4
བོ༌འཟ༌སི༌ རུཐ༌ ཉམ༌པོ༌ ན༌མ༌ ཅོས༌།
4:1-12
1 བོ༌འཟ༌ གྲོང༌ཁྱེར༌རི༌ གྱས༌སྒོའེ༌ཀ༌ སོང༌ཏེ༌ དུགས༌། རུཐ༌ལ༌ ཤད༌ཁན༌ནི༌ ནཱའོ༌མིའི༌ མག༌པའེ༌ ཉེན༌གྲུང༌ ཉེ༌མོ༌ ཏེ༌རུ༌ ཡོང༌ང༌ཅིག༌ བོ༌འཟ༌སི༌ ཁོའ༌ ཟེརས༌, “འི༌ཀ༌ ཡོངས༌ཏེ༌ སའེ༌ཀ༌ དུག༌, ང༌ ཁྱོ༌རང༌ ཉམ༌པོ༌ སྤེ༌ར༌ ཏང༌གོ༌ཤེས༌ ཡོད༌།” ཁོང༌གུན༌ སའི༌ཀ༌ དུགས༌།
2 ཏེ༌ནེ༌ བོ༌འཟ༌སི༌ གྲོང༌ཁྱེར༌རི༌ འུ༌སྐྱོང༌ རྕུ༌ ཁོའེ༌ ཞུ༌ཝ༌ ཕུལ༌ཏེ༌ ཡོང༌ཁན༌གུན༌ལ༌ སའེ༌ཀ༌ ཞུགས༌ ཟེརས༌ ཡང༌ ཁོང༌གུན༌ དུགས༌།
3 བོ༌འཟ༌སི༌ ནཱའོ༌མིའི༌ མག༌པའེ༌ ཉེན༌གྲུང༌ ཉེ༌མོ༌བོའ༌ ཟེརས༌, “མོ༌འབ༌ནེ༌ ལོགས༌ཏེ༌ ཡོང༌ཁན༌ནི༌ ནཱའོ༌མིའི༌ ང༌དང༌ངི༌ ཉེན༌གྲུང༌ ཨེ༌ལི༌མེ༌ལེག༌གི༌ ས༌ཀྱད༌པོ༌ ཙོང༌དུག༌།
4 ངའེ༌ ཏེ༌བོའེ༌ སྐོར༌ལ༌ ཤད༌ཏེ༌ ཁྱོ༌རང༌ང༌ ཏེ༌བོ༌ ཉོ༌ཅེས༌སི༌ སྐབས༌ ཏང༌ཨིན༌ སམ༌ ཀལ༌ཏེས༌ ཁྱོ༌རང༌ ཐད༌དད༌ན༌ འི༌ འུ༌སྐྱོང༌གུན༌ནི༌ དུན༌ལ༌ ཏེ༌བོ༌ ཉོ༌གོས༌ ཨིན༌ནའང༌ ཐད༌ད༌ མེད༌ན༌ དག༌ས༌ ངའ༌ ཟེར༌ ཅིའ༌ཟེར༌ན༌ ཁྱོ༌རང༌ངི༌ སྟིང༌ནེ༌ ཏེ༌བོ༌ ཉོ༌ཅེས༌སི༌ ཁག༌ ང༌ ཕོག༌ག༌ནོག༌།”
མི༌བོའེ༌ ལན༌ཏངས༌, “ངའེ༌ ཏེ༌བོ༌ ཉོ༌ཨིན༌།”
5 ཏེ༌ནེ༌ བོ༌འཟ༌སི༌ ཁོའ༌ ཟེརས༌, “ཁྱོ༌རང༌ངི༌ ནཱའོ༌མི༌ ཀ༌ནེ༌ ས༌ཀྱད༌ ཉོ༌ན༌, མག༌པ༌ ཀྲོངས༌ཁན༌ མོ༌འབ༌མ༌ རུཐ༌ ཉམ༌པོའང༌ ཁྱོ༌རང༌ངི༌ ན༌མ༌ ཅོ༌གོས༌ ཅིའ༌ཟེར༌ན༌ ཤི༌ཁན༌ནི༌ ས༌ཀྱད༌ དང༌ མིར༌གྱུད༌ ལུས༌ཤེས༌ལ༌ ཁོའ༌ ཕྲུ༌གུ༌ ཇོར༌གོས༌།”
6 ཏེ༌བོ༌ ཚོར༌ར༌ཅིག༌ ཉེན༌གྲུང༌ བུ༌ཚའེ༌ ཟེརས༌, “ཏེ༌ཟུག༌ ཨིན༌ན༌ ངའེ༌ ཏེ༌ ས༌ཀྱད༌པོ༌ མི༌ ཉོ༌ ཅིའ༌ཟེར༌ན༌ ཏེ༌བོ༌ ངའེ༌ ཕྲུ༌གུ༌གུན༌ལ༌ ནོར༌སྐལ༌ལ༌ ཐོབ༌ཅེས༌ མེ༌རག༌། ཉེ༌རང༌ངི༌ ས༌ཀྱད༌པོ༌ ཉོའ༌ ཛད༌, ཏེ༌བོ༌ ངའེ༌ མི༌ཉོ༌།”
