26
1 ꤊꤢ꤬ꤛꤢ꤭ꤒꤢ꤬ꤊꤢꤧ꤬ ꤔꤌꤣ꤬ꤗꤢ꤬ ꤢꤨ꤭ ꤒꤥ꤭ ꤘꤛꤢ꤬ꤘꤢꤨ꤬ꤐꤟꤢꤦꤑꤟꤢ ꤔꤟꤤꤜꤢꤨ꤭ ꤒꤥ꤬꤯
ꤢ꤬ꤞꤛꤢꤔꤢ ꤓꤛꤢꤩ꤭ꤒꤢ꤬ꤏꤤ ꤒꤥ꤭ ꤒꤟꤢ꤭ ꤊꤟꤢꤩꤊꤟꤢꤨꤋꤢꤧ꤭ ꤒꤥ꤬, ꤊꤟꤢꤩ ꤒꤥ꤭ ꤡꤟꤢꤦ꤬ ꤊꤢꤧꤙꤌꤣ ꤋꤢꤧ꤭ ꤒꤥ꤬ ꤔꤌꤣ꤬ ꤟꤢꤪ꤯
2 ꤢ꤬ꤞꤛꤢꤔꤢ ꤓꤢꤨ꤬ꤘꤤ꤭ꤊꤢꤪꤕꤜꤛꤢ ꤐꤟꤌꤣ꤬ꤓꤥ꤭ꤐꤟꤌꤣ꤬ꤜꤟꤛꤢ꤬ ꤒꤟꤢ꤭ꤥ꤬ꤊꤟꤌꤣ ꤒꤥ꤬ ꤔꤌꤣ꤬ꤟꤢꤪ,
ꤔꤟꤢꤧ꤬ ꤊꤤ꤬ ꤗꤟꤢꤩ꤬ꤞꤢꤦ ꤒꤣ꤬ꤡꤣ꤬꤮ ꤒꤥ꤬ ꤟꤢꤩꤗꤢ꤬, ꤒꤟꤢꤧ꤬ꤏꤢꤪ꤭ꤟꤢ꤭ ꤟꤛꤢ꤭ꤙꤢꤧ꤬ꤡꤟꤛꤢ ꤔꤟꤢꤧ꤬ ꤒꤥ꤬꤯
3 ꤒꤢ꤬ꤞꤤ ꤢ꤬ꤑꤢꤩ꤭ ꤤ꤬ꤕꤜꤤ, ꤗꤟꤛꤢ꤬ꤢꤪꤜꤛꤢ ꤢ꤬ꤑꤢꤩ꤭ ꤢ꤬ꤕꤜꤛꤢꤩ꤬,
ꤊꤢ꤬ꤛꤢ꤭ꤒꤢ꤬ꤊꤢꤧ꤬ ꤑꤟꤢꤋꤢꤨ꤬ ꤢ꤬ꤑꤢꤩ꤭ꤗꤢ꤬ ꤤ꤬ꤗꤟꤢꤦ꤭꤯
4 ꤊꤢ꤬ꤛꤢ꤭ꤒꤢ꤬ꤊꤢꤧ꤬ ꤊꤤ꤬ ꤏꤢꤨ꤬ꤘꤛꤢ꤭ ꤒꤢ꤬ꤋꤝꤥꤒꤢ꤬ꤊꤢꤧ꤬ ꤔꤟꤢꤧ꤬ ꤒꤟꤢꤧ꤬ꤏꤢꤨ꤬ꤘꤛꤢ꤭ ꤟꤢꤩꤚꤢꤪ, ꤟꤢꤩꤊꤟꤢ꤬ꤋꤛꤢꤩ꤭ꤏꤢꤦ꤬ ꤒꤢꤧ꤭ ꤢꤧ꤬ ꤗꤟꤢꤩ꤯
ꤊꤤ꤬ꤗꤟꤢꤒꤥ꤬ ꤟꤢꤩꤗꤢ꤬, ꤔꤟꤢꤧ꤬ꤞꤛꤢ ꤊꤟꤌꤣ꤭ꤊꤛꤢ꤭ ꤔꤢ ꤜꤢꤨ꤭ ꤕꤢ꤭꤯
