6
1 ཏེ༌བོའེ༌ཕིའ༌ ང༌དང༌གུན༌ གོ༌ཟུག༌གི༌ཀ༌ མ༌ཤི༌ཀའེ༌ སྐོར༌ལ༌ ལབ༌ཞ༌ ཐོབ༌ཁན༌གུན༌ནི༌ཀ༌ ཡང༌སྐྱར༌ ལོགས༌ཏེ༌ མ༌ཆའ༌, ཨིན༌ནའང༌ ལྡན༌ཏེ༌ སམ༌བ༌ཅན༌ རིག༌ གྱུར༌ཨིན༌། དེན༌བ༌ ང༌དང༌ང༌ ངན༌པའེ༌ ལས༌གུན༌ནི༌ ཀ༌ནེ༌ གྱོད༌པ༌ སྐྱེ༌ཅེས༌ ཡང༌ དཀོན༌མཆོག༌གི༌ ནང༌ང༌ ཏད༌པ༌ ཅོ༌ཅེས༌སི༌ གོ༌མའེ༌ ལབ༌ཞ༌ གུན༌ནེ༌ ཡང༌སྐྱར༌ གོ༌ཟུགས༌ ཅོ༌གོས༌ མེད༌ཏེ༌ ཨིན༌ནོག༌།
2 ཁྱོ༌ཞ༌གུན༌ལ༌ ཁྲུས༌ལེན༌ཅེས༌, ཐུག༌ཉིད༌དི༌ ཁྱུད༌གུན༌ ཐོབ༌ཅེས༌ལ༌ གོའེ༌ཀ༌ ལག༌པ༌ བོར༌ཅེས༌, ཤི༌ཁན༌གུན༌ སོན༌ཏེའ༌ ལང༌ཅེས༌ དང༌ ཐའ༌མེད༌པའེ༌ ཁྲིམས༌ཅད༌ གུན༌ནི༌ སྐོར༌ལ༌ ཏ༌རུང༌ མང༌ང༌ ལབ༌ཞ༌ ལེན༌གོས༌ མེད༌པ༌ ཨིན༌ནོག༌།
3 ཡང༌ དཀོན༌མཆོག༌གི༌ ཐུགས༌དོད༌ ཡོད༌ན༌ ང༌དང༌གུན༌ ལྡན༌ཁན༌ནི༌ ལབ༌ཞའེ༌ ནང༌ང༌ ཀེན༌ལ༌ ཆེན༌།
4 གྱོད༌པ༌ ཅོ༌ཅེས༌སི༌ ཕིའ༌ འི༌ མི༌གུན༌ ལོགས༌ཏེ༌ མ༌ནེ༌ ཁྱོང༌ཉན༌ན༌ མ༌ནོག༌, ཀ༌གུན༌ལ༌ མ༌ཤི༌ཀའེ༌ སྐོར༌ལ༌ ལོན༌བོའེ༌ ཧ༌གོ༌ གང༌པོ༌ ཡོད༌, ནམ༌ཁའེ༌ ཅིན༌ལབས༌གུན༌ནི༌ བྲོད༌ ཉོངས༌, ཡང༌ དམ༌པའེ༌ ཐུག༌ཉིད༌དི༌ ནང༌ང༌ དྲེས༌,
5 དཀོན༌མཆོག༌གི༌ བཀའ༌ ཟང༌པོའེ༌ ཡང༌ དཀོན༌མཆོག༌གི༌ གྱལ༌སྲིད༌ ཡོང༌ཅེས༌ཅན༌ནི༌ ཁྱུད༌གུན༌ནི༌ ཐོང༌ངོམས༌ ཡོད༌།
6 ཡང༌ སྟིང༌ནེ༌ ཁོང༌གུན༌ དཀོན༌མཆོག༌ནེ༌ བེ༌ཏེ༌ ཐག༌རིང༌ང༌ སོང༌། འི༌ཙོགས༌སི༌ མི༌གུན༌ གྱོད༌སེམས༌སི༌ ནང༌ང༌ ལོགས༌ཏེ༌ ཁྱོང༌ཅེས༌པོ༌ ཉན༌ན༌ མ༌ནོག༌། དཀོན༌མཆོག༌གི༌ སྲས༌ ཕང༌ཅེས༌པོའེ༌, ཁོང༌གུན༌ནི༌ མ༌ཤི༌ཀའ༌ ཡང༌སྐྱར༌ རྐྱང༌ཤིང༌ངི༌ཀ༌ རྐྱང༌ཅེས༌ ཡང༌ མི༌གུན༌ནི༌ དུན༌ལ༌ ཁྲེལ༌བ༌ ལྟན༌ཅེས༌ དང༌ཙོགས༌ ཅོས༌ཏེ༌ ཨིན༌ནོག༌།
