2
མོ༌ཟེས༌ སྐྱེས༌།
2:1-10
1 ཏ༌ ལི༌ཝིའི༌ མི༌སྡེ༌ བུ༌ཚ༌ཞིག༌གི༌ ཏེན༌ན༌ མི༌སྡེ༌ བུ༌མོ༌ཞིག༌ ཉམ༌པོ༌ ན༌མ༌ ཅོས༌།
2 ཡང༌ བུ༌མོ༌ ཕན༌ཅེས༌མ༌ གྱུར༌ཏེ༌ བུ༌ཚ༌ཞིག༌ ཇོར༌། བུ༌ཚ༌བོ༌ ལྡེ༌མོ༌ ཕྲུ༌གུ༌ ཞིག༌ ཡོད༌པ༌ ཨ༌མའེ༌ ཕྲུ༌གུ༌བོ༌ ཟླ༌ཝ༌ སུམ༌ སྦས༌ཏེ༌ བོརས༌།
3 ཨིན༌ནའང༌ ཨ༌མའ༌ ཕྲུ༌གུ༌བོ༌ ཏེ༌སང༌ མང༌ང༌ སྦས༌ཏེ༌ བོར༌ མ༌ཉན༌ པ༌སང༌ ཁོའེ༌ པེཔ༌རུས༌ ཟེར༌ཁན༌ནི༌ སོག༌མའ༌ ལས༌ཁན༌ནི༌ པག༌ཙེ༌ ཁྱོངས༌ཏེ༌ ཆུ༌ ནང༌ཀུག༌ག༌ མི༌ཡོང༌ཅེས༌ལ༌ ཏར༌ཀོལ༌ སྐུས༌ ཡང༌ ཕྲུ༌གུ༌བོ༌ ཏེ༌ནང༌ང༌ གྱངས༌ཏེ༌ ནཱའེལ༌ ལྩངས༌པོའེ༌ ཐའ༌མའེ༌ ལྡམ༌བུའི༌ ཕྲོའ༌ བོརས༌།
4 ཕྲུ༌གུའི༌ སྲིང༌མོ༌ ཐག༌རིང༌ཞིག༌ནེ༌ ཁོའ༌ ཅི༌ ཆ༌རུག༌ ལྟེན༌ དུགས༌།
5 གྱལ༌པོའེ༌ བུ༌མོ༌ ཆུའ༌ཞུག༌ག༌ལ༌ ལྩངས༌པོ༌ ཆོགས༌ལ༌ བབས༌ཏེ༌ སོང༌ ཡང༌ ཁོའེ༌ ཡ༌ཏོ༌གུན༌ ལྩངས༌པོའེ༌ ཐའ༌མ༌ གྲུལ༌ཨིན༌ ཁོང༌ སྲུང༌ངད༌པིན༌། གྱལ༌མོའ༌ ལྡམ༌བུའི༌ ཕྲོའ༌ པག༌ཙེ༌ ཞིག༌ ཐོང༌ ཡང༌ ཡ༌ཏོ༌ཞིག༌ ཏེ༌བོ༌ ཁྱོང༌ང༌ལ༌ ལམ༌ ཅུགས༌།
6 ཁོའེ༌ ཏེ༌བོ༌ ཕེའ༌ཅིག༌ ཕྲུ༌གུ༌ བུ༌ཚ༌ཞིག༌ ཐོང༌། ཕྲུ༌གུ༌བོ༌ ངུ༌ཨིན༌ ཡོད༌པ༌ ཁོང༌ང༌ སྙིང༌རྗེ༌ སྐྱེས༌ཏེ༌ ཟེརས༌, “འི༌བོ༌ ཀ༌ནེའང༌ ཨིབ༌རི༌པ༌ ཞིག༌གི༌ ཕྲུ༌གུ༌ ཨིན༌ནོག༌།”
7 ཏེ༌ནེ༌ ཁོའེ༌ སྲིང༌མོའེ༌ གྱལ༌པོའེ༌ བུ༌མོའ༌ ཏྲིས༌, “ང༌ སོང༌ཏེ༌ ཕྲུ༌གུའ༌ འོ༌མ༌ སྟེར༌ཁན༌ནི༌ ཨིབ༌རི༌པ༌ བུ༌མོ༌ཞིག༌ ཉེ༌རང༌ངི༌ ཕིའ༌ ཙལ༌ཏེ༌ ཁྱོང༌ང༌?”