5 ꤟꤢꤩꤊꤟꤢ꤬ꤋꤛꤢꤩ꤭ꤏꤢꤦ꤬ ꤊꤢ꤬ꤛꤢ꤭ꤒꤢ꤬ꤊꤢꤧ꤬ ꤖꤢꤨ ꤢ꤬ ꤜꤟꤢꤩꤊꤜꤥ꤭ ꤏꤢꤨ꤬ꤘꤛꤢ꤭ꤒꤢ꤬ꤊꤢꤧ꤬ ꤢꤨ꤭ ꤔꤌꤣ꤬꤯
ꤚꤢꤪ ꤔꤢꤪ꤭ ꤞꤢꤧꤑꤢꤩ꤭ ꤢꤧ꤬ ꤔꤢ ꤙꤢ꤮ ꤢ꤬ ꤒꤢ꤬ꤔꤟꤢꤩ꤬ ꤔꤌꤣ꤬, ꤢ꤬ꤒꤟꤢꤧ꤬ꤞꤤꤖꤢꤧ ꤥ꤬ ꤔꤢ ꤟꤤ ꤒꤥ꤬꤯
6 ꤔꤟꤢꤧ꤬ ꤊꤤ꤬ ꤔꤢꤪ꤭ ꤡꤛꤣꤞꤢꤨ꤭ ꤊꤢ꤬ꤛꤢ꤭ꤒꤢ꤬ꤊꤢꤧ꤬ ꤒꤟꤢꤧ꤬ꤚꤤ꤬ꤒꤟꤢꤧ꤬ꤊꤛꤢ꤭ ꤟꤢꤩꤗꤢ꤬,
ꤢ꤬ꤞꤛꤢꤔꤢ ꤔꤟꤢꤧ꤬ ꤕꤟꤢ꤭ꤒꤟꤢꤦ꤭ ꤔꤟꤤꤘꤢꤦ꤬ ꤔꤟꤢꤧ꤬ꤋꤢ꤭ꤘꤟꤌꤣ꤬꤯
ꤢ꤬ꤞꤛꤢꤔꤢ ꤔꤟꤢꤧ꤬ ꤥ꤭ ꤢ꤬ꤡꤢꤦ꤬ꤢ꤬ꤕꤜꤟꤢꤧ꤯
7 ꤊꤢ꤬ꤛꤢ꤭ꤒꤢ꤬ꤊꤢꤧ꤬ ꤊꤚꤝꤥ꤭ꤟꤢꤩꤙꤢꤧ꤬ ꤊꤟꤌꤣ꤭ ꤕꤚꤟꤢꤧ꤬ꤞꤤꤖꤢꤧꤍꤟꤥ ꤔꤌꤣ꤬ꤗꤢ꤬,
ꤢ꤬ꤞꤛꤢꤔꤢ ꤋꤢ꤭ꤘꤟꤌꤣ꤬ꤘꤢ ꤘꤣ ꤔꤢꤪ꤭ꤢꤩ꤬ꤡꤟꤛꤢ ꤕꤢ꤭ ꤜꤢꤨ꤭ꤒꤥ꤬꤯
8 ꤘꤛꤢ꤬ꤘꤢꤨ꤬ꤐꤟꤢꤦꤑꤟꤢ ꤔꤟꤤ ꤊꤢ꤬ꤛꤢ꤭ꤒꤢ꤬ꤊꤢꤧ꤬ ꤔꤌꤣ꤬ꤗꤢ꤬,
ꤢ꤬ꤞꤛꤢꤔꤢ ꤤ꤬ꤙꤤ꤭ꤗꤢ꤬ ꤟꤢꤩ꤬ꤕꤜꤢꤪ꤬ ꤘꤣ ꤖꤛꤢꤡꤟꤢꤪꤜꤟꤥ꤬꤯
9 ꤊꤢ꤬ꤛꤢ꤭ꤒꤢ꤬ꤊꤢꤧ꤬ ꤊꤚꤝꤥ꤭ꤟꤢꤩꤙꤢꤧ꤬ ꤊꤟꤌꤣ꤭ ꤕꤚꤟꤢꤧ꤬ꤞꤤꤖꤢꤧꤍꤟꤥ ꤔꤌꤣ꤬ꤗꤢ꤬,
