8
ཆད༌པ༌ ཉིས༌པ༌།
8:1-15
1 ཏེ༌ནེ༌ ཡ༌ཝའེ༌ མོ༌ཟེས༌ལ༌ མོལས༌, “གྱལ༌པོ༌ ཡོད༌ས༌ སོང༌ ཡང༌ ཁོའ༌ ཟེར༌, ‘ཡ༌ཝའེ༌ འི༌ཟུག༌ མོལས༌, ངའ༌ ཅོལ༌ཅེས༌ལ༌ ངའེ༌ མི༌གུན༌ ཆ༌ཅུག༌།
2 ཀལ༌ཏེས༌ ཁྱོ༌རང༌ངི༌ ཁོང༌གུན༌ ཆ༌ མ༌ཅུག༌ན༌ ངའེ༌ ཁྱོ༌རང༌ངི༌ ས༌ཆ༌ གང༌པོའེ༌ ནང༌ང༌ བལ༌པ༌ གང༌ཅུག༌ཨིན༌།
3 ནཱའེལ༌ ལྩངས༌པོ༌ བལ༌པའེ༌ གང༌ཨིན༌ ཡང༌ ཏེ༌གུན༌ ཆུའི༌ ནང༌ནེ༌ བིངས༌ཏེ༌ ཁྱོ༌རང༌ངི༌ ཁར༌ དང༌ ཁྱོ༌རང༌ ཉིད༌ལོག༌སའེ༌ ནང༌ དང༌ མལ༌ཙེ༌ ནང༌ང༌ ཡོང༌ཨིན༌། ཏེ༌གུན༌ ཁྱོ༌རང༌ངི༌ སྤོན༌བོ༌གུན༌ དང༌ མི༌གུན༌ནི༌ ཁང༌པའེ༌ ནང༌ང༌ ཡང༌ ཁྱོ༌ཞའེ༌ ཁར༌ཇི༌ སྐོལ༌སའེ༌ ཐབ༌ དང༌ པག༌པའེ༌ རུ༌སའེ༌ ཞོང༌པ༌ གུན༌ནི༌ ནང༌ང༌ ཞུགས༌ཨིན༌།
4 བལ༌པ༌གུན༌ ཁྱོ༌རང༌, ཁྱོ༌རང༌ངི༌ སྤོན༌བོ༌ དང༌ མི༌གུན༌ནི༌ཀ༌ ལྕེབ༌ཨིན༌།’ ”
5 ཏེ༌ནེ༌ ཡ༌ཝའེ༌ མོ༌ཟེས༌ལ༌ མོལས༌, “ཨ༌རོན༌ལ༌ ཟེར༌, ‘ཁྱོ༌རང༌ངི༌ ལག༌ག༌ ཡོད༌ཁན༌ནི༌ བེར༌ཀ༌ ཨི༌ཇིབ༌བི༌ ལྩངས༌པོ༌, ཡུ༌ར༌ དང༌ ཟིང༌ ཚང༌མའེ༌ཀ༌ རྐྱངས༌ཏེ༌ བལ༌པ༌གུན༌ ཨི༌ཇིབ༌བི༌ ས༌ཀྱད༌ གང༌པོའེ༌ ནང༌ང༌ གང༌ཅུག༌།’ ”
6 ཏེ༌ནེ༌ ཨ༌རོན༌ནི༌ ཁོ༌རང༌ངི༌ ལག༌པ༌ ཨི༌ཇིབ༌བི༌ ཆུ༌ ཚང༌མའེ༌ཀ༌ རྐྱངས༌པ༌ ཆུའི༌ ནང༌ནེ༌ བལ༌པ༌ བིང༌ཏེ༌ ཨི༌ཇིབ༌བི༌ ས༌ཀྱད༌ གང༌པོ༌ ཀབས༌།
7 ཨིན༌ནའང༌ ཆོས༌ངན༌ ཅོ༌ཁན༌གུན༌ནིའང༌ སང༌ཝའེ༌ ཁྱུད༌ ཀོལ༌ཏེ༌ ཏེན༌ན༌ ཙོགས༌ ཅོས༌། ཁོང༌གུན༌ནིའང༌ ཆུའི༌ ནང༌ནེ༌ བལ༌པ༌ ཨི༌ཇིབ༌བི༌ ས༌ཀྱད༌དི༌ཀ༌ བིང༌ཅུགས༌།
