25
ꤋꤝꤤꤏꤢꤪ꤬ꤜꤢ꤬ꤗꤥ꤬ ꤢ꤬ꤍꤟꤥꤞꤤꤖꤢꤧ ꤒꤢ꤬ꤟꤢꤩ꤬
1 ꤛꤢꤩ꤭ ꤗꤢ꤬ ꤛꤢꤨꤘꤢ꤬ꤊꤜꤝꤤ꤭ ꤢ꤬ꤋꤝꤤ ꤋꤝꤤꤟꤢꤩ꤬ꤐꤢ꤬ꤊꤤꤛꤢ꤬ ꤢ꤬ꤊꤢ꤬ꤛꤢ꤭ ꤒꤢ꤬ꤟꤢꤩ꤬ ꤗꤛꤢꤙꤢꤦ꤭ꤚꤢ꤭ ꤊꤟꤌꤣ꤭ ꤋꤝꤤꤏꤢꤪ꤬ꤜꤢ꤬ꤗꤥ꤬ ꤢ꤬ꤍꤟꤥꤞꤤꤖꤢꤧ ꤔꤌꤣ꤬ꤒꤢ꤬ꤟꤢꤩ꤬ ꤟꤢꤪ꤯
2 ꤡꤢꤪꤗꤢ꤬ꤚꤛꤢ꤬ ꤘꤛꤢꤩꤜꤟꤌꤣ꤭ ꤢꤨ꤭ ꤔꤢ ꤢ꤬ꤒꤟꤢꤧ꤬ꤘꤢꤪꤢꤟꤌꤣꤘꤢꤪꤙꤤ ꤒꤥ꤬ ꤚꤢꤪ ꤢꤨ꤭ ꤘꤛꤢ꤬ꤘꤢꤨ꤬ꤘꤛꤢ꤬ꤓꤢꤨ꤭ ꤔꤟꤤ ꤜꤢꤨ꤭꤯
ꤋꤝꤤ ꤟꤢꤩꤜꤟꤌꤣ꤭ꤕꤜꤥ꤭ ꤕꤢꤩ ꤢꤨ꤭, ꤚꤢꤪ ꤢꤨ꤭ ꤘꤛꤢ꤬ꤘꤢꤨ꤬ꤘꤛꤢ꤬ꤓꤢꤨ꤭ ꤔꤟꤤ ꤜꤢꤨ꤭꤯
3 ꤖꤢꤨ꤮ ꤗꤢꤪꤋꤢꤨ꤬ ꤓꤛꤢ꤬ꤜꤣ꤭ ꤒꤢꤩ꤭ꤓꤝꤥ ꤙꤢꤧ ꤒꤥ꤬, ꤟꤢꤩ꤬ꤋꤢꤨ꤬ ꤒꤟꤢ꤭ꤐꤟꤢ꤭ ꤒꤢꤩ꤭ꤜꤟꤛꤢ꤬ꤒꤟꤌꤣ ꤙꤢꤧ ꤒꤥ꤬ ꤔꤌꤣ꤬,
ꤞꤢꤧꤑꤢꤩ꤭ ꤓꤝꤥꤙꤢꤧꤜꤟꤢꤪ꤭ ꤋꤝꤤꤞꤢꤧꤕꤜꤢꤪ꤬ ꤒꤥ꤬꤯
4 ꤤ꤬ꤙꤢꤦ꤭ꤕꤜꤤ꤭ ꤊꤛꤢ꤭ ꤢ꤬ꤊꤚꤛꤢꤩ꤬ ꤘꤣ ꤚꤢꤦ꤭ꤜꤟꤥ꤬ ꤔꤌꤣ꤬꤯
ꤓꤌꤣ꤭ꤕꤢ꤭ꤚꤢꤪ ꤕꤚꤟꤢꤧ꤬ꤜꤥ꤭ꤚꤢꤦ꤭ ꤊꤟꤢꤦ ꤜꤥ꤭ꤓꤢꤩ꤬ ꤜꤢꤨ꤭ ꤔꤢ ꤙꤢꤩ꤭ꤚꤢꤦ꤭ ꤘꤣ ꤢ꤬ꤒꤝꤟꤥ꤯