ꤢ꤬ꤞꤛꤢꤔꤢ ꤞꤢꤪ꤬ꤏꤛꤢ ꤏꤛꤢ ꤊꤢ꤬ꤛꤢ꤭ꤥ꤭ꤗꤟꤢꤦ꤬ꤓꤛꤢꤩ꤭ ꤢ꤬ꤒꤢ꤬ꤋꤢꤨ꤬ꤊꤢꤨ꤭ ꤚꤢꤪ ꤢ꤬ ꤞꤢꤧꤑꤢꤩ꤭ ꤔꤟꤤꤘꤛꤢꤩ ꤒꤥ꤬ ꤔꤌꤣ꤬ ꤟꤢꤪ꤯
10 ꤊꤢ꤬ꤛꤢ꤭ ꤘꤣ ꤢ꤬ ꤡꤛꤣꤘꤢ꤬ꤊꤢꤧ꤬ ꤊꤢ꤬ꤛꤢ꤭ꤒꤢ꤬ꤊꤢꤧ꤬ ꤡꤛꤣꤓꤥ꤭ꤡꤛꤣꤜꤟꤛꤢ꤬ ꤘꤣ ꤊꤜꤛꤢꤜꤟꤥ꤬ ꤔꤌꤣ꤬ꤗꤢ꤬,
ꤢ꤬ꤞꤛꤢꤔꤢ ꤕꤚꤟꤢꤧ꤬ꤋꤢꤧꤊꤜꤛꤢꤩ꤬ ꤋꤢꤧꤙꤢꤪ꤭ꤋꤢꤧꤙꤛꤢꤩ꤬ ꤊꤛꤢ꤭ ꤕꤜꤟꤢꤧ꤯
11 ꤊꤢ꤬ꤛꤢ꤭ꤒꤢ꤬ꤊꤢꤧ꤬ ꤘꤣ ꤢ꤬ ꤗꤟꤢꤩ꤬ ꤒꤢ꤬ꤗꤥ꤭ ꤒꤟꤢꤧ꤬ꤙꤢꤪ꤭ꤙꤛꤢꤩ꤬ ꤔꤌꤣ꤬ꤗꤢ꤬,
ꤢ꤬ꤞꤛꤢꤔꤢ ꤓꤝꤤ꤬ ꤤ꤬ꤜꤛꤢꤩ꤬ꤢꤩ꤬ ꤔꤟꤤꤘꤛꤢꤩꤋꤛꤢꤩ꤭ ꤢ꤬ꤕꤚꤛꤢ꤯
12 ꤔꤟꤢꤧ꤬ ꤤ꤬ꤞꤛꤥ ꤊꤢ꤬ꤛꤢ꤭ꤒꤢ꤬ꤊꤢꤧ꤬ ꤔꤌꤣ꤬ꤗꤢ꤬,
ꤔꤟꤢꤧ꤬ꤒꤟꤢꤧ꤬ꤗꤛꤢꤏꤢꤦ꤭ ꤥ꤬ ꤊꤜꤢꤪ꤭ꤕꤢ꤭ꤡꤢꤪ ꤔꤢ ꤔꤟꤢꤧ꤬ ꤤ꤬ꤞꤛꤥ ꤊꤢ꤬ꤛꤢ꤭ ꤘꤣ ꤢ꤬ ꤒꤢ꤬ꤔꤟꤢꤩ꤬ꤔꤟꤤ ꤢ꤬ꤔꤟꤢꤩ ꤔꤢ ꤢ꤬ ꤞꤢꤧꤑꤢꤩ꤭ꤜꤟꤢꤪ꤭ ꤟꤢꤪ ꤗꤢ꤬ꤔꤢꤚꤢꤪ ꤢ꤬ ꤞꤢꤧꤑꤢꤩ꤭ ꤒꤣ꤬ꤡꤣ꤬꤮ ꤒꤥ꤬ ꤔꤌꤣ꤬ꤒꤣ꤬ꤕꤚꤟꤢꤧ꤬꤯
13 ꤊꤢ꤬ꤛꤢ꤭ꤒꤢ꤬ꤊꤜꤢꤩ꤭ ꤟꤢꤩ ꤔꤢ, “ꤢꤛꤢ꤭ꤞꤤ꤭ ꤥ꤬ ꤘꤣ ꤊꤜꤛꤢꤜꤟꤥ꤬꤯
ꤢꤛꤢ꤭ꤞꤤ꤭ ꤥ꤬ ꤘꤣ ꤊꤜꤛꤢꤘꤢꤧ꤭ꤊꤢꤨ꤭!”
