11
ཨིས༌ར༌ཨེལ༌པ༌གུན༌ ཐར༌ཅུག༌ཁན༌ ཡེཕ༌ཐཧ༌།
11:1-40
1 ཏ༌ གི༌ལེད༌པ༌ ཡེཕ༌ཐཧ༌, མག༌ ཏང༌ཁན༌ ཀྲག༌པོ༌ ཨིན༌པིན༌། ཁོའེ༌ ཨ༌བ༌ གི༌ལེད༌ ཡང༌ ཨ༌མ༌ ཟུགས༌ཙོང༌མ༌ཞིག༌ ཨིན༌པིན༌།
2 ཨིན༌ནའང༌ གི༌ལེད༌ལ༌ ཁོ༌རང༌ངི༌ ན༌མ༌ གྱུད༌ཏེ༌ ཞན༌ བུ༌ཚ༌གུན༌ ཇོར༌། ཏེ༌ བུ༌ཚ༌གུན༌ ལྡན༌ཏེ༌ སྟིང༌ནེ༌ ཁོང༌གུན༌ནི༌ ཡེཕ༌ཐཧ༌ ཁང༌པ༌ནེ༌ ཕིངས༌ཏེ༌ ཟེརས༌, “ང༌ཞའེ༌ ཁྱོ༌རང༌ང༌ ཨ༌བའེ༌ ནོར༌སྐལ༌ ཅའང༌ མི༌ཏང༌ ཅིའ༌ཟེར༌ན༌ ཁྱོ༌རང༌ ཟུགས༌ཙོང༌མའེ༌ བུ༌ཚ༌, ང༌ཞའེ༌ ཨ༌མའེ༌ ཕྲུ༌གུ༌ མ༌ནོག༌།”
3 ཏེ༌ནེ༌ ཡེཕ༌ཐཧ༌ ཁོ༌རང༌ངི༌ ཨ༌ཅོ༌ནོ༌གུན༌ནེ༌ ཤོར༌ཏེ༌ ཏོབ༌ ནས༌སའེ༌ ནང༌ང༌ དུགས༌, ཏེ༌རུ༌ ཁྲིམས༌ མ༌སྲུང༌ཁན༌ནི༌ མི༌ བན༌ཤིག༌ ཁོའེ༌ གྱབ༌ནེ༌ ཡོངས༌ ཡང༌ ཁོའེ༌ ཕྲོ༌པ༌ གྱུར༌།
4 ཏུས༌ བན༌ཤིག༌གི༌ སྟིང༌ནེ༌ ཨེམ༌མོན༌པ༌གུན༌ནི༌ ཨིས༌ར༌ཨེལ༌པ༌གུན༌ནི༌ གྱབ༌གལ༌ལ༌ མག༌ ཏངས༌།
5 གི༌ལེད༌པའེ༌ འུ༌སྐྱོང༌གུན༌ ཏོབ༌བ༌ ཡེཕ༌ཐཧ༌ ཡོད༌ས༌ སོང༌ཏེ༌ ཟེརས༌,
6 “ཡོང༌, ང༌ཞ༌གུན༌ནི༌ མག༌སྤོན༌ གྱུར༌ཏེ༌ ཨེམ༌མོན༌པ༌གུན༌ལ༌ མག༌ ཏང༌ཅེས༌ལ༌ ང༌ཞའ༌ རོགས༌ ཅོས༌།”
7 ཨིན༌ནའང༌ ཡེཕ༌ཐཧའེ༌ ཁོང༌གུན༌ལ༌ ཟེརས༌, “ཁྱོ༌ཞ༌གུན༌ནི༌ ངའ༌ ནཕ༌རད༌ ཅོས༌ཏེ༌ ང༌ ང༌རང༌ངི༌ ཨ༌བའེ༌ ཁང༌པ༌ནེ༌ ཕིངས༌ཏེ༌ མ༌ཏངས༌པིན༌ན༌? ཏ༌ ཀགས༌པོ༌ ཐོང༌ང༌ཅིག༌ ཅི༌ཕིའ༌ ཁྱོ༌རང༌གུན༌ ངའེ༌ཀ༌ ཡོངས༌ཏེ༌ ཨིན༌?”
