དཱ༌ནི༌ཨེལ༌ལི༌ བྲིའ༌ ཛད༌ཁན༌ སྤེ༌ཆ༌།
དཱ༌ནི༌ཨེལ༌ལི༌ སྤེ༌ཆའེ༌ སྐོར༌
ཆོས༌སི༌ ནང༌ང༌ ཁས༌པ༌གུན༌ནི༌ འིན༌ན༌ སྤེ༌ཆའེ༌ ལིའུ༌ 9 དང༌ 10 རྐང༌པ༌ ཉིས༌པ༌ གྱུད༌ཏེ༌ འི༌ སྤེ༌ཆ༌ དཱ༌ནི༌ཨེལ༌ལི༌ བྲིས༌ཁན༌ སལ༌པོ༌ ཧ༌གོ༌ཏེ༌ ཨིན༌ནོག༌། མད༌ཐཱའེ༌ སྤེ༌ཆའེ༌ ལིའུ༌ 24:15 ནང༌ང༌ གཙོ༌བོ༌ ཡེ༌ཤུ༌ མ༌ཤི༌ཀའེ༌ "ཁམ༌ལོག༌ ཚི༌ཏུ༌ ཅོ༌ཁན༌བོ༌" དཱ༌ནི༌ཨེལ༌ལི༌ བྲིས༌ཏེ༌ ཨིན༌ཁན༌ནི༌ སྤང༌པོ༌ སལ༌ལ༌ ཛདས༌ ཀ༌བོ༌ དཱ༌ནི༌ཨེལ༌ལི༌ སྤེ༌ཆའེ༌ 9:27, 11:31 དང༌ 12:11 ནང༌ང༌ བྲིས༌ཏེ༌ ཡོད༌ཏེ༌ ཨིན༌ནོག༌།
འི༌ སྤེ༌ཆ༌ དཱ༌ནི༌ཨེལ༌ལི༌ ཧ༌ལམ༌ གཙོ༌བོ༌ ཡེ༌ཤུ༌ ལྟམས༌སི༌ སང༌ ལོ༌ 600 སྔུན༌ལ༌, ཀ༌བོ༌ གྱལ༌པོ༌ སཱའི༌རས༌སི༌ བ༌བེ༌ལོན༌ལ༌ ཕམ༌ཀལ༌ཏེ༌ ང༌ཡོག༌ག༌ ཁྱོང༌ཁན༌ ཏུས༌སི༌ ཉེ༌ཁོར༌ལ༌ བྲིའ༌ཛད༌ཏེ༌ ཨིན༌ནོག༌།
འི༌ སྤེ༌ཆའེ༌ ནང༌ང༌ ཁག༌ཅན༌ ལབ༌ཞ༌བོ༌ དཀོན༌མཆོག༌ ནམ༌ཁའ༌ དང༌ ས༌ ཉིས༌ཀོའེ༌ གྱལ༌པོ༌ ཡང༌ ཁོང༌, མིའི༌ གྱལ༌སྲིད༌ ཚང༌མའེ༌ཀ༌ ཝང༌སྲུལ༌ཁན༌ ཡང༌ དཱ༌ནི༌ཨེལ༌ལ༌ ཐོང༌ཁན༌ནི༌ ཞལ༌ཟིགས༌ སྣ༌ཚོགས༌སི༌ ནང༌ང༌ དཀོན༌མཆོག༌ག༌ གྱབ༌གལ༌ ཅོ༌ཁན༌ ཚང༌མའེ༌ཀ༌ ཁོང༌ང༌ གྱལ༌ཁའ༌ ཐོབ༌ཁན༌བོ༌ སྟན༌ན༌ ཛདས༌། ༼དཱ༌ནི༌ཨེལ༌ 7:11, 26-27, 8:25, 9:27, 11:45༽
