90
Moseseꞌa nunumuꞌmo huꞌniya gemae
1 Ala kava nene, huꞌna, lagaemo afole aige afole aige huta neꞌmaunagekaeꞌmo kagaemo muki afinaꞌmo notigana huka maiꞌnane.
2 Akeyaꞌvilaga aveꞌe ma mopaꞌeꞌmo alo osuꞌnana afinaꞌmo hogoteka maiꞌnananageka maige maige huka alagi maigane.
3 Kagaemo vayaꞌaifeꞌmo, halate mopamo alita hamaleyo, huka huteka nefaligekaeꞌmo mopamo alika hamaleka neꞌapatane.
4 Vani tauseniꞌa kafugamo magoke afinakana huno haneꞌniye, huka kagesamo afiꞌnane. Egamo malage huno hano huꞌniya kava huno vani tauseniꞌa kafugamo malage huno hano nehiye. Magoke haniꞌilagamo malage huno hano huꞌniya kava huno kaulagaleꞌmo vani tauseniꞌa kafugamo malage huno hano nehiye.
5-6 Aniꞌmo heteno alinino neꞌviya kava huka lavalelika uka nelatanageta nefalune. Alagamunamo ageꞌnageno malage huno apake nekaniya kava huta malage huta nefalune. Kahaumoꞌmo netepiꞌmo lagiteno ause hetenoꞌaeꞌmo uneꞌamo ago falu neteya kava huta maiꞌneta nefalune.
7 Kaipamo leka latetekaeꞌmo nelamagine. Kayamukiki nehanagetaeꞌmo atete nehune.
8 Hosu kavatimo afole yateꞌmo haneꞌnigeka neꞌagane. Huta fala kita neꞌatalona hosu kavatimo kaulagalekeꞌmo haneꞌnigeka alika neꞌmalane.
9 Kaipamo leꞌnigeka ge nehukaeꞌmo ma mopafiꞌmo maisuna afinatimo alika hogo huka nelatane. Kaiteneꞌmo huꞌa hapa nepaigenoꞌaeꞌmo malage huno apake nekaniya kava huta malage huta nefalune.
10 Lagaemo 70ꞌa kafugamo maige lokiya vayaꞌmo 80ꞌa kafugamo maige huta neꞌmaunaꞌmonanafa lokiya aliꞌyaꞌmo alige hanageke yaꞌmo alige huta aise afinaꞌmo maiꞌneta ma mopamo malage huta ataleta halelita neꞌune.
11 Ina laꞌmo kaipamo leꞌniya lokiyakamo ageno alagepa huno ageꞌniye. Kaipamo nelegeka kayamukiki nehanageꞌapaeꞌmo lusi kava huꞌa koli nehaya kavakamo ina laꞌmo ageno alagepa huno ageꞌniye.
12 Ma mopafiꞌmo maisuna afinatimo lekana paisunafeꞌmo alika laya malegeta alagepa huta ageteta afino.
13 Ala kava nene, huꞌna, aika atagi neka lagaetegamo eno. Na magi afinaꞌmo kaipamo leka lategane. Aliꞌyakamo neꞌaluna vayakaeꞌmo kahau huka lato.
14 Muki afinaꞌmo lamogaga aige amuse huge huta maisunafeꞌmo muki afinaꞌmo neteꞌae neteꞌaeꞌmo olataleka kahau huka lato.
15 Hanageke yaꞌmo lamiꞌnanageno laipamoꞌmo kana huꞌniye. Laha maegeta na magi afinaꞌmo laipamoꞌmo kana huꞌnifi huta ani agufa yatala afinakeꞌmo lamogaga aino.
16 Aliꞌyakamo alika aliꞌyakamo neꞌaluna vayakamo lave liyo. Laginago mafaꞌnetimo himamukamo alika apave liyo.
17 Ala kava neꞌmo Gotitimogae, huꞌna, amuse huka lateteka laha maegenoꞌao aliꞌyatimoꞌmo alagepa huno afole aino.