8 ཏེ༌ནེ༌ གྱལ༌པོའེ༌ མོ༌ཟེས༌ དང༌ ཨ༌རོན༌ལ༌ བོད༌ཏེ༌ ཟེརས༌, “ང༌ དང༌ ངའེ༌ མི༌གུན༌ནི༌ ཀ༌ནེ༌ བལ༌པ༌ ཚང༌མ༌ མེད༌ཁན༌ ཅོ༌ཅེས༌ལ༌ ཡ༌ཝ༌ མོས༌ལམ༌ ཞུས༌ ཏེ༌ནེ༌ ཁོང༌ང༌ ཆོད༌པ༌ ཕུལ༌ཅེས༌ལ༌ ངའེ༌ ཁྱོ༌ཞའེ༌ མི༌གུན༌ ཆ༌ཅུག༌ཨིན༌།”
9 མོ༌ཟེས༌སི༌ གྱལ༌པོའ༌ ཟེརས༌, “ཁྱོ༌རང༌ངི༌ ལྡམས༌ཁན༌ནི༌ ཏུས༌པོའེ༌ཀ༌ ངའེ༌ ཁྱོ༌རང༌, ཁྱོ༌རང༌ངི༌ སྤོན༌བོ༌གུན༌ དང༌ མི༌གུན༌ ཡང༌ ཁྱོ༌ཞའེ༌ ཁང༌པ༌གུན༌ནི༌ ནང༌ནེ༌ བལ༌པ༌གུན༌ མེད༌ཁན༌ ཆ༌ཅེས༌ལ༌ མོས༌ལམ༌ ཞུ༌ཨིན༌། ལྩངས༌པོ༌ ནཱའེལ༌ ཅིག༌པོའེ༌ ནང༌ང༌ ཏེ༌གུན༌ ལུས༌ཨིན༌།”
10 གྱལ༌པོའེ༌ ཟེརས༌, “ཐོ༌རེ༌ ཅོས༌།”
མོ༌ཟེས༌སི༌ ལན༌ཏངས༌, “ཁྱོ༌རང༌ངི༌ ཟེར༌ཁན༌ ནང༌ཞིན༌ ཏེ༌བོ༌ གྲུབ༌ཨིན༌། ཏེ༌ནེ༌ ཁྱོ༌རང༌ང༌ ཡ༌ཝ༌ ང༌ཞའེ༌ དཀོན༌མཆོག༌ ཙོགས༌ སུའང༌ མེད༌ཁན༌བོ༌ ཧ༌གོ༌ཡིན༌།
11 བལ༌པ༌གུན༌ ཁྱོ༌རང༌, ཁྱོ༌རང༌ངི༌ སྤོན༌བོ༌གུན༌ དང༌ མི༌གུན༌ནི༌ ཁང༌པ༌གུན༌ནི༌ ནང༌ནེ༌ བིང༌ཏེ༌ ཆེན༌། ལྩངས༌པོ༌ ནཱའེལ༌ ཅིག༌པོའེ༌ ནང༌ང༌ ལུས༌ཨིན༌།”
12 མོ༌ཟེས༌ དང༌ ཨ༌རོན༌ གྱལ༌པོའེ༌ ཁར༌ནེ༌ བིང༌ཏེ༌ སོང༌ ཡང༌ མོ༌ཟེས༌སི༌ ཡ༌ཝ༌ བལ༌པ༌གུན༌ མེད༌ཁན༌ ཛད༌ཅེས༌ལ༌ མོས༌ལམ༌ ཞུས༌ ཀ༌གུན༌ ཁོང༌ངི༌ གྱལ༌པོའེ༌ ས༌ཆའེ༌ ནང༌ང༌ ཁྱོང༌ང༌ ཛདས༌།
13 ཡང༌ ཡ༌ཝའེ༌ མོ༌ཟེས༌སི༌ ཞུ༌ཝ༌ ཕུལ༌ཁན༌བོ༌ ཛདས༌། ཁང༌པ༌, ནང༌སྐོར༌ དང༌ ཞིང༌ གུན༌ནི༌ ནང༌ང༌ ཡོད༌ཁན༌ བལ༌པ༌ ཚང༌མ༌ ཤི༌།
14 མི༌གུན༌ནི༌ བལ༌པ༌ ཤི༌ཁན༌ ཚང༌མ༌ ལྡུས༌ཏེ༌ སྤུངས༌ ཡང༌ ཡུལ༌ གང༌པོའེ༌ ནང༌ང༌ ཏྲི༌ངན༌ གངས༌།
