89
Kotalake hu maleꞌniya geꞌaeꞌmo ava gemae
1 O, Ala kava nene, huꞌna, nagaemo kahau huka neꞌapatana kavaꞌaleꞌe kavaꞌaleꞌefeꞌmo muki afinaꞌmo yokegeꞌmo huge huge huꞌna maiguve. Kagaemo gekamo alagi akame nehana kavakaeꞌmo hemenimo maiꞌnaya vayaꞌe aliꞌa apateme apateme visaya vayaꞌefeꞌmo navayafatiꞌmo hapa paiguve.
2 Nagaemo, kagaemo noꞌmo kigekana huka muki afinaꞌmo afaꞌa hanesiyafeꞌmo kahau huka apatege apatege huka maigane, huꞌna hapa paiꞌnove. Kagaemo gekamo alagi akame nehana kavakamoꞌmo kokuꞌnapiꞌmo noꞌmo faika ategekana huka maleꞌnane.
3 Gotiꞌa, Nagaemo mago vekamo lekana paiꞌna ateteꞌna agaeꞌeꞌmo kotalake geꞌnimo magokepiꞌmo hu maleꞌnove. Aliꞌyaꞌnimo neꞌaliya vekamo Nevinifeꞌmo,
4 kagae nofi vayaꞌmogi muki afinaꞌmo lokiya vaiꞌa maigae. Kini vekamo maiꞌneka yagaika neꞌapatana kava huꞌa kini vayaꞌmo maiꞌneꞌa yagaiꞌa apatete apatete hume hume uꞌa maigae, huꞌna ha paiꞌnove.
5 O, Ala kava nene, huꞌna, kokuꞌnapiꞌmo maiꞌnaya vayaꞌmogi nehana kavakamo ageteꞌapaeꞌmo hapau aiteꞌa ala kagikamo kamigae. Apaote vayaꞌmo aliꞌa anupa huꞌa maiꞌneꞌapaeꞌmo gekamo akame nehana kavakalefeꞌmo alagepa kavaꞌageꞌmo nehiye, huꞌa hugae.
6 Kokuꞌnapiꞌmo maiꞌnaya vayapatiꞌmo ina laꞌmo Ala kava nekana huno maiꞌniye. Lokiya vayapatiꞌmo mago vekamoꞌa Ala kava nekana huno oꞌmaiꞌniye.
7 Apaote vayaꞌmo aliꞌa anupa huꞌa maiꞌnayategamo Gotifekeꞌmo lusi kava huꞌa koli huꞌnae. Gotiꞌeꞌmo magokepi lokaeꞌa maiꞌnaya vayaꞌmogi agaefeꞌmo koli huꞌnae.
8 O Gotiyo, muki vayaꞌaiteꞌmo yagaika neꞌapatana Gotigae, huꞌna, Lokiyakaꞌe vekamo maiꞌnanageno ina laꞌmo kagaekana huno maiꞌniye. Gekamo alagi akame nehana kavakamoꞌmo faino ku aino nekate.
9 Solovala aniꞌmoꞌa aino holakau holakau nehigekaeꞌmo yagaika neꞌatane. Solovala aniꞌmoꞌa aepa faino aino holakau hugefe nehigekaeꞌmo afaꞌa hano huka nehanagenoꞌaeꞌmo afaꞌa nehane.
10 Kagaemo Isipi kotega maiꞌnaya vayaꞌai himamuꞌapimo ago alika hano huka ataleꞌnane. Lokiya kayatetiꞌmo kame vayakamo apamagiꞌnanageꞌa atagu faeꞌa uꞌeꞌa huꞌa maiꞌnae.
11 Kokuꞌnaꞌe ma mopaꞌeꞌmo kagaika yaꞌmo haneꞌniye. Ma mopaꞌe muki ma mopafiꞌmo maiꞌnaya vayaꞌe yaꞌeꞌmo alo huꞌnane.
12 Aluga aluga haopalegaꞌeꞌmo alo huꞌnane. Alopa avemo Tamo aveꞌmoꞌe Hemoni avemo alopa avemoꞌeꞌmo kagikalefeꞌmo anamogaga neꞌaiꞌae.
13 Himamukaletiꞌmo aliꞌyaꞌmo neꞌaline. Kayaꞌmo lokiya kayaꞌmo haneꞌniye. Lamaga kayatetiꞌmo aeka apakaseꞌnane.
14 Kini vekamo maiꞌneka fatago kavaꞌmo huka alagepa huka alika fako huka apateteka yagaika neꞌapatane. Kahau huka apatege lama geꞌageꞌmo huge huka maiꞌnane.
