39
བླ༌མའེ༌ ཀོས༌ལག༌
39:1
1 ཁོང༌གུན༌ནི༌, བླ༌མ༌གུན༌ནི༌ ཏམ༌པའེ༌ ཀུར༌རི༌ ནང༌ང༌ ཞབས༌ཏོག༌ ཞུ༌ ཟ༌ནེ༌ གོན༌ཅེས༌, སྔོན༌པོ༌, སྔོ༌མར༌ དང༌ མར༌པོ༌ ནས༌མ༌ ཐགས༌ཁན༌ནི༌ ཀོས༌གུན༌ ཅོས༌། ཡ༌ཝའེ༌ མོ༌ཟེས༌ལ༌ བཀའ༌ སལ༌ཁན༌ ནང༌ཞིན༌ ཁོང༌གུན༌ནི༌ ཨ༌རོན༌ནི༌ ཕིའ༌ བླ༌མའེ༌ ཀོས༌པོ༌ ཅོས༌།
ཨེ༌ཕོད༌།
39:2-21
2 ཁོང༌གུན༌ནི༌ ཨེ༌ཕོད༌, རས༌ རིན༌ཅན༌ནི༌ཀ༌ སེར༌ ཡང༌ སྔོན༌པོ༌, སྔོ༌མར༌ དང༌ མར༌པོ༌ ནས༌མ༌ སྲུལ༌ཏེ༌ ཅོས༌།
3 ཁོང༌གུན༌ནི༌ ལག༌ཤེས༌ ཁས༌པའེ༌ ལས༌, སེར༌ སྲ༌མོ༌ རྡུངས༌ཏེ༌ ཏེ༌བོ༌ སྐུད༌པ༌ ཙོགས༌ ཁྲ༌མོ༌ ཅད༌ཏེ༌ རས༌ རིན༌ཅན༌ནི༌ཀ༌ སེར༌ དང༌ སྔོན༌པོ༌, སྔོ༌མར༌, མར༌པོ༌ ནས༌མ༌ སྲུལ༌ཏེ༌ ཅོས༌།
4 ཁོང༌གུན༌ནི༌ ཨེ༌ཕོད༌དི༌ གྱབ༌ དང༌ དུན༌ ཐུད༌ཅེས༌ལ༌ སྤུང༌པའེ༌ རས༌པོ༌ ཅོས༌།
5 ཁོང༌གུན༌ནི༌ ཨེ༌ཕོད༌དི༌ སྐྱེ༌རག༌པོའང༌ ཏེན༌ན༌ ཙོགས༌ རས༌ རིན༌ཅན༌ནི༌ཀ༌ སེར༌ དང༌ སྔོན༌པོ༌, སྔོ༌མར༌, མར༌པོ༌ ནས༌མ༌ སྲུལ༌ཏེ༌ ཅོས༌, ཀ༌ཟུག༌ ཡ༌ཝའེ༌ མོ༌ཟེས༌ལ༌ བཀའ༌ སལ༌ཏེ༌ ཨིན༌པིན༌།
6 ཁོང༌གུན༌ནི༌ ཨོ༌ནེཀས༌ ཁྲ༌རྡོ༌གུན༌ནི༌ཀ༌ ཡ༌ཀོབ༌བི༌ བུ༌ཚ༌ རྕུག༌ཉིས༌སི༌ མིང༌གུན༌ སྐོས༌ཏེ༌ སེར༌རི༌ རིབ༌ཞི༌ ནང༌ང༌ ཅུགས༌།
7 ཨིས༌ར༌ཨེལ༌ལི༌ མི༌སྡེ༌ རྕུག༌ཉིས༌ ཨིད༌ཏུ༌ བོར༌ཅེས༌ལ༌ ཏེ༌བོ༌ ཨེ༌ཕོད༌དི༌ སྤུང༌པའེ༌ རས༌སི༌ཀ༌ ཏགས༌, ཀ༌ཟུག༌ ཡ༌ཝའེ༌ མོ༌ཟེས༌ལ༌ བཀའ༌ སལ༌ཏེ༌ ཨིན༌པིན༌།