14 ꤊꤢ꤬ꤛꤢ꤭ꤒꤢ꤬ꤊꤜꤢꤩ꤭ ꤔꤌꤣ꤬ ꤢ꤬ ꤊꤢ꤬ꤓꤢꤪ꤬ꤓꤌꤣ꤭ ꤢ꤬ ꤥ꤬ꤗꤛꤢꤩ꤭ ꤊꤟꤢ꤬ꤋꤛꤢꤩ꤭ ꤘꤣ ꤜꤟꤢꤩꤗꤛꤢꤩ꤭ꤊꤢꤨ꤭,
ꤞꤛꤢꤔꤢ ꤊꤢ꤬ꤘꤢ꤭ꤘꤢꤨ꤬ꤜꤢꤧ꤬ ꤜꤢꤨ꤬ꤕꤜꤟꤛꤢ ꤊꤟꤢ꤬ꤋꤛꤢꤩ꤭ꤟꤛꤢ꤭ꤑꤢꤩ꤭ ꤘꤣ ꤊꤢ꤬ꤘꤢ꤭ꤘꤢꤨ꤬ꤊꤢꤨ꤭ ꤔꤌꤣ꤬ ꤟꤢꤪ꤯
15 ꤊꤢ꤬ꤛꤢ꤭ꤒꤢ꤬ꤊꤜꤢꤩ꤭ ꤔꤌꤣ꤬ ꤢ꤬ ꤙꤢꤪꤔꤟꤌꤣ꤭ ꤡꤢꤪꤟꤢꤪ ꤘꤣ ꤘꤤ꤭ꤙꤢꤩ꤭ꤊꤢꤨ꤭ ꤒꤢ꤬ꤘꤣ꤬ꤚꤢꤪ, ꤢ꤬ ꤒꤢ꤬ꤊꤜꤢꤩ꤭ ꤏꤢꤨ꤬ꤔꤟꤌꤣ꤭ ꤘꤣ ꤢ꤬ꤊꤟꤛꤢ꤭ꤊꤢꤨ꤭꤯
16 ꤊꤢ꤬ꤛꤢ꤭ꤒꤢ꤬ꤊꤜꤢꤩ꤭ ꤒꤢ꤬ꤔꤟꤢꤩ꤬ꤔꤟꤤꤘꤛꤢꤩ ꤢ꤬ꤔꤟꤢꤩ ꤔꤢ ꤢ꤬ꤒꤟꤢꤧ꤬ꤞꤤꤖꤢꤧ ꤥ꤬ꤊꤜꤢꤪ꤭ ꤔꤢ ꤕꤚꤟꤢꤧ꤬ꤞꤤꤖꤢꤧ ꤘꤣ ꤢ꤬ ꤟꤢꤩꤊꤟꤢ꤬ꤋꤛꤢꤩ꤭ꤏꤢꤦ꤬ ꤒꤟꤢ꤭ꤒꤟꤢꤩ꤬ ꤡꤟꤛꤢ ꤢꤨ꤭ ꤔꤌꤣ꤬ ꤞꤌꤣ꤭ꤞꤛꤥꤒꤣ꤬ꤕꤚꤟꤢꤧ꤬꤯
17 ꤢꤨ꤭ ꤊꤜꤛꤢꤩ ꤔꤟꤤꤘꤢꤦ꤬ ꤜꤢꤨ꤭ ꤚꤢꤪ ꤊꤢ꤬ꤛꤢ꤭ ꤘꤣ ꤢ꤬ ꤥ꤬ꤘꤢꤦ꤬ ꤢ꤬ꤒꤟꤢꤧ꤬ ꤚꤢꤪ ꤢ꤬ ꤡꤛꤣꤔꤟꤌꤣ꤭ꤊꤜꤛꤢꤩ ꤊꤟꤌꤣ꤭ ꤢꤨ꤭ ꤒꤣ꤬ꤕꤚꤟꤢꤧ꤬ꤕꤚꤟꤢꤧ꤬ ꤔꤌꤣ꤬,
