3
ནེ༌བུ༌ཀཱ༌ནེ༌ཟཱར༌རི༌ སེར༌རི༌ སྐུན༌དྲ༌།
3:1-30
1 གྱལ༌པོ༌ ནེ༌བུ༌ཀཱ༌ནེ༌ཟཱར༌རི༌ སེར༌རི༌ སྐུན༌དྲ༌ མི༌ཀྲར༌ 27 ཐོན༌པོ༌ ཡང༌ མི༌ཀྲར༌ 3 ཟམ༌ཤིག༌ ཞང༌ཅན༌ ཞང༌ཅུགས༌ཏེ༌ བ༌བེ༌ལོན༌ ཡུལ༌ཇོངས༌སི༌ དུ༌རའེ༌ ཐང༌ངི༌ཀ༌ ལངས༌ཏེ༌ བོརས༌།
2 ཏེ༌ནེ༌ གྱལ༌པོའེ༌ ཀོ༌ས༌ ཐོན༌པོའེ༌ ཀའ༌ལོན༌གུན༌, ཞན༌ སྤོན༌བོ༌གུན༌, ལོན༌པོ༌གུན༌, ཁ༌དའ༌ ཏང༌ཁན༌གུན༌, བང༌ཛོད༌དི༌ ལོན༌པོ༌གུན༌, ཁྲིམ༌སྤོན༌ རྩད༌ཅན༌གུན༌ དང༌ ཞན༌ ཁྲིམ༌སྤོན༌གུན༌, ཡུལ༌ཇོངས༌གུན༌ནི༌ འུ༌སྐྱོང༌ ཚང༌མ༌, ཏེ༌ སྐུན༌དྲའ༌ ཅོལ༌ཅེས༌ གོ༌ཟུག༌ ཅོ༌ཅེས༌སི༌ གའ༌སྟོན༌ རྩི༌ཅེས༌ལ༌ བོདས༌།
3 ཏེ༌བོའེ༌ཕིའ༌ གྱལ༌པོ༌ ནེ༌བུ༌ཀཱ༌ནེ༌ཟཱར༌རི༌ ཞང༌ཅུག༌ཁན༌ནི༌ སྐུན༌དྲའ༌ ཅོལ༌ཅེས༌སི༌ གའ༌སྟོན༌ རྩིའ༌ལ༌ ཝང༌སྲུལ༌པ༌ ཚང༌མ༌ ཛོམས༌ ཡང༌ ཏེ༌བོའེ༌ དུན༌ལ༌ ལངས༌ཏེ༌ དུགས༌།
4 ཏེ༌ནེ༌ གྱལ༌པོའེ༌ ཁྱབ༌གྲགས༌ ཅོ༌ཁན༌བོའེ༌ སྐད༌ ཆེན༌མོའེ༌ ནང༌ང༌ ཟེརས༌, “གྱལ༌ཁམས༌, སྐད༌ དང༌ མི༌ ཚང༌མ༌, གྱལ༌པོའེ༌ བཀའ༌ སལ༌དུག༌,
5 ཏུང༌, ལིང༌བུ༌, སུར༌ན༌, ཏར༌ཅན༌ནི༌ རོལ༌མོ༌, ཧརྦ༌ དང༌ ཞན༌ རོལ༌མོ༌ གུན༌ ཕུའ༌ ཚོར༌ར༌ཅིག༌ ཁྱོ༌ཞ༌གུན༌ སའེ༌ཀ༌ གྱེལ༌ཏེ༌ གྱལ༌པོ༌ ནེ༌བུ༌ཀཱ༌ནེ༌ཟཱར༌རི༌ ཞང༌ཅུག༌ཁན༌ སེར༌རི༌ སྐུན༌དྲ༌ ཆག༌ཕུལ༌ གོས༌།
6 ཆག༌ མ༌ ཕུལ༌ཁན༌གུན༌ ཏེན༌ན༌མལ༌ལ༌ མེ༌ ཀྲག༌པོ༌ བར༌ཨིན༌ ཡོད༌ཁན༌ནི༌ དོང༌ངི༌ ནང༌ང༌ ཕང༌ཨིན༌།”
