8
མ༌ཤི༌ཀ༌ ནི༌ ང༌དང༌གུན༌ནི༌ བླ༌མ༌ ཆེན༌མོ༌ ཞུགས༌ཏེ༌ ཨིན༌ནོག༌།
8:1 ནེ༌ 13
1 ངའེ༌ ཟེར༌ཅེས༌སི༌ ཏོན༌བོ༌ ནི༌, ང༌དང༌གུན༌ལ༌ བླ༌མ༌ ཆེན༌མོ༌ཞིག༌ ཡོད༌ཏེ༌ ཨིན༌ནོག༌། ཁོང༌ ནི༌ ནམ༌ཁའེ༌ ནང༌ང༌ ཟིར༌རྗིད༌ཅན༌ནི༌ དཀོན༌མཆོག༌གི༌ ཞུགས༌ཁྲིས༌སི༌ ཡས༌ ཆོགས༌ལ༌ རྩི༌ཝ༌ཅན༌ནི༌ ནས༌སའེ༌ཀ༌ ཞུགས༌ཁན༌བོ༌ ཨིན༌།
2 ཡང༌ ནམ༌ཁའེ༌ ཀུར༌, ངོས༌པོའེ༌ ཅོལ༌སའེ༌ ནས༌སའེ༌ ནང༌ང༌ བླ༌མའེ༌ ཚུལ༌ལ༌ ཞབ༌སྟོག༌ ཞུའ༌ ཛད༌ད༌ནོག༌, ཀ༌བོ༌ མིའི༌ མ༌ཅོའ༌ གཙོ༌བོ༌ དཀོན༌མཆོག༌གི༌ ཅོའ༌ ཛད༌ཏེ༌ ཨིན༌ནོག༌།
3 བླ༌མ༌ ཆེན༌མོ༌ ཚང༌མ༌, སྐྱེས༌ དང༌ སྲོག༌གི༌ ཆོད༌པ༌ གུན༌ ཕུལ༌ཅེས༌ལ༌ སྐོའ༌ ཛད༌ པ༌སང༌, ང༌དང༌གུན༌ནི༌ ནམ༌ཁའེ༌ བླ༌མ༌ ཆེན༌མོའང༌ ཕུལ༌ཅེས༌ལ༌ ཆོད༌པ༌ཞིག༌ ཡོང༌གོས༌།
4 གལ༌ཏེས༌ ཁོང༌, འི༌ ཇིག༌རྟེན༌ནི༌ཀ༌ ཞུགས༌ཏེ༌ ཡོད༌པིན༌ན༌ ཏེ༌ནེ༌ ཁོང༌ བླ༌མ༌ཞིག༌ ཨིན༌ ཁོ༌རང༌ མན༌གྲོ༌, ཅིའ༌ཟེར༌ན༌ འི༌རུ༌ ཁྲིམས༌ ནང༌ཞིན༌ ཆོད༌པ༌ ཕུལ༌ཁན༌ནི༌ བླ༌མ༌གུན༌ ཡོད༌ཏེ༌ ཨིན༌ནོག༌།
5 བླ༌མ༌གུན༌ནི༌ ཞབ༌སྟོག༌ ཞུ༌ཨིན༌ ཅོལ༌སའེ༌ ནས༌ས༌བོ༌ ནམ༌ཁའེ༌ ནང༌ང༌ ཡོད༌ཁན༌ནི༌ ངོས༌མ༌བོའེ༌ ཀྲིབ༌ཀྱག༌ ཙོགས༌ཤིག༌ ཨིན༌ནོག༌། ཏེན༌ན༌བོའེ༌ཕིའ༌ མོ༌ཟེས༌སི༌ ཀུར༌ ཅོ༌ཅེས༌པོ༌ གོ༌ཟུག༌ ཅོ༌ ཟ༌ནེ༌, དཀོན༌མཆོག༌གི༌ ཁོའ༌ སྤང༌པུད༌ད༌ ཛད༌ཏེ༌ མོལས༌, "ངའེ༌ ཁྱོ༌རང༌ང༌ རི༌ཀ༌ ཤད༌ཁན༌ ནང༌ཞིན༌, ཏེ༌ ཀུར༌བོ༌ ཅོ༌ཅེས༌སི༌ ནང༌ང༌ ཚིར༌ དང༌ ཀུར༌རི༌ རིང༌ དང༌ ཞང༌ ཚང༌མ༌ ཏན༌ཏན༌ ཅོ༌གོས༌། "
6 ཨིན༌ནའང༌ ཏ༌ དཀོན༌མཆོག༌གི༌ ང༌དང༌ངི༌ བླ༌མ༌ ཆེན༌མོ༌ ཡེ༌ཤུའ༌, སྔུན༌མའེ༌ བླ༌མ༌གུན༌ནི༌ སང༌ མང༌ང༌ གྱས༌པ༌ ཞབ༌སྟོག༌ ཞུ༌ཅེས༌ཤིག༌ སལ༌ལ༌ ཛད༌ཏེ༌ ཨིན༌ནོག༌། ཏེན༌ན༌ ཙོགས༌ལ༌ ཁོང༌ངི༌ དཀོན༌མཆོག༌ དང༌ ང༌དང༌གུན༌ནི༌ པར༌ལ༌ ཆད༌དོན༌ སོ༌མ༌ ཛད༌ཁན༌བོ༌ སྔུན༌མའེ༌ སང༌ གྱས༌ས༌ ཨིན༌ནོག༌། ཏེ༌བོའེ༌ ནང༌ང༌ དཀོན༌མཆོག༌གི༌ ཀ༌ནེ༌ ང༌དང༌ང༌ ཐོབ༌ཅེས༌ཅན༌ནི༌ ཅིན༌ལབས༌གུན༌, མང༌ང༌ གྱས༌ས༌ ཞལ༌ཆད༌ཞིག༌གི༌ཀ༌ སྟེན༌ཏེ༌ ཨིན༌ནོག༌།