5 ꤠꤟꤢꤧꤓꤢꤩ꤬ꤊꤛꤢ꤭ ꤊꤢ꤬ꤛꤢ꤭ ꤓꤝꤟꤥ꤭ꤘꤢꤨ꤬ꤓꤝꤟꤥ꤭ꤋꤢꤨ꤬ ꤘꤣ ꤢ꤬ꤡꤟꤛꤢꤩ꤭ꤚꤤ꤬ꤡꤟꤛꤢ ꤙꤤ ꤋꤝꤤ ꤢ꤬ꤗꤢꤧ꤬ꤞꤢꤧꤑꤢꤩ꤭ ꤔꤌꤣ꤬꤯
ꤚꤢꤪ ꤋꤝꤤ ꤢ꤬ꤒꤟꤢꤧ꤬ꤕꤣꤒꤢ꤬ꤚꤤ ꤊꤟꤢꤦ ꤥ꤬ꤊꤜꤟꤢꤪ꤬ꤗꤢ꤬ ꤔꤢ ꤒꤟꤢꤧ꤬ꤡꤢꤪꤒꤟꤢꤧ꤬ꤒꤟꤢꤩ꤬ ꤕꤢ꤭꤯
6 ꤙꤢꤩ꤬ꤓꤛꤢ꤬ꤜꤣ꤭ ꤒꤢꤧ꤭ ꤔꤟꤢꤧ꤬ꤔꤟꤢꤩ ꤘꤣ ꤋꤝꤤ ꤢ꤬ꤗꤢꤧ꤬ꤞꤢꤧ꤬ꤑꤢꤩ꤭ ꤗꤟꤢꤩ꤯
ꤊꤢ꤬ꤓꤢꤪ꤬ꤥ꤬ ꤒꤢꤧ꤭ ꤘꤣ ꤢ꤬ꤊꤢ꤬ꤛꤢ꤭ ꤕꤚꤟꤢꤧ꤬ꤓꤝꤟꤥ꤭ꤋꤢꤨ꤬ꤊꤜꤢꤪꤋꤢꤨ꤬ꤊꤜꤛꤢ꤭ ꤒꤢ꤬ꤟꤢꤩ꤬ ꤢ꤬ꤊꤜꤢꤧ꤭ ꤗꤟꤢꤩꤗꤟꤢꤩ꤯
7 “ꤓꤛꤢ꤬ꤥ꤬ꤔꤛꤢ꤭ꤥ꤬ ꤘꤣ ꤛꤢꤩ꤭,” ꤋꤝꤤ ꤟꤢꤩ ꤔꤟꤢꤧ꤬ ꤔꤌꤣ꤬ꤗꤢ꤬,
ꤢ꤬ꤚꤛꤢ ꤜꤣꤊꤜꤢꤪ꤭ ꤡꤢꤪꤔꤢ ꤢ꤬ ꤔꤢꤪ꤭ꤒꤟꤢ꤭ꤥ꤬ꤔꤛꤢ꤭ ꤒꤢ꤬ꤔꤟꤢꤊꤛꤢ꤭ ꤔꤟꤢꤧ꤬ ꤚꤢꤪ ꤢ꤬ ꤗꤟꤢꤩ꤬ꤞꤢꤧꤒꤢ꤬ꤚꤟꤢꤧ꤭ꤊꤛꤢ꤭ ꤔꤟꤢꤧ꤬ ꤘꤣ ꤢ꤬ꤊꤢ꤬ꤛꤢ꤭ꤓꤝꤟꤥ꤭ꤘꤢꤨ꤬ꤓꤝꤟꤥ꤭ꤋꤢꤨ꤬ ꤒꤢ꤬ꤟꤢꤩ꤬ ꤢ꤬ꤗꤢꤧ꤬ꤞꤢꤧ꤬ꤑꤢꤩ꤭ ꤔꤌꤣ꤬ ꤡꤢꤪ꤯