7 ཏེ༌ནེ༌ ཏུང༌, ལིང༌བུ༌, སུར༌ན༌, ཏར༌ཅན༌ནི༌ རོལ༌མོ༌, ཧརྦ༌ དང༌ ཞན༌ རོལ༌མོ༌ གུན༌ནི༌ སྐད༌ ཚོར༌ར༌ཅིག༌ གྱལ༌ཁམས༌, སྐད༌ དང༌ མི༌ ཚང༌མ༌ སའེ༌ཀ༌ གྱེལ༌ཏེ༌ གྱལ༌པོ༌ ནེ༌བུ༌ཀཱ༌ནེ༌ཟཱར༌རི༌ ཞང༌ཅུག༌ཁན༌ སེར༌རི༌ སྐུན༌དྲ༌ ཆག༌ཕུལས༌།
8 ཨིན༌ནའང༌ སྐར༌རྩིས༌ ཏང༌ཁན༌ ཁ༌ཅིག༌ གྱལ༌པོའེ༌ཀ༌ སོང༌ཏེ༌ ཡ༌ཧུ༌དཱ༌པ༌གུན༌ནི༌ སྐོར༌ལ༌ མ༌བེབས༌ ཅོས༌།
9 ཁོང༌གུན༌ནི༌ གྱལ༌པོའ༌ ཟེརས༌, “གྱལ༌པོའེ༌ སྐུ༌ཚེ༌ རིང༌ཤིག༌།
10 ཉེ༌རང༌ངི༌ ཏུང༌, ལིང༌བུ༌, སུར༌ན༌, ཏར༌ཅན༌ནི༌ རོལ༌མོ༌, ཧརྦ༌ དང༌ ཞན༌ རོལ༌མོ༌ གུན༌ནི༌ སྐད༌ ཚོར༌ར༌ཅིག༌ མི༌ཚང༌མ༌ སའེ༌ཀ༌ གྱེལ༌ཏེ༌ ཉེ༌རང༌ངི༌ ཞང༌ཅུག༌ཁན༌ སེར༌རི༌ སྐུན༌དྲ༌ ཆག༌ཕུལ༌
11 ཡང༌ ཆག༌ མ༌ ཕུལ༌ཁན༌གུན༌ མེ༌ ཀྲག༌པོ༌ བར༌ཨིན༌ ཡོད༌ཁན༌ནི༌ དོང༌ངི༌ ནང༌ང༌ ཕང༌ཨིན༌ མོལ༌ཏེ༌ བཀའ༌ སལས༌།
12 ཨིན༌ནའང༌ ཉེ༌རང༌ངི༌ བ༌བེ༌ལོན༌ནི༌ ཡུལ༌ཇོངས༌སི༌ ནང༌ང༌ ཝང༌སྲུལ༌པ༌ ཛདས༌ཁན༌ ཡ༌ཧུ༌ད༌པ༌ ཤཱད༌རག༌, མེ༌ཤཱག༌ དང༌ ཨ༌བེད༌ནི༌གོ༌ གུན༌ནི༌ ཉེ༌རང༌ངི༌ མོལ༌ཁན༌བོའ༌ ནང༌སྟག༌ མ༌ཏང༌ང༌, ཉེ༌རང༌ངི༌ ལྷ༌ལྷ༌མོ༌གུན༌ནི༌ ཞབས༌ཏོག༌ མ༌ཞུའ༌ ཡང༌ ཉེ༌རང༌ངི༌ ཞང༌ཅུག༌ཁན༌ སེར༌རི༌ སྐུན༌དྲ༌ ཅོལ༌ཏེ༌ ཆག༌ མ༌ཕུལས༌།”
13 ཏེ༌བོ༌ ཚོར༌ར༌ཅིག༌ གྱལ༌པོའ༌ མ༌སྲན༌ཏྲེ༌ སྲོ༌ ཡོངས༌ ཡང༌ ཤཱད༌རག༌, མེ༌ཤཱག༌ དང༌ ཨ༌བེད༌ནི༌གོ༌ གུན༌ལ༌ བོདས༌ ཡང༌ ཁོང༌གུན༌ ཡོང༌ང༌ཅིག༌
14 གྱལ༌པོའེ༌ ཁོང༌གུན༌ལ༌ ཏྲིས༌, “ཤཱད༌རག༌, མེ༌ཤཱག༌ དང༌ ཨ༌བེད༌ནི༌གོ༌, ཁྱོ༌ཞའེ༌ ངའེ༌ ལྷ༌ལྷ༌མོ༌གུན༌ནི༌ ཞབས༌ཏོག༌ མ༌ཞུའ༌ ཡང༌ ངའེ༌ ཞང༌ཅུག༌ཁན༌ སེར༌རི༌ སྐུན༌དྲའ༌ ཆག༌ མ༌ཕུལ༌ཁན༌བོ༌ ཀྲང༌པོ༌ ཨིན༌ནོག༌ག༌?