7 ས༌ཀྱད༌དི༌ ནང༌ང༌ ཆར༌པ༌ ཐིམས༌ཏེ༌ ཞིང༌བད༌པ༌གུན༌ལ༌ སྟོན༌ཐོགས༌ གྱལ༌ལ༌ སྨིན༌ཅེས༌པོའེ༌ཀ༌ དཀོན༌མཆོག༌གི༌ ཅིན༌ལབས༌ ཡོད༌ཏེ༌ ཨིན༌ནོག༌།
8 ཨིན༌ནའང༌ ཚེར༌མང༌ དང༌ ལྗང༌ཙེར༌ སྐྱེ༌ཁན༌ནི༌ ཞིང༌, ཕན༌མི༌ཐོགས༌ཤིག༌ ཨིན༌ནོག༌། ཏེ༌ ཞིང༌བོའ༌ ངན༌ ཕོག༌ཏེ༌ མེའ༌ཏུག༌ག༌ ཛད༌ད༌ནོག༌།
9 ཅེས༌པའེ༌ ཛ༌འོ༌གུན༌ ཞན༌ ང༌ཞའེ༌ ཏེ༌ཙོགས༌སི༌ སྤེ༌ར༌ ཏང༌ནའང༌, ཁྱོ༌ཞ༌གུན༌ནི༌ མི༌ཚེ༌ ཕུད༌ཚུལ༌བོ༌ ཐར༌པ༌ ཐོབ༌ཅེས༌ཅན༌གུན༌ ཙོགས༌, ཡོད༌ཅེས༌ལ༌ ང༌ཞའ༌ ལོ༌ཁྱེལ༌ རག༌།
10 དཀོན༌མཆོག༌ ནི༌ མི༌འོས༌པ༌ ཛད༌ཁན༌ཞིག༌ ཞུགས༌ཏེ༌ མ༌ནོག༌། ཁྱོ༌ཞ༌གུན༌ནི༌ ཁོང༌ངི༌ ཏོན༌ལ༌ ཙམ༌ཤིག༌གི༌ རྩོན༌གྲུས༌ དང༌ ཞན༌ཡང༌ ཏད༌པ༌ཅན༌གུན༌ལ༌ རོགས༌ ཅོས༌, ཡང༌ ཏ༌རུང༌ངའང༌ ཅོ༌ཅེས༌པོའེ༌ དཀོན༌མཆོག༌ག༌ ཅེས༌པ༌ ལྟན༌ཁན༌བོ༌, ཁོང༌ངི༌ མ༌ནེ༌ ཞེད༌ད༌ མི༌ཛད༌།
11 ཁྱོ༌ཞའ༌ སོན༌ཏེའ༌ ཡོད༌ ཟ༌ནེ༌, ཞན༌མ༌གུན༌ལ༌ ཅེས༌པ༌ ཅོ༌ཅེས༌པོ༌ ང༌ཞའེ༌ དོད༌པ༌ ཆེན༌མོ༌ ཨིན༌། ཏེ༌ཟུག༌ ཅོ༌ཅེས༌པོའེ༌ ཁྱོ༌ཞ༌གུན༌ནི༌ རེ༌ཝ༌ ཅོ༌ཁན༌བོ༌ དྲན༌དྲ༌ གྲུབ༌ ཐུབ༌ཨིན༌།
12 ཁྱོ༌ཞ༌གུན༌ ལས༌མི༌ལམ༌ གྱུར༌ མ༌གོས༌། ཨིན༌ནའང༌ ཏད༌པ༌ དང༌ སྙིང༌རུས༌ གུན༌ནི༌ ཞས༌ཏེ༌, དཀོན༌མཆོག༌གི༌ ཞལ༌ཆད༌ ཛད༌ཁན༌ ནོར༌སྐལ༌ལ༌, ཐོབ༌ཁན༌གུན༌ནི༌ སྤེའེ༌ཀ༌ གྲུལ༌ཅེས༌པོ༌ ང༌ཞའེ༌ དོད༌པ༌ ཨིན༌།
དཀོན༌མཆོག༌གི༌ ཞལ༌ཆད༌ ཨིད༌ཤེས༌ཅན༌།
6:13 ནེ༌ 20
13 དཀོན༌མཆོག༌གི༌ ཨབ༌ར༌ཧམ༌མ༌ ཞལ༌ཆད༌ ཛད༌ ཟ༌ནེ༌, ནའ༌ ཁུར༌ཅེས༌ལ༌ ཞན༌སུ༌ཞིག༌གའང༌ ཁོང༌ངི༌ སང༌ ཀྲག༌ག༌ཞིག༌ མེད༌ པ༌སང༌, དཀོན༌མཆོག༌གི༌ ཁོང༌རང༌ངི༌ ཚན༌ནི༌ ནང༌ང༌ ནའ༌ ཁུར༌ར༌ ཛད༌ཏེ༌ མོལས༌,
