91
Ala neꞌapimo fala kino maiꞌniyategamo haino neꞌmaiya vekaeꞌmo ava gemae
1 Hogote Ala neꞌapimo fala kino maiꞌniyategamo haino neꞌmaiya vekamoꞌa lokiyaꞌage vekamo aunefiꞌmo fala kino maige maige huno maigiye.
2 Nagaemo Ala kava nefeꞌmo huꞌnaeꞌmo, agaepiꞌmo fala kiꞌna maiꞌnogeno faino ku aino yagaino nateꞌneno naha maeno nagufamo alino katino nateꞌniya vekaꞌnimo maiꞌniye. Gotiꞌnimoꞌmo maiꞌniyanageno, naha maegaiye, huꞌna huguve.
3 Agaemo oꞌageꞌnana nofitetiꞌmo aneꞌaimo hanagiꞌa aeꞌa katafaugefeꞌmo hisaya nofiꞌmoꞌa okatafausiyafeꞌmo hatu maeno kateteno lusi kaitaꞌmo kahausigekaeꞌmo ofalisanafeꞌmo alagepa huno yagaino kategaiye.
4 Agaemo hakumo alino atalelineno hakufiꞌmo alino fala kino katesigeka alagepa huka hakufiꞌmo fala kika maigane. Lama geꞌamoꞌmo kagae halegukana huno haneꞌneno yagaino katesigeka maigane.
5 Apakaemo hanipifeꞌmo koli hisaya yafeꞌmo kagaemo koli osugane. Kevemoꞌmo malage huno eno haniꞌniya kava huno yegemo neleya afinaꞌmo hosu kavaꞌmoꞌa malage huno kahaesiya kavafeꞌmo koli osugane.
6 Haniꞌilagamo lusi kaitaꞌmo kahausigekaeꞌmo koli osugane. Felugamo alopa hanageke yaꞌmo kagaeteꞌmo afole aisiya kavafeꞌmo koli osugane.
7 Kahaopaleꞌmo vani tauseniꞌa vayaꞌmo falige lamaga kahaopaleꞌmo teni tauseniꞌa vayaꞌmo falige huꞌa falisagenoꞌaeꞌmo falisana kavaꞌmo kahaopaleꞌmo afole oꞌaigiye.
8 Kahaopaleꞌmo afole oꞌaigiyaꞌmonanafa kaulagafatikeꞌmo hosu vayaꞌmo hosu kavaꞌmo anonaꞌapilefeꞌmo hosu yaꞌmo alisageka apakegane.
9-10 Kagaemo uꞌna fala kiꞌnova vekafifeꞌmo, agaepiꞌmo maige maige huꞌna maiguve, huka huꞌnanaꞌmofeꞌmo mago hosu yaꞌmoꞌa okahaesigeno hosu kaitaꞌmo nokaleꞌmo afole oꞌaigiye.
11 Ala kava neꞌmoꞌa enisole vayaꞌaeꞌmo, yagaitapa ateyo, huno hapa paisigeꞌa muki afinaꞌmo kategamo umenitata hisana afinaꞌmo yagaiꞌa kategayaꞌmofeꞌmo hosu kavaꞌmo kagaeteꞌmo alagi afole oꞌaigiye.
12 Apayatetiꞌmo kavaleꞌa kasagausageno yafaꞌmoꞌa kaiyafiꞌmo okahaegaiye.
13 Kaiyaletiꞌmo laiyoniꞌe nagaloꞌyaveꞌeꞌmo aeka latapaigane.
14 Gotiꞌa, nagaefeꞌmo hau ayamopafiꞌmo hauꞌniyaꞌmofeꞌmo agufamo aliꞌna katiꞌna ategauve, huno huꞌniye. Nagiꞌnimo afino alagepa huꞌniyaꞌmofeꞌmo aliꞌna asaga huꞌna ategauve.
15 Nagaefeꞌmo keya aeno ge hisigeꞌnaeꞌmo afiguve. Hanageke yaꞌmo neꞌalisigeꞌnaeꞌmo agaeꞌeꞌmo magokepi lokaeꞌna maiguve. Agufamo aliꞌna katiꞌna ateteꞌna ala agiꞌamo amiguve.
16 Yatala kafugamo maisiya yaꞌmo amisugenoꞌaeꞌmo, haine, huno huteno hao ke hegaiye. Agufamo aliꞌna katiꞌna ateꞌnova kavaꞌnimo aepaꞌamo aliꞌna ave liguve, huno huꞌniye.