8 འུ༌སྐྱོང༌གུན༌ནི༌ ལན༌ཏངས༌, “ང༌ཞའ༌ ཁྱོ༌རང༌ངི༌ རོགས༌ གོས༌སད༌། ཀལ༌ཏེས༌ ཁྱོ༌རང༌ངི༌ ང༌ཞའ༌ ཨེམ༌མོན༌པའེ༌ གྱབ༌གལ༌ལ༌ མག༌ ཏང༌ཅེས༌ལ༌ རོགས༌ ཅོ༌ན༌ ང༌ཞའེ༌ གི༌ལེད༌དི༌ ནང༌ང༌ དུག༌ཁན༌ ཚང༌མའེ༌ཀ༌ ཁྱོ༌རང༌ ཝང༌སྲུལ༌པ༌ སྐོ༌ཨིན༌།”
9 ཡེཕ༌ཐཧའེ༌ ལན༌ཏངས༌, “ཀལ༌ཏེས༌ ང༌ ཁྱོ༌ཞ༌གུན༌ལ༌ རོགས༌ ཅོའ༌ ཡོངས༌ཏེ༌ ཡ༌ཝ༌ དཀོན༌མཆོག༌གི༌ ངའ༌ ཨེམ༌མོན༌པ༌གུན༌ནི༌ཀ༌ གྱལ༌ཁ༌ སལ༌ན༌, དེན༌བའ༌ ཁྱོ༌ཞ༌གུན༌ནི༌ ངའ༌ ཁྱོ༌ཞའེ༌ འུ༌སྐྱོང༌ ལྡམ༌ ཨིན༌ན༌?”
10 འུ༌སྐྱོང༌གུན༌ནི༌ ལན༌ཏངས༌, “ཡ༌ཝ༌ སྤང༌པོ༌ ཞུགས༌ཏེ༌ ཨིན༌, ཏན༌ཏན༌ ཁྱོ༌རང༌ངི༌ ཟེར༌ཁན༌བོ༌ ང༌ཞའེ༌ ཅོ༌ཨིན༌།”
11 ཏེ༌ནེ༌ ཡེཕ༌ཐཧ༌ གི༌ལེད༌པ༌ འུ༌སྐྱོང༌གུན༌ ཉམ༌པོ༌ སོང༌, ཡང༌ ཁོང༌གུན༌ནི༌ ཁོ༌ ཁོང༌གུན༌ནི༌ཀ༌ འུ༌སྐྱོང༌ དང༌ མག༌མིའི༌ སྤོན༌བོའ༌ སྐོས༌། མིཟ༌པཧའེ༌ ནང༌ང༌ ཡ༌ཝའེ༌ སྐུན༌དུན༌ལ༌ ཡེཕ༌ཐཧའེ༌ ཟེར༌ཁན༌གུན༌ ཡང༌སྐྱར༌ ལྡབས༌ཏེ༌ ཟེརས༌།
12 ཏེ༌ནེ༌ ཡེཕ༌ཐཧའེ༌ ཨེམ༌མོན༌པ༌གུན༌ནི༌ གྱལ༌པོའ༌ ལོན༌ ཀལ༌ཏེ༌ ཏྲིས༌, “ང༌ཞའ༌ ནོལ༌ལ༌ ཡོང༌ཅེས༌ ང༌ཞའེ༌ ཁྱོ༌ཞའེ༌ གྱབ༌གལ༌ལ༌ ཅི༌ ཅོས༌?”