8 ꤔꤟꤢꤧ꤬ ꤊꤤ꤬ ꤗꤛꤢꤓꤛꤢꤩ꤬ ꤢꤨ꤭ ꤗꤟꤢꤩ꤬ ꤒꤟꤢꤧ꤬ ꤒꤣ꤬ꤡꤣ꤬ꤡꤣ꤬ ꤟꤢꤩꤗꤢ꤬, ꤞꤛꤢꤖꤢꤨ ꤢꤨ꤭ ꤊꤟꤢꤦ ꤙꤢꤩ꤬ꤒꤟꤢꤧ꤬ꤞꤢꤦ ꤜꤢꤨ꤭ ꤢ꤬ꤑꤢꤩ꤭ ꤔꤌꤣ꤬, ꤡꤛꤣ ꤟꤢꤩꤏꤥ꤬ ꤒꤢ꤬ꤕꤜꤟꤌꤣꤒꤢ꤬ꤕꤜꤛꤢꤩ꤭ ꤒꤢꤧ꤭ ꤘꤣ ꤘꤢꤪ꤭ꤡꤟꤢꤧꤟꤤ꤬ ꤗꤟꤢꤩ꤯
ꤘꤣꤋꤛꤢꤩ꤭ꤕꤢ꤭, ꤕꤚꤟꤢꤧ꤬ꤋꤛꤢꤞꤢꤧ ꤘꤣ ꤢ꤬ꤚꤟꤌꤣ꤬ ꤒꤣ꤬ꤕꤚꤟꤢꤧ꤬ ꤊꤤ꤬ ꤐꤟꤢꤨ꤭ꤜꤟꤌꤣ꤭ ꤔꤢ ꤔꤟꤢꤧ꤬ ꤟꤢꤩꤒꤟꤢꤧ꤬ ꤔꤌꤣ꤬ ꤢ꤬ꤞꤢꤦ ꤟꤢꤩꤗꤢ꤬, ꤔꤟꤢꤧ꤬ ꤊꤟꤢꤦ ꤗꤟꤢꤩ꤬ ꤖꤢꤨꤒꤢꤩ꤭ ꤕꤢ꤭?
9 ꤙꤤ ꤔꤟꤢꤧ꤬ ꤟꤢꤩꤙꤢꤧ꤬ꤥ꤬ꤢꤧ ꤔꤢ ꤔꤟꤢꤧ꤬ꤋꤥ꤭ ꤢ꤬ꤋꤢꤧ꤭ꤔꤌꤣ꤬,
ꤟꤢꤩꤜꤟꤌꤣ꤭ ꤒꤢꤧ꤭ ꤊꤢ꤬ꤛꤢ꤭ ꤒꤣ꤬ꤕꤚꤟꤢꤧ꤬ꤕꤚꤟꤢꤧ꤬ ꤢ꤬ꤚꤤ꤬ꤢ꤬ꤊꤛꤢ꤭ ꤘꤣ ꤢ꤬ ꤘꤢꤪꤢꤟꤌꤣꤘꤢꤪꤙꤤꤔꤟꤤ ꤔꤌꤣ꤬ ꤗꤟꤢꤩ꤯
10 ꤊꤤ꤬ꤗꤟꤢꤒꤥ꤬ꤟꤢꤩꤗꤢ꤬, ꤊꤢ꤬ꤛꤢ꤭ ꤘꤣ ꤢ꤬ ꤔꤟꤤꤟꤌꤣ꤭ ꤔꤌꤣ꤬ꤒꤣ꤬ꤕꤚꤟꤢꤧ꤬ ꤗꤟꤢꤩ꤬ꤒꤢ꤬ꤚꤟꤢꤧ꤭ ꤔꤟꤢꤧ꤬ ꤕꤢ꤭꤯