15 ངའེ༌ ཁྱོ༌ཞའ༌ སྐབས༌ ཅིག༌ ཏང༌ཨིན༌ ཏུང༌, ལིང༌བུ༌, སུར༌ན༌, ཏར༌ཅན༌ནི༌ རོལ༌མོ༌, ཧརྦ༌ དང༌ ཞན༌ རོལ༌མོ༌ གུན༌ནི༌ སྐད༌ ཚོར༌ར༌ཅིག༌, སྐུན༌དྲའ༌ ཆག༌ཕུལ༌ཏེ༌ ཅོལ༌ན༌ གྱལ༌ལ༌ ཆེན༌, མ༌ ཅོལ༌ན༌ ངའེ༌ ཁྱོ༌ཞའ༌ ཏེན༌ན༌མལ༌ལ༌ མེ༌ ཀྲག༌པོ༌ བར༌ཨིན༌ ཡོད༌ཁན༌ནི༌ དོང༌ངི༌ ནང༌ང༌ ཕང༌ ཅུག༌ཨིན༌། ཏེ༌ནེ༌ ཁྱོ༌ཞའ༌ ངའེ༌ ལག༌ནེ༌ ཀ༌ ལྷ༌ལྷ༌མོ༌བོ༌ སྐྱོབ༌ ཐུབ༌ཨིན༌?”
16 ཤཱད༌རག༌, མེ༌ཤཱག༌ དང༌ ཨ༌བེད༌ནི༌གོ༌ གུན༌ནི༌ ལན༌ ཏངས༌, “ཀྱེ༌ གྱལ༌པོ༌ ནེ༌བུ༌ཀཱ༌ནེ༌ཟཱར༌ ལེ༌, ང༌ཞའེ༌ ང༌ཞ༌རང༌ སྐྱོན༌མེད༌ སྟན༌ཅེས༌སི༌ རྩོན༌གྲུས༌ མི༌ཅོ༌།
17 ཀལ༌ཏེས༌ ང༌ཞའ༌ མེ༌ ནང༌ང༌ ཕང༌ང༌ ཛད༌ན༌, ང༌ཞའེ༌ ཞབས༌ཏོག༌ ཞུ༌ཁན༌ནི༌ དཀོན༌མཆོག༌གི༌ ང༌ཞའ༌ སྐྱོབ༌ ཐུབ༌ཨིན༌། ཁོང༌ངི༌ ང༌ཞའ༌ ཉེ༌རང༌ངི༌ ལག༌པ༌ནེ༌ སྐྱོབ༌བ༌ ཛད༌ཨིན༌།
18 ཁོང༌ངི༌ སྐྱོབ༌བ༌ མ༌ཛད༌ནའང༌ ཉེ༌རང༌ང༌ འི༌བོ༌ གྱུས༌ ཆ༌གོས༌, ང༌ཞའེ༌ ཉེ༌རང༌ངི༌ ལྷ༌ལྷ༌མོ༌གུན༌ལ༌ ཞབས༌ཏོག༌ ཡ༌ ཉེ༌རང༌ངི༌ ཞང༌ཅུག༌ཁན༌ སེར༌རི༌ སྐུན༌དྲའ༌ མན༌ནེ༌ ཆག༌ མི༌ཕུལ༌།
19 ཏེ༌ནེ༌ གྱལ༌པོའ༌ ཤཱད༌རག༌, མེ༌ཤཱག༌ དང༌ ཨ༌བེད༌ནི༌གོ༌ གུན༌ནི༌ཀ༌ མ༌སྲན༌ཏྲེ༌ སྲོ༌ ཡོངས༌ ཡང༌ ཁོང༌གུན༌ནི༌ ཆོགས༌ལ༌ ཁོའེ༌ སེམས༌ གྱུར༌ཏེ༌ མེ༌བོ༌ རྡུན༌ ལྡབ༌ ཚན༌ཏེ༌ ཅོ༌ཅེས༌ལ༌ ཟེརས༌།
