15
མོ༌ཟེས༌ དང༌ མིར༌ཨམ༌མི༌ ལུ༌།
15:1-21
1 ཏེ༌ནེ༌ མོ༌ཟེས༌ དང༌ ཨིས༌ར༌ཨེལ༌པ༌གུན༌ནི༌ ཡ༌ཝའ༌ སྟོད༌པ༌ ཕུལ༌ཨིན༌ ལུ༌ ཏངས༌:
“ངའེ༌ ཡ༌ཝའ༌ སྟོད༌པའེ༌ ལུ༌ ཏང༌ངད༌
ཅིའ༌ཟེར༌ན༌ ཁོང༌ངི༌ གྱལ༌ཁ༌ སྤལ༌ཅན༌ ལེནས༌།
ཁོང༌ངི༌ རྟ༌ དང༌ ཏེ༌ཀ༌ ཞོན༌ཁན༌ ཚང༌མ༌
ཚོའེ༌ ནང༌ང༌ ཕང༌ང༌ ཛདས༌།
2 ཡ༌ཝ༌ ནི༌ ངའེ༌ ཤེད༌ ཡང༌ ཁོང༌ང༌ ངའེ༌ སྟོད༌པའེ༌ ལུ༌ ཕུལ༌ཨིན༌,
ཁོང༌ ངའེ༌ ཐར༌པ༌བོ༌ གྱུར༌ར༌ ཛདས༌,
ཁོང༌ ངའེ༌ དཀོན༌མཆོག༌ ཡང༌ ངའེ༌ ཁོང༌ང༌ སྟོད༌པ༌ ཕུལ༌ལད༌,
ངའེ༌ ཨ༌བའེ༌ དཀོན༌མཆོག༌, ངའེ༌ ཁོང༌ང༌ སྟོད༌པ༌ ཕུལ༌ཨིན༌།
3 ཁོང༌ མག༌མི༌ ཀྲག༌པོ༌ ཞུགས༌ཏེ༌,
ཁོང༌ངི༌ ཚན༌ ཡ༌ཝ༌ ཨིན༌ནོག༌།
4 ཁོང༌ངི༌ གྱལ༌པོའེ༌ མག༌མི༌ དང༌ རྟ༌རེལ༌ གུན༌
ཚོའེ༌ ནང༌ང༌ ཕང༌ང༌ ཛདས༌།
གྱལ༌པོའེ༌ མག༌མི༌ གྱལ༌ལ༌ ཚང༌མ༌
ཚོ༌ མར༌པོའེ༌ ནང༌ང༌ ནུབ༌ཅུག༌ག༌ ཛདས༌།
5 ཚོའེ༌ ཆུ༌ ཏིང༌ཅན༌ནི༌ ཁོང༌གུན༌ ཀབས༌,
ཁོང༌གུན༌ རྡོའ༌ ཙོགས༌ལ༌ ཐིལ༌ལ༌ ནུབ༌།
6 ཡ༌ཝ༌ ཉེ༌རང༌ངི༌ ཆག༌ ཡས༌པ༌ མ༌ སྟོབས༌ཅན༌,
ཡ༌ཝ༌, ཉེ༌རང༌ངི༌ ཆག༌ ཡས༌པའེ༌
གྲ༌འོ༌ ཚང༌མ༌ ཁྲེས༌ཏོར༌ ཅོའ༌ ཛདས༌།
7 ཉེ༌རང༌ངི༌ ཟིར༌རྗིད༌ ཀྲག༌པོའེ༌ ནང༌ང༌
ཉེ༌རང༌ངི༌ གྱབ༌གལ༌ལ༌ ནོལ༌ཁན༌གུན༌ལ༌ ཕམ༌ཀལ༌ལ༌ ཛདས༌།
ཉེ༌རང༌ངི༌ ཐུགས༌སྲོའེ༌ ཁོང༌གུན༌ སོག༌མ༌
མེའ༌ སྲག༌ག༌ ཙོགས༌ལ༌ མེད༌ཁན༌ ཅོའ༌ ཛདས༌།
8 ཉེ༌རང༌ངི༌ འུགས༌ ཉམ༌པོ༌ ཕུ༌ སལ༌ཏེ༌
ཚོའེ༌ ཆུ༌ ལངས༌ཏེ༌ དུག༌ ཅུག༌ག༌ ཛདས༌།
