5
1 མི༌གུན༌ནི༌ ཕྲོ༌ནེ༌ དཀོན༌མཆོག༌གི༌ ལྡམ༌མ༌ ཛད༌ཁན༌ནི༌ ཡ༌ཧུ༌དཱ༌པའེ༌ བླ༌མ༌ ཆེན༌མོ༌ ཚང༌མའེ༌, མི༌གུན༌ནི༌ བྲེལ༌ དཀོན༌མཆོག༌ ཉམ༌པོ༌ ལུས༌ཤུག༌ཅེས༌ལ༌, ཁོང༌གུན༌ནི༌ ཚབས༌ ཅོས༌ཏེ༌ ལས༌ ཅོའ༌ནོག༌། བླ༌མ༌ ཆེན༌མོའེ༌ ཁག༌ ནི༌, མི༌གུན༌ནི༌ སྡིག༌པའེ༌ ཕིའ༌ སེམས༌ཅན༌ནི༌ སྲོག༌གི༌ ཆོད༌པ༌ དང༌ སྐྱེས༌ གུན༌ དཀོན༌མཆོག༌གི༌ སྐུན༌དུན༌ལ༌ ཕུལ༌ཅེས༌པོ༌ ཨིན༌ནོག༌།
2 བླ༌མ༌ ཆེན༌མོ༌ ཁོ༌རང༌གུན༌ནའང༌ སེམས༌སི༌ ནང༌ང༌ འུ༌ཐུགས༌ ཡོད༌ པ༌སང༌, མ༌ཤེས༌ས༌ སྡིག༌པ༌ ཅོ༌ཁན༌གུན༌ ཉམ༌པོ༌ བོལ༌མོ༌ དང༌ ཇམ༌པོ༌ ཉམ༌པོ༌ ལས༌ ཅོ༌ ཉན༌ན༌ནོག༌།
3 ཏེན༌ན༌བོའེ༌ཕིའ༌ ཁོའ༌ ཁོ༌རང༌ངི༌ སྡིག༌པ༌ མ༌ཚད༌, མི༌གུན༌ནི༌ སྡིག༌པའེ༌ ཕིའང༌ སྲོག༌གི༌ ཆོད༌པ༌ ཕུལ༌གོས༌ས༌ནོག༌།
4 བླ༌མ༌ ཆེན༌མོའེ༌ རྩི༌ཝ༌ཅན༌ནི༌ ཀོ༌ས༌ སུ༌ཞིག༌གིའང༌ ལེན༌ཉན༌ན༌ མ༌ནོག༌། འི༌ ཀོ༌སའེ༌ ཕིའ༌ ཁོའ༌ དཀོན༌མཆོག༌གི༌ ལྡམ༌མ༌ ཛད༌གོས༌ས༌ནོག༌, ཀ༌ཟུག༌ ཨ༌རོན༌ ཟེར༌ཁན༌བོ༌ ཨིན༌པིན༌།
5 ཏེན༌ན༌བོའེ༌ཕིའ༌ མ༌ཤི༌ཀའེ༌ ཁོང༌རང༌ངི༌ ཁོང༌རང༌ང༌ རྩི༌ཝ༌ ཐོབ༌ཅེས༌ལ༌, བླ༌མ༌ ཆེན༌མོ༌ ཅོའ༌ མ༌ཛདས༌། ཨིན༌ནའང༌ ཁོང༌ང༌
"ཁྱོ༌རང༌ ངའེ༌ བུ༌ཚ༌ ཨིན༌།
དི༌རིང༌ ང༌ ཁྱོ༌རང༌ངི༌ ཨ༌བ༌ གྱུར༌ཏེ༌ ཨིན༌། "
མོལ༌ཁན༌ནི༌ དཀོན༌མཆོག༌གི༌ ལྡམ༌མ༌ ཛད༌ཏེ༌ ཨིན༌ནོག༌།
6 ཞན༌ཡང༌ ནས༌ས༌ཞིག༌གི༌ ནང༌ང༌ དཀོན༌མཆོག༌གི༌ ཁོང༌ང༌ མོལ༌ལ༌ ཛདས༌།
"མེལ༌ཀ༌ཟེ༌དེག༌ ཙོགས༌ལ༌ ཁྱོ༌རང༌ ནི༌ ཏུས༌གྱུན༌ནི༌ ཕིའ༌ བླ༌མ༌བོ༌ ཨིན༌།"
7 ཡེ༌ཤུ༌ ཇིག༌རྟེན༌ནི༌ཀ༌ ཞུགས༌ཏེ༌ ཡོད༌ ཟ༌ནེ༌, ཁོང༌ངི༌ ཁོང༌ ཤི༌ཅེས༌སི༌ ཀ༌ནེ༌ སྐྱོབ༌བ༌ ཛད༌ཉན༌ཁན༌ནི༌ དཀོན༌མཆོག༌ག༌ ཆི༌མ༌ ཉམ༌པོ༌ ཀུ༌ཅོ༌ ཏང༌ཨིན༌, ཞུ༌ཝ༌ དང༌ མོས༌ལམ༌ ཕུལ༌ལ༌ ཛདས༌། ཁོང༌ངི༌ སྙིང༌ངི༌ ཐིལ༌ནེ༌ དཀོན༌མཆོག༌ག༌ ཀུས༌པ༌ ཛད༌ཏེ༌, ཁོང༌རང༌ དཀོན༌མཆོག༌གི༌ ཝང༌ངི༌ ཡོག༌ག༌ བོར༌ར༌ ཛད༌པ༌, དཀོན༌མཆོག༌གི༌ ཁོང༌ངི༌ མོས༌ལམ༌གུན༌ སན༌ན༌ ཛདས༌།