8 ཁོང༌གུན༌ནི༌ ཀྲང༌ང༌ ཀབ༌ཅེས༌ ཅོས༌, ལག༌ཤེས༌ ཁས༌པའེ༌ ལས༌ ཙོགས༌། ཏེ༌བོ༌ ཨེ༌ཕོད༌ ཙོགས༌ རས༌ རིན༌ཅན༌ནི༌ཀ༌ སེར༌ དང༌ སྔོན༌པོ༌, སྔོ༌མར༌, མར༌པོ༌ ནས༌མ༌ སྲུལ༌ཏེ༌ ཅོས༌།
9 ཏེ༌བོ༌ ཀྲུབ༌ཞི༌, རིང༌ དང༌ ཞང༌ སེན༌ཀྲི༌མི༌ཀྲར༌ 22 ཡང༌ ཉི༌ལྟབ༌ ཅོས༌།
10 ཁོང༌གུན༌ནི༌ ཏེ༌བོའེ༌ཀ༌ ཁྲ༌རྡོའ༌ རིན༌ཅན༌གུན༌ནི༌ ཀྲལ༌ཞི༌ ཅོས༌ ཡང༌ གོ༌མའེ༌ ཀྲལ༌ལི༌ ནང༌ང༌ རུ༌བི༌, ཏོ༌པཟ༌ དང༌ ཡུ༌;
11 ཀྲལ༌ ཉིས༌པའེ༌ ནང༌ང༌ ཏར༌ཀོའེས༌, ནི༌ལིམ༌ དང༌ ཨི༌མ༌རལད༌;
12 ཀྲལ༌ སུམ༌པའེ༌ ནང༌ང༌ ཇེ༌སིནཐ༌, ཨ༌གཏ༌ དང༌ ཨ༌མེ༌ཐིསཏ༌;
13 ཀྲལ༌ ཞི༌པའེ༌ ནང༌ང༌ ཀརི༌སོ༌ལཱེཏ༌, ཨོ༌ནེཀས༌ དང༌ ཇས༌པར༌ གུན༌། ཏེ༌ ཚང༌མ༌ སེར༌རི༌ རིབ༌ཞི༌ ནང༌ང༌ ཅུགས༌།
14 ཁྲ༌རྡོའ༌ རྕུག༌ཉིས༌པོའེ༌ཀ༌ ཡ༌ཀོབ༌བི༌ བུ༌ཚ༌ རྕུག༌ཉིས༌སི༌ མིང༌གུན༌ ཐེ༌ཙེ༌ ཙོགས༌ལ༌ སྐོས༌ ཀ༌གུན༌ ཨིས༌ར༌ཨེལ༌ལི༌ མི༌སྡེ༌ རྕུག༌ཉིས༌ ཨིན༌ནོག༌།
15 ཀྲང༌ང༌ ཀབ༌ཅེས༌པོ༌ ཨེ༌ཕོད༌ ཉམ༌པོ༌ ཐུད༌ཅེས༌ལ༌ ཅའང༌ མ༌དྲེས༌ཁན༌ནི༌ སེར༌, ཁྲ༌མོ༌ ལྕུས༌ཏེ༌ ཉག༌ཐག༌ ཅོས༌།
16 ཁོང༌གུན༌ནི༌ སེར༌རི༌ རིབ༌ཞི༌ དང༌ ཀྱི༌ལྡིར༌ ཉིས༌ ཅོས༌ ཡང༌ ཀྱི༌ལྡིར༌གུན༌ ཀྲང༌ང༌ ཀབ༌ཅེས༌པོའེ༌ སྟག༌གི༌ ཀྲུ༌ ཉིས༌ཀོའེ༌ཀ༌ ཏགས༌།
17 སེར༌རི༌ ཉག༌ཐག༌གུན༌ནི༌ ཇུག༌ཅིག༌པོ༌ ཀྲང༌ང༌ ཀབ༌ཅེས༌སི༌ ཀྱི༌ལྡིར༌ ཉིས༌ཀོའེ༌ཀ༌ ཏགས༌།
18 ཉག༌ཐག༌གི༌ ཞན༌ ཇུག༌པོ༌ ཨེ༌ཕོད༌དི༌ དུན༌ ཆོགས༌སི༌ སྤུང༌པའེ༌ཀ༌ ཁྲ༌ ཅུག༌ཁན༌ སེར༌རི༌ རིབ༌ཞི༌ཀ༌ ཏགས༌།
