བིང༌ཏེ༌ ཆའ༌ཁན༌།
བིང༌ཏེ༌ ཆའ༌ཁན༌ནི༌ སྤེ༌ཆའེ༌ སྐོར༌།
ཏམ༌པ༌ སུང༌རབས༌སི༌ ནང༌ང༌ མོ༌ཟེས༌སི༌ འི༌ སྤེ༌ཆ༌ བྲིས༌ཏེ༌ ཨིན༌ཁན༌བོ༌ ངོས༌ལེན༌ ཅོའ༌ནོག༌: སྤེར༌ན༌ འིན༌ན༌ སྤེ༌ཆའེ༌ 17:14, 24:4, 34:27, དང༌ ཡོ༌ཤུའེ༌ སྤེ༌ཆ༌ 8:31། གཙོ༌བོ༌ ཡེ༌ཤུའི༌ ལན༌ མང༌པོ༌ འི༌ སྤེ༌ཆ༌ མོ༌ཟེས༌སི༌ བྲིས༌ཏེ༌ ཨིན༌ནོག༌ མོལས༌ ༼མར༌ཀུས༌ 7:10, 12:26༽ ཡང༌ ལུ༌ཀའེ༌ སྤེ༌ཆ༌ བྲིས༌ཁན༌བོའེང༌ ཏེན༌ན༌ ཙོགས༌ ཟེར༌དུག༌ ༼ལུ༌ཀ༌ 2:22,23།༽
འི༌ཏུས༌སི༌ ཆོས༌སི༌ ནང༌ང༌ ཁས༌པ༌ མང༌པོའེ༌ འི༌ སྤེ༌ཆ༌བོ༌ ཡེ༌ཤུ༌ མ༌ཤི༌ཀ༌ ལྟམས༌སི༌ སང༌ སྔུན༌ནི༌ ལོ༌ 1,446 ཉེ༌ཁོར༌ལ༌ མོ༌ཟེས༌སི༌ བྲིས༌ཏེ༌ ཨིན༌ནོག༌། ཏེ༌བོའེ༌ཕིའ༌ འི༌ ནང༌ང༌ བྲིས༌ཁན༌ ཚང༌མ༌ ཐུཏྲ༌མོས༌ སུམ༌པ༌ དང༌ ཁོའེ༌ བུ༌ཚ༌ ཨ༌མུན༌ཧོ༌ཏེཔ༌ གྱལ༌པོ༌གུན༌ནི༌ ཝང༌སྲུལ༌ལི༌ ཏུས༌ལ༌ ཇུང༌ཏེ༌ ཨིན༌པིན༌ ཡང༌ ཁོང༌གུན༌ནི༌ ཨིས༌ར༌ཨེལ༌པ༌གུན༌ལ༌ མ༌སྲན༌ཏྲེ༌ ནགས༌ སྟནས༌ ཨིན༌ནའང༌ སྟིང༌ཇུག༌ག༌ ཁོང༌གུན༌ ཨི༌ཇིབ༌ནེ༌ བིངས༌ཏེ༌ ཆ༌ཅུག༌ཁན༌བོ༌ ཤད༌ད༌ནོག༌།
གོ༌ཟུག༌གི༌ སྤེ༌ཆའེ༌ ལོ༌རྒྱུས༌པོ༌ ཆད༌མ༌ཅུག༌ག༌ འི༌ སྤེ༌ཆའེ༌ ནང༌ང༌ བྲིས༌ཏེ༌ ཡོད༌ཏེ༌ ཨིན༌ནོག༌ ཏེ༌བོ༌ ཀ༌ཟུག༌གི༌ དཀོན༌མཆོག༌གི༌ ཁོང༌རང༌ངི༌ མི༌གུན༌ ཨི༌ཇིབ༌བི༌ ཚེ༌ཡོག༌ནེ༌ སྐྱོབས༌, ཀ༌ཟུག༌གི༌ མོ༌ཟེས༌ ལུང༌སྟོན༌པའེ༌ ཚུལ༌ལ༌ ལྡམ༌མ༌ ཛད༌ཁན༌, ཁོའེ༌ ཁོང༌ངི༌ མི༌གུན༌ སི༌ནཱའི༌ རིའ༌ ཁྲིད༌ཏེ༌ ཁྱེརས༌, དཀོན༌མཆོག༌གི༌ བཀའ༌རྒྱ༌གུན༌ ཐོབ༌ ཡང༌ དཀོན༌མཆོག༌གི༌ མི༌གུན༌ལ༌ ཀ༌ཟུག༌གི༌ མི༌ཚེ༌ ཕུད༌ཅེས༌ དང༌ ཁོང༌ང༌ ཅོལ༌ཅེས༌ ལབ༌ཁན༌བོ༌ ཨིན༌པིན༌།
མོ༌ཟེས༌ གྱལ༌པོའེ༌ ཁར༌རི༌ ནང༌ང༌ ལྡན༌ཏེ༌ ལོ༌ ཞིབ༌ཅུ༌ ཨི༌ཇིབ༌བི༌ གྱལ༌ལུའི༌ ཚུལ༌ལ༌ ལོབ༌ཇོང༌ དང༌ ཁྱུད༌ ཚང༌མ༌ ཇང༌ཅུགས༌ཏེ༌ དཀོན༌མཆོག༌གི༌ འི༌ ལས༌སི༌ ཕིའ༌ མོ༌ཟེས༌ གྲལ༌གྲིག༌ ཛདས༌, ཏེ༌བོ༌ མ༌ཚད༌ ལོ༌ ཞིབ༌ཅུ༌ ཟོད༌པ༌ ཉམ༌པོ༌ ལུག༌རྫི༌ ཚུལ༌ལ༌ རི༌སྟོང༌ངི༌ ནང༌ང༌ མི༌ཚེ༌ ཕུད༌ཅེས༌ དང༌ སྟིང༌ཇུག༌ག༌ ཨིས༌ར༌ཨེལ༌པ༌གུན༌ ཨི༌ཇིབ༌ནེ༌ ཕིངས༌ཏེ༌ སི༌ནཱའི༌ རིའ༌ ཁྲིད༌ཅེས༌ ཀ༌རུ༌ ཁོའ༌ དཀོན༌མཆོག༌གི༌ བཀའ༌རྒྱ༌གུན༌ ཐོབ༌།
འིན༌ན༌ ཏུས༌ལ༌ དཀོན༌མཆོག༌གི༌ ཁོང༌རང༌ངི༌ ཚན༌ ཡ༌ཝ༌ ཁོང༌རང༌ངི༌ མི༌གུན༌ལ༌ སྔོན༌ཅུག༌ག༌ ཛདས༌, ཏེ༌ཏུས༌ ཚག༌པ༌ ཁོང༌ངི༌ ཏེ༌བོ༌ མ༌ཛད༌ད༌ ཨིན༌པིན༌། དཀོན༌མཆོག༌གི༌ ཁོང༌རང༌ངི༌ སྕོད༌ལམ༌གུན༌ སྔོན༌ཅུག༌ག༌ ཛདས༌: ཀ༌གུན༌ ཁྲིམས༌ཅད༌ ཀྲང༌པོ༌ ཛད༌ཁན༌, སྙིང༌རྗེ༌ དང༌ ཐུག༌རྗེ༌ གངས༌ཁན༌, སྲོ༌ གྱོགས༌པ༌ མ༌ ཡོང༌ཁན༌, ཅམས༌པ༌ གངས༌ཁན༌, ཨིད༌ཤེས༌ཅན༌ དང༌ ཏམ༌པ༌ ཡང༌ སྡིག༌ཅན༌གུན༌ལ༌ ཤགས༌པ༌ སལ༌ཁན༌།