ꤓꤌꤣ꤭ꤒꤥ꤬ ꤔꤟꤢꤧ꤬ ꤊꤟꤢꤦ ꤗꤝꤟꤤ꤬ꤕꤟꤤ꤭ꤓꤛꤢꤩ꤭ꤞꤤ ꤜꤢ꤭ ꤊꤛꤢ꤭ ꤕꤢ꤭꤯
11 ꤟꤢꤩꤙꤢꤧ꤬ ꤒꤟꤢ꤭ꤒꤥ꤭ꤒꤟꤢ꤭ꤙꤢꤧ꤬ ꤍꤟꤥ ꤔꤌꤣ꤬ꤗꤢ꤬,
ꤢ꤬ꤞꤛꤢꤔꤢ ꤢꤨ꤭ ꤏꤢꤨ꤬ꤔꤟꤌꤣ꤭ꤒꤝꤟꤥ ꤓꤢꤧ꤭ꤗꤢꤧ꤬ꤞꤢꤧ꤬ꤕꤜꤢꤪ꤬ ꤘꤣ ꤚꤢꤦ꤭ꤜꤟꤥ꤬ ꤔꤌꤣ꤬ꤡꤢꤪ꤯
12 ꤊꤢ꤬ꤛꤢ꤭ ꤘꤣ ꤕꤚꤟꤢꤧ꤬ꤞꤤꤖꤢꤧ ꤤ꤬ꤞꤛꤥꤚꤛꤢꤊꤟꤢ꤬ ꤜꤢꤨ꤭ ꤚꤢꤪ ꤢ꤬ ꤞꤢꤧꤐꤟꤢꤦ ꤔꤟꤤꤘꤢ꤭ꤔꤌꤣ꤬,
ꤢ꤬ꤞꤛꤢꤔꤢ ꤢ꤬ ꤞꤛꤢ꤭ꤔꤟꤤ ꤋꤢ꤭ꤞꤛꤢ꤭ꤓꤢꤧ꤭, ꤢ꤬ ꤊꤢ꤬ꤜꤟꤢ꤭ꤔꤟꤤ ꤊꤢ꤬ꤜꤟꤢ꤭ꤓꤢꤧ꤭ ꤔꤌꤣ꤬ ꤟꤢꤪ꤯
13 ꤕꤚꤟꤢꤧ꤬ꤞꤢꤨ꤭ ꤒꤟꤢꤧ꤬ꤚꤤ꤬ꤒꤟꤢꤧ꤬ꤊꤛꤢ꤭ ꤘꤣ ꤢ꤬ ꤡꤢꤪ ꤔꤢ ꤕꤚꤟꤢꤧ꤬ꤔꤢꤪ꤭ ꤜꤢꤨ꤭ ꤔꤌꤣ꤬, ꤢ꤬ ꤘꤛꤢꤩ ꤊꤢ꤬ꤡꤟꤢꤨꤊꤢ꤬ꤙꤢꤧ ꤢ꤬ꤙꤛꤢ꤬ꤡꤢꤧ꤬ꤞꤢꤧꤕꤜꤢꤪ꤬,
ꤞꤛꤢꤔꤢ ꤊꤟꤢꤩꤡꤟꤢꤦ꤬ ꤊꤢ꤬ꤡꤟꤢꤨꤒꤟꤢ꤭ ꤒꤟꤢꤧ꤬ꤗꤟꤢꤪꤒꤟꤢꤧ꤬ꤙꤥ꤭ ꤙꤤ ꤤ꤬ꤜꤟꤌꤣꤤ꤬ꤕꤜꤢꤦ꤭ ꤢ꤬ꤋꤢꤧ꤭ꤔꤌꤣ꤬ ꤟꤢꤪ꤯