19 སེར༌རི༌ ཀྱི༌ལྡིར༌ ཡང༌ ཉིས༌ ཅོས༌ཏེ༌ ཀྲང༌ང༌ ཀབ༌ཅེས༌པོའེ༌ ཡོག༌གི༌ ཀྲུ༌ ཉིས༌ཀོའེ༌ ཐིལ༌ལ༌ ཨེ༌ཕོད༌ ཆོགས༌ལ༌ ཏགས༌།
20 ཁོང༌གུན༌ནི༌ སེར༌རི༌ ཀྱི༌ལྡིར༌ ཡང༌ ཉིས༌ ཅོས༌ཏེ༌ ཨེ༌ཕོད༌དི༌ དུན༌ ཆོགས༌ལ༌ སྤུང༌པའེ༌ རས༌སི༌ ཇུག༌པོའེ༌ཀ༌, ཨེ༌ཕོད༌ དང༌ སྐྱེ༌རག༌ ཐུད༌སའེ༌ སྟག༌པོའེ༌ཀ༌ ཏགས༌།
21 ཀྲང༌ང༌ ཀབ༌ཅེས༌སི༌ ཀྱི༌ལྡིར༌གུན༌ དང༌ ཨེ༌ཕོད༌དི༌ སྐྱེ༌རག༌གི༌ ཁེ༌ཐོག༌ག༌ ཡོད༌ཁན༌ནི༌ ཀྱི༌ལྡིར༌གུན༌ སྔོན༌པོ༌ རས༌ ཁྲ༌མོ༌ ཉམ༌པོ༌ ལྡམས༌། ཏེ༌ནེ༌ ཀྲང༌ང༌ ཀབ༌ཅེས༌པོ༌ གྲུལ༌ མ༌གྲུལ༌ལ༌ ཨེ༌ཕོད༌ ཉམ༌པོ༌ སྟན༌པོ༌ ལུས༌, ཀ༌ཟུག༌ ཡ༌ཝའེ༌ མོ༌ཟེས༌ལ༌ བཀའ༌ སལ༌ཏེ༌ ཨིན༌པིན༌།
བླ༌མའེ༌ ཞན༌ ཀོས༌ལག༌།
39:22-31
22 ཨེ༌ཕོད༌དི༌ ཡོག༌ག༌ གོན༌ཅེས༌སི༌ ཀོས༌པོ༌ ཐགས༌ཁན༌ནི༌ རས༌ སྔོན༌པོའ༌ ཙེམས༌,
23 གོ༌ ཕིང༌ཅེས༌སི༌ ཕིའ༌ ཏེ༌བོའེ༌ སྐྱིལ༌ལ༌ བི༌གའང༌ ཅོས༌ཏེ༌ མི༌ ཆད༌ཅེས༌ལ༌ ཐའ༌རིལ༌ ཏངས༌།
24 ཏེ༌བོའེ༌ ཡོག༌གི༌ ཟུར༌རི༌ཀ༌ སྔོན༌པོ༌, སྔོ༌མར༌ དང༌ མར༌པོ༌ ནས༌མ༌ ཉམ༌པོ༌ ཨ༌ནར༌རི༌ ཟོས༌ཏ༌ ཙོགས༌ ཅོས༌ཏེ༌ ཏགས༌།
25 ཡང༌ ཁོང༌གུན༌ནི༌ ཅའང༌ མ༌དྲེས༌ཁན༌ སེར༌རི༌ ཀྲི༌ལུ༌ ཅོས༌ཏེ༌ ཀོས༌སི༌ ཡོག༌གི༌ ཟུར༌རི༌ཀ༌ ཨ༌ནར༌གུན༌ནི༌ པར༌ལ༌ ཏགས༌།
26 ཞབས༌ཏོག༌ ཞུ༌ ཟ༌ནེ༌ བླ༌མ༌ གོན༌ཅེས༌, ཏེ༌ ཀོས༌སི༌ ཟུར༌ལ༌ ཀྲི༌ལུ༌ དང༌ ཨ༌ནར༌ གུན༌ སྤེལ༌ཏེ༌ ཏགས༌, ཀ༌ཟུག༌ ཡ༌ཝའེ༌ མོ༌ཟེས༌ལ༌ བཀའ༌ སལ༌ཏེ༌ ཨིན༌པིན༌།