13 ཨེམ༌མོན༌ནི༌ གྱལ༌པོའེ༌ ཡེཕ༌ཐཧའེ༌ ལོན༌ ཁྱོང༌ཁན༌གུན༌ལ༌ ཟེརས༌, “ཨི༌ཇིབ༌ནེ༌ ཡོངས༌ཏེ༌ སྟིང༌ནེ༌ ཨིས༌ར༌ཨེལ༌པ༌གུན༌ ཨར༌ནོན༌ ལྩངས༌པོ༌ ནེ༌ ཡབ༌བོག༌ ལྩངས༌པོ༌ ཚོག༌པ༌, ཡོར༌དཱན༌ ལྩངས༌པོའེ༌ ཤར༌ ཆོགས༌སི༌ ངའེ༌ ས༌ཀྱད༌ གང༌པོ༌ ཀོགས༌ཏེ༌ ཁྱེརས༌། ཏ༌ ཞི༌དེ༌ ཉམ༌པོ༌ ཏེ༌ ས༌ཀྱད༌གུན༌ ལོགས༌ཏེ༌ ཏོང༌།”
14 ཡེཕ༌ཐཧའེ༌ ལོན༌ཁྱེར༌ཁན༌གུན༌ ཨེམ༌མོན༌པའེ༌ གྱལ༌པོའེ༌ཀ༌ ལོགས༌ཏེ༌ ལམ༌ཅུགས༌,
15 ཁོང༌གུན༌ནི༌ ཟེརས༌, “ཡེཕ༌ཐཧའེ༌ ཟེར༌དུག༌, ‘ཨིས༌ར༌ཨེལ༌པ༌གུན༌ནི༌ མོ༌འབ༌ ཡ༌ ཨེམ༌མོན༌པའེ༌ ས༌ཀྱད༌ ཀོགས༌ཏེ༌ མ༌ཁྱེར༌ར༌ ཨིན༌ནོག༌།
16 ཨིན༌ནའང༌ ཨིས༌ར༌ཨེལ༌པ༌གུན༌ ཨི༌ཇིབ༌ནེ༌ བིང༌ཏེ༌ ཐང༌སྟོང༌ གྱུད༌ཏེ༌ ཚོ༌ མར༌པོ༌ རྒལ༌ཏེ༌ ཀ༌དེཤ༌ལ༌ ལེབ༌ ཟ༌ནེ༌,
17 ཁོང༌གུན༌ནི༌ ཨི༌དོམ༌པའེ༌ གྱལ༌པོའ༌ ལོན༌ ཀལ༌ཏེ༌ ཟེརས༌, “ཁྱོ༌ཞའེ༌ ས༌ཀྱད༌ གྱུད༌ཏེ༌ ང༌ཞའ༌ ཆ༌ཅེས༌ལ༌ གོངས༌པ༌ སལ༌།” ཨིན༌ནའང༌ ཁོང༌གུན༌ནི༌ ཆ༌ མ༌ཅུགས༌། ཏེ༌ནེ༌ ཨིས༌ར༌ཨེལ༌པ༌གུན༌ནི༌ མོ༌འབ༌བི༌ གྱལ༌པོའ༌ ཏེན༌ན༌ ཙོགས༌ ཞུ༌ཝ༌ ཕུལས༌ ཨིན༌ནའང༌ ཁོང༌ངིའང༌ ཁོང༌གུན༌ ཆ༌ མ༌ཅུགས༌། ཏེ༌བོའེ༌ཕིའ༌ ཨིས༌ར༌ཨེལ༌པ༌གུན༌ ཀ༌དེཤ༌སི༌ ནང༌ང༌ དུགས༌།’ ”