8 གྱལ༌མོའེ༌ ཟེརས༌, “སོང༌ ཡང༌ ཙོལ༌།” ཏེ༌ནེ༌ བུ༌མོ༌བོ༌ སོང༌ ཡང༌ ཕྲུ༌གུའི༌ ཨ༌མ༌ ཁྲིད༌ཏེ༌ ཁྱོངས༌།
9 གྱལ༌མོའེ༌ ཏེ༌ བུ༌མོ༌བོའ༌ ཟེརས༌, “འི༌ ཕྲུ༌གུ༌བོ༌ ཁྱེར༌ ཡང༌ ངའེ༌ ཕིའ༌ འོ༌མ༌ སྟེར༌ཏེ༌ སྟ༌སྟོག༌ ཅོས༌། ངའེ༌ ཁྱོ༌རང༌ང༌ ལ༌ཆ༌ ཏང༌ཨིན༌།” ཏེ༌ནེ༌ བུ༌མོའེ༌ ཕྲུ༌གུ༌ ཁྱེརས༌ ཡང༌ འོ༌མ༌ སྟེར༌ཏེ༌ ཁོའ༌ སྟ༌སྟོག༌ ཅོས༌།
10 ཕྲུ༌གུ༌ ཆེན༌མོ༌ ཆའ༌ཅིག༌ ཁོའེ༌ ཨ༌མའེ༌ ཁོ༌ གྱལ༌པོའེ༌ བུ༌མོ༌ ཡོད༌ས༌ ཁྱེརས༌ ཡང༌ ཕྲུ༌གུ༌ ཁོའེ༌ བུ༌ཚ༌ གྱུར༌། ཏེ༌ནེ༌ གྱལ༌མོའེ༌ ཟེརས༌, “ངའེ༌ ཁོ༌ ཆུའི༌ ནང༌ནེ༌ ཕིངས༌ཏེ༌ ཨིན༌ པ༌སང༌ ངའེ༌ ཁོའེ༌ མིང༌ང༌ མོ༌ཟེས༌ ཏག༌ཨིན༌།”
མོ༌ཟེས༌ མི༌དིའན༌ལ༌ ཤོར༌ཏེ༌ སོང༌།
2:11-25
11 ལྡན༌ཏེ༌ སྟིང༌ནེ༌ མོ༌ཟེས༌ ཞག༌ཤིག༌ ཁོ༌རང༌ངི༌ མི༌ ཨིབ༌རི༌པ༌གུན༌ ཡོད༌ས༌ ཕི༌ལོག༌ག༌ སོང༌ ཡང༌ ཁོའ༌ ཁོང༌གུན༌ལ༌ ནགས༌ཅན༌ ལས༌ ཅོ༌ ཅུག༌ཁན༌བོ༌ ཐོང༌། ཁོའ༌ ཨི༌ཇིབ༌པ༌ ཞིག༌གི༌ ཁོ༌རང༌ངི༌ མི༌ ཨིབ༌རི༌པ༌ཞིག༌ག༌ རྡུང༌ཨིན༌ ཐོང༌།
12 མོ༌ཟེས༌སི༌ ཉེ༌ཁོར༌ ཚང༌མ༌ལ༌ ལྟས༌ ཡང༌ སུ༌ཞིག༌གའང༌ མ༌ཐོང༌པ༌ ཁོའེ༌ ཨི༌ཇིབ༌པ༌བོ༌ སད༌ཏེ༌ ཁོའེ༌ ཟུགས༌པོ༌ པེ༌མའེ༌ ནང༌ང༌ སྦས༌།
13 སྟིང༌མ༌ཞག༌པོ༌ ཁོ༌ ཡང༌སྐྱར༌ ཕི༌ལོག༌ག༌ སོང༌པ༌ ཁོའ༌ ཨིབ༌རི༌པ༌ མི༌ ཉིས༌ ནོལ༌ཨིན༌ ཐོང༌། མོ༌ཟེས༌སི༌ གལ༌ཏེ༌ ཡོད༌ཁན༌ནི༌ མི༌བོའ༌ ཟེརས༌, “ཅི༌ ཕིའ༌ ཁྱོ༌རང༌ངི༌ ཨིབ༌རི༌པ༌ རང༌ངི༌ ཕྲོ༌པ༌ རྡུང༌ངད༌?”