ཚོའེ༌ ཆུ༌ གྱུག༌ཁན༌བོ༌ རྩིག༌པ༌ ཙོགས༌ལ༌ ལངས༌ཏེ༌ དུག༌ ཅུག༌ག༌ ཛདས༌,
ཚོ༌ ཏིང༌ཅན༌ནི༌ ནང༌ང༌ ཆུ༌ ཁྱགས༌པ༌ ཙོགས༌ སྲན༌ཏྲེ༌ གྱུར༌།”
9 “གྲ༌འོ༌གུན༌ནི༌ ཕོ༌སོ༌ ཅོས༌ཏེ༌ ཟེརས༌, ‘ང༌དང༌ ཁོང༌གུན༌ནི༌ སྟིང༌རང༌ནེ༌ སོང༌ཏེ༌
ཁོང༌གུན༌ ཟུམ༌ཨིན༌།
ང༌དང༌གུན༌ནི༌ ཁོང༌གུན༌ནི༌ ནོར༌ ཅོམས༌ཏེ༌
ཁོང༌གུན༌ ཉམ༌པོ༌ ང༌དང༌ ཐད༌ཁན༌ ཅོ༌ཨིན༌།
ང༌དང༌ངི༌ ར༌འི༌གུན༌ ཕིངས༌ཏེ༌
ང༌དང༌ངི༌ ལག༌པའེ༌ ཁོང༌གུན༌ མེད༌ཁན༌ ཅོ༌ཨིན༌།’
10 ཨིན༌ནའང༌ ཡ༌ཝ༌ ཉེ༌རང༌ངི༌ འུགས༌ ཉམ༌པོ༌ ཕུ༌ སལ༌ཏེ༌
ཚོའེ༌ ཆུའ༌ ཁོང༌གུན༌ ཀབ༌ ཅུག༌ག༌ ཛདས༌
ཡང༌ ཁོང༌གུན༌ གྱ༌ཚོའེ༌ ཐིལ༌ལ༌
རྡོའ༌ ཙོགས༌ལ༌ ནུབ༌།
11 ལྷ༌ལྷ༌མོ༌ ཚང༌མའེ༌ ཕྲོ༌ནེ༌ ཡ༌ཝ༌ ཉེ༌རང༌ ཙོགས༌ སུ༌ ཡོད༌གྲོ༌?
ཏམ༌པའེ༌ ནང༌ང༌ ཟིར༌རྗིད༌ཅན༌, ཧ༌མི༌གོ༌ཅེས༌སི༌ སྤལ༌ཅན༌ དང༌
ཧ༌ལས༌ཤེས༌སི༌ ཛད༌པ༌ ཛད༌ཁན༌ ཉེ༌རང༌ ཙོགས༌ སུའང༌ མེད༌།
12 ཉེ༌རང༌ངི༌ ཤེད༌ཅན༌ ཆག༌ ཡས༌པ༌ རྐྱང༌ང༌ ཛདས༌
ཡང༌ ང༌དང༌ངི༌ གྲ༌འོ༌གུན༌ ས༌ཀྱད༌དི༌ སྨིད༌ཏངས༌།
13 ཉེ༌རང༌ངི༌ ཡ༌ཤ༌ སྟན༌པོའེ༌ ནང༌ང༌
ཉེ༌རང༌ངི༌ ཉོའ༌ ཛད༌ཁན༌ནི༌ མི༌གུན༌ ཁྲིད༌ད༌ ཛད༌ཨིན༌།
སྟོབས༌ཤུགས༌ ཉམ༌པོ༌ ཉེ༌རང༌ངི༌ ཁོང༌གུན༌ལ༌ ལམ༌སྟན༌ ཛད༌ཏེ༌
ཉེ༌རང༌ངི༌ ཨིན༌ཁན༌ནི༌ ཏམ༌པ༌ ས༌ཆའེ༌ ནང༌ང༌ ཁྱེར༌ར༌ ཛད༌ཨིན༌།
14 གྱལ༌ཁམས༌གུན༌ནི༌ ཏེ༌གུན༌ ཚོར༌ཏེ༌ ཇིགས༌ཏེ༌ དར༌ཨིན༌།
ཕི༌ལིས༌ཏི༌པ༌གུན༌ མ༌སྲན༌ཏྲེ༌ ཇིགས༌ཨིན༌།
15 ཨི༌དོམ༌མི༌ སྤོན༌བོ༌གུན༌ སྲན༌ཏྲེ༌ ཇིགས༌ཨིན༌།
