12
ཨེཕ༌ར༌ཡིམ༌པ༌གུན༌ དང༌ ཡེཕ༌ཐཧ༌།
12:1-7
1 ཏེ༌ནེ༌ ཨེཕ༌ར༌ཡིམ༌པའེ༌ བུ༌ཚ༌གུན༌ ཛོམས༌ཏེ༌ ཡོར༌དཱན༌ ལྩངས༌པོ༌ རྒལ༌ཏེ༌ ཟ༌ཕོན༌ ཆོགས༌ལ༌ སོང༌ ཡང༌ ཡེཕ༌ཐཧའ༌ ཟེརས༌, “ཨེམ༌མོན༌པ༌གུན༌ལ༌ ནོལ༌ལ༌ ཆ༌ ཟ༌ནེ༌ ཁྱོ༌རང༌ངི༌ རོགས༌ ཅོ༌ཅེས༌ལ༌ ང༌ཞའ༌ ཅིའ༌ མ༌བོད༌པིན༌? ང༌ཞའེ༌ ཁྱོ༌ཞའ༌ རགས༌ཏེ༌ ཁྱོ༌ཞའེ༌ ཁང༌པ༌གུན༌ མེའ༌ ཏུག༌ཨིན༌།”
2 ཡེཕ༌ཐཧའེ༌ ལན༌ཏངས༌, “ཨེམ༌མོན༌པ༌གུན༌ནི༌ ང༌ཞའ༌ སྲན༌ཏྲེ༌ གོབ༌ནོན༌ ཅོ༌ ཟ༌ནེ༌ ངའེ༌ ཁྱོ༌ཞའ༌ རོགས༌ ཅོ༌ཅེས༌ལ༌ བོད༌པིན༌ ཨིན༌ནའང༌ ཁྱོ༌ཞའ༌ ང༌ཞའ༌ སྐྱོབ༌བ༌ མ༌ཡོངས༌།
3 ཁྱོ༌ཞའ༌ རོགས༌ ཅོའ༌ལ༌ མི༌ཡོང༌ཅེས༌པོ༌ ཧ༌གོའ༌ཅིག༌, ངའེ༌ ང༌རང༌ངི༌ སྲོག༌ ཇིགས༌པའེ༌ ནང༌ང༌ ཏངས༌ཏེ༌ ཨེམ༌མོན༌པ༌གུན༌ལ༌ ནོལ༌ལ༌ སོང༌པིན༌ ཡང༌ ཡ༌ཝའེ༌ ངའ༌ ཁོང༌གུན༌ནི༌ཀ༌ གྱལ༌ཁ༌ སལ༌ལ༌ ཛདས༌། ཏ༌ དི༌རིང༌ ཁྱོ༌ཞའ༌ ང༌ཞ༌གུན༌ལ༌ ནོལ༌ལ༌ ཅི༌ཕིའ༌ ཡོངས༌ཏེ༌ ཨིན༌?”
4 “ཁྱོ༌ཞའ༌ ཨེཕ༌ར༌ཡིམ༌ དང༌ མ༌ནས༌ས༌ སྡེ༌གུན༌ནེ༌ ཤོར༌ཏེ༌ ཆའ༌ཁན༌གུན༌ ཨིན༌ནོག༌” ཟེར༌ཏེ༌ ཨེཕ༌ར༌ཡིམ༌པ༌གུན༌ནི༌ གི༌ལེད༌པ༌གུན༌ལ༌ མ༌བེབས༌ ཅོས༌པ༌ ཡེཕ༌ཐཧའེ༌ གི༌ལེད༌པ༌ ཚང༌མ༌ ཛོམ༌ཅུགས༌ཏེ༌ ཁོང༌གུན༌ནི༌ཀ༌ སྤུང༌གོལ༌ ཅོས༌ཏེ༌ ཕམ༌ཀལས༌།
5 ཡོར༌དཱན༌ ལྩངས༌པོ༌ རྒལ༌ ཉན༌སའེ༌ ནས༌ས༌ ཏེལ༌མོ༌ ཚང༌མ༌ གི༌ལེད༌པ༌གུན༌ནི༌ ང༌ཡོག༌ག༌ ཁྱོངས༌། ཨེཕ༌ར༌ཡིམ༌པ༌ སོན༌ཏེའ༌ ལུས༌ཁན༌གུན༌ ཆུ༌ རྒལ༌ཏེ༌ ཆ༌ཅེས༌ལ༌ ཡོང༌ང༌ཅིག༌ གི༌ལེད༌པ༌གུན༌ནི༌ ཁོང༌གུན༌ལ༌ “ཁྱོ༌ཞའ༌ ཨེཕ༌ར༌ཡིམ༌པ༌ ཨིན༌ན༌” ཟེར༌ཏེ༌ ཏྲིའད༌པིན༌? ཀལ༌ཏེས༌ ཁོང༌གུན༌ནི༌ མན༌ ཟེར༌ན༌,