27 ཁོང༌གུན༌ནི༌ ཨ༌རོན༌ དང༌ ཁོའེ༌ བུ༌ཚ༌གུན༌ལ༌ ཐགས༌ཁན༌ནི༌ རས༌ གྱལ༌ལ༌ ཉམ༌པོ༌ ནང༌ཀུག༌གི༌ ཀོས༌,
28 རས༌ རིན༌ཅན༌ ཉམ༌པོ༌ གོའ༌ སྲིལ༌ཅེས༌སི༌ ཐོད༌, ཏི༌བི༌གུན༌ དང༌ ནང༌ཀུག༌ག༌ གོན༌ཅེས༌གུན༌ ཙེམས༌།
29 ཡང༌ ལག༌ཤེས༌ ཁས༌པ༌གུན༌ནི༌ ཀུས༌པོ༌ རས༌སི༌ཀ༌ སེར༌ དང༌ སྔོན༌པོ༌, སྔོ༌མར༌, མར༌པོ༌ ནས༌མ༌ སྲུལ༌ཏེ༌ སྐྱེ༌རགས༌གུན༌ ཅོས༌, ཀ༌ཟུག༌ ཡ༌ཝའེ༌ མོ༌ཟེས༌ལ༌ བཀའ༌ སལས༌།
30 ཁོང༌གུན༌ནི༌ ཅའང༌ མ༌དྲེས༌ཁན༌ནི༌ སེར༌ རྡུངས༌ཏེ༌ ལེབ༌ལེབ༌ ཀྲུབ༌ཞི༌, ཐོར༌ཤོག༌ ཏམ༌པ༌ ཅོས༌ཏེ༌ ཏེ༌ཀ༌ “ཡ༌ཝའེ༌ ཁོང༌རང༌ངི༌ ཕིའ༌ ཁོ༌ ཏམ༌པ༌ ཛདས༌” སྐོས༌ཏེ༌ བྲིས༌།
31 ཏེ༌བོ༌ ཐོད༌དི༌ དུན༌ལ༌ སྐྱེ༌རགས༌ ཁྲ༌མོ༌ སྔོན༌པོ༌ཞིག༌ ཉམ༌པོ༌ ལྡམས༌, ཀ༌ཟུག༌ ཡ༌ཝའེ༌ མོ༌ཟེས༌ལ༌ བཀའ༌ སལ༌ཏེ༌ ཨིན༌པིན༌།
མོ༌ཟེས༌སི༌ ཏམ༌པ༌ ཀུར༌ གྲུབ༌ཁན༌བོའེ༌ སྟ༌སྟོག༌ ཅོས༌།
39:32-41
32 ཏ༌ ཡ༌ཝའ༌ ཐུག༌སའེ༌, ཏམ༌པ༌ ཀུར༌ ཅོ༌ཅེས༌སི༌ ལས༌ ཚང༌མ༌ གྲུབ༌། ཨིས༌ར༌ཨེལ༌པ༌གུན༌ནི༌ ཅི༌ཚང༌མ༌ ཡ༌ཝའེ༌ མོ༌ཟེས༌ལ༌ བཀའ༌ སལ༌ཁན༌ ནང༌ཞིན༌ ཅོས༌།
33 ཏེ༌ནེ༌ ཁོང༌གུན༌ནི༌ ཏམ༌པའེ༌ ཀུར༌བོ༌ མོ༌ཟེས༌སི༌ དུན༌ལ༌ ཁྱོངས༌, ཀུར༌ དང༌ ཏེ༌བོའེ༌ ཅ༌ལག༌ ཚང༌མ༌; ཅ༌ཀུག༌གུན༌, རིབ༌ཞི༌གུན༌, པ༌ར༌ཁ༌ ཏང༌ཅེས༌སི༌ ཀྲ༌ལུ༌གུན༌, ཀ༌ཝ༌གུན༌ ཡང༌ ཏེ༌བོའེ༌ ཞབ༌ལྡན༌གུན༌,