14 "ངའེ༌ ཏན༌ཏན༌ལ༌ ཁྱོ༌རང༌ང༌ ཅིན༌ལབས༌ ཏངས༌ཏེ༌
ཁྱོ༌རང༌ངི༌ པུར༌གྱུད༌གུན༌ མ༌མང༌པོ༌ ཕེལ༌ཅུག༌ཨིན༌།"
15 ཡང༌ ཨབ༌ར༌ཧམ༌མི༌ ཟོད༌པ༌ ཉམ༌པོ༌ སྲུངས༌པ༌, ཁོའ༌ དཀོན༌མཆོག༌གི༌ ཞལ༌ཆད༌ ཛད༌ཁན༌བོ༌ ཐོབ༌།
16 ནའ༌ ཁུར༌ ཟ༌ནེ༌, མི༌གུན༌ནི༌ ཁོ༌རང༌གུན༌ནི༌ སང༌ ཀྲག༌ག༌ཞིག༌གི༌ ནའ༌ ཁུར༌ར༌ནོག༌, ཡང༌ ནའ༌ ཁུར༌ཅེས༌པོའེ༌ ཁོང༌གུན༌ནི༌ ཟེར༌ཁན༌བོ༌ སྟན༌པོ༌ ཅོས༌ཏེ༌ ཟེར༌རྒྱུ༌ མེད༌ཁན༌ ཅོའ༌ནོག༌།
17 ཏེན༌ན༌ ཙོགས༌ལ༌, ཞལ༌ཆད༌ ཐོབ༌ཁན༌གུན༌ལ༌, དཀོན༌མཆོག༌ ཁོང༌རང༌ངི༌ ཐུགས༌སམ༌མི༌ ནང༌ང༌ མ༌ནེ༌ མི༌གྱུར༌ཅེས༌ ཨིན༌ཁན༌བོ༌, ཏན༌ཏན༌ སལ༌པོ༌ ཅོ༌ཅེས༌སི༌ ཕིའ༌ ཁོང༌ངི༌ ནའ༌ ཁུར༌ར༌ ཛདས༌།
18 ཏེ༌བོའེ༌ཕིའ༌ དཀོན༌མཆོག༌གི༌ ཞལ༌ཆད༌ ཛད༌ཁན༌ དང༌ ནའ༌ ཁུར༌ཁན༌ ཉིས༌ཀོའེ༌ ནང༌ང༌ གྱུར༌ཇ༌ མི༌ཛད༌, ཅིའ༌ཟེར༌ན༌ ཁོང༌ང༌ ཟུན༌ སལ༌ ཉན༌ཅེས༌ མ༌ནེ༌ མེད༌ཀྱག༌། ཏེ༌བོའེ༌ཕིའ༌ ང༌དང༌གུན༌ནི༌ ཐོབ༌ཅེས༌ཅན༌ནི༌ ཐར༌པའེ༌ རེ༌ཝ༌བོའ༌ ཐམས༌ཏེ༌, དཀོན༌མཆོག༌གི༌ ཆག༌གི༌ ཡོག༌ག༌ སྐྱོབ༌བ༌ ཛད༌ཅེས༌ལ༌ ཁོང༌ངི༌ དུན༌ལ༌ བང༌ཏང༌ཁན༌ ང༌དང༌གུན༌ལ༌ ལོ༌ཁྱེལ༌ ཆེན༌མོ༌ བོར༌ཐུབ༌བ༌ནོག༌།
19 འི༌ རེ༌ཝ༌བོའེ༌ ང༌དང༌གུན༌ནི༌ སེམས༌པོ༌ སྟན༌པོ༌, མ༌ནེ༌ སྐུལ༌མི༌ཉན༌ཅེས༌སི༌ བྲག༌ དང༌ཙོགས༌ ཅོའ༌ནོག༌, ཡང༌ ང༌དང༌གུན༌ ཡོ༌ལའེ༌ གྱབ༌བ༌, དཀོན༌མཆོག༌གི༌ ཚང༌མའེ༌སང༌ དམ༌པའེ༌ ནས༌ས༌བོའེ༌ ནང༌ང༌ ཁྲིད༌ཏེ༌ ཁྱེར༌ཨིན༌།
20 ཡེ༌ཤུ༌ ཏེ༌རུ༌ ང༌དང༌གུན༌ནི༌ ཏོན༌ལ༌ སྔུན༌ལ༌ སྐྱོད༌ ཚར༌ཏེ༌, མེལ༌ཀ༌ཟེ༌དེག༌ ཙོགས༌ལ༌ ཁོང༌ ཏུས༌གྱུན༌ནི༌ ཕིའ༌ ང༌དང༌གུན༌ནི༌ བླ༌མ༌ ཆེན༌མོ༌ གྱུར༌ར༌ ཛད༌ཏེ༌ ཨིན༌ནོག༌།