15 ཨིན༌ནའང༌ གྱལ༌པོའ༌ ཏེ༌ རྡུག༌ངལ༌བོ༌ མེད༌ཁན༌ ཆའ༌ ཐོང༌ང༌ཅིག༌ ཡ༌ཝའེ༌ མོལ༌ཁན༌ ནང༌ཞིན༌ ཁོའེ༌ སྙིང༌ ཡང༌སྐྱར༌ སྐྱོང༌པོ༌ གྱུར༌ཏེ༌ མོ༌ཟེས༌ དང༌ ཨ༌རོན༌ནི༌ ཟེར༌ཁན༌བོ༌ མ༌ཅོས༌།
ཆད༌པ༌ སུམ༌པ༌།
8:16-19
16 ཏེ༌ནེ༌ ཡ༌ཝའེ༌ མོ༌ཟེས༌ལ༌ མོལས༌, “ཨ༌རོན༌ལ༌ ཁོ༌རང༌ངི༌ བེར༌ཀ༌ སྟགས༌ཏེ༌ སའ༌ གྱབ༌ཅེས༌ལ༌ ཟེར༌། ཨི༌ཇིབ༌བི༌ ས༌ཆ༌ གང༌པོའེ༌ ཐལ༌བ༌གུན༌ སོ༌གའ༌ ཏབ༌ཁན༌ནི༌ བུ༌ཙིག༌ འུར༌ཁན༌ ཆུ༌ངུན༌གུན༌ལ༌ གྱུར༌ཨིན༌།”
17 མོ༌ཟེས༌ དང༌ ཨ༌རོན༌ནི༌ ཡ༌ཝའེ༌ བཀའ༌ སལ༌ཁན༌ ནང༌ཞིན༌ ཅོས༌། ཨ༌རོན༌ནི༌ ཁོ༌རང༌ངི༌ བེར༌ཀ༌ སྟགས༌ཏེ༌ སའེ༌ཀ༌ གྱབ༌བ༌ཅིག༌ མི༌གུན༌ དང༌ སེམས༌ཅན༌གུན༌ བུ༌ཙིག༌གི༌ ཀབས༌། ཨི༌ཇིབ༌བི༌ ས༌ཀྱད༌དི༌ ཐལ༌བ༌ ཚང༌མ༌ སོ༌གའ༌ ཏབ༌ཁན༌ནི༌ བུ༌ཙིག༌ འུར༌ཁན༌ ཆུ༌ངུན༌ལ༌ གྱུར༌།
18 གྱལ༌པོའེ༌ ཆོས༌ངན༌ ཅོ༌ཁན༌གུན༌ནིའང༌ ཁོ༌རང༌གུན༌ནི༌ སང༌ཝའེ༌ ཁྱུད༌ གྱུད༌ཏེ༌ ཏེན༌ན༌ ཙོགས༌ ཅོ༌ཅེས༌ ཅོས༌ ཨིན༌ནའང༌ ཅོ༌ མ༌ཉན༌། མི༌གུན༌ དང༌ སེམས༌ཅན༌ ཚང༌མ༌ སོ༌གའ༌ ཏབ༌ཁན༌ནི༌ བུ༌ཙིག༌གུན༌ནི༌ ཀབས༌།
19 ཆོས༌ངན༌ ཅོ༌ཁན༌གུན༌ནི༌ གྱལ༌པོའ༌ ཟེརས༌, “འི༌བོ༌ དཀོན༌མཆོག༌གི༌ ཛད༌ཏེ༌ ཨིན༌ནོག༌།” ཨིན༌ནའང༌ ཡ༌ཝའེ༌ མོལ༌ཁན༌ ནང༌ཞིན༌ གྱལ༌པོའེ༌ སྙིང༌ སྐྱོང༌པོ༌ ལུས༌ཏེ༌ ཁོའེ༌ ཁོང༌གུན༌ནི༌ ཟེར༌ཁན༌བོའ༌ མ༌ཉནས༌།
ཆད༌པ༌ ཞི༌པ༌
8:20-32
20 ཏེ༌ནེ༌ ཡ༌ཝའེ༌ མོ༌ཟེས༌ལ༌ མོལས༌, “ང༌མོ༌ གྱལ༌པོ༌ ལྩངས༌པོ༌ ནཱའེལ༌ལ༌ ཆ༌ ཟ༌ནེ༌ ཁྱོ༌རང༌ ལམ༌མི༌ཀ༌ ཁོའ༌ ཐུག༌ག༌ སོང༌ཏེ༌ ཟེར༌, ‘ཡ༌ཝའེ༌ འི༌ཟུག༌ མོལས༌, ངའ༌ ཅོལ༌ཅེས༌ལ༌ ངའེ༌ མི༌གུན༌ ཆ༌ཅུག༌།