6 གི༌ལེད༌པ༌གུན༌ནི༌ ཁོང༌གུན༌ལ༌ “ཤིབ༌བོ༌ལེཐ༌” ཟེར༌ ཅུག༌གད༌པིན༌ ཀལ༌ཏེས༌ ཁོང༌གུན༌ནི༌ “སིབ༌བོ༌ལེཐ༌” ཟེར༌ན༌ ཁོང༌གུན༌ནི༌ ཁོང༌གུན༌ ཏེན༌ནེ༌ཀ༌ སད༌དད༌པིན༌ ཅིའ༌ཟེར༌ན༌ ཨེཕ༌ར༌ཡིམ༌པ༌གུན༌ལ༌ ཏེ༌ ཚིགས༌པོ༌ སལ༌པོ༌ ཟེར༌ ཉན༌ན༌ མེད༌པིན༌། ཏེན༌ན༌ ཞག༌ག༌ ཁོང༌གུན༌ནི༌ ཨེཕ༌ར༌ཡིམ༌པ༌ 42,000 སདས༌།
7 ཡེཕ༌ཐཧའེ༌ ཨིས༌ར༌ཨེལ༌པ༌གུན༌ནི༌ གོ༌ཁྲིད༌ ལོ༌ 6 ཅོས༌། ཁོ༌ ཤི༌ཏེ༌ སྟིང༌ནེ༌ ཁོའེ༌ སྤུར༌ གི༌ལེད༌དི༌ ནང༌ང༌ ཡོད༌ཁན༌ ཁོའེ༌ གྲོང༌ཁྱེར༌རི༌ ནང༌ང༌ སུབས༌།
ཨིབ༌ཟན༌, ཨེ༌ལོན༌ དང༌ ཨབ༌དོན༌ གོ༌ཁྲིད༌གུན༌།
12:8-15
8 ཡེཕ༌ཐཧའེ༌ སྟིང༌ནེ༌ བེད༌ལེ༌ཧེམ༌པ༌ ཨིབ༌ཟན༌ ཨིས༌ར༌ཨེལ༌པ༌གུན༌ནི༌ གོ༌ཁྲིད༌ གྱུར༌།
9 ཁོའ༌ བུ༌ཚ༌ 30 དང༌ བུ༌མོ༌ 30 ཡོད༌པིན༌། ཁོའེ༌ ཁོ༌རང༌ངི༌ སྡེ༌ནེ༌ མན༌ཁན༌གུན༌ལ༌ ཁོ༌རང༌ངི༌ བུ༌མོ༌གུན༌ ན༌མ༌ ཏངས༌ ཡང༌ ཁོ༌རང༌ངི༌ སྡེ༌ནེ༌ མན༌ཁན༌ བུ༌མོ༌གུན༌ ཁོ༌རང༌ངི༌ བུ༌ཚ༌གུན༌ལ༌ ན༌མའ༌ ཁྱོངས༌། ཨིབ༌ཟན༌ནི༌ ཨིས༌ར༌ཨེལ༌པ༌གུན༌ལ༌ གོ༌ཁྲིད༌ ལོ༌ 7 ཅོས༌།
10 ཁོ༌ ཤི༌ཏེ༌ སྟིང༌ནེ༌ ཁོའེ༌ སྤུར༌ བེད༌ལེ༌ཧེམ༌མི༌ ནང༌ང༌ སུབས༌།
11 ཨིབ༌ཟན༌ནི༌ སྟིང༌ནེ༌ ཟེ༌བུ༌ལོན༌ནི༌ སྡེ༌ནེ༌ ཨིན༌ཁན༌ ཨེ༌ལོན༌ནི༌ ཨིས༌ར༌ཨེལ༌པ༌གུན༌ལ༌ གོ༌ཁྲིད༌ ལོ༌ 10 ཅོས༌།
12 ཁོ༌ ཤི༌ཏེ༌ སྟིང༌ནེ༌ ཁོའེ༌ སྤུར༌ ཟེ༌བུ༌ལོན༌པའེ༌ ནས༌ས༌ ཨའི༌ཡ༌ལོན༌ནི༌ ནང༌ང༌ སུབས༌།
13 ཨེ༌ལོན༌ ཤི༌ཏེ༌ སྟིང༌ནེ༌ ཕི༌ར༌ཐོན༌པ༌ ཧིལ༌ལེལ༌ལི༌ བུ༌ཚ༌ ཨབ༌དོན༌ ཨིས༌ར༌ཨེལ༌པ༌གུན༌ནི༌ གོ༌ཁྲིད༌ གྱུར༌།
14 ཁོའ༌ བུ༌ཚ༌ 40 དང༌ ཚ༌འོ༌ 30 ཡོད༌པིན༌, ཁོང༌ རེ༌རེའ༌ ཞོན༌ཏེ༌ གྲུལ༌ཅེས༌ལ༌ བུང༌བུ༌ རེ༌རེ༌ ཡོད༌པིན༌། ཁོའེ༌ ཨིས༌ར༌ཨེལ༌པ༌གུན༌ལ༌ གོ༌ཁྲིད༌ ལོ༌ 8 ཅོས༌།
15 ཁོ༌ ཤི༌ཏེ༌ སྟིང༌ནེ༌ ཁོའེ༌ སྤུར༌ ཨེཕ༌ར༌ཡིམ༌པའེ༌ ནས༌ས༌ ཕི༌ར༌ཐོན༌ནི༌ ནང༌ང༌ སུབས༌ ཀ༌བོ༌ ཨ༌མ༌ལིཀ༌པ༌གུན༌ནི༌ རི༌ཡུལ༌ ཨིན༌པིན༌།