18 “སྟིང༌ནེ༌ ཁོང༌གུན༌ ཐང༌སྟོང༌ གྱུད༌ཏེ༌ ཨི༌དོམ༌ དང༌ མོ༌འབ༌ ཡུལ༌གུན༌ནི༌ ཐའ༌མ༌ནེ༌ སོང༌ ཡང༌ མོ༌འབ༌བི༌ ཤར༌ ཆོགས༌སི༌ སན༌ཚམས༌ ཨར༌ནོན༌ ལྩངས༌པོའེ༌ འ༌ངོ༌ ཆོགས༌ལ༌ ཀུར༌ ཙུགས༌ཏེ༌ དུགས༌། ཁོང༌གུན༌ ཨར༌ནོན༌ ལྩངས༌པོ༌ རྒལ༌ཏེ༌ མོ༌འབ༌ ཡུལ༌ཇོངས༌སི༌ ནང༌ང༌ མན༌ནེ༌ མ༌སོང༌།”
19 “ཏེ༌ནེ༌ ཨིས༌ར༌ཨེལ༌པ༌གུན༌ནི༌ ཧེཤ༌བོན༌ གྱལ༌སའེ༌ ནང༌ང༌ དུག༌ཁན༌ ཨ༌མོར༌པའེ༌ གྱལ༌པོ༌ སི༌ཧོན༌ལ༌ ཁོང༌གུན༌ ཁོང༌ངི༌ ས༌ཀྱད༌ གྱུད༌ཏེ༌ ཆ༌ཅུག༌ཅེས༌ལ༌ གོངས༌པ༌ སལ༌ ཞུས༌།
20 ཨིན༌ནའང༌ གྱལ༌པོ༌ སི༌ཧོན༌ལ༌ ཨིས༌ར༌ཨེལ༌པ༌གུན༌ ཁོའེ༌ ས༌ཀྱད༌ གྱུད༌ཏེ༌ ཆ༌ཅེས༌པོའ༌ ཨིད༌ཤེས༌ མ༌ཅོས༌པ༌ ཁོའེ༌ ཡ༌ཧཟ༌ཟི༌ ནང༌ང༌ ཁོ༌རང༌ངི༌ མག༌མི༌གུན༌ བོད༌ཏེ༌ ཁོང༌གུན༌ནི༌ཀ༌ སྤུང༌གོལ༌ ཅོས༌།”
21 “ཨིན༌ནའང༌ ཨིས༌ར༌ཨེལ༌པའེ༌ དཀོན༌མཆོག༌ ཡ༌ཝའེ༌ གྱལ༌པོ༌ སི༌ཧོན༌ དང༌ ཁོང༌ངི༌ མག༌མི༌ ཚང༌མ༌ ཨིས༌ར༌ཨེལ༌པ༌གུན༌ནི༌ ལག༌ག༌ སལས༌ ཡང༌ ཁོང༌གུན༌ནི༌ ཏེ༌ ཡུལ༌ཇོངས༌སི༌ ནང༌ང༌ དུག༌ཁན༌ ཨ༌མོར༌པ༌གུན༌ནི༌ ས༌ཀྱད༌ གང༌པོ༌,
22 ལྷོ༌ ཆོགས༌སི༌ ཨར༌ནོན༌ ལྩངས༌པོ༌ནེ༌ བྱང༌ ཆོགས༌སི༌ ཡབ༌བོག༌ ལྩངས༌པོ༌ ཚོག༌པ༌ ཡང༌ ཤར༌ ཆོགས༌སི༌ ཐང༌སྟོང༌ནེ༌ ནུབ༌ ཆོགས༌སི༌ ཡོར༌དཱན༌ ལྩངས༌པོ༌ ཚོག༌པ༌ ང༌ཡོག༌ག༌ ཁྱོངས༌།”
23 “ཏ༌ ཨིས༌ར༌ཨེལ༌པའེ༌ དཀོན༌མཆོག༌ ཡ༌ཝའེ༌ ཨ༌མོར༌པ༌གུན༌ནི༌ ས༌ཀྱད༌ ཨིས༌ར༌ཨེལ༌པ༌གུན༌ལ༌ སལ༌ལ༌ ཛད༌ པ༌སང༌ ཏེ༌ནེ༌ ཅིའ༌ ང༌ཞའེ༌ འི༌གུན༌ ཁྱོ༌ཞའ༌ ལོགས༌ཏེ༌ ཏང༌ཨིན༌?