མོ༌འབ༌པའེ༌ སྤོན༌བོ༌གུན༌ ཇིགས༌ཏེ༌ དར༌ཨིན༌།
ཀེ༌ནན༌པ༌གུན༌ནི༌ སྤོས༌པ༌ སྟོར༌ཏེ༌ མུན༌ཨིན༌།
16 ཡ༌ཝ༌ ཉེ༌རང༌ངི༌ ཤེད༌ གྱུད༌ཏེ༌ ཁོང༌གུན༌ནི༌ཀ༌ ཇིགས༌པ༌ དང༌
ཚབས༌ཤེས༌ ལེབ༌ཨིན༌།
ཉེ༌རང༌ངི༌ ཁྱུད༌ཅན༌ ཆག༌གི༌ ཁོང༌གུན༌ རྡོའ༌ ཙོགས༌ འུགས༌མེད༌ གྱུར༌ཅུག༌ཨིན༌
ནམ༌ཚོག༌པ༌ ཉེ༌རང༌ངི༌ མི༌,
ཚེ༌ཡོག༌ནེ༌ ཐར༌ ཅུག༌ག༌ ཛད༌ཁན༌གུན༌ ཏེ༌ གྱལ༌ཁམས༌གུན༌ གྱུད༌ཏེ༌ ཆ༌ མི༌ཚར༌།
17 ཉེ༌རང༌ངི༌ ཨིན༌ཁན༌ནི༌ རི༌ཀ༌
ཉེ༌རང༌ངི༌ ཁོང༌གུན༌ ཁྱོང༌ང༌ ཛད༌ཏེ༌ ཚུག༌ཤུག༌ག༌ ཛད༌ཨིན༌,
ཡ༌ཝ༌, ཉེ༌རང༌ ནས༌ཤེས༌སི༌ ཕིའ༌ ཏེ༌ ས༌ཆ༌བོ༌ ཅོའ༌ ཛད༌ཏེ༌ ཨིན༌པིན༌,
ཉེ༌རང༌ངི༌ རྩིག༌ག༌ ཛད༌ཁན༌ནི༌ ཏམ༌པའེ༌ ནས༌ས༌ ཞིག༌།
18 ཡ༌ཝའེ༌ ཏུས༌གྱུན༌ནེ༌གྱུན༌ ཝང༌ སྲུལ༌ལ༌ ཛད༌ཨིན༌།”
19 ཨིས༌ར༌ཨེལ༌པ༌གུན༌ ཚོའེ༌ ཞུང༌ནེ༌ ས༌སྐམ༌པོའེ༌ ཀ༌ནེ༌ གྲུལ༌ཏེ༌ སོང༌, ཨིན༌ནའང༌ གྱལ༌པོའེ༌ རྟ༌རེལ༌ དང༌ ཏེ༌ཀ༌ ཞོན༌ཁན༌གུན༌ ཚོའེ༌ ནང༌ང༌ ཆའ༌ཅིག༌ ཡ༌ཝའེ༌ ཆུ༌ མལ༌ལི༌ཀ༌ ལོགས༌ཏེ༌ ཁྱོང༌ང༌ ཛདས༌ ཡང༌ ཁོང༌གུན༌ ཆུའི༌ ནང༌ང༌ ནུབ༌།
20 ཨ༌རོན༌ནི༌ སྲིང༌མོ༌ ལུང༌སྟོན༌མ༌ མི༌རི༌ཨམ༌མི༌ ལག༌པའེ༌ ནང༌ང༌ དབ༌ ཁུརས༌, ཞན༌ བུ༌མོ༌ ཚང༌མ༌ ཁོའེ༌ སྟིང༌རང༌ནེ༌ དབ༌ ཁུར༌ཏེ༌ རྩེ༌ཨིན༌ སོང༌།
21 མི༌རི༌ཨམ༌མི༌ ལུ༌ ཏངས༌,
“ཡ༌ཝའེ༌ ཕིའ༌ ལུ༌ ཏོང༌
ཅིའ༌ཟེར༌ན༌ ཁོང༌ངི༌ གྱལ༌ཁ༌ སྤལ༌ཅན༌ ལེན༌ཏེ༌ ཨིན༌ནོག༌།
ཁོང༌ངི༌ རྟ༌རེལ༌ དང༌ ཏེ༌ཀ༌ ཞོན༌ཁན༌ ཚང༌མ༌
ཚོའེ༌ ནང༌ང༌ ཕང༌ང༌ ཛདས༌།”