20 གྱལ༌པོའེ༌ ཁོ༌རང༌ངི༌ ཚང༌མའེ༌ སང༌ ཤེད༌ཅན༌ མག༌མི༌ ཁ༌ཅིག༌ག༌ ཁོང༌གུན༌ ལྡམས༌ཏེ༌ ཏེ༌ ནང༌ང༌ ཕང༌ཅེས༌ལ༌ བཀའ༌ ཏངས༌།
21 ཏེ༌ནེ༌ མག༌མི༌གུན༌ནི༌ ཀོས༌, ཀང༌ཙེ༌, ཏི༌བི༌ དང༌ ཞན༌ ཀོས༌ལག༌ གུན༌ གོན༌གོན༌པ༌ ཁོང༌གུན༌ ལྡམས༌ཏེ༌ མེ༌ ནང༌ང༌ ཕངས༌།
22 གྱལ༌པོའ༌ མ༌ སྲན༌ཏྲེ༌ སྲོ༌ ཡོངས༌ཏེ༌ མེ༌བོ༌ ཏེ༌ཟམ༌ ཚན༌ཏེ༌ ཅོ༌ཅེས༌ལ༌ བཀའ༌ ཏངས༌ པ༌སང༌ ཁོང༌གུན༌ མེ༌ ནང༌ང༌ ཕང༌ཁན༌ནི༌ མག༌མི༌གུན༌ མེའ༌ ཞེན༌ཏེ༌ ཤི༌།
23 ཏེ༌ མི༌ སུམ༌ཀོ༌ སྟན༌པོ༌ ལྡམས༌ཏེ༌ ཀྲག༌པོ༌ མེ༌ ནང༌ང༌ ཕངས༌།
24 ཏེ༌ནེ༌ གྱལ༌པོ༌ ནེ༌བུ༌ཀཱ༌ནེ༌ཟཱར༌ ཧེ༌རཱན༌ སོང༌ཏེ༌ ཆོམས༌ ཡང༌ ཁོ༌རང༌ངི༌ ཁ༌དའ༌ ཏང༌ཁན༌གུན༌ལ༌ ཏྲིས༌, “ང༌དང༌ངི༌ མེ༌ ནང༌ང༌ མི༌ སུམ༌ ལྡམས༌ཏེ༌ མ༌ཕངས༌ པིན༌ན༌?”
ཁོང༌གུན༌ནི༌ ལན༌ ཏངས༌, “ཏན༌ཏན༌ ཕངས༌པིན༌ ལེ༌།”
25 གྱལ༌པོའེ༌ ཟེརས༌, “ལྟོས༌སའང༌། མེ༌ ནང༌ང༌ མ༌ལྡམ༌ཁན༌ དང༌ མེ༌ མ༌ཚིག༌ཁན༌ མི༌ ཞི༌ གྲུལ༌ལ༌ལ༌ ཡང༌ ཞི༌པ༌བོ༌ ཕོ༌ཉ༌ ཙོགས༌ཤིག༌ དུག༌།”
26 ཏེ༌ནེ༌ གྱལ༌པོ༌ མེ༌ དོང༌ངི༌ ཁའེ༌ དུན༌ལ༌ སོང༌ཏེ༌ ཟེརས༌, “ཤཱད༌རག༌, མེ༌ཤཱག༌ དང༌ ཨ༌བེད༌ནི༌གོ༌, དཀོན༌མཆོག༌ ཀུན༌ཝང༌ངི༌ ཞབས༌ཏོག༌པ༌གུན༌ བིང༌ཏེ༌ ཡོང༌།”
ཏེ༌ནེ༌ ཁོང༌གུན༌ མེ༌ ནང༌ནེ༌ བིང༌ཏེ༌ ཡོངས༌།