དཱ༌ནི༌ཨེལ༌ལི༌ སྤེ༌ཆ༌ ཁག༌ཉིས༌སི༌ ནང༌ང༌ བགོས༌ཏེ༌ ཡོད༌ཏེ༌ ཨིན༌ནོག༌, ཏང༌པོ༌ ལིའུ༌ 1-6 ཚོག༌པ༌ ཀ༌བོའེ༌ ནང༌ང༌ བ༌བེ༌ལོན༌ནི༌ ནང༌ང༌ ཇུང༌ཁན༌གུན༌ནི༌ གྱལ༌རབས༌ དང༌ དཱ༌ནི༌ཨེལ༌ དང༌ ཁོའེ༌ ཕྲོ༌པ༌ ཤཱད༌རག༌, མེ༌ཤཱག༌ དང༌ ཨ༌བེད༌ནི༌གོ༌ གུན༌ནི༌ དཀོན༌མཆོག༌གི༌ཀ༌ ཨིད༌ཤེས༌ ཅོ༌ཁན༌ནི༌ སྐོར༌ བྲིས༌ཏེ༌ ཨིན༌ནོག༌། ཁོང༌ ཞི༌ཀོའེ༌ དཀོན༌མཆོག༌གི༌ བཀའ༌ ཁའ༌ཉན༌ཏེ༌ རྩང༌མ༌ མན༌ཁན༌ནི༌ ཁར༌ཇི༌ མ༌ཟོས༌ ཡང༌ གྱལ༌པོ༌ དང༌ ཁོའེ༌ སྐུན༌དྲ༌ ཆག༌ མ༌ཕུལ༌ལ༌ ཤི༌ཅེས༌ལ༌ ཐད༌ ཏེ༌བོའེ༌ཕིའ༌ ཁོང༌གུན༌ ཆད༌པ༌ སྣ༌ཚོགས༌ནེ༌ དཀོན༌མཆོག༌གི༌ ཧ༌ལས༌ཤེས༌སི༌ ཆག༌ལས༌ གྱུད༌ཏེ༌ སྐྱོབ༌བ༌ ཛདས༌། ཁོང༌གུན༌ནི༌ ཨིད༌ཤེས༌ དང༌ དཀོན༌མཆོག༌གི༌ ཧ༌ལས༌ཤེས༌སི༌ ཆག༌ལས༌གུན༌ ཐོང༌ཏེ༌ ཏེ༌ཏུས༌སི༌ གྱལ༌པོ༌གུན༌ནི༌ དཀོན༌མཆོག༌ག༌ སྟོད༌པ༌ ཕུལས༌ ཡང༌ ཁ༌ཅིག༌གི༌ ཡ༌ཝ༌ དཀོན༌མཆོག༌གི༌ཀ༌ ཏད༌པ༌ ཅོས༌།
ཉིས༌པ༌ ཁག༌པོ༌ ལིའུ༌ 7-12 ཚག༌པ༌ ཀ༌བོའེ༌ ནང༌ང༌ དཱ༌ནི༌ཨེལ༌ལ༌ ཐོང༌ཁན༌ནི༌ ཞལ༌ཟིགས༌ སྣ༌ཚོགས༌གུན༌ སལ༌པོ༌ ཅོ༌ཅེས༌ དང༌ ཏེ༌བོའེ༌ ཏོན༌ ཤད༌ཏེ༌ ཡོད༌ཏེ༌ ཨིན༌ནོག༌། ཏེ༌གུན༌ནི༌ ནང༌ང༌ དཀོན༌མཆོག༌, གྱལ༌པོ༌ ཚང༌མའེ༌ཀ༌ ཝང༌སྲུལ༌ལ༌ ཛད༌ཁན༌ནི༌ གྱལ༌པོ༌ ཞུགས༌ཁན༌བོ༌ སལ༌པོ༌ ཛད༌ཏེ༌ ཨིན༌ནོག༌། འི༌ ཞལ༌ཟིགས༌གུན༌ནི༌ ནང༌ང༌ མ༌ཡོངས༌པའེ༌ ཏུས༌སི༌ ནང༌ང༌ ཇིག༌རྟེན༌ནི༌ཀ༌ གྱལ༌སྲིད༌ སྣ༌ཚོགས༌ བིང༌ཏེ༌ ཝང༌སྲུལ༌ཅེས༌ ཀ༌བོའེ༌ ནང༌ང༌ ཏང༌པོའ༌ ཉིས༌པའེ༌ ཀ༌ནེ༌, ཉིས༌པའ༌ སུམ༌པའེ༌ ཀ༌ནེ༌, སུམ༌པའ༌ ཞི༌པ༌ ཝང༌སྲུལ༌པའེ༌ ཀ༌ནེ༌ ཕམ༌ ཕོག༌ཅེས༌། སྟིང༌ཇུག༌གི༌ རྐང༌པའེ༌ ནང༌ང༌ དཱ༌ནི༌ཨེལ༌ལི༌ མ༌ཡོངས༌པའེ༌ ཏུས༌སི༌ ཇིགས༌ནང༌ཅན༌ནི༌ ཏུས༌གུན༌ནི༌ ནང༌ང༌ ང༌དང༌ དཀོན༌མཆོག༌གི༌ མི༌གུན༌ནི༌ ཀ༌ཟུག༌གི༌ མི༌ཚེ༌ ཕུད༌ཅེས༌པོ༌ སལ༌པོ༌ ཛདས༌། དཱ༌ནི༌ཨེལ༌ལི༌ མི༌ཚེ༌ ཕུད༌ཅེས༌པོ༌ སྤེ༌ཞིག༌ ཨིན༌ནོག༌། ང༌དང༌གུན༌ནི༌ སྟིང༌ཇུག༌ ཚག༌པ༌ ཆད༌མེད༌ དཱ༌ནི༌ཨེལ༌ ཙོགས༌ལ༌ ཨིད༌ཤེས༌ཅན༌ནི༌ མི༌ཚེ༌ ཕུད༌གོས༌ ཏེ༌ནེ༌ དཀོན༌མཆོག༌གི༌ ཇིག༌རྟེན༌པ༌གུན༌ལ༌ ཁྲིམས༌ཅད༌དི༌ ཏུས༌ དཱ༌ནི༌ཨེལ༌ ཙོགས༌ལ༌ ང༌དང༌ངའང༌ སོལ༌རས༌ ཐོབ༌ཨིན༌།
1
བ༌བེ༌ལོན༌ནི༌ ནང༌ང༌ དཱ༌ནི༌ཨེལ༌ལི༌ ལོབ༌ཇོང༌།
1:1-21
1 ཡ༌ཧུ༌དཱ༌པའེ༌ གྱལ༌པོ༌ ཡ༌ཧོའ༌ཀིམ༌མི༌ ཝང༌སྲུལ༌ལི༌ ལོ༌ སུམ༌པའེ༌ ནང༌ང༌ བ༌བེ༌ལོན༌ནི༌ གྱལ༌པོ༌ ནེ༌བུ༌ཀཱ༌ནེ༌ཟཱར༌རི༌ ཡེ༌རུ༌ཤ༌ལེམ༌མི༌ཀ༌ སྤུང༌གོལ༌ ཅོས༌ཏེ༌ གྱལ༌སའ༌ མག༌མི༌ སྐོར༌ཏེ༌ བོརས༌།
2 ཡ༌ཝའེ༌ ཡ༌ཧུ༌དཱ༌པའེ༌ གྱལ༌པོ༌ ཡ༌ཧོའ༌ཀིམ༌ དང༌ དཀོན༌མཆོག༌གི༌ ཆོད༌ཁང༌ངི༌ ཅ༌ལག༌ ཁ༌ཅིག༌ ཁོའེ༌ ལག༌ག༌ སྟདས༌ ཡང༌ ནེ༌བུ༌ཀཱ༌ནེ༌ཟཱར༌རི༌ ཏེ༌ ཅ༌ལག༌གུན༌ བ༌བེ༌ལོན༌ནི༌ ནང༌ང༌ ཁོ༌རང༌ངི༌ ལྷའེ༌ ཆོད༌ཁང༌ངི༌ བང༌ཛོད༌དི༌ ནང༌ང༌ བོརས༌།