ꤢ꤬ꤞꤛꤢꤔꤢ ꤢ꤬ ꤡꤛꤣꤡꤝꤤ꤬ ꤋꤛꤢꤩ ꤓꤝꤤ꤬ꤋꤢ꤭ꤜꤢꤧ꤬ꤊꤟꤌꤣ ꤔꤌꤣ꤬ꤟꤢꤪ꤯
18-19 ꤊꤢ꤬ꤛꤢ꤭ ꤘꤣ ꤢ꤬ ꤜꤢ꤬ꤟꤥ꤭ꤢꤩ꤬ ꤢꤨ꤭ ꤚꤢꤪ, “ꤠꤢ꤭ ꤟꤢꤩꤙꤛꤢꤩ꤬ ꤞꤤ꤭ ꤕꤚꤢꤧ,” ꤢ꤬ ꤟꤢꤩ ꤔꤌꤣ꤬ꤗꤢ꤬,
ꤢ꤬ꤞꤛꤢꤔꤢ ꤊꤢ꤬ꤛꤢ꤭ ꤒꤢ꤬ꤗꤝꤤ꤭ ꤋꤢꤧ ꤕꤜꤟꤢꤧꤗꤤ꤬ꤢꤦ꤭ ꤘꤣ ꤢ꤬ ꤗꤟꤢꤩ꤬ꤞꤛꤢꤩ꤭ ꤡꤟꤛꤢ ꤢꤨ꤭꤯
20 ꤊꤚꤢꤨ꤬ ꤥ꤬ꤒꤥ꤬ ꤗꤢ꤬ ꤗꤤ꤬ꤕꤟꤤ꤭꤯
ꤕꤚꤟꤢꤧ꤬ꤘꤛꤢꤐꤟꤥ꤬ ꤥ꤬ꤒꤥ꤬ ꤗꤢ꤬, ꤒꤟꤢꤧ꤬ꤊꤜꤛꤢꤩꤒꤟꤢꤧ꤬ꤍꤢ꤭ ꤥ꤬ꤗꤟꤢꤩ꤯
21 ꤊꤢ꤬ꤛꤢ꤭ ꤘꤣ ꤢ꤬ ꤟꤢꤩꤙꤢꤧ꤬ꤥ꤬ꤢꤧ ꤒꤢ꤬ꤗꤥ꤭ꤗꤥ꤭ ꤢꤨ꤭ ꤔꤌꤣ꤬, ꤢ꤬ ꤗꤟꤢꤩ꤬ꤥ꤬ꤢꤧꤓꤛꤢ꤬ ꤕꤟꤥ ꤒꤟꤢꤧ꤬ꤊꤜꤛꤢꤩꤒꤟꤢꤧ꤬ꤍꤢ꤭,
ꤞꤛꤢꤔꤢ ꤢꤨ꤭ ꤤ꤬ꤗꤟꤢꤪ꤭ ꤖꤢꤧ꤬ꤞꤢꤨ꤬ ꤚꤢꤪ ꤢ꤬ꤢꤦ꤭, ꤢꤨ꤭ ꤤ꤬ꤏꤢꤦ ꤊꤚꤢꤨ꤬ ꤚꤢꤪ ꤢ꤬ꤊꤟꤛꤢ꤭ ꤔꤌꤣ꤬ꤟꤢꤪ꤯