27 ཀོ༌ས༌ ཐོན༌པོའེ༌ ཀའ༌ལོན༌གུན༌, ཞན༌ སྤོན༌བོ༌གུན༌, ལོན༌པོ༌གུན༌, ཁ༌དའ༌ ཏང༌ཁན༌གུན༌, བང༌ཛོད༌དི༌ ལོན༌པོ༌གུན༌, ཁྲིམ༌སྤོན༌ རྩད༌ཅན༌གུན༌, ཁྲིམ༌སྤོན༌གུན༌ དང༌ ཡུལ༌ཇོངས༌གུན༌ནི༌ འུ༌སྐྱོང༌ ཚང༌མ༌ ཁོང༌གུན༌ལ༌ ཁོར༌ཏེ༌ ལྟས༌། མེ༌ ཁོང༌གུན༌ནི༌ ཟུགས༌པོའ༌ ཅའང༌ ནོད༌པ༌ མ༌ཏང༌ང༌ མ༌ཚད༌ སྲའེ༌ སྲལ༌ཉག༌ ཅིག༌ ཡ༌ ཀོས༌ལག༌ མེའ༌ མ༌ཚིག༌ག༌ ཡང༌ ཁོང༌གུན༌ལ༌ ཏུད༌པའེ༌ ཏྲི༌མའང༌ མེད༌པིན༌།
28 གྱལ༌པོ༌ ནེ༌བུ༌ཀཱ༌ནེ༌ཟཱར༌རི༌ ཟེརས༌, “ཤཱད༌རག༌, མེ༌ཤཱག༌ དང༌ ཨ༌བེད༌ནི༌གོ༌ གུན༌ནི༌ དཀོན༌མཆོག༌ག༌ སྟོད༌པ༌ ཕུལ༌། ཁོང༌ངི༌ ཁོང༌རང༌ངི༌ ཕོ༌ཉ༌ ཀལ༌ལ༌ ཛད༌ཏེ༌ ཁོང༌ང༌ ཨིད༌ཤེས༌ ཅོ༌ཁན༌ནི༌ ཁོང༌ངི༌ ཞབས༌ཏོག༌པ༌གུན༌ སྐྱོབ༌བ༌ ཛདས༌། ཁོང༌གུན༌ནི༌ གྱལ༌པོའེ༌ བཀའ༌ ཁའ༌ མ༌ཉན༌ན༌ ཁོ༌རང༌གུན༌ནི༌ དཀོན༌མཆོག༌ མ༌སྟོག༌ ཞན༌ཞིག༌ག༌ ཅོལ༌ལི༌སང༌ ཤི༌ཅེས༌ལ༌ ཐད༌།
29 གྱལ༌ཁམས༌, སྐད༌ དང༌ མི༌ ཚང༌མའེ༌ ཕྲོ༌ནེ༌ ཤཱད༌རག༌, མེ༌ཤཱག༌ དང༌ ཨ༌བེད༌ནི༌གོ༌ གུན༌ནི༌ དཀོན༌མཆོག༌གི༌ གྱབ༌གལ༌ལ༌ ཟེར༌ཁན༌གུན༌ ཏུམ༌པ༌ ཏུམ༌པའེ༌ ནང༌ང༌ ཅད༌ཏེ༌ ཁོང༌གུན༌ནི༌ ཁང༌པ༌ ཤིགས༌ཏེ༌ མེད༌ཁན༌ ཅོ༌ཅེས༌ལ༌ ངའེ༌ བཀའ༌ ཏང༌ངད༌ ཅིའ༌ཟེར༌ན༌ ཞན༌ ལྷ༌ལྷ༌མོ༌ སུ༌ཞིག༌གའང༌ འི༌ ཙོགས༌ལ༌ སྐྱོབ༌ མི༌ཉན༌།”
30 ཏེ༌ནེ༌ གྱལ༌པོའེ༌ བ༌བེ༌ལོན༌ནི༌ ཡུལ༌ཇོངས༌སི༌ ནང༌ང༌ ཤཱད༌རག༌, མེ༌ཤཱག༌ དང༌ ཨ༌བེད༌ནི༌གོ༌ གུན༌ ཀོ༌ས༌ ཆེན༌མོའེ༌ཀ༌ སྟགས༌།