3 ཏེ༌ནེ༌ གྱལ༌པོའེ༌ ཁོ༌རང༌ངི༌ ལོན༌པོ༌ རྩད༌ཅན༌ ཨཤ༌ཕེ༌ནེས༌ལ༌ ཟེརས༌, “ཨིས༌ར༌ཨེལ༌པ༌གུན༌ནི༌ ཕྲོ༌ནེ༌ གྱལ༌གྱུད༌ ཡང༌ ཀྲག༌ཞན༌ ཁ༌ཅིག༌ ཁར༌ལ༌ ཁྱོང༌།
4 ཁོང༌གུན༌ ཞུ༌ནུ༌, ཟུགས༌སི༌ ཐོག༌ནེ༌ སྐྱོན༌ མེད༌ཁན༌, ངམ༌ཤན༌, ཤེས༌རབས༌ དང༌ རིག༌པ༌ཅན༌, ལོབ༌ཇོང༌ གྱལ༌ལ༌ ལེན༌ཁན༌, གྱོགས༌པ༌ ཧ༌གོ༌ཁན༌, གྱལ༌པོའ༌ ཞབས༌ཏོག༌ ཞུ༌ཅེས༌ལ༌ ཇོན༌པོ༌ ཡོང༌གོས༌། ཁོང༌གུན༌ལ༌ བ༌བེ༌ལོན༌པའེ༌ སྤེ༌ཆ༌ སྣ༌ཚོགས༌ སིལ༌ཅེས༌ དང༌ སྐད༌ ལབ༌གོས༌།
5 ཁོང༌གུན༌ནི༌ ཕིའ༌ ཞག༌ཏང༌ ཚད༌ ནང༌ཞིན༌ ཁར༌ཇི༌ དང༌ རྒུན༌ཆང༌ གྱལ༌པོའེ༌ ཁར༌ནེ༌ ཏོང༌ ཡང༌ ལོ༌ སུམ༌ ལོབ༌ཇོང༌ ལེན༌ཏེ༌ སྟིང༌ནེ༌ ཁོང༌གུན༌ནི༌ གྱལ༌པོའ༌ ཞབས༌ཏོག༌ ཞུ༌ཅེས༌ གོ༌ཟུག༌ ཅོ༌ཨིན༌།”
6 ཁོང༌གུན༌ནི༌ ཕྲོའ༌ ཡ༌ཧུ༌དཱ༌པ༌ དཱ༌ནི༌ཨེལ༌, ཧ༌ན༌ནཱི༌ཡཱ༌, མི༌ཤཱེལ༌ དང༌ ཨ༌ཟར༌ཡཱ༌ གུན༌ ཡོད༌པིན༌།
7 གྱལ༌པོའེ༌ ལོན༌པོ༌ རྩད༌ཅན༌ནི༌ ཏེ༌ ཁྱོག༌ཏོང༌གུན༌ནི༌ མིང༌ སྤོས༌ཏེ༌ དཱ༌ནི༌ཨེལ༌ལ༌ བེལ༌ཏེ༌ཤ༌ཟར༌, ཧ༌ན༌ནཱི༌ཡཱ༌ ཤཱད༌རག༌, མི༌ཤཱེལ༌ལ༌ མེ༌ཤཱག༌ དང༌ ཨ༌ཟར༌ཡཱ༌ ཨ༌བེད༌ནི༌གོ༌ ཏགས༌།