15 Afiteꞌapaeꞌmo apamogaga neꞌaiya gemo afiꞌa aeto huꞌnaya vayaꞌmo Goti aulagaleꞌmo alagepa huꞌa maiꞌnayanageꞌa afaꞌa apamogaga aigae. Kaugosafatiꞌmo aeno ha neleya yategamo umenitata hugae.
16 Apakaemo kagikalefeꞌmo muki afinaꞌmo apamogaga neꞌaiye. Apakaemo fatago kavakaletiꞌmo ala apakiꞌapimo neꞌaliye.
17 Ha le konali himamuꞌapimo kagaetegatiꞌmo aliꞌnae. Kagaemo fiku laha maeka lamiꞌnanageta aeta apakaseꞌnone.
18 Ala kava neꞌmo halegutigana huno maiꞌniye. Isaleliꞌa aote vekamo kini vekatimo maiꞌniye.
19 Aote vekakamoꞌa alagamuna agegekana huno ageꞌnigekaeꞌmo ina ge huka ha paiꞌnane. Nagaemo himamuꞌaꞌe vekamo lokiya vaiꞌna ateꞌnove. Nagaemo mago vekamo vayapatiꞌmo lekana paiꞌna ateteꞌna aliꞌna asaga huꞌna ateꞌnove.
20 Nagaemo aliꞌyaꞌnimo alisiya vekamo Neviniꞌmo kahauya huꞌna ageteꞌnaeꞌmo aote uveliletiꞌmo faleꞌna ateꞌnove.
21 Muki afinaꞌmo himamuꞌnimo agaeteꞌmo maleteꞌnaeꞌmo lokiya vaiꞌna ategauve.
22 Kame vekaꞌamoꞌmo anonaꞌalefeꞌmo asole yaꞌmo oꞌalisigeno hosu vekamoꞌa kana yaꞌmo alino oꞌamigiye.
23 Nagaemo kame vayaꞌamo apamagisugeꞌa aulagaleꞌmo asagauꞌa aigae. Nagaemo apaini huꞌa neꞌataya vayaꞌmo kaitaꞌmo apamiguve.
24 Apamiguvaꞌmonanafa agaefeꞌmo ani kavaꞌmo huguve, huꞌna ha paiꞌnova geꞌnimo alagi akame huꞌna nahau huꞌna ategauve. Nagiꞌnilefeꞌmo agiꞌaleꞌmo aliꞌna asaga huꞌna ategauve.
25 Nagaemo alopa mopaleꞌmo yagaisiyafeꞌmo lokiya vaiꞌna ateꞌnisugeno mago ayaꞌmo solovala aniteꞌmo maleteno mago ayaꞌmo anilafateꞌmo malegaiye.
26 Agaemo alopa gefatiꞌmo nagaefeꞌmo keya aeno ge hunoꞌaeꞌmo, Kagaemo afoꞌnimogamo maiꞌnane. Gotiꞌnimogae, huno, nagufamo alika katika natesana yafaꞌnimo maiꞌnane, huno naha paigiye.
27 Yege mafaꞌneꞌnimo maiꞌniye, huꞌna hu malegauve. Agaemo muki ma mopafiꞌmo maiꞌnaya kini vayaꞌmo ago aeno apakaseno hogote kini vekamo maigiye.
28 Nagaemo muki afinaꞌmo nahau huꞌna atege atege huꞌna maiguve. Agaeꞌeꞌmo kotalake geꞌnimo hu maleꞌnova geꞌnimoꞌa afaꞌa hanege hanege huno hanegaiye.
29 Agae nofi vayaꞌamo afaꞌa maige maige huꞌa maigae. Kokuꞌnaꞌmoꞌa hanege hanege huno hanesiya kava huno muki afinaꞌmo kini vekamo maiꞌneno yagaino apategaiye.
30 Mafaꞌneꞌamogimo keꞌaepa geꞌnimo ataleꞌa aliꞌna fako hu maleꞌnova geꞌnimo akame osuge
31 avoꞌmo kae maleꞌnaya geꞌnimo amagiꞌa atalege hiyo, huꞌna hapa paiꞌnova gemo akame osuge huꞌa maiꞌnisayaꞌmoꞌmo
32 nagaemo hosu kavaꞌapilefeꞌmo kayoꞌmo apamiteꞌna kayotetiꞌmo apamagisugeno apamuꞌmo apalegaiye.
33 Kayoꞌmo apamiguvaꞌmonanafa alagi aliꞌna hafaiꞌna oꞌataleꞌna agaefeꞌmo nahau nayamopafiꞌmo nahauꞌnisigeꞌna ha maegauve, huꞌna huꞌnova geꞌnimo amagiꞌna oꞌataleꞌna alagi akame huguve.