7 ༼ཏ༌ ཏེ༌ ཏུས༌ལ༌ ས༌ཀྱད༌ ཉོ༌ཅེས༌ ཡ༌ ཙོང༌ཅེས༌ སྟན༌པོ༌ ཅོ༌ཅེས༌ལ༌, ཅིག༌པོའེ༌ ཞན༌ ཅིག༌པོའ༌ རང༌ངི༌ པ༌བུ༌ ཕུད༌ཏེ༌ ཏང༌ངད༌པིན༌། ཏེན༌ན༌ ཟུག༌གི༌ ཨིས༌ར༌ཨེལ༌ལི༌ ནང༌ང༌ ཁྲིམས༌ ནང༌ཞིན༌ ཚོང༌ལེན༌གུན༌ ཐག༌ ཅད༌དད༌པིན༌།༽
8 ཏེ༌བོའེ༌ཕིའ༌ ཉེན༌གྲུང༌ ཉེ༌མོ༌བོའེ༌ ཁོ༌རང༌ངི༌ པ༌བུ༌ པུད༌ཏེ༌ བོ༌འཟ༌ལ༌ ཏངས༌ ཡང༌ ཟེརས༌, “ཉེ༌རང༌ངི༌ ས༌ཀྱད༌པོ༌ ཉོའ༌ ཛད༌།”
9 ཏེ༌ནེ༌ བོ༌འཟ༌སི༌ ཏེ༌རུ༌ ཡོད༌ཁན༌ འུ༌སྐྱོང༌གུན༌ དང༌ མི༌གུན༌ལ༌ ཟེརས༌, “དི༌རིང༌ ཨེ༌ལི༌མེ༌ལེག༌, ཀི༌ལི༌འོན༌ དང༌ མཧ༌ལོན༌ གུན༌ནི༌ ཨིན༌ཁན༌ ཅི༌ཚང༌མ༌ ནཱའོ༌མིའི༌ ཀ༌ནེ༌ ངའེ༌ ཉོས༌ཁན༌ནི༌ སྤང༌པོ༌ ཁྱོ༌ཞ༌གུན༌ ཨིན༌།
10 ཤི༌ཁན༌ནི༌ ས༌ཀྱད༌ དང༌ མིར༌གྱུད༌ ལུས༌ཤེས༌ ཡང༌ ཁོའེ༌ ཕྲུ༌གུ༌གུན༌ལ༌ ཁོའེ༌ གྱུ༌ནོར༌ ནོར༌སྐལ༌ལ༌ ཐོབ༌ཅེས༌སི༌ ཕིའ༌ མོ༌འབ༌མ༌ མཧ༌ལོན༌ ཀྲོངས༌ཁན༌ནི༌ ན༌མ༌ རུཐ༌ ཉམ༌པོ༌ ངའེ༌ བག༌སྟོན༌ ཅོད༌། འི༌བོའེ༌ སྤང༌པོ༌ དི༌རིང༌ ཁྱོ༌ཞའ༌ ཚང༌མ༌ ཨིན༌ནོག༌།”
11 ཏེ༌ནེ༌ གྱས༌སྒོའེ༌ དུན༌ལ༌ ཡོད༌ཁན༌ནི༌ འུ༌སྐྱོང༌གུན༌ དང༌ མི༌ཚང༌མའེ༌ ལན༌ཏངས༌, “ང༌ཞ༌གུན༌ སྤང༌པོ༌ ཨིན༌། ཡ༌ཝའེ༌ ཉེ༌རང༌ངི༌ ཁང༌པའ༌ ཡོང༌ཁན༌ནི༌ བུ༌མོ༌བོ༌ རེ༌ཅལ༌ དང༌ ལི༌ཡ༌ ཙོགས༌ ཛད༌ཤིག༌, ཁོང༌གུན༌ གྱུད༌ཏེ༌ ཨིས༌ར༌ཨེལ༌ལི༌ མིར༌གྱུད༌ ཚང༌མ༌ ཇུངས༌ཏེ༌ ཨིན༌ནོག༌། ཨེཕ༌ར༌ཐཧ༌ མི༌རིགས༌སི༌ ནང༌ང༌ ཉེ༌རང༌ ཅི༌ས༌ཐོག༌ནེ༌ ཆུག༌པོ༌ གྱུར༌ཏེ༌ བེད༌ལེ༌ཧེམ༌མི༌ ནང༌ང༌ མིང༌ཅན༌ གྱུར༌ཤིག༌།