14 ꤊꤢ꤬ꤛꤢ꤭ ꤘꤣ ꤢ꤬ ꤢꤪꤜꤟꤛꤢ꤬ ꤔꤢ ꤢ꤬ ꤊꤟꤢꤦ ꤘꤛꤢꤩ ꤔꤟꤢꤧ꤬ ꤏꤛꤢꤩ꤭ꤐꤟꤢꤨ ꤕꤢ꤭ ꤚꤢꤪ ꤢ꤬ ꤘꤛꤢꤩ ꤕꤢꤩ ꤒꤣ꤬ꤖꤟꤌꤣ꤮ ꤒꤥ꤬ ꤒꤢ꤬ꤟꤢꤩ꤬ꤔꤌꤣ꤬,
ꤢ꤬ꤞꤛꤢꤔꤢ ꤢꤪꤜꤟꤌꤣꤓꤛꤢ꤬, ꤊꤟꤢꤩꤜꤢ꤬ꤞꤢꤧꤜꤢ꤬ꤜꤛꤢ꤭ ꤚꤢꤪ ꤊꤟꤢꤩꤡꤟꤢꤦ꤬ ꤒꤥ꤬ ꤔꤌꤣ꤬ ꤟꤢꤪ꤯
15 ꤊꤢ꤬ꤛꤢ꤭ ꤞꤢꤧꤕꤜꤢꤪ꤬ꤓꤢꤨ꤭ ꤡꤝꤤ꤬ꤔꤟꤤꤓꤢꤪꤔꤟꤤꤡꤟꤛꤢ ꤕꤚꤟꤢꤧ꤬ꤕꤣ ꤒꤟꤢꤧ꤬ ꤢ꤬ꤞꤢꤧꤕꤜꤢꤪ꤬꤯
ꤍꤟꤥꤞꤢꤧꤘꤥ꤭ ꤗꤟꤢꤩ꤬ꤒꤢ꤬ꤊꤜꤛꤢ꤬ꤡꤟꤛꤢ ꤊꤢ꤬ꤛꤢ꤭ꤋꤢꤨ꤬ꤊꤜꤢꤪꤕꤚꤛꤢꤩ꤭ ꤢ꤬ꤒꤟꤢꤧ꤬ꤒꤢ꤬ꤔꤟꤢꤩ꤬꤯
16 ꤔꤟꤢꤧ꤬ ꤊꤤ꤬ ꤗꤛꤢꤓꤛꤢꤩ꤬ ꤠꤛꤢꤓꤛꤢꤩ꤭ ꤚꤢꤪ ꤢꤩ꤬ꤒꤥ꤭ꤢꤩ꤬ꤙꤢꤧ꤬ ꤕꤚꤢꤧ ꤔꤤ꤯
ꤔꤟꤢꤧ꤬ ꤊꤤ꤬ ꤢꤩ꤬ꤒꤢ꤬ꤜꤝꤥ ꤥ꤭ꤒꤢ꤬ꤜꤟꤛꤢꤩ꤬ ꤟꤢꤩꤗꤢ꤬, ꤔꤟꤢꤧ꤬ ꤊꤟꤢꤦ ꤕꤚꤛꤢꤓꤢꤩ꤬ ꤜꤟꤢꤪ꤭ ꤋꤛꤢꤩ꤭ꤞꤛꤢ ꤕꤢ꤭꤯
17 ꤡꤛꤣꤥ꤬ꤜꤢꤩ꤭ ꤒꤢ꤬ꤗꤥ꤭ ꤒꤢꤧ꤭ ꤘꤣ ꤢꤨ꤭ꤟꤤ꤬ ꤗꤟꤢꤩ꤯
ꤔꤟꤢꤧ꤬ ꤊꤤ꤬ ꤡꤛꤣ ꤒꤢ꤬ꤗꤥ꤭ꤗꤥ꤭ ꤟꤢꤩꤗꤢ꤬, ꤢꤨ꤭ ꤊꤟꤢꤦ ꤞꤢꤧꤓꤢꤩ꤬ꤞꤢꤧꤒꤢ꤬ꤋꤥ꤭ ꤊꤛꤢ꤭ ꤔꤟꤢꤧ꤬ ꤕꤢ꤭꤯