7 གལ༌ཏེས༌ གོ༌མའེ༌ ཆད༌དོན༌བོ༌ སྐྱོན༌མེད༌ཤིག༌ ཡོད༌པིན༌ན༌, ཏེ༌ནེ༌ ཏེ༌བོའེ༌ ཚབས༌ལ༌ ཆད༌དོན༌ ཉིས༌པའེ༌ སྒོས༌དོམ༌ མེད༌གྲོ༌།
8 ཨིན༌ནའང༌ དཀོན༌མཆོག༌གི༌ མི༌གུན༌ནི༌ ནང༌ང༌ སྐྱོན༌ ཟིགས༌པ༌ མོལས༌,
"ཞག༌པོ༌ ལེབ༌པིན༌ ཨིན༌ནོག༌ གཙོ༌བོ༌ དཀོན༌མཆོག༌གི༌ མོལས༌,
ངའེ༌ ཨིས༌ར༌ཨེལ༌ དང༌ ཡ༌ཧུ༌དཱ༌པ༌ མི༌གུན༌ ཉམ༌པོ༌ ཆད༌དོན༌ སོ༌མ༌ཞིག༌ ཅོ༌ཨིན༌།
9 འི༌ ཆད༌དོན༌བོ༌ ངའེ༌ ཁོང༌གུན༌ནི༌ ཕ༌མེས༌པོ༌གུན༌ ཉམ༌པོ༌ ཅོ༌ཁན༌བོ༌ ཙོགས༌ མི༌ཡོང༌,
ཀ༌ཟ༌ནེ༌ ངའེ༌ ཁོང༌གུན༌ལ༌ ལག༌པ༌ ཐམས༌ཏེ༌ ཨི༌ཇིབ༌ནེ༌ ཕི༌ལོག༌ག༌ ཁྲིད༌ཏེ༌ ཁྱེར༌པིན༌།
ཁོང༌གུན༌ ངའེ༌ ཆད༌དོན༌བོའེ༌ ནང༌ང༌ ཨིད༌ཤེས༌ཅན༌ མ༌ལུས༌པ༌,
ངའེ༌ ཁོང༌གུན༌ལ༌ གྱབ༌ གྱུར༌པིན༌, གཙོ༌བོའེ༌ མོལས༌།
10 ཨིན༌ནའང༌ ཏེ༌སྟིང༌ནེ༌ འི༌བོ༌ ནི༌ ཨིས༌ར༌ཨེལ༌པ༌གུན༌ ཉམ༌པོ༌
ཅོ༌ཅེས༌ཅན༌ནི༌ ཆད༌དོན༌ སོ༌མ༌ཞིག༌ ཨིན༌, གཙོ༌བོའེ༌ མོལས༌།
ངའེ༌ ང༌རང༌ངི༌ ཁྲིམས༌གུན༌ ཁོང༌གུན༌ནི༌ སམ༌བའེ༌ ནང༌ང༌ ཅུག༌ཨིན༌
ཡང༌ ངའེ༌ ཁོང༌གུན༌ནི༌ སྙིང༌གུན༌ནི༌ ནང༌ང༌ བྲི༌ཨིན༌།
ང༌ ཁོང༌གུན༌ནི༌ དཀོན༌མཆོག༌, ཡང༌ ཁོང༌གུན༌ ངའེ༌ མི༌གུན༌ གྱུར༌ཨིན༌།
11 ཡང༌ ཁོང༌གུན༌ནི༌ ཁོ༌རང༌ངི༌ ཁྱིམ༌ཚེས༌པ༌གུན༌ མ༌ཚད༌ ཉེན༌གུན༌ལའང༌
'ཁྱོ༌ཞའེ༌ གཙོ༌བོ༌ དཀོན༌མཆོག༌ ཤེས༌གོས༌' ཟེར༌ཏེ༌ ལབ༌གོས༌ མི༌ཡོང༌།
ཅིའ༌ཟེར༌ན༌ ཉམ༌ཤུང༌ནེ༌ ཀྲག༌པོ༌ ཚོག༌པ༌, ཁོང༌ ཚང༌མའེ༌ ངའ༌ ཤེས༌ཨིན༌།
12 ཡང༌ ངའེ༌ ཁོང༌གུན༌ནི༌ ངན༌པ༌གུན༌ལ༌ ཤགས༌པ༌ ཏང༌ཨིན༌
ཡང༌ ངའེ༌ ཁོང༌གུན༌ནི༌ སྡིག༌པ༌གུན༌ མ༌ནེ༌ ཨིད༌ཏུ༌ མི༌བོར༌། "
13 དཀོན༌མཆོག༌གི༌ ཆད༌དོན༌ "སོ༌མའེ༌" ཞལ༌ཏ༌ སལ༌ལ༌ ཛད༌ ཟ༌ནེ༌, ཁོང༌ངི༌ སྔུན༌མའེ༌ ཆད༌དོན༌བོའེ༌ སྒོས༌དོམ༌ མེད༌ཁན༌བོ༌ ལྟན༌ན༌ནོག༌། ཡང༌ སྙིང༌པ༌ དང༌ ཕན༌མི༌ཐོགས༌ གུན༌ གྱོགས༌པ༌ མེད༌ཁན༌ ཆའ༌ནོག༌།