8 ཨིན༌ནའང༌ དཱ༌ནི༌ཨེལ༌ལི༌ གྱལ༌པོའེ༌ ཟན༌ དང༌ རྒུན༌ཆང༌ ཐུངས༌ཏེ༌ ཁོ༌རང༌ ཚི༌ཏུ༌ མི༌ཅོ༌ཅེས༌ སྟན༌པོ༌ ཐག༌ཅདས༌ ཡང༌ ཏེ༌ ཚི༌ཏུ༌ ཅོ༌ཁན༌ནི༌ ཟན༌ ཡང༌ རྒུན༌ཆང༌ མི༌ཐུང༌ཅེས༌ལ༌ ཁོའ༌ གོངས༌པ༌ སལ༌ ཟེར༌ཏེ༌ ཁོའེ༌ ལོན༌པོ༌ རྩད༌ཅན༌ལ༌ ཞུ༌ཝ༌ ཕུལས༌།
9 ཡང༌ དཀོན༌མཆོག༌གི༌ ཏེ༌ ལོན༌པོའ༌ དཱ༌ནི༌ཨེལ༌ལི༌ཀ༌ སྙིང༌རྗེ༌ སྐྱེས༌ཏེ༌ ཆོགས༌སྐྱོར༌ ཅོ༌ཅུག༌ག༌ ཛདས༌,
10 ཨིན༌ནའང༌ ལོན༌པོའེ༌ དཱ༌ནི༌ཨེལ༌ལ༌ ཟེརས༌, “ཁྱོ༌ཞའ༌ འི༌གུན༌ ཟའ༌ དང༌ ཐུང༌ ཅུག༌ཅེས༌ལ༌ ངའ༌ བཀའ༌ ཏང༌ཁན༌ ངའེ༌ གཙོ༌བོ༌ གྱལ༌པོའ༌ ངའ༌ ཇིགས༌ས༌ རག༌, ཅིའ༌ཟེར༌ན༌ གྱལ༌པོའེ༌ ཁྱོ༌ཞའ༌ དང༌ ལོ༌ ཅིག༌པོའེ༌ ཞན༌ ཞུ༌ནུ༌གུན༌ནི༌ སང༌ ཁྱོ༌ཞའ༌ རིད༌པ༌ ཐོང༌ན༌, ཁོང༌ངི༌ ང༌ ཆད༌པ༌ སལ༌ཏེ༌ ངའེ༌ གོ༌ ཅད༌ཅུག༌ ཨིན༌།”
11 ཏེ༌ནེ༌ ལོན༌པོ༌ རྩད༌ཅན༌ནི༌ དཱ༌ནི༌ཨེལ༌, ཧ༌ན༌ནཱི༌ཡཱ༌, མི༌ཤཱེལ༌, དང༌ ཨ༌ཟར༌ཡཱ༌ སྲུང༌ང༌ སྐོས༌ཁན༌ནི༌ མི༌བོའ༌ དཱ༌ནི༌ཨེལ༌ལི༌ ཟེརས༌,
12 “ཞག༌པོ༌ རྕུ༌, ང༌ཞའ༌ ཆུ༌ དང༌ ཚོད༌མ༌ ཟའ༌ལ༌ ཏངས༌ཏེ༌ ལྟའ༌ ཛད༌།
13 ཞག༌པོ༌ རྕུའི༌ སྟིང༌ནེ༌ གྱལ༌པོའེ༌ ཁར༌ཇི༌ ཟའ༌ཁན༌ནི༌ ཞུ༌ནུ༌གུན༌ ཉམ༌པོ༌ ང༌ཞའ༌ ལྡུར༌ར༌ ཛད༌, ཏེ༌ནེ༌ ཉེ༌རང༌ང༌ ཐོང༌ཁན༌ ནང༌ཞིན༌ ཐག༌ཅད༌ད༌ ཛད༌།”
14 ཁོའེ༌ ཏེ༌བོའ༌ ཁའ༌ཆམས༌ཏེ༌ ཞག༌པོ༌ རྕུ༌ སྟག༌ཅད༌ ཅོས༌།
15 ཞག༌པོ༌ རྕུའི༌ སྟིང༌ནེ༌ ཁོང༌གུན༌ནི༌ ཟུགས༌པོ༌, གྱལ༌པོའེ༌ ཁར༌ཇི༌ ཟའ༌ཁན༌ནི༌ ཞུ༌ནུ༌གུན༌ནི༌ སང༌ མང༌ང༌ ཁྲངས༌པོ༌ དང༌ ཤེད༌ཅན༌ ཐོང༌ངད༌པིན༌།