22 ꤍꤟꤥꤘꤛꤢꤐꤟꤥ꤬ ꤗꤢ꤬ ꤔꤟꤤꤘꤢ꤭ꤗꤟꤥ꤬꤯
ꤔꤟꤌꤣ꤭ꤙꤢꤧ꤬ꤒꤟꤌꤣ ꤞꤢꤧꤕꤜꤢꤪ꤬ ꤟꤢꤪꤊꤢꤨ꤭꤯
23 ꤊꤢ꤬ꤛꤢ꤭ꤞꤢꤧꤕꤜꤢꤪ꤬ꤗꤢꤨ꤭ꤗꤟꤛꤢ ꤟꤢꤩꤙꤢꤧ꤬ ꤙꤢꤕꤜꤝꤤ꤭ ꤡꤟꤛꤢꤚꤛꤢ,
ꤞꤛꤢꤔꤢ ꤢꤨ꤭ ꤕꤜꤢꤪꤙꤢꤕꤜꤝꤤ꤭ꤒꤝꤟꤥꤚꤛꤢ ꤚꤢꤦ꤭ ꤔꤢ ꤕꤟꤢꤪ꤬ꤟꤢꤩ꤬ ꤔꤌꤣ꤬ ꤟꤢꤪ꤯
24 ꤊꤢ꤬ꤛꤢ꤭ ꤘꤣ ꤢ꤬ ꤞꤢꤧꤓꤢꤩ꤬ ꤢꤨ꤭ ꤔꤌꤣ꤬, ꤢ꤬ ꤟꤢꤩꤙꤢꤧ꤬ꤙꤤ ꤔꤟꤤꤘꤛꤢꤩ ꤔꤢ ꤍꤟꤥꤗꤟꤥ꤬꤯
ꤗꤢ꤬ꤔꤢꤚꤢꤪ ꤘꤣ ꤢ꤬ꤞꤢꤧꤕꤜꤢꤪ꤬ꤊꤢꤨ꤭ ꤔꤌꤣ꤬, ꤢ꤬ ꤒꤢ꤬ꤐꤛꤢꤩ꤬ ꤜꤢ꤬ꤟꤥ꤭ ꤏꤛꤣ꤭ꤏꤢꤦ꤮ ꤕꤚꤢꤧ ꤢꤨ꤭꤯
25 ꤢ꤬ ꤟꤢꤩꤙꤢꤧ꤬ꤗꤟꤥ꤬ ꤔꤟꤢꤧ꤬ ꤒꤢ꤬ꤘꤣ꤬ꤚꤢꤪ ꤐꤟꤢꤦꤢꤩ꤬ ꤒꤢꤧ꤭ ꤜꤢꤨ꤭ ꤗꤟꤢꤩ꤯
ꤢ꤬ꤞꤢꤧꤕꤜꤢꤪ꤬ꤊꤢꤨ꤭ ꤔꤌꤣ꤬, ꤢ꤬ ꤥ꤬ꤙꤢ꤭ ꤡꤢꤪ ꤔꤢ ꤒꤟꤢꤧ꤬ꤗꤢꤨ꤭ꤗꤟꤛꤢ ꤞꤌꤣ꤭ꤞꤛꤥ ꤒꤣ꤬ꤡꤣ꤬꤯
26 ꤢ꤬ ꤜꤢ꤬ꤟꤥ꤭ꤙꤤ ꤔꤟꤤꤘꤛꤢꤩ ꤢ꤬ꤒꤟꤢꤧ꤬ꤞꤢꤧꤋꤢꤞꤢꤧꤓꤢꤩ꤬ ꤢꤨ꤭ ꤔꤢ ꤍꤟꤥꤗꤟꤥ꤬꤯