18 ꤊꤢ꤬ꤛꤢ꤭ ꤘꤣ ꤢ꤬ ꤋꤛꤢꤜꤢ꤬ꤟꤥ꤭ ꤒꤢ꤬ꤊꤢꤧ꤬ ꤢꤨ꤭ ꤔꤌꤣ꤬,
ꤢ꤬ꤞꤛꤢꤔꤢ ꤤ꤬ꤗꤟꤢꤦ꤭, ꤔꤢꤧ ꤔꤢ ꤕꤜꤟꤢꤧ ꤘꤣ ꤢ꤬ꤡꤛꤣ꤭ꤚꤢ꤬ꤗꤤ ꤔꤌꤣ꤬ ꤟꤢꤪ꤯
19 ꤙꤤ ꤏꤤꤒꤣ꤬ꤙꤢꤧ꤬ ꤒꤟꤢꤧ꤬ꤕꤟꤛꤢꤒꤟꤢꤧ꤬ꤏꤢꤧ꤭ ꤢ꤬ꤋꤢꤧ꤭, ꤞꤢꤧꤜꤟꤢꤧ꤬ꤔꤟꤤ ꤊꤢ꤬ꤛꤢ꤭ ꤡꤢꤪꤔꤢꤍꤟꤥ ꤒꤥ꤬ ꤔꤌꤣ꤬ꤗꤢ꤬,
ꤢ꤬ꤞꤛꤢꤔꤢ ꤋꤢꤨ꤬ꤋꤛꤢꤩ꤭ ꤏꤢꤧ꤭ꤡꤟꤛꤢꤩ꤭ ꤚꤢꤪ ꤢꤩ꤬ꤏꤢꤧ꤬, ꤋꤢ꤭ꤘꤟꤌꤣ꤬ꤏꤢꤧ꤭ꤡꤟꤢꤦ꤬ ꤚꤢꤪ ꤡꤛꤣꤊꤜꤛꤢ ꤔꤌꤣ꤬ꤟꤢꤪ꤯
20 ꤤ꤬ꤚꤥ꤭ ꤕꤢꤩ ꤊꤢ꤬ꤛꤢ꤭ ꤞꤢꤧꤕꤜꤢꤪ꤬ꤕꤛꤢꤩ ꤒꤣ꤬ꤕꤚꤟꤢꤧ꤬ ꤒꤟꤢꤧ꤬ꤤ꤬ꤚꤥ꤭ ꤔꤌꤣ꤬ꤗꤢ꤬,
ꤢ꤬ꤞꤛꤢꤔꤢ ꤕꤜꤝꤥꤊꤛꤢ꤭ ꤟꤛꤢꤩ꤬ꤡꤟꤢ꤬ ꤘꤣ ꤊꤟꤢꤩꤚꤟꤥꤋꤢꤧ꤭ ꤔꤌꤣ꤬ꤒꤣ꤬ꤑꤢꤩ꤭, ꤗꤟꤢꤒꤥ꤬ꤚꤢꤪ ꤐꤢꤦ꤭ꤔꤟꤌꤣ꤭ ꤤ꤬ꤞꤢꤧ꤬ꤓꤛꤢꤩ꤭ ꤘꤣ ꤢ꤬ꤡꤢꤨ꤬ꤢ꤬ꤓꤛꤢ꤭ꤊꤢꤨ꤭ ꤔꤌꤣ꤬ ꤟꤢꤪ꤯
21 ꤊꤢ꤬ꤛꤢ꤭ ꤘꤣ ꤢ꤬ ꤞꤢꤧꤓꤢꤩ꤬ ꤔꤟꤢꤧ꤬ ꤊꤤ꤬ ꤞꤢꤧꤠꤟꤤ꤭ꤞꤢꤧꤢꤩ꤬ ꤟꤢꤩꤚꤢꤪ, ꤒꤢ꤬ꤚꤟꤢꤨ꤮ ꤘꤛꤢꤩꤢꤩ꤬ ꤢꤧ꤬ ꤔꤤ꤯