34 ལུག༌ཕོའེ༌ པགས༌པ༌ མར༌པོའེ༌ ཀབ༌ཅེས༌, གྱལ༌ལ༌ ཀོའེ༌ ཀབ༌ཅེས༌, ཡོ༌ལ༌,
35 ཀྲ༌ལུ༌གུན༌ ཉམ༌པོ༌ ཆད༌དོན༌ནི༌ སྒམ༌ དང༌ ཐུག༌རྗེ༌ ཁའ༌ལེབ༌,
36 ཅོག༌ཙེ༌ དང༌ ཏེ༌བོའེ༌ ཅ༌ལག༌ ཚང༌མ༌ ཡང༌ དཀོན༌མཆོག༌ག༌ ཕུལ༌ཁན༌ནི༌ ཏ༌གི༌,
37 སྐྱོང༌ཙེ༌གུན༌ ཉམ༌པོ༌ ཅའང༌ མ༌དྲེས༌ཁན༌ནི༌ སེར༌རི༌ འོད༌སྟགས༌ དང༌ ཏེ༌བོའེ༌ ཅ༌ལག༌ ཚང༌མ༌ ཡང༌ འོད༌དི༌ ཕིའ༌ མར༌ནག༌,
38 སེར༌རི༌ ཆོད༌ཁྲི༌, ཁྲུས༌ཏང༌ཅེས༌སི༌ མར༌ནག༌, ཏྲི༌ཞིམ༌ཅན༌ནི༌ སྤོས༌, ཀུར༌རི༌ ནང༌ང༌ ཞུག༌སའེ༌ སྒོའེ༌ ཡོ༌ལ༌,
39 ར༌གན༌ནི༌ ཀྲ༌མིག༌ ཉམ༌པོ༌ ར༌གན༌ནི༌ ཆོད༌ཁྲི༌, ཏེ༌བོའེ༌ ཀྲ༌ལུ༌གུན༌ ཡང༌ ཆོད༌ཁྲིའི༌ ཅ༌ལག༌ ཚང༌མ༌, ལག༌པ༌ ཁྲུ༌ཅེས༌སི༌ ཞོང༌པ༌ དང༌ ཏེ༌བོ༌ བོར༌ས༌,
40 ནང༌སྐོར༌རི༌ ཡོ༌ལ༌, ཏེ༌བོའེ༌ ཀ༌ཝ༌གུན༌ དང༌ ཞབ༌ལྡན༌གུན༌, ཏེ༌ནང༌ང༌ ཆ༌སའེ༌ སྒོའེ༌ ཡོ༌ལ༌, ཏེ༌བོའེ༌ ཐག༌པ༌ དང༌ པུར༌ཆ༌ གུན༌, ཡ༌ཝ༌ ཐུག༌སའེ༌, ཏམ༌པ༌ ཀུར༌རི༌ ནང༌ང༌ ཀོལ༌ཅེས༌སི༌ ཅ༌ལག༌ ཚང༌མ༌,
41 ཡང༌ ཏམ༌པའེ༌ ཀུར༌རི༌ ནང༌ང༌ བླ༌མའེ༌ ཚུལ༌ལ༌ ཞབས༌ཏོག༌ ཞུ༌ ཟ༌ནེ༌ ཨ༌རོན༌ དང༌ ཁོའེ༌ བུ༌ཚ༌གུན༌ གོན༌ཅེས༌སི༌ ཀོས༌ལག༌ ཏམ༌པ༌ གུན༌།
42 ཡ༌ཝའེ༌ མོ༌ཟེས༌ལ༌ བཀའ༌ སལ༌ཁན༌ ནང༌ཞིན༌ ཨིས༌ར༌ཨེལ༌པ༌གུན༌ནི༌ ལས༌ ཚང༌མ༌ ཅོས༌།
43 ཁོང༌གུན༌ནི༌ ཏེ༌ ཚང༌མ༌ ཡ༌ཝའེ༌ བཀའ༌ སལ༌ཁན༌ ནང༌ཞིན༌ ཅོ༌ཁན༌བོ༌ མོ༌ཟེས༌སི༌ ཐོང༌པ༌ ཁོའེ༌ ཁོང༌གུན༌ལ༌ ཅིན༌ལབས༌ ཏངས༌།