka nie nyain wuu neesim dunia nwa ni,
16 ka gbanꞌe nyovur pianꞌad la kiŋ kiŋ. Ya yaꞌa niŋi ala, m na nweꞌ nyoꞌog ne ya Yesu Kiristo ken na daar la, ye m zigib ne m tuuma la wusa pu niŋ zaalim.
17 Hale baa m yaꞌa zaŋi m nyovur tis ka li wenne maan ne, yanam yadda niŋir zug, li na malis man ka m na maal sumalisim ne ya wusa.
18 Ala mene li suꞌum ka ya sunya maꞌae ka ya mor sumalisim ne m.
Timoti ne Epafroditus la yela
19 M mor tiꞌir ti Zugsob Yesu Kiristo ni ye ti ku yuuge ka na tum Timoti ya saꞌan na ka o na tisi ya m labaar ka m sunf maꞌae.
20 On maꞌaa mor potenꞌer yinni ne mam ka on baꞌa sid be ne ya yela hale.
21 Soꞌ mekama zigid ne o meŋ yela ka kaꞌane Yesu Kiristo yelaa.
22 Ka ya miꞌ Timoti suꞌum a siꞌem ka miꞌ ye mam ne one tum labasuŋ tuuma wen wuu dau ne o biigi niŋid siꞌem la.
23 Dinzugo m mor potenꞌer ye m na tum o ya saꞌan toꞌoto, m yaꞌa baŋ m yela la na niŋ siꞌem.
24 Ka m meŋ me mor tiꞌir Zugsobin la ye li ku yuuge ka m me na kena.
25 M gbanꞌe li ka li nar ye m tumi m baꞌabiig, Epafroditus one a m tumtum tiraan ka lem a m sogia tiraan ka a one ka ya tum o ye o suŋi m la.
26 Ka o bood hale ye o nyee ya wusa; ka o sunf saꞌam yaname wumi o banꞌas yela la.
27 Sida, o daa benꞌedne ka nwaas kum. Ka Winaꞌam zo o nimbaanlig, ka li kaꞌane on maꞌaa nimbaanliga, amaa laꞌam ne mam men, ka m susaꞌaŋ da lem peꞌese.
28 Dinzug ka m mood ne nimmua hale ye m tum o ya saꞌan na, ka ya yaꞌa nye o, ya sunya na malis, ka m yaꞌam na maꞌae men.
29 Diꞌemin o ne sumalisim hale Zugsob la zug.
30 O daa nwaasne kum Kiristo tuuma yela, ka keesi o nyovur ye o suŋi man ne line ka ya meŋ pu nyaŋe suŋi m la. Naꞌasimi niŋkan buudi.