ꤢ꤬ ꤊꤤ꤬ ꤜꤢ꤬ꤘꤛꤢꤥ꤭ꤓꤛꤢꤩ꤭ ꤟꤢꤩꤚꤢꤪ, ꤒꤢ꤬ꤚꤟꤢꤨ꤮ ꤘꤛꤢꤩꤥ꤭ ꤜꤢꤨ꤭꤯
22 ꤔꤟꤢꤧ꤬ ꤊꤤ꤬ ꤗꤟꤢꤩ꤬ ꤖꤢꤨꤔꤌꤣ꤬ ꤟꤢꤩꤗꤢ꤬, ꤢ꤬ ꤊꤟꤢꤦ ꤞꤢꤧꤒꤢ꤬ꤚꤟꤢꤧ꤭ ꤔꤟꤤꤘꤛꤢꤩ ꤢ꤬ꤔꤟꤢꤩ ꤞꤛꤢꤔꤢ ꤔꤟꤢꤧ꤬ ꤘꤛꤢ꤬ꤓꤛꤢ꤬ ꤗꤤ꤬ꤊꤜꤝꤥ ꤘꤣ ꤜꤢꤨ꤭ꤋꤢꤨ꤬ꤊꤜꤢꤪꤜꤟꤥ꤬꤯
ꤚꤢꤪ ꤡꤢꤪꤗꤢ꤬ꤚꤛꤢ꤬ ꤊꤟꤢꤦ ꤘꤛꤢꤩ ꤔꤟꤢꤧ꤬ ꤒꤟꤢꤧ꤬ꤗꤟꤢꤩ꤬ꤔꤟꤤꤋꤝꤥꤊꤢꤧ꤬ ꤕꤢ꤭꤯
23 ꤖꤢꤨ ꤊꤟꤢꤩꤜꤢ꤬ꤞꤢꤧ ꤘꤣ ꤡꤤꤓꤥ꤭ ꤒꤣ꤬ꤊꤛꤢꤩ꤭ ꤖꤛꤢꤩꤟꤛꤢ꤭ ꤊꤟꤢꤩꤡꤟꤢꤦ꤬ ꤔꤌꤣ꤬ꤟꤢꤪ,
ꤊꤢ꤬ꤛꤢ꤭ ꤘꤣ ꤢ꤬ ꤙꤢꤪ꤬ꤊꤜꤛꤢꤩ ꤢꤨ꤭ ꤔꤌꤣ꤬ꤗꤢ꤬, ꤢ꤬ ꤗꤟꤢꤩ꤬ꤓꤝꤟꤥ꤭ꤓꤛꤢ꤬ ꤒꤟꤢꤧ꤬ꤞꤢꤧꤕꤜꤢꤪ꤬ꤘꤢꤨ꤬꤯
24 ꤥ꤬ ꤒꤢꤦ꤮ ꤘꤢꤦ꤬ ꤘꤣ ꤟꤤ꤬ꤋꤢꤨ꤬ꤊꤜꤝꤥꤒꤢ꤬ꤙꤛꤢꤩ꤬ꤋꤢꤨ꤬ ꤔꤌꤣ꤬ꤗꤢ꤬,
ꤢ꤬ꤚꤛꤢꤊꤜꤢꤪ꤭ ꤔꤢ ꤥ꤬ꤒꤟꤣ ꤔꤢ ꤗꤢꤩ꤭ ꤘꤣ ꤢ꤬ ꤊꤜꤛꤢꤩꤍꤢ꤭ꤏꤛꤥ꤬ ꤘꤣ ꤟꤤ꤬ꤊꤢꤨ꤭꤯