24 ཁྱོ༌ཞའེ༌ ལྷ༌ ཀེ༌མོཤ༌ཤི༌ ཏང༌ཁན༌བོ༌ ཁྱོ༌ཞ༌གུན༌ནི༌ མི༌ལེན༌ན༌? ཡ༌ཝ༌ དཀོན༌མཆོག༌གི༌ ང༌ཞའ༌ སལ༌ཁན༌བོ༌ ང༌ཞའེ༌ བོར༌ཨིན༌།
25 ཅི༌ ཁྱོ༌ཞའ༌ མོ༌འབ༌བི༌ གྱལ༌པོ༌ ཟིཔ༌པོར༌རི༌ བུ༌ཚ༌ བ༌ལག༌གི༌ སང༌ ཇིགས༌ས༌ ཨིན༌ན༌? ཅི༌ ཁོའེ༌ ས༌ཀྱད༌དི༌ ཛིང༌མོའེ༌ ཕིའ༌ ཨིས༌ར༌ཨེལ༌པའེ༌ གྱབ༌གལ༌ལ༌ ཁྲིམས༌ ཙུགས༌ས༌? ཅི༌ ཁོང༌གུན༌ནི༌ ཨིས༌ར༌ཨེལ༌པ༌གུན༌ནི༌ གྱབ༌གལ༌ལ༌ མག༌ ཏངས༌ས༌?
26 ཨིས༌ར༌ཨེལ༌པ༌གུན༌ ལོ༌ 300 ནེ༌ ཕར༌ལ༌ ཧེཤ༌བོན༌, ཨ༌རོ༌འེར༌ དང༌ ཏེ༌བོའེ༌ ཉེ༌ཁོར༌རི༌ ནས༌ས༌ ཡང༌ ཨར༌ནོན༌ ལྩངས༌པོའེ༌ གྲོང༌ཁྱེར༌ ཚང༌མའེ༌ ནང༌ང༌ དུགས༌ཏེ༌ ཨིན༌ནོག༌། ཏེ༌ཏུས༌ གང༌པོ༌ ཁྱོ༌ཞ༌གུན༌ནི༌ འི༌ ས༌ཀྱད༌གུན༌ ལོགས༌ཏེ༌ ཅིའ༌ མ༌ ཁྱེར༌པིན༌?
27 ངའེ༌ ཁྱོ༌ཞའ༌ ནོར༌ཁྲུལ༌ མ༌ཅོས༌པིན༌ ཨིན༌ནའང༌ ཁྱོ༌ཞ༌གུན༌ ང༌ཞའ༌ སྤུང༌གོལ༌ ཅོའ༌ལ༌ ཡོངས༌ཏེ༌ ནོར༌ཁྲུལ༌ ཅོས༌ཏེ༌ ཨིན༌ནོག༌། དི༌རིང༌ ཨིས༌ར༌ཨེལ༌པ༌ ཡ༌ ཨེམ༌མོན༌པ༌ ཉིས༌ཀོའེ༌ ནང༌ནེ༌ སུ༌ ཀྲང༌པོ༌ ཨིན༌ ནམ༌ཁའ༌ ཞུགས༌ཁན༌ནི༌ ཁྲིམ༌སྤོན༌ ཡ༌ཝའེ༌ ཐག༌ཅད༌ ཛད༌ཤིག༌།”
28 ཨིན༌ནའང༌ ཨེམ༌མོན༌པའེ༌ གྱལ༌པོའེ༌ ཡེཕ༌ཐཧའེ༌ ལོན༌ ཀལ༌ཁན༌བོའ༌ ནང༌སྟག༌ མ༌ཏངས༌།
29 ཏེ༌ནེ༌ ཡེཕ༌ཐཧའེ༌ ནང༌ང༌ ཡ༌ཝའེ༌ ཐུག༌ཉིད༌ གངས༌ ཡང༌ ཁོ༌ གི༌ལེད༌ དང༌ མ༌ནས༌སའེ༌ ཡུལ༌ཇོངས༌ གྱུད༌ཏེ༌ སོང༌ཏེ༌ གི༌ལེད༌དི༌ མིཟ༌པཧ༌ གྱལ༌སའེ༌ ནང༌ང༌ མག༌མི༌གུན༌ ཛོམ༌ཅུགས༌ཏེ༌ ཨེམ༌མོན༌པ༌གུན༌ལ༌ ནོལ༌ལ༌ སོང༌།