14 ཁོའེ༌ ལན༌ཏངས༌, “སུའི༌ ཁྱོ༌རང༌ ང༌ཞའེ༌ ཝང༌སྲུལ༌པ༌ དང༌ ཁྲིམས༌ཅད༌ཁན༌ལ༌ སྐོས༌? ཅི༌ ཁྱོ༌རང༌ངི༌ ཨི༌ཇིབ༌པ༌བོ༌ སད༌ད༌ ཙོགས༌ལ༌ ངའང༌ སད༌ཨིན༌ན༌?”
ཏེ༌ནེ༌ མོ༌ཟེས༌ ཇིགས༌ ཡང༌ སམ༌, “ངའེ༌ ཅོ༌ཁན༌བོ༌ མི༌གུན༌ལ༌ གྱུས༌ སོང༌ཏེ༌ ཨིན༌ཏིག༌དུག༌།”
15 གྱལ༌པོའ༌ ཏེ༌བོ༌ ཚོར༌ར༌ཅིག༌ ཁོའེ༌ མོ༌ཟེས༌ སད༌ཅེས༌སི༌ རྩོན༌གྲུས༌ ཅོས༌, ཨིན༌ནའང༌ མོ༌ཟེས༌ གྱལ༌པོའེ༌ ཀ༌ནེ༌ ཤོར༌ཏེ༌ མི༌དིའན༌ནི༌ ས༌ཆའ༌ ལེབས༌ཏེ༌ ཁོ༌ ཆུ༌དོང༌ ཞིག༌གི༌ དུན༌ལ༌ སའི༌ཀ༌ དུགས༌།
16 ཏ༌ མི༌དིའན༌པ༌ བླ༌མ༌ཞིག༌ག༌ བུ༌མོ༌ རྡུན༌ ཡོད༌པིན༌། ཁོང༌གུན༌ ཁོ༌རང༌གུན༌ནི༌ ཨ༌བའེ༌ ར༌ལུག༌གུན༌ལ༌ ཆུ༌ ཏང༌ཅེས༌ལ༌ ཡོངས༌ ཡང༌ ཆུ༌ ཕིངས༌ཏེ༌ ཞོང༌པ༌གུན༌ སྐངས༌།
17 ཨིན༌ནའང༌ ཞན༌ ལུག༌རྫི༌ རིག༌ ཡོངས༌ཏེ༌ ཝང༌ ཉམ༌པོ༌ བུ༌མོ༌གུན༌ ཏེ༌ཀ༌ནེ༌ ཆ༌ཅུགས༌པ༌ མོ༌ཟེས༌ ཁོང༌གུན༌ལ༌ རོགས༌ ཅོའ༌ལ༌ ཡོངས༌ཏེ༌ ཁོང༌ངི༌ ར༌ལུག༌གུན༌ལ༌ ཆུ༌ ཏངས༌།
18 ཁོང༌གུན༌ ཨ༌བ༌ རི༌འུལ༌ ཡོད༌ས༌ ལོགས༌ཏེ༌ ལེབ༌བ༌ཅིག༌ ཁོའེ༌ ཏྲིས༌, “དི༌རིང༌ ཁྱོ༌ཞ༌གུན༌ འི༌ཟུག༌ གྱོགས༌པ༌ ལོགས༌ཏེ༌ ཀ༌ཟུག༌གི༌ ལེབ༌?”