ཁོང༌ངི༌ ཁོང༌རང༌ངི༌ མི༌ ཨིས༌ར༌ཨེལ༌པ༌གུན༌ ཨི༌ཇིབ༌ནེ༌ ཐར༌ཅུག༌ཅེས༌སི༌ ཐབ༌ལྡིངས༌, ཁོང༌ངི༌ ཏམ༌པ༌ བཀའ༌རྒྱ༌, ཁོང༌ངི༌ ཐུགས༌ཐད༌ ནང༌ཞིན༌ ཁོང༌ང༌ ཅོལ༌ཅེས༌, ཨ༌རོན༌ དང༌ ཁོའེ༌ པུར༌གྱུད༌གུན༌ནི༌ བླ༌མའེ༌ ལས༌ གོ༌ཟུག༌ ཅོ༌ཅེས༌, སི༌ནཱའི༌ རི༌ཀ༌ མི༌གུན༌ལ༌ ཁོང༌རང༌ངི༌ ཆད༌དོན༌ སྔོན༌ཅུགས༌ ཀ༌བོ༌ ཀལ༌ཏེས༌ མི༌གུན༌ནི༌ ཁོང༌ངི༌ བཀའ༌རྒྱ༌གུན༌ ཁའ༌ཉན༌ན༌ ཁོང༌ ཁོང༌གུན༌ནི༌ དཀོན༌མཆོག༌ ཡང༌ ཁོང༌གུན༌ ཁོང༌ངི༌ མི༌ གྱུར༌ཨིན༌།
1
ཨི༌ཇིབ༌བི༌ ནང༌ང༌ ཨིས༌ར༌ཨེལ༌པ༌གུན༌།
1:1-22
1 འི༌གུན༌ ཨིས༌ར༌ཨེལ༌ ཡང༌ན༌ ཡ༌ཀོབ༌བི༌ བུ༌ཚ༌ ཁོང༌ ཉམ༌པོ༌ ཨི༌ཇིབ༌བ༌ ཆའ༌ཁན༌གུན༌ ཨིན༌ནོག༌, ཁོང༌ ཚང༌མའེ༌ ནང༌ཚངས༌ གུན༌ནའང༌ ཉམ༌པོ༌ ཡོད༌པིན༌།
2 རུ༌བེན༌, སི༌མེ༌འོན༌, ལི༌ཝི༌, ཡ༌ཧུ༌དཱ༌,
3 ཨིས༌ས༌ཁར༌, ཟེ༌བུ༌ལོན༌, བེན༌ཡཱ༌མིན༌,
4 དཱན༌, ནཕ༌ཐལ༌ལི༌, གཱད༌ དང༌ ཨ༌ཤེར༌ གུན༌ ཨིན༌པིན༌།
5 ཡ༌ཀོབ༌ གྱུད༌ཏེ༌ ཁོའེ༌ མིར༌གྱུད༌ ཚང༌མ༌ རྡུན༌ཅུ༌ ཡོད༌པིན༌, ཡོ༌སེབ༌ ཨི༌ཇིབ༌ ནང༌ང༌ སྔུན༌ལ༌ ཡོད༌ཏེ༌ ཨིན༌ནོག༌།
6 ཏ༌ ཡོ༌སེབ༌, ཁོའེ༌ ཨ༌ཅོ༌ནོ༌ དང༌ ཁོང༌གུན༌ནི༌ མི༌རབས༌ ཚང༌མ༌ ཤི༌།
7 ཨིན༌ནའང༌ ཨིས༌ར༌ཨེལ༌པ༌གུན༌ལ༌ ཕྲུ༌གུ༌ ཇོར༌ ཡང༌ ཁོང༌གུན༌ མ༌མང༌པོ༌ ཕེལ༌ཏེ༌ ཨི༌ཇིབ༌ གང༌པོའེ༌ ནང༌ང༌ གང༌ ཡང༌ མ༌ ཤེད༌ཅན༌ གྱུར༌།
8 ཏེ༌ནེ༌ ཡོ༌སེབ༌བི༌ སྐོར༌ལ༌ ཅའང༌ གྱུས༌ མེད༌ཁན༌ གྱལ༌པོ༌ སོ༌མ༌ཞིག༌ ཨི༌ཇིབ༌བི༌ ཝང༌སྲུལ༌པ༌ གྱུར༌།
9 ཁོའེ༌ ཁོང༌རང༌ངི༌ མི༌གུན༌ལ༌ ཟེརས༌, “འི༌ ཨིས༌ར༌ཨེལ༌པ༌གུན༌ ང༌དང༌གུན༌ནི༌ སང༌ མང༌ང༌ དང༌ ཤེད༌ཅན༌ གྱུར༌ཏེ༌ དུག༌།