མ༌རཧ༌ དང༌ ཨེ༌ལིམ༌མི༌ ཆུ༌།
15:22-27
22 ཏེ༌ནེ༌ མོ༌ཟེས༌སི༌ ཨིས༌ར༌ཨེལ༌པ༌གུན༌ ཚོ༌ མར༌པོ༌ནེ༌ ཁྲིད༌ཏེ༌ ཤུར༌ ཟེར༌སའེ༌ ཐང༌སྟོང༌ངི༌ ནང༌ང༌ སོང༌། ཁོང༌གུན༌ ཐང༌སྟོང༌ངི༌ ནང༌ང༌ གྲུལ༌ཨིན༌ ཞག༌པོ༌ སུམ༌ སོང༌ ཨིན༌ནའང༌ ཆུ༌མིག༌ ཅིག༌གའང༌ མ༌ཐོང༌།
23 མ༌རཧ༌ ཟེར༌ཁན༌ནི༌ ས༌ཆ༌ ལེབ༌བ༌ཅིག༌ ཏེ༌ ནས༌སའེ༌ ཆུ༌གུན༌ ཁན༌ཀྲེ༌ ཡོད༌པ༌ ཁོང༌གུན༌ ཐུང༌ མ༌ཉན༌། ༼ཏེན༌ན༌བོའེ༌ཕིའ༌ ཏེ༌ ས༌ཆ༌བོའ༌ མ༌རཧ༌ ཟེར༌རད༌པིན༌།༽
24 མི༌གུན༌ནི༌ མོ༌ཟེས༌ལ༌ སྐྱོན༌རྗོད༌ ཅོ༌ཨིན༌ ཟེརས༌, “ང༌ཞ༌གུན༌ནི༌ ཅི༌ ཐུང༌?”
25 མོ༌ཟེས༌སི༌ ཡ༌ཝའ༌ མོས༌ལམ༌ ཞུས༌པ༌ ཡ༌ཝའེ༌ ཁོའ༌ བེར༌ཀ༌ ཞིག༌ སྟན༌ན༌ ཛདས༌། མོ༌ཟེས༌སི༌ ཏེ༌བོ༌ ཆུའི༌ ནང༌ང༌ ཕངས༌ ཡང༌ ཆུའི༌ ཁན༌ཀྲེ༌ མེད༌ཁན༌ སོང༌ཏེ༌ ཐུང༌ཉན༌།
ཏེ༌རུ༌ ཡ༌ཝའེ༌ ཁོང༌གུན༌ལ༌ བཀའ༌ཁྲིམས༌ཤིག༌ སལས༌ ཡང༌ ཁོང༌གུན༌ལ༌ ཚོད༌ལྟ༌ ཛདས༌།
26 ཁོང༌ངི༌ མོལས༌, “ཀལ༌ཏེས༌ ཁྱོ༌ཞ༌གུན༌ནི༌ ཡ༌ཝ༌ དཀོན༌མཆོག༌གི༌ མོལ༌ཁན༌ ཚང༌མ༌ ཁའ༌ཉན༌ཏེ༌ ཀྲང༌པོ༌བོ༌ ཅོས༌ཏེ༌, བཀའ༌རྒྱ༌ དང༌ བཀའ༌ཁྲིམས༌ ཚང༌མ༌ ནང༌སྟག༌ ཏང༌ན༌ ངའེ༌ ཨི༌ཇིབ༌པ༌གུན༌ནི༌ཀ༌ ཁྱོང༌ཁན༌ནི༌ ནད༌ ཅིག༌གའང༌ ཁྱོ༌ཞ༌གུན༌ལ༌ ཡོང༌ མི༌ཅུག༌, ཅིའ༌ཟེར༌ན༌ ང༌ ཡ༌ཝ༌, ཕན༌ཅུག༌ག༌ ཛད༌ཁན༌བོ༌ ཨིན༌།”
27 ཏེ༌ནེ༌ ཁོང༌གུན༌ ཨེ༌ལིམ༌མ༌ ལེབ༌, ཀ༌རུ༌ ཆུ༌མིག༌ རྕུག༌ཉིས༌ དང༌ ཁ༌སོར༌རི༌ ལྕང༌མ༌ རྡུན༌ཅུ༌ ཡོད༌པིན༌, ཏེ༌རུ༌ ཁོང༌གུན༌ནི༌ ཆུའི༌ དུན༌ལ༌ ཀུར༌ ཙུགས༌ཏེ༌ དུགས༌།