19 ཁོང༌གུན༌ནི༌ ལན༌ཏངས༌, “ཨི༌ཇིབ༌པ༌ མི༌ཞིག༌གི༌ ལུག༌རྫི༌གུན༌ནི༌ ཀ༌ནེ༌ ང༌ཞའ༌ སྐྱོབས༌ ཡང༌ ཁོའེ༌ ཆུ༌ ཕིངས༌ཏེ༌ ར༌ལུག༌གུན༌ལ༌ ཏངས༌།”
20 ཨ༌བའེ༌ ཏྲིས༌, “ཁོ༌ ཀ༌རེ༌, ཁྱོ༌ཞའ༌ མི༌བོ༌ བོར༌ཏེ༌ ཅིའ༌ ཡོངས༌པིན༌? སོང༌ ཡང༌ ང༌དང༌གུན༌ ཉམ༌པོ༌ ཁར༌ཇི༌ ཟའ༌ལ༌ ཁོ༌ བོད༌ཏེ༌ ཁྱོང༌།”
21 མོ༌ཟེས༌སི༌ ཏེ༌རུ༌ རི༌འུལ༌ ཉམ༌པོ༌ དུག༌ཅེས༌ ཐག༌ཅདས༌། སྟིང༌ནེ༌ ཁོའེ༌ ཁོ༌རང༌ངི༌ བུ༌མོ༌ ཟི༌པོ༌ར༌ མོ༌ཟེས༌ལ༌ ན༌མ༌ ཏངས༌།
22 ཟི༌པོ༌ར༌ བུ༌ཚ༌ཞིག༌ སྐྱེས༌ ཡང༌ མོ༌ཟེས༌སི༌ ཟེརས༌, “འི༌ ས༌ཆ༌བོའེ༌ཀ༌ ང༌ ཞན༌ཡུལ༌ལི༌ མི༌ ཚུགས༌ཏེ༌ ཨིན༌ནོག༌།” ཏེ༌བོའེ༌ ཕིའ༌ ཁོའེ༌ བུ༌ཚའེ༌ མིང༌ང༌ གེར༌ཤོམ༌ ཏགས༌།
23 ལོ༌ བན༌ཞིག༌གི༌ སྟིང༌ནེ༌, ཨི༌ཇིབ༌བི༌ གྱལ༌པོ༌ ཤི༌ ཨིན༌ནའང༌ ཨིས༌ར༌ཨེལ༌པ༌གུན༌ལ༌ ཏ༌རུང༌ངའང༌ ཨི༌ཇིབ༌པ༌གུན༌ནི༌ རྡུག༌ངལ༌ སྟན༌པ༌ ཁོང༌གུན༌ ཚེ༌ཡོག༌ནེ༌ ཐར༌ ཅུག༌ག༌ ཛད༌ཅེས༌ལ༌ ཁོང༌གུན༌ནི༌ སྙིང༌ནེ༌ མོས༌ལམ༌ ཞུའད༌པིན༌ ཡང༌ དཀོན༌མཆོག༌གི༌ ཁོང༌གུན༌ནི༌ མོས༌ལམ༌ སན༌ན༌ ཛདས༌།
24 དཀོན༌མཆོག༌གི༌ ཁོང༌གུན༌ནི༌ རྡུག༌པོའེ༌ སྐད༌གུན༌ སན༌ཏེ༌ ཨབ༌ར༌ཧམ༌, ཨི༌སཱག༌ དང༌ ཡ༌ཀོབ༌ གུན༌ ཉམ༌པོ༌ ཛད༌ཁན༌ནི༌ ཁོང༌རང༌ངི༌ ཆད༌དོན༌བོ༌ ཨིད༌ཏུ༌ ཡོངས༌།
25 ཨིས༌ར༌ཨེལ༌པ༌གུན༌ལ༌ ནགས༌བར༌དོ༌ ཐོང༌ཁན༌གུན༌ དཀོན༌མཆོག༌གི༌ ཟིགས༌ ཡང༌ ཁོང༌གུན༌ནི༌ཀ༌ སྙིང༌རྗེ༌ སྐྱེའ༌ ཛདས༌།