16 ཏེ༌ནེ༌ སྲུང༌ཁན༌ནི༌ མི༌བོའེ༌ ཁོང༌གུན༌ལ༌ གྱལ༌པོའེ༌ ཁར༌ཇི༌ དང༌ རྒུན༌ཆང༌ གུན༌ནི༌ ཚབས༌ལ༌ ཁོང༌གུན༌ལ༌ ཚོད༌མ༌ ཟའ༌ལ༌ ཏངས༌།
17 དཀོན༌མཆོག༌གི༌ ཁོང༌ ཞི༌ཀོའ༌ སྤེ༌ཆ༌ སྣ༌ཚོགས༌ ཚང༌མ༌ སིལ༌ཅེས༌སི༌ ཤེས༌རབས༌ དང༌ རིག༌པ༌ སལ༌ལ༌ ཛདས༌། དཱ༌ནི༌ཨེལ༌ལ༌ ཞལ༌ཟིགས༌ དང༌ ཉི༌ལམ༌ སྣ༌ཚོགས༌ ཚང༌མའེ༌ ཏོན༌ ཧ༌གོ༌ཅེས༌སི༌ ཁྱུད༌ སལ༌ལ༌ ཛདས༌།
18 ཏེ༌ནེ༌ ལོབ༌ཇོང༌ངི༌ ལོ༌ སུམ༌ ཚར༌ར༌ཅིག༌ ལོན༌པོ༌ རྩད༌ཅན༌ནི༌ ཁོང༌ ཚང༌མ༌ གྱལ༌པོ༌ ནེ༌བུ༌ཀཱ༌ནེ༌ཟཱར༌རི༌ དུན༌ལ༌ ཁྱེརས༌།
19 ཡང༌ གྱལ༌པོའེ༌ ཁོང༌གུན༌ ཉམ༌པོ༌ སྤེ༌ར༌ ཏངས༌། དཱ༌ནི༌ཨེལ༌, ཧ༌ན༌ནཱི༌ཡཱ༌, མི༌ཤཱེལ༌, དང༌ ཨ༌ཟར༌ཡཱ༌ ཞི༌ཀོ༌ ཙོགས༌ ཤེས༌རབས༌ཅན༌ སུའང༌ མ༌བིང༌, ཏེན༌ན༌བོའེ༌ཕིའ༌ ཁོང༌གུན༌ གྱལ༌པོའེ༌ ཞབས༌ཏོག༌གི༌ ལས༌སི༌ ནང༌ང༌ སྐོས༌།
20 ཤེས༌རབས༌ དང༌ རིག༌པ༌ ཚང༌མའེ༌ སྐོར༌ལ༌ གྱལ༌པོའེ༌ ཏྲི༌ཝ༌ ཏྲི༌ཁན༌ནི༌ ལན༌, གྱལ༌སྲིད༌ གང༌པོའེ༌ མོ༌ ཏབ༌ཁན༌ དང༌ ཤི༌ཁན༌ནི༌ སེམས༌ཉིད༌ བོད༌ཁན༌ ཚང༌མའེ༌ སང༌ ཁོང༌གུན༌ནི༌ རྕུ༌ལྡབ༌ གྱལ༌ལ༌ ཏང༌ངད༌པིན༌།
21 ཡང༌ དཱ༌ནི༌ཨེལ༌ གྱལ༌པོ༌ སཱའི༌རས༌སི༌ ཝང༌སྲུལ༌ལི༌ ལོ༌ ཏང༌པོ༌ ཚག༌པ༌ གྱལ༌པོའེ༌ ལས༌གུན༌ ཅོ༌ཨིན༌ ཏེ༌རུ༌ ལུས༌།