8 ཞན༌ ཡེ༌ཤུ༌ དཀོན༌མཆོག༌གི༌ སྲས༌ ཨིན༌ནའང༌, རྡུག༌ངལ༌ བྱུང༌ང༌ ཛད༌ཅེས༌པོའེ༌ ཀ༌ནེ༌, ཁོང༌ང༌ དཀོན༌མཆོག༌ག༌ ཁའ༌ཉན༌ཅེས༌པོ༌ ལོབས༌།
9 འིན༌ན༌གུན༌ནི༌ ཞས༌ཏེ༌ དཀོན༌མཆོག༌གི༌ ཁོང༌ང༌ ཕུན༌སུམ༌ཚོགས༌པའེ༌ བླ༌མ༌ ཆེན༌མོ༌ ཅོའ༌ ཛདས༌། ཡང༌ ཡེ༌ཤུ༌ ནི༌, ཁོང༌རང༌ངི༌ ཁའ༌ཉན༌ཁན༌གུན༌ལ༌, ཐའ༌མེད༌པའེ༌ ཐར༌པ༌ སལ༌ལ༌ ཛད༌ཁན༌བོ༌ ཨིན༌ནོག༌།
10 འིན༌ན༌བོའེ༌ ཞས༌ཏེ༌ མེལ༌ཀ༌ཟེ༌དེག༌ ཙོགས༌ལ༌ དཀོན༌མཆོག༌གི༌ ཁོང༌ང༌ བླ༌མ༌ ཆེན༌མོའེ༌ ཀོ༌སའེ༌ཀ༌ སྐོའ༌ ཛདས༌།
ཏད༌པའེ༌ ནང༌ང༌ ལྡན༌ཅེས༌ལ༌ བོདས༌།
5:11 ནེ༌ 6:12
11 མ༌ཤི༌ཀ༌ བླ༌མ༌ ཆེན༌མོའེ༌ སྐོར༌ལ༌ ཤད༌རྒྱུ༌ མང༌པོ༌ ཡོད༌ཏེའང༌, ཁྱོ༌ཞ༌གུན༌ལ༌ ཧ༌གོ༌ཅུག༌ཅེས༌ མ༌ ཀགས༌པོ༌ ཆ༌རུག༌, ཅིའ༌ཟེར༌ན༌ སེམས༌ཉིད༌དི༌ ཐོག༌ནེ༌ ཧ༌གོ༌ཅེས༌ལ༌ ཁྱོ༌ཞ༌གུན༌ འུ༌ཐུགས༌ དུག༌།
12 ཁྱོ༌ཞ༌གུན༌ ཏུས༌ མང༌པོ༌ཞིག༌ནེ༌ ཕར༌ལ༌ ཏད༌པ༌ཅན༌ ཨིན༌ པ༌སང༌, ཁྱོ༌ཞ༌གུན༌ནི༌ ཞན༌མ༌གུན༌ལ༌ ལབ༌ཞའ༌ ཏང༌གོ༌ཤེས༌ ཨིན༌ནོག༌། ཨིན༌ནའང༌ ཁྱོ༌ཞ༌གུན༌ལ༌ ཏ༌རུང༌ངའང༌ དཀོན༌མཆོག༌གི༌ བཀའ༌དྲང༌པོའེ༌ མག༌ལྡན༌བོ༌, ཡང༌གོ༌མ༌ནེ༌ ལབ༌ཁན༌ཞིག༌གི༌ སྒོས༌དོམ༌ ཡོད༌ཏེ༌ ཨིན༌ནོག༌། ཁྱོ༌ཞ༌གུན༌ལ༌ ཟན༌ མན༌པ༌, འོ༌མའེ༌ སྒོས༌དོམ༌ ཡོད༌ཏེ༌ ཨིན༌ནོག༌།
13 འོ༌མ༌ ཅིག༌པོ༌ ཐུང༌ཁན༌གུན༌ ཏ༌རུང༌ངའང༌ ཕྲུ༌གུ༌ ཆུ༌ངུན༌ ཙོགས༌ ཨིན༌ནོག༌, ཁོང༌གུན༌ལ༌ མི༌ཚེ༌ དྲང༌པོ༌ ཕུད༌ཅེས༌སི༌ ལབ༌ཞ༌གུན༌ ཤེས༌ས༌ མ༌ནོག༌།
14 ཁར༌ཇི༌ ནི༌ ལྡན༌ཁན༌གུན༌ནི༌ ཕིའ༌ ཨིན༌ནོག༌, ཀ༌གུན༌ནི༌ རྩོན༌གྲུས༌ ཅོ༌ཅེས༌པོའེ༌, དྲང༌པོ༌ དང༌ ངན༌པའེ༌ ཁྱད༌པོ༌ ཧ༌གོ༌ཐུབ༌ཏེ༌ ཨིན༌ནོག༌།