25 ꤔꤟꤤꤟꤌꤣ꤭ ꤒꤟꤢꤧ꤬ꤚꤤ꤬ꤒꤟꤢꤧ꤬ꤊꤛꤢ꤭ ꤗꤟꤥ꤬ ꤥ꤬ ꤘꤣ ꤊꤟꤢꤩꤐꤛꤢꤩ꤬ ꤟꤛꤢ꤭ ꤔꤌꤣ꤬ꤗꤢ꤬,
ꤢ꤬ꤞꤛꤢꤔꤢ ꤥ꤭ꤔꤟꤤ ꤓꤛꤢꤩ꤭ꤊꤢ꤬ꤡꤟꤢꤨ ꤙꤤ ꤞꤢꤧꤥ꤭ ꤔꤛꤢ꤬ꤡꤢꤪ ꤓꤛꤢꤩ꤭ ꤢ꤬ꤋꤢꤧ꤭ꤔꤌꤣ꤬ ꤟꤢꤪ꤯
26 ꤊꤢ꤬ꤛꤢ꤭ꤡꤢꤪꤒꤟꤢꤩ꤬ ꤊꤤ꤬ ꤕꤜꤝꤥ꤭ꤕꤣꤔꤟꤤ ꤢ꤬ꤔꤟꤢꤩ ꤔꤢ ꤊꤢ꤬ꤛꤢ꤭ꤚꤤ꤬ꤡꤟꤛꤢ ꤟꤢꤩꤗꤢ꤬,
ꤢ꤬ꤞꤛꤢꤟꤢꤪ ꤔꤢ ꤓꤛꤢꤩ꤭ꤓꤢꤩ꤬ꤋꤢꤨ꤬ ꤘꤣ ꤢ꤬ꤊꤢ꤬ꤘꤌꤣ, ꤓꤛꤢꤩ꤭ꤊꤜꤢꤦ꤬ ꤘꤣ ꤢ꤬ꤗꤢꤨ꤭ꤗꤟꤛꤢ꤯
27 ꤢꤩ꤬ ꤢꤧ ꤒꤢ꤬ꤜꤝꤥ ꤠꤛꤢꤓꤛꤢꤩ꤭ ꤗꤢ꤬ ꤢ꤬ꤚꤛꤢ ꤒꤥ꤬꤯
ꤢ꤬ꤞꤛꤢꤖꤢꤨ ꤔꤌꤣ꤬ꤟꤢꤪ, ꤞꤢꤧꤐꤟꤢꤦ ꤔꤢꤪ꤭ ꤓꤢꤨ꤬ꤞꤢꤧ ꤢꤨ꤭ ꤔꤢ ꤔꤟꤢꤧ꤬ꤔꤟꤢꤩ ꤔꤌꤣ꤬꤮ ꤗꤢ꤬ ꤢ꤬ꤚꤛꤢ ꤒꤥ꤬ꤒꤥ꤬꤯
28 ꤊꤢ꤬ꤛꤢ꤭ ꤘꤣ ꤢ꤬ ꤋꤢꤪ꤭ꤕꤟꤢꤩ ꤔꤟꤤꤘꤛꤢꤩ ꤢ꤬ꤔꤟꤢꤩ ꤒꤥ꤬ ꤔꤌꤣ꤬ꤗꤢ꤬,
ꤢ꤬ꤞꤛꤢꤟꤢꤪ ꤔꤢ ꤠꤟꤤ꤭ ꤒꤣ꤬ꤠꤟꤤ꤭ ꤘꤣ ꤢ꤬ꤠꤟꤤ꤭ꤢꤨ꤭ ꤒꤟꤢ꤭ꤕꤚꤟꤢꤪ꤬ ꤊꤛꤢ꤭ꤜꤟꤢꤪ꤭ ꤔꤌꤣ꤬ ꤟꤢꤪ꤯