21 ཀལ༌ཏེས༌ ཁྱོ༌རང༌ངི༌ ཆ༌ མ༌ཅུག༌ན༌ ངའེ༌ ཁྱོ༌རང༌, ཁྱོ༌རང༌ངི༌ སྤོན༌བོ༌གུན༌, མི༌གུན༌ དང༌ ཁྱོ༌ཞའེ༌ ཁང༌པ༌གུན༌ནི༌ ནང༌ང༌ ར༌ངུ༌ མང༌པོ༌ ཀལ༌ཏེ༌ ཨི༌ཇིབ༌པ༌གུན༌ནི༌ ཁང༌པ༌ དང༌ ས༌ཀྱད༌ ཚང༌མ༌ ར༌ངུའི༌ ཚོགས༌གུན༌ གང༌ཨིན༌།’ ”
22 “ ‘ཨིན༌ནའང༌ ཏེ༌ ཞག༌ག༌ ངའེ༌ མི༌གུན༌ དུག༌སའེ༌ ནས༌ས༌ གོ༌ཤེན༌ སྐྱོབ༌ཨིན༌ ཏེ༌རུ༌ ར༌ངུའི༌ ཚོགས༌ ཅིག༌གའང༌ མི༌ཐོབ༌། ཏེ༌ནེ༌ ང༌ ཡ༌ཝ༌ ཁྱོ༌རང༌ངི༌ ས༌ཆའེ༌ ནང༌ང༌ ཡོད༌ཁན༌བོ༌ ཁྱོ༌རང༌ང༌ ཧ༌གོ༌ཡིན༌།
23 ངའེ༌ ང༌རང༌ངི༌ མི༌གུན༌ དང༌ ཁྱོ༌རང༌ངི༌ མི༌གུན༌ སོ༌སོ༌ ཕེ༌ཨིན༌། འི༌ ཧ༌ལས༌ཤེས༌སི༌ སྟགས༌པོ༌ ཐོ༌རེ༌ གྲུབ༌ཨིན༌།’ ”
24 ཡ༌ཝའེ༌ ཏེན༌ན༌ ཟུག༌ ཅོའ༌ ཛདས༌། ར༌ངུའི༌ ཚོགས༌ མང༌པོ༌ གྱལ༌པོའེ༌ ཁར༌ དང༌ ཁོའེ༌ སྤོན༌བོ༌གུན༌ནི༌ ཁང༌པ༌གུན༌ནི༌ ནང༌ང༌ གང༌ ཡང༌ ཨི༌ཇིབ༌བི༌ ས༌ཀྱད༌ གང༌པོ༌ ར༌ངུའི༌ ཀབ༌ཅེས༌པོའེ༌ ས༌ཀྱད༌ གང༌པོ༌ དོད༌མེད༌ ཆ༌ཅེས༌ གོ༌ཟུག༌།
25 གྱལ༌པོའེ༌ མོ༌ཟེས༌ དང༌ ཨ༌རོན༌ལ༌ བོད༌ཏེ༌ ཁྱོངས༌ ཡང༌ ཟེརས༌, “སོང༌ ཡང༌ ཁྱོ༌ཞའེ༌ དཀོན༌མཆོག༌ག༌ འིན༌ན༌ ནས༌སའེ༌ ནང༌ང༌ ཆོད༌པ༌ ཕུལ༌།”
26 ཨིན༌ནའང༌ མོ༌ཟེས༌སི༌ ལན༌ཏངས༌, “ཏེ༌ཟུག༌ ཅོ༌ན༌ གྲིག༌ཅེས༌ མ༌ནོག༌། ང༌ཞ༌རང༌ངི༌ ཡ༌ཝ༌ དཀོན༌མཆོག༌ག༌ ང༌ཞའེ༌ ཆོད༌པ༌ ཕུལ༌ཁན༌གུན༌ ཨི༌ཇིབ༌པ༌གུན༌ནི༌ ཚི༌ཏུ༌ ཐེའ༌ནོག༌ ཡང༌ ཁོང༌གུན༌ནི༌ དུན༌ལ༌ ཏེ༌ཟུག༌ ཅོ༌ན༌ ཁོང༌གུན༌ནི༌ ང༌ཞའ༌ རྡོའ༌ གྱབས༌ཏེ༌ མི༌སད༌ད༌?