ꤒꤢ꤬ꤘꤣ꤬ꤚꤢꤪ ꤢꤨ꤭ ꤕꤝꤟꤥ꤭꤮ ꤒꤣ꤬ꤕꤚꤟꤢꤧ꤬ ꤊꤟꤢꤦ ꤞꤢꤧꤑꤢꤩ꤭ꤜꤟꤢꤪ꤭ ꤢ꤬ꤒꤟꤢꤧ꤬ꤗꤢꤨ꤭ꤗꤟꤛꤢ ꤔꤌꤣ꤬ꤕꤢ꤭꤯
27 ꤊꤢ꤬ꤛꤢ꤭ ꤘꤣ ꤢ꤬ ꤤ꤬ꤠꤟꤢꤧ꤭ ꤒꤟꤢ꤭ꤐꤟꤢ꤭ ꤟꤢꤩ꤬ꤊꤢꤨ꤭ ꤘꤣ ꤢꤨ꤭ ꤊꤟꤢꤦ ꤜꤢ꤬ꤒꤟꤢ꤭ꤔꤟꤌꤣ꤭ ꤢ꤬ꤑꤢꤩ꤭ꤔꤌꤣ꤬, ꤢ꤬ ꤊꤟꤢꤦ ꤜꤢ꤬ꤒꤟꤢ꤭ꤔꤟꤌꤣ꤭ ꤔꤟꤤꤘꤛꤢꤩ ꤋꤛꤢꤩ꤭ꤞꤛꤢꤘꤢꤦ꤬ ꤕꤢ꤭꤯
ꤊꤢ꤬ꤛꤢ꤭ ꤘꤣ ꤢ꤬ ꤊꤟꤢꤦꤚꤟꤢꤩ ꤓꤢꤨ꤬ꤜꤟꤢꤪ꤭ꤒꤟꤢ꤭ꤙꤢꤧ꤬ ꤢꤨ꤭ ꤔꤢ ꤜꤟꤢꤪ ꤔꤌꤣ꤬, ꤜꤟꤢꤪ ꤊꤟꤢꤦ ꤜꤟꤢꤨ꤬ꤜꤢꤪ꤭ ꤊꤟꤢ꤬ꤋꤛꤢꤩ꤭ ꤙꤢꤧ꤬ ꤋꤛꤢꤩ꤭ꤞꤛꤢꤘꤢꤦ꤬ ꤜꤢꤨ꤭ ꤕꤢ꤭꤯
28 ꤊꤢ꤬ꤛꤢ꤭ ꤘꤣ ꤢ꤬ ꤟꤢꤩꤙꤢꤧ꤬ꤜꤢ꤬ꤟꤥ꤭ ꤗꤟꤢꤩ꤬ꤡꤟꤛꤢꤩ꤭ꤗꤟꤢꤩ꤬ꤡꤟꤢꤦ꤬ ꤢꤨ꤭ ꤔꤌꤣ꤬ꤗꤢ꤬, ꤢ꤬ ꤞꤢꤧꤓꤢꤩ꤬ ꤢꤨ꤭꤯
ꤊꤢ꤬ꤛꤢ꤭ ꤘꤣ ꤢ꤬ ꤓꤢꤨ꤬ꤞꤢꤧ ꤜꤢ꤬ꤟꤥ꤭ ꤢꤨ꤭ ꤒꤢ꤬ꤟꤢꤩ꤬ꤔꤌꤣ꤬, ꤢ꤬ ꤊꤟꤢꤦ ꤕꤛꤢꤩꤊꤛꤢ꤭ ꤕꤢ꤭꤯