30 ཡང༌ ཡེཕ༌ཐཧའེ༌ ནའ༌ ཁུར༌ཏེ༌ ཡ༌ཝའ༌ ཟེརས༌, “ཀལ༌ཏེས༌ ཉེ༌རང༌ངི༌ ངའ༌ ཨེམ༌མོན༌པ༌གུན༌ནི༌ཀ༌ གྱལ༌ཁ༌ སལ༌ན༌
31 ང༌ ལོགས༌ཏེ༌ ཆ༌ ཟ༌ནེ༌ ངའེ༌ ཁང༌པའེ༌ ནང༌ནེ༌ གོ༌མ༌རང༌ ངའ༌ ཐུག༌ག༌ ཡོང༌ཁན༌བོ༌ ངའེ༌ མེའ༌ སྲགས༌ཏེ༌ ཉེ༌རང༌ང༌ ཆོད༌པ༌ ཕུལ༌ཨིན༌།”
32 ཏེ༌ནེ༌ ཡེཕ༌ཐཧ༌ མག༌མི༌གུན༌ ཉམ༌པོ༌ ཨེམ༌མོན༌པ༌གུན༌ལ༌ ནོལ༌ལ༌ སོང༌ ཡང༌ ཡ༌ཝའེ༌ ཁོའ༌ ཁོང༌གུན༌ནི༌ཀ༌ གྱལ༌ཁ༌ སལས༌།
33 ཁོའེ༌ ཨ༌རོ༌འེར༌ནེ༌ ཏངས༌ཏེ༌ མིན༌ནིཐ༌, ཐག༌རིང༌ ཨ༌བེལ༌ ཀེ༌ར༌མིམ༌ ཚོག༌པ༌ ཨེམ༌མོན༌པའེ༌ གྲོང༌ཁྱེར༌ ཉི༌ཤུ༌ ཁྲེས༌ཏོར༌ ཅོས༌། ཏེན༌ན༌ ཟུག༌གི༌ ཨིས༌ར༌ཨེལ༌པ༌གུན༌ནི༌ ཨེམ༌མོན༌པ༌གུན༌ལ༌ ཕམ༌ཀལས༌།
34 མིཟ༌པཧའ༌ ཡེཕ༌ཐཧ༌ ཁོ༌རང༌ངི༌ ཁང༌པ༌ ལོགས༌ཏེ༌ ལེབ༌བ༌ཅིག༌ ཁོའེ༌ བུ༌མོ༌ ཀྲམ༌བུ༌རིན༌ རྡུང༌ཨིན༌ རྩེས༌ ཏང༌ཨིན༌ ཁོའ༌ ཐུག༌ག༌ལ༌ བིངས༌ཏེ༌ ཡོངས༌། ཁོ༌ ཁོའེ༌ ཕྲུ༌གུ༌ ཅིག༌ཅིག༌པོ༌ ཨིན༌པིན༌། ཏེན༌ན༌ བུ༌མོ༌བོ༌ མན༌ནེ༌ ཁོའ༌ ཞན༌ ཕྲུ༌གུ༌ མེད༌པིན༌།
35 བུ༌མོ༌ ཐོང༌ང༌ཅིག༌ ཁོའེ༌ ཁོ༌རང༌ངི༌ ཀོས༌ ཤགས༌ ཡང༌ སེམ༌རྡུག༌ ཉམ༌པོ༌ ཟེརས༌, “ཨོ༌, ངའེ༌ བུ༌མོ༌། ཁྱོ༌རང༌ངི༌ ང༌ སེམ༌རྡུག༌ དང༌ རྡུག༌པོ༌ སྲན༌ཏྲེ༌ ཁྱོངས༌ ཅིའ༌ཟེར༌ན༌ ངའེ༌ ཡ༌ཝའ༌ ནའ༌ ཁུར༌པིན༌ ཡང༌ ཏེ༌བོ༌ ཅག༌ ཉན༌ཅེས༌ མེད༌།”
