17
བྲག༌གི༌ ནང༌ནེ༌ ཆུ༌།
17:1-7
1 ཨིས༌ར༌ཨེལ༌ལི༌ སྡེ༌ གང༌པོ༌ སིན༌ནི༌ ཐང༌སྟོང༌ནེ༌ བིང༌ཏེ༌ ཡ༌ཝའེ༌ བཀའ༌ ནང༌ཞིན༌ ས༌ཆ༌ ཅིག༌ནེ༌ ཅིག༌ག༌ སོང༌། ཁོང༌གུན༌ རེ༌ཕི༌དིམ༌ ཟེར༌སའེ༌ ས༌ཆའེ༌ ནང༌ང༌ ཀུར༌ ཙུགས༌ཏེ༌ དུགས༌, ཨིན༌ནའང༌ ཏེ༌རུ༌ མི༌གུན༌ལ༌ ཐུང༌ཅེས༌སི༌ ཕིའ༌ ཆུ༌ མེད༌པིན༌།
2 ཁོང༌གུན༌ནི༌ མོ༌ཟེས༌ལ༌ མ༌བེབས༌ ཅོས༌ཏེ༌ ཟེརས༌, “ང༌ཞ༌གུན༌ལ༌ ཐུང༌ཅེས༌སི༌ ཕིའ༌ ཆུ༌ ཏོང༌།”
མོ༌ཟེས༌སི༌ ལན༌ཏངས༌, “ཅིའ༌ ཁྱོ༌ཞ༌གུན༌ནི༌ ངའ༌ མ༌བེབས༌ ཅོའད༌? ཅིའ༌ ཁྱོ༌ཞ༌གུན༌ནི༌ ཡ༌ཝའ༌ ཚོད༌ སྟད༌?”
3 ཨིན༌ནའང༌ མི༌གུན༌ སྲན༌ཏྲེ༌ སྐོམས༌ཏེ༌ ཡོད༌པིན༌ ཡང༌ མོ༌ཟེས༌ལ༌ མ༌བེབས༌ ཅོས༌ཏེ༌ ཟེརས༌, “ཁྱོ༌རང༌ངི༌ ང༌ཞ༌གུན༌ ཨི༌ཇིབ༌ནེ༌ ཕིངས༌ཏེ༌ འི༌ ཐང༌སྟོང༌ངི༌ ནང༌ང༌ ང༌ཞའ༌, ང༌ཞའེ༌ ཕྲུ༌གུ༌གུན༌ དང༌ སེམས༌ཅན༌གུན༌ སྐོམ༌རིའ༌ སད༌ད༌ལ༌ ཁྱོངས༌པིན༌ན༌?”
4 མོ༌ཟེས༌སི༌ ཡ༌ཝའ༌ མོས༌ལམ༌ ཞུས༌, “འི༌ མི༌གུན༌ ཉམ༌པོ༌ ངའེ༌ ཅི༌ ཅོ༌? ཁོང༌གུན༌ནི༌ ངའ༌ རྡོའ༌ གྱབས༌ཏེ༌ སད༌ཅེས༌ དུག༌ལེ༌།”
5 ཡ༌ཝའེ༌ མོ༌ཟེས༌ལ༌ མོལས༌, “ཨིས༌ར༌ཨེལ༌པའེ༌ སྤོན༌བོ༌ ཁ༌ཅིག༌ ཁྱོ༌རང༌ ཉམ༌པོ༌ ཁྲིད༌ཏེ༌ མི༌གུན༌ནི༌ སང༌ སྔུན༌སྔུན༌ལ༌ སོང༌, ཁྱོ༌རང༌ངི༌ ལག༌པའེ༌ ནང༌ང༌ ནཱའེལ༌ ལྩངས༌པོའ༌ གྱབས༌ཁན༌ནི༌ བེར༌ཀ༌བོ༌ ཁུར༌ཏེ༌ སོང༌།
6 ང༌ ཁྱོ༌རང༌ངི༌ དུན༌ལ༌ ཧོ༌རེབ༌བི༌ ཕོ༌ལོངས༌སི༌ཀ༌ དུག༌ཨིན༌། ཏེ༌ ཕོ༌ལོངས༌པོའ༌ བེར༌ཀ༌བོ༌ གྱོབ༌ ཡང༌ ཏེ༌ནང༌ནེ༌ མི༌གུན༌ ཐུང༌ཅེས༌སི༌ ཕིའ༌ ཆུ༌ བིང༌ཨིན༌།”
མོ༌ཟེས༌སི༌ ཨིས༌ར༌ཨེལ༌ལི༌ སྤོན༌བོ༌གུན༌ནི༌ དུན༌ལ༌ ཏེན༌ན༌ ཟུག༌ ཅོས༌།
7 མོ༌ཟེས༌སི༌ ཏེ༌ ས༌ཆ༌བོའ༌ མ༌སཧ༌ དང༌ མེ༌རི༌བཧ༌ མིང༌ ཏགས༌ ཅིའ༌ཟེར༌ན༌ ཨིས༌ར༌ཨེལ༌པ༌གུན༌ནི༌ མོ༌ཟེས༌ལ༌ ཛིང༌མོ༌ ཏངས༌ ཡང༌ ཡ༌ཝའ༌ ཚོད༌ལྟས༌ཏེ༌ ཟེརས༌, “ཡ༌ཝ༌ ང༌དང༌གུན༌ ཉམ༌པོ༌ ཞུགས༌ཏེ༌ ཡོད༌ད༌ ཧེ༌?”