34 Kotalake geꞌnimo amagiꞌna oꞌataleꞌna navayafatiꞌmo hu maleꞌnova geꞌnileꞌmo alu gemo halate osuguve.
35 Nagaemo magoke afinaꞌmo naote kavaꞌnilefeꞌmo huꞌnaeꞌmo, Nevinifeꞌmo aigofe gemo alagi osuguve, huꞌna nagoꞌyamo ago ataleteꞌna ha paiꞌnove.
36 Agae nofi vayaꞌamo alagi hano osuꞌa afaꞌa maige maige huꞌa maigae. Yegemoꞌmo naulagaleꞌmo lege lege huno neꞌmaiya kava huno muki afinaꞌmo kini vekamo maiꞌneno yagaino apategaiye.
37 Kaimoꞌmo hanege hanege huno nehaneya kava huno fai maiꞌneno yagaino neꞌapateya sialeꞌmo muki afinaꞌmo fai maiꞌneno yagaino apategaiye. Kokuꞌnapatiꞌmo kaimoꞌmo, Gotiꞌa maiꞌniye, huno lama gemo nehiye, huno nehiya kaigana huno maiꞌneno yagaino apategaiye.
38 Kagaemo ani gemo huꞌnanaꞌmonanafa kagaemo ago alika yaga auka ataleteka kakameꞌyamo amiꞌnane. Kagaemo uvelimo faleka ateꞌnana vekaeꞌmo kaipamo leka ateꞌnane.
39 Kagaemo aliꞌyakamo neꞌaliya vekaꞌeꞌmo kotalake gemo hu maleꞌnana gemo ago alika hano huka ataleꞌnane.
40 Kagaemo kegiꞌyaꞌamo ago aeka halagape vaiꞌnane. Halagape oꞌvaisaya agufa lokiya nokoꞌmo heka halagape vaiꞌnane.
41 Muki u eꞌa nehaya vayaꞌmogimo kagemi yaꞌamo kumayaꞌmo neꞌaliye. Haopaleꞌmo maiꞌnaya vayaꞌmogimo huꞌa faipa huꞌa neꞌatae.
42 Kagaemo kame vayaꞌamo hapa maeꞌnanageꞌa kame huꞌa aeꞌa agaseꞌnae. Hapa maeꞌnanageꞌa apamogaga aiꞌnae.
43 Kagaemo ati vayaꞌamo lokiya vaika oꞌapateꞌnanageꞌa kame huꞌa aeꞌa oꞌapakaseꞌnae. Kagaemo afaꞌa ataleꞌnanageno kame vayaꞌaꞌeꞌmo kame huno aeno oꞌapakaseꞌniye.
44 Kagaemo ha le konali yaꞌamo alika hano huka ataleꞌnane. Yagaino apatesiya himamuꞌamo ago alika hano huka ataleꞌnane.
45 Kagaemo ataleꞌnanageno malage huno ago kosuna leꞌniye. Lokiyaꞌamo ohaneꞌnigeno avagage kavaꞌamoꞌmo aeno ati kaeꞌniye.
46 Ala kava nene, huꞌna, na magi afinaꞌmo fala kika maigane. Muki afinaꞌmo fala kika maigapiye. Atagana huno kaipamo lesifiye.
47 Maisuva afinaꞌmo aise afinaꞌmo haneꞌniyaꞌmofemo kage okanika kagesamo afiyo. Fiku maisayafeꞌmo muki vayaꞌmo alo huka apateꞌnapiye.
48 Haiya vekamoꞌa ofalino afaꞌa maige maige huno maigiye. Kanolufiꞌmo oꞌmaino faino kasalo paegaifiye.
49 Ala kava nene, huꞌna, Hogoteka Nevinifeꞌmo kahau kayamopafiꞌmo kahauꞌnigeka alagepa huka ha maeꞌnane. Na kava higeka hemenimo ani kavaꞌmo nosane. Kagaemo Nevinifeꞌmo ani kavaꞌmo huguve, huka huteka kagoꞌyamo ataleꞌnane.
50 Ala kava nene, huꞌna, aliꞌyakamo neꞌaliya vayakaeꞌmo huꞌa faipa huꞌa neꞌapataya kavafeꞌmo kage okanika kagesamo afiyo. Muki asole vayaꞌmogimo huꞌa faipa huꞌa nelatageꞌnaeꞌmo naipamoꞌmo lusi kava huno kana nehiye.
51 O Ala kava nene, huꞌna, kame vayakamogi huꞌa faipa huꞌa lateꞌnae. Apakaemo uvelimo faleka ateꞌnana vekamoꞌa nehiya kavafeꞌmo huꞌa faipa huꞌa ateꞌnae.
52 Ala kava neꞌmo alagepa huno maino. He, Lama ge. Lama ge.