12 ཡང༌ འི༌ ན༌ཆུང༌ གྱུད༌ཏེ༌ ཡ༌ཝའེ༌ ཉེ༌རང༌ང༌ པུར༌གྱུད༌ སལ༌ཁན༌གུན༌, ཏ༌མར༌ལ༌ སྐྱེ༌ཁན༌ ཡ༌ཧུ༌དཱའེ༌ བུ༌ཚ༌ པེ༌རེཟ༌ ཙོགས༌ ཡོང༌ཤིག༌།”
དཱ༌བིད༌དི༌ ཕ༌མེས༌པོ༌གུན༌།
4:13-22
13 ཏེ༌ནེ༌ བོ༌འཟ༌སི༌ རུཐ༌ ཁོ༌རང༌ངི༌ ཁང༌པའ༌ ཁྱེརས༌ ཡང༌ ཁོ༌ ཁོའེ༌ ན༌མ༌ གྱུར༌། ཁོང༌ ཉིས༌ཀོ༌ ཛོམས༌ཏེ༌ ཡ༌ཝའེ༌ རུཐ༌ སྐྱེ༌ཅེས༌མ༌ཞིག༌ གྱུར༌ཅུག༌ག༌ ཛདས༌ ཡང༌ ཁོའ༌ བུ༌ཚ༌ཞིག༌ ཇོར༌།
14 ཏེ༌ནེ༌ གྲོང༌ཁྱེར༌རི༌ བུ༌མོ༌གུན༌ནི༌ ནཱའོ༌མིའ༌ ཟེརས༌, “ཡ༌ཝའ༌ སྟོད༌པ༌། ཁོང༌ངི༌ ཁྱོ༌རང༌ང༌ གྱུད༌ཟིན༌ སྐྱོབ༌ཁན༌ བུ༌ཚ༌ཞིག༌ སལ༌ལ༌ ཛད༌ཏེ༌ ཨིན༌ནོག༌། ཨིས༌ར༌ཨེལ༌ལི༌ ནང༌ང༌ ཁོ༌ མིང༌ཅན༌ གྱུར༌ཤིག༌།
15 ཁོའེ༌ ཉེ༌རང༌ངི༌ མི༌ཚེ༌ སོས༌ཏེ༌ རྒད༌པོའེ༌ ཏུས༌ལ༌ ཉེ༌རང༌ང༌ སྟ༌སྟོག༌ ཅོ༌ཨིན༌ ཅིའ༌ཟེར༌ན༌ བུ༌ཚ༌ རྡུན༌ནི༌ སང༌ མང༌ང༌ ཉེ༌རང༌ང༌ ཅེས༌པ༌ ཅོ༌ཁན༌ ཉེ༌རང༌ངི༌ བུ༌ཚའེ༌ ན༌མའ༌ ཏེ༌ བུ༌ཚ༌ ཇོར༌ཏེ༌ ཨིན༌ནོག༌།”
16 ཏེ༌ནེ༌ ནཱའོ༌མིའི༌ ཕྲུ༌གུ༌བོ༌ པང༌ང༌ ཁུར༌ཏེ༌ ཁོའ༌ སྟ༌སྟོག༌ ཅོས༌།
17 ཁྱིམ༌ཚེས༌པའེ༌ བུ༌མོ༌གུན༌ནི༌ ཟེརས༌, “ཏ༌ འི༌ བུ༌ཚ༌ ནཱའོ༌མི༌ ཚ༌འོ༌ ཨིན༌ནོག༌།” ཡང༌ ཁོང༌གུན༌ནི༌ ཏེ༌ ཕྲུ༌གུ༌བོའེ༌ མིང༌ང༌ ཨོ༌བེད༌ ཏགས༌། ཁོང༌ ཡེ༌ཤེའེ༌ ཨ༌བ༌ གྱུར༌ ཡང༌ ཡེ༌ཤེའ༌ དཱ༌བིད༌དི༌ ཨ༌བ༌ ཨིན༌ནོག༌།
18 པེ༌རེཟ༌སི༌ པུར༌གྱུད༌གུན༌ནི༌ ཐོ༌ འི༌བོ༌ ཨིན༌།
པེ༌རེཟ༌ ཧེཟ༌རོན༌ ནི༌ ཨ༌བ༌,
19 ཧེཟ༌རོན༌ རམ༌མི༌ ཨ༌བ༌,
རམ༌ ཨམ༌མི༌ན༌དབ༌བི༌ ཨ༌བ༌,
20 ཨམ༌མི༌ན༌དབ༌ ནཧ༌ཤོན༌ནི༌ ཨ༌བ༌,
ནཧ༌ཤོན༌ སལ༌མོན༌ནི༌ ཨ༌བ༌,
21 སལ༌མོན༌ བོ༌འཟ༌སི༌ ཨ༌བ༌,
བོ༌འཟ༌ ཨོ༌བེད༌དི༌ ཨ༌བ༌,
22 ཨོ༌བེད༌ ཡེ༌ཤེའེ༌ ཨ༌བ༌,
ཡེ༌ཤེ༌ དཱ༌བིད༌དི༌ ཨ༌བ༌ ཨིན༌པིན༌།