10 ཡོང༌ཤིག༌, ང༌དང༌གུན༌ནི༌ ཁོང༌གུན༌ མང༌པོ༌ མི༌ཕེལ༌ཅེས༌སི༌ ཐབས༌ ཙལ༌གོས༌, ཏེ༌མན༌ནེ༌ མག༌གི༌ ཏུས༌ལ༌ ཁོང༌གུན༌ གྲ༌འོ༌གུན༌ ཉམ༌པོ༌ ཛོམས༌ཏེ༌ ང༌དང༌ངི༌ གྱབ༌གལ༌ལ༌ མག༌ ཏངས༌ཏེ༌ འི༌ ཡུལ༌ནེ༌ བིང༌ཏེ༌ ཆའ༌ནོག༌།”
11 ཏེ༌བོའེ༌ཕིའ༌ ཁོང༌གུན༌ནི༌ ཨིས༌ར༌ཨེལ༌པ༌གུན༌ལ༌ ཝང༌ ཉམ༌པོ༌ ལས༌ ནགས༌ཅན༌ ཅོ༌ཅུག༌ཅེས༌ལ༌ སྤོན༌བོ༌གུན༌ སྐོས༌, ཀ༌གུན༌ནི༌ ཁོང༌གུན༌ལ༌ ཨི༌ཇིབ༌བི༌ གྱལ༌པོའེ༌ ཕིའ༌ གྲུ༌ སག༌སའེ༌ གྱལ༌ས༌ པི༌ཐོམ༌ དང༌ རམ༌སིས༌ གུན༌ རྩིག༌ཅུགས༌།
12 ཨིན༌ནའང༌ ཁོང༌གུན༌ནི༌ ཨིས༌ར༌ཨེལ༌པ༌གུན༌ལ༌ ཙམ༌ཤིག༌ མང༌ང༌ ནགས༌ སྟན༌ནའང༌ ཁོང༌གུན༌ མང༌ང༌ ཕེལ༌ཏེ༌ གྱས༌ཨིན༌ སོང༌། ཏེ༌བོའེ༌ ཕིའ༌ ཨི༌ཇིབ༌པ༌གུན༌ ཁོང༌གུན༌ལ༌ ཇིགས༌ཏེ༌
13 ཁོང༌གུན༌ལ༌ སྙིང༌རྗེ༌ མེད༌པ༌ ནགས༌ཅན༌ ལས༌ ཅོ༌ཅུགས༌།
14 ཁོང༌གུན༌ནི༌ ཨིས༌ར༌ཨེལ༌པ༌གུན༌ནི༌ མི༌ཚེ༌ མ༌ འུ༌ཐུགས༌ གྱུར༌ཅུགས༌། ཨི༌ཇིབ༌པ༌གུན༌ནི༌ ཁོང༌གུན༌ལ༌ ཝང༌ ཏངས༌ཏེ༌ པག༌བུ༌, ཀ༌ལག༌ དང༌ ཞིང༌ངི༌ ལས༌ རིགས༌ ཚང༌མ༌ ཅོ༌ཅུག༌གད༌པིན༌ ཡང༌ ལས༌ ཀགས༌པོ༌ ཅོའ༌ལ༌ ཏང༌ཁན༌ ཚང༌མའེ༌ ནང༌ང༌ ཁོང༌གུན༌ནི༌ སྙིང༌རྗེ༌ སྟན༌ན༌ མེད༌པིན༌།
15 ཏེ༌ནེ༌ ཨི༌ཇིབ༌བི༌ གྱལ༌པོའེ༌ ཕྲུ༌གུ༌ ཇོར༌ ཟ༌ནེ༌ རོགས༌ ཅོ༌ཁན༌ ཤིཕ༌རཧ༌ དང༌ པུ༌འཧ༌ ཨིབ༌རི༌པ༌ བུ༌མོ༌གུན༌ལ༌ བཀའ༌ ཏངས༌ཏེ༌ ཟེརས༌,