27 ཡ༌ཝ༌ ང༌ཞའེ༌ དཀོན༌མཆོག༌ག༌ ཆོད༌པ༌ ཕུལ༌ཅེས༌སི༌ ཕིའ༌ ང༌ཞ༌གུན༌ ཞག༌མ༌ སུམ༌ རི༌སྟོང༌ངི༌ ནང༌ང༌ བེས༌ལ༌ ཆ༌གོས༌ ཀ༌ཟུག༌ ཁོང༌ངི༌ བཀའ༌ སལ༌ཏེ༌ ཡོད༌།”
28 གྱལ༌པོའེ༌ ཟེརས༌, “ངའེ༌ ཁྱོ༌རང༌གུན༌ རི༌སྟོང༌ང༌, ཡ༌ཝ༌ ཁྱོ༌ཞའེ༌ དཀོན༌མཆོག༌ག༌ ཆོད༌པ༌ ཕུལ༌ཅེས༌སི༌ ཕིའ༌ ཆ༌ཅུག༌ཨིན༌ ཀལ༌ཏེས༌ ཁྱོ༌ཞའ༌ མ༌ ཐག༌རིང༌ང༌ མ༌ཆའ༌ན༌། ངའེ༌ ཕིའ༌ མོས༌ལམ༌ ཞུས༌།”
29 མོ༌ཟེས༌སི༌ ལན༌ཏངས༌, “ང༌ ཁྱོ༌རང༌ངི༌ ཁར༌ནེ༌ བིང༌ང༌ཅིག༌ ངའེ༌ ཡ༌ཝ༌ མོས༌ལམ༌ ཞུ༌ཨིན༌ ཡང༌ ཐོ༌རེ༌ ཁྱོ༌རང༌, ཁྱོ༌རང༌ངི༌ སྤོན༌བོ༌གུན༌ དང༌ མི༌གུན༌ནི༌ ཀ༌ནེ༌ ར༌ངུ༌གུན༌ མེད༌ཁན༌ ཆེན༌། ཨིན༌ནའང༌ ང༌ཞའ༌ ཡ༌ཝ༌ ཆོད༌པ༌ ཕུལ༌ཅེས༌ལ༌ ཆ༌ མ༌ཅུག༌ག༌ གྱལ༌པོའེ༌ ང༌ཞའ༌ ཡང༌སྐྱར༌ གོབ༌སྐོར༌ ཏང༌ མ༌གོས༌།”
30 ཏེ༌ནེ༌ མོ༌ཟེས༌ གྱལ༌པོའེ༌ ཁར༌ནེ༌ སོང༌ ཡང༌ ཡ༌ཝའ༌ མོས༌ལམ༌ ཞུས༌།
31 ཡ༌ཝའེ༌ མོ༌ཟེས༌སི༌ ཞུ༌ཁན༌ ནང༌ཞིན༌ ཅོའ༌ཛདས༌: གྱལ༌པོ༌, ཁོའེ༌ སྤོན༌བོ༌གུན༌ དང༌ མི༌གུན༌ནི༌ ཀ༌ནེ༌ ར༌ངུའི༌ ཚོགས༌གུན༌ མེད༌ཁན༌ ཛདས༌, ཅིག༌གའང༌ ལུས༌ཤུག༌ག༌ མ༌ཛདས༌།
32 ཨིན༌ནའང༌ ཡང༌སྐྱར༌ གྱལ༌པོའེ༌ སྙིང༌ སྐྱོང༌པོ༌ གྱུར༌ཏེ༌ ཨིས༌ར༌ཨེལ༌པ༌གུན༌ ཆ༌མ༌ཅུགས༌།