36 བུ༌མོའེ༌ ཟེརས༌, “ཨ༌བ༌ལེ༌, ཉེ༌རང༌ངི༌ ཡ༌ཝ༌ ཉམ༌པོ༌ ནའ༌ ཁུར༌ར༌ ཛད༌ཏེ༌ ཨིན༌ནོག༌། ཡ༌ཝའེ༌ ཉེ༌རང༌ང༌ ཨེམ༌མོན༌པ༌གུན༌ནི༌ཀ༌ གྱལ༌ཁ༌ སལ༌ལ༌ ཛད༌པ༌ ཏ༌ ཉེ༌རང༌ངི༌ ཁ༌ཆད༌ ཛད༌ཁན༌བོ༌ ང༌ ཉམ༌པོ༌ ཅོས༌།
37 ཨིན༌ནའང༌ ངའེ༌ ཞུ༌ཝ༌ ཅིག༌ཅིག༌པོ༌ ང༌ སལ༌ལེ༌། ང༌ རི༌ ཡུལ༌གུན༌ལ༌ ཁོར༌ཏེ༌ ང༌རང༌ངི༌ ཛ༌མོ༌གུན༌ ཉམ༌པོ༌ རྡུག༌པོ༌ ཅོ༌ཅེས༌ལ༌ ཟླ༌ཝ༌ ཉིས༌ སལ༌ལ༌ ཛད༌ ཅིའ༌ཟེར༌ན༌ ངའ༌ ན༌མ༌ ཅོས༌ཏེ༌ ཕྲུ༌གུ༌ ཇོར༌ཅེས༌སི༌ སྐབས༌ མེད༌ཏེ༌ ཨིན༌ནོག༌།”
38 ཡེཕ༌ཐཧའེ༌ ཟེརས༌, “ཁྱོ༌རང༌ ཆ༌ནའང༌ གྲིག༌།” ཡང༌ ཁོའེ༌ བུ༌མོ༌ ཟླ༌ཝ༌ ཉིས༌སི༌ ཕིའ༌ ཆ༌ཅུགས༌། བུ༌མོ༌ དང༌ ཁོའེ༌ ཛ༌མོ༌གུན༌ རི༌ཡུལ༌གུན༌ལ༌ སོང༌ ཡང༌ རྡུག༌པོ༌ ཅོས༌ ཅིའ༌ཟེར༌ན༌ ཁོའ༌ ན༌མ༌ ཅོས༌ཏེ༌ ཕྲུ༌གུ༌ ཇོར༌ཅེས༌སི༌ སྐབས༌ མེད༌ཏེ༌ ཨིན༌ནོག༌།
39 ཟླ༌ཝ༌ ཉིས༌སི༌ སྟིང༌ནེ༌ བུ༌མོ༌ ལོགས༌ཏེ༌ ཁང༌པ༌ ཡོང༌ང༌ཅིག༌ ཨ༌བའེ༌ ནའ༌ ཁུར༌ཁན༌ ནང༌ཞིན༌ ཁོ༌ ཉམ༌པོ༌ ཅོས༌། ཏེ༌ བུ༌མོའ༌ ན༌མ༌ ཅོས༌ཏེ༌ ཕྲུ༌གུ༌ ཇོར༌ཅེས༌སི༌ སྐབས༌ མ༌ཐོབ༌བ༌ ཤི༌།
ཏེ༌བོའེ༌ ཞས༌ཏེ༌ ཨིས༌ར༌ཨེལ༌ལི༌ ནང༌ང༌ ལུག༌སྲོལ༌ཞིག༌ གོ༌ཟུག༌།
40 གི༌ལེད༌པ༌ ཡེཕ༌ཐཧའེ༌ བུ༌མོའེ༌ དྲན༌སོའེ༌ ནང༌ང༌ ཨིས༌ར༌ཨེལ༌པ༌ བུ༌མོ༌ ན༌ཆུང༌གུན༌ ལོ༌ཞུང༌ ཞག༌པོ༌ ཞིའི༌ ཕིའ༌ རི༌ཡུལ༌ལ༌ དུག༌ག༌ ཆའད༌པིན༌།