16 “ཁྱོ༌ཞའེ༌ ཨིབ༌རི༌པ༌ བུ༌མོ༌གུན༌ལ༌ ཕྲུ༌གུ༌ ཇོར༌ཏུས༌ རོགས༌ ཅོ༌ ཟ༌ནེ༌, ཀལ༌ཏེས༌ ཕྲུ༌གུ༌ བུ༌ཚ༌ ཨིན༌ན༌ སོད༌ ཨིན༌ནའང༌ བུ༌མོ༌གུན༌ སོན༌ཏེའ༌ བོར༌།”
17 ཨིན༌ནའང༌ ཕྲུ༌གུ༌ ཇོར༌ཏུས༌ རོགས༌ ཅོ༌ཁན༌གུན༌ དཀོན༌མཆོག༌ག༌ ཇིགས༌ཏེ༌ གྱལ༌པོའེ༌ ཁའ༌ མ༌ཉནས༌ ཡང༌ ཕྲུ༌གུ༌ བུ༌ཚ༌གུན༌ མ༌ སདས༌།
18 ཏེ༌ནེ༌ གྱལ༌པོའེ༌ ཕྲུ༌གུ༌ ཇོར༌ཏུས༌ རོགས༌ ཅོ༌ཁན༌ནི༌ བུ༌མོ༌གུན༌ བོད༌ཏེ༌ ཁྱོངས༌ ཡང༌ ཏྲིས༌, “ཁྱོ༌རང༌གུན༌ནི༌ འི༌བོ༌ ཅི༌ ཅོས༌ཏེ༌ ཨིན༌? ཕྲུ༌གུ༌ བུ༌ཚ༌གུན༌ ཅིའ༌ མ༌སད༌པིན༌?”
19 ཁོང༌གུན༌ནི༌ གྱལ༌པོ༌ ལན༌ཏངས༌, “ཨིབ༌རི༌པ༌ བུ༌མོ༌གུན༌ ཨི༌ཇིབ༌པ༌ བུ༌མོ༌གུན༌ ཙོགས༌ མེད༌ཏེ༌ ཨིན༌ནོག༌། ཁོང༌གུན༌ལ༌ ཕྲུ༌གུ༌ ལ༌མོའ༌ ཇོར༌དུག༌, ང༌ཞའ༌ ལེབ༌བི༌སང༌ སྔུན༌ལ༌ ཁོང༌གུན༌ལ༌ ཕྲུ༌གུ༌ ཇོར༌དུག༌།”
20 དཀོན༌མཆོག༌གི༌ ཏེ༌ བུ༌མོ༌གུན༌ལ༌ ཐུག༌རྗེ༌ ཛདས༌ ཡང༌ ཨིས༌ར༌ཨེལ༌པ༌གུན༌ མང༌ང༌ ཕེལ༌ཨིན༌ སོང༌ཏེ༌ ཤེད༌ཅན༌ གྱུར༌།
21 ཡང༌ ཕྲུ༌གུ༌ ཇོར༌ཏུས༌ རོགས༌ ཅོ༌ཁན༌ནི༌ བུ༌མོ༌གུན༌ དཀོན༌མཆོག༌ག༌ ཇིགས༌ཁན༌ ཡོད༌ པ༌སང༌ དཀོན༌མཆོག༌གི༌ ཁོང༌གུན༌ལའང༌ ཕྲུ༌གུ༌ སལ༌ལ༌ ཛདས༌།
22 ཏེ༌ནེ༌ གྱལ༌པོའེ༌ ཨི༌ཇིབ༌པ༌གུན༌ལ༌ བཀའ༌ ཏངས༌ཏེ༌ ཟེརས༌, “ཨིབ༌རི༌པ༌གུན༌ལ༌ སྐྱེ༌ཁན༌ བུ༌ཚ༌ ཚང༌མ༌ ནཱའེལ༌ ལྩངས༌པོའེ༌ ནང༌ང༌ ཕང༌གོས༌ ཨིན༌ནའང༌ བུ༌མོ༌ ཚང༌མ༌ སོན༌ཏེའ༌ བོར༌།”