ཨིས༌ར༌ཨེལ༌པ༌གུན༌ནི༌ ཨ༌མ༌ལིཀ༌པ༌གུན༌ལ༌ ཕམ༌ཀལས༌།
17:8-16
8 རེ༌ཕི༌དིམ༌མི༌ ས༌ཆའེ༌ཀ༌ ཨ༌མ༌ལིཀ༌པ༌གུན༌ནི༌ ཨིས༌ར༌ཨེལ༌པ༌གུན༌ནི༌ཀ༌ སྤུང༌གོལ༌ ཅོས༌།
9 མོ༌ཟེས༌སི༌ ཡོ༌ཤུའ༌ ཟེརས༌, “ང༌དང༌ངི༌ ཕྲོ༌ནེ༌ མི༌ ཁ༌ཅིག༌ ལྡམས༌ཏེ༌ ཨ༌མ༌ལིཀ༌པ༌གུན༌ལ༌ ནོལ༌ལ༌ སོང༌། ཐོ༌རེ༌ ང༌ བྲག༌གི༌ གོའེ༌ཀ༌ ལངས༌ཏེ༌ དཀོན༌མཆོག༌གི༌ བེར༌ཀ༌བོ༌ ང༌རང༌ངི༌ ལག༌པའེ༌ ནང༌ང༌ ཁུར༌ཏེ༌ དུག༌ཨིན༌།”
10 ཏེ༌ནེ༌ ཡོ༌ཤུའེ༌ མོ༌ཟེས༌སི༌ ཟེར༌ཁན༌ ནང༌ཞིན༌ ཨ༌མ༌ལིཀ༌པ༌གུན༌ལ༌ ནོལ༌ལ༌ སོང༌ ཡང༌ མོ༌ཟེས༌, ཨ༌རོན༌ དང༌ ཧུར༌ བྲག༌གི༌ གོའ༌ ཛགས༌ཏེ༌ སོང༌།
11 མོ༌ཟེས༌སི༌ ལག༌པ༌ ཀེན༌ལ༌ སྟགས༌ཏེ༌ བོརས༌ ཟ༌ནེ༌ ཨིས༌ར༌ཨེལ༌པ༌གུན༌ལ༌ གྱལ༌ཁ༌ ཐོབ༌, ཨིན༌ནའང༌ ཁོའེ༌ ལག༌པ༌ ཕབ༌བ༌ཅིག༌ ཨ༌མ༌ལིཀ༌པ༌གུན༌ལ༌ གྱལ༌ཁ༌ ཐོབ༌བད༌པིན༌།
12 མོ༌ཟེས༌སི༌ ལག༌པ༌ ངལ༌ལ༌ཅིག༌ ཨ༌རོན༌ དང༌ ཧུར༌རི༌ ཁོ༌ དུག༌ཅེས༌སི༌ ཕིའ༌ རྡོའ༌ ཞིག༌ ཁྱོངས༌ ཡང༌ ཁོང༌གུན༌ མོ༌ཟེས༌སི༌ ལྡོའ༌ དུགས༌ཏེ༌ ཁོའེ༌ ལག༌པ༌ ཉི༌མ༌ སྐྱོད༌སྐྱོད༌ ཚོག༌པ༌ སྟན༌པོ༌ སྟགས༌ཏེ༌ ལུས༌ཤེས༌ལ༌ ཐམས༌ཏེ༌ བོརས༌།
13 ཏེན༌ན༌ཟུག༌གི༌ ཡོ༌ཤུའེ༌ ར༌འི༌ ཉམ༌པོ༌ ཨ༌མ༌ལིཀ༌པ༌གུན༌ལ༌ ཕམ༌ཀལས༌།
14 ཏེ༌ནེ༌ ཡ༌ཝའེ༌ མོ༌ཟེས༌ལ༌ མོལས༌, “འི༌ གྱལ༌ཁ༌ ཐོབ༌ཁན༌བོ༌ ཨིད༌ཏུ༌ ལུས༌ཤེས༌ལ༌ སྤེ༌ཆའེ༌ ནང༌ང༌ བྲིས༌ ཡང༌ ཡོ༌ཤུའ༌ ཚོར༌ཅུགས༌ཏེ༌ སིལ༌། ངའེ༌ ཨ༌མ༌ལིཀ༌པའེ༌ མིར༌གྱུད༌ འི༌ ཇིག༌རྟེན༌ནི༌ ཀ༌ནེ༌ པད༌ མེད༌ཁན༌ ཅོ༌ཨིན༌།”
15 མོ༌ཟེས༌སི༌ ཆོད༌ཁྲི༌ཞིག༌ རྩིགས༌ ཡང༌ ཏེ༌བོའ༌ “ངའ༌ གྱལ༌ཁའ༌ སལ༌ཁན༌ ཡ༌ཝ༌ ཨིན༌” ཟེར༌ཏེ༌ མིང༌ང༌ ཏགས༌།
16 ཁོའེ༌ ཟེརས༌ “ཡ༌ཝའེ༌ ཁྲིས༌ ཆོགས༌ལ༌ ལག༌པ༌གུན༌ ཀེན༌ལ༌ སྟགས༌ པ༌སང༌ མི༌རབས༌ནེ༌ མི༌རབས༌ ཡ༌ཝའེ༌ ཨ༌མ༌ལིཀ༌པ༌གུན༌ནི༌ གྱབ༌གལ༌ལ༌ ནོལ༌ལ༌ ཛད༌ཨིན༌།”