ཡོ༌ཤུའ༌ སྤེ༌ཆ༌།
ཡོ༌ཤུའེ༌ སྤེ༌ཆའེ༌ སྐོར༌
འི༌ སྤེ༌ཆའེ༌ ནང༌ང༌ ང༌དང༌ང༌ སྤེ༌ཆ༌ བྲི༌ཁན༌བོའེ༌ མིང༌ ཐོབ༌བ༌ མི༌དུག༌, ཨིན༌ནའང༌ མ༌ཤི༌ཀ༌པའེ༌ ཆོས༌སི༌ ནང༌ང༌ ཁས༌པ༌ མང༌པོའེ༌ འི༌ སྤེ༌ཆ༌ ཏེན༌ན༌ ཏུས༌སི༌ བླ༌མ༌ ཨེ༌ལི༌འ༌ཟར༌ ཡ༌ ཁོའེ༌ བུ༌ཚ༌ ཕི༌ནི༌ཧས༌ བྲིས༌ཏེ༌ ཨིན༌ནོག༌ སམ༌མ༌ནོག༌། ཡ༌ཧུ༌དཱ༌པའེ༌ ཆོས༌ ལབ༌ཁན༌ ལོབ༌བོན༌གུན༌ནི༌ མི༌རབས༌ནེ༌ མི༌རབས༌, སྟིང༌ཇུག༌གི༌ ལིའུ༌ མ༌སྟོགས༌ འི༌ སྤེ༌ཆ༌ གང༌པོ༌ ཡོ༌ཤུའེ༌ བྲིས༌ཏེ༌ ཨིན༌ནོག༌ ཟེར༌ཏེ༌ ལབ༌བད༌པིན༌ ཅིའ༌ཟེར༌ན༌ སྟིང༌ཇུག༌གི༌ ལིའུ༌ ནང༌ང༌ ཡོ༌ཤུའ༌ ཀྲོངས༌ཁན༌ནི༌ སྐོར༌ལ༌ བྲིས༌ཏེ༌ ཡོད༌ པ༌སང༌ ཁོང༌གུན༌ནི༌ ཏེ༌བོ༌ བླ༌མ༌ ཨེ༌ལི༌འ༌ཟར༌རི༌ བྲིས༌ཏེ༌ ཨིན༌ནོག༌ ཟེར༌ར༌ནོག༌། ཡོ༌ཤུའ༌ ཡ༌ ཨེ༌ལི༌འ༌ཟར༌ ཡ༌ ཁོའེ༌ བུ༌ཚ༌ ཡ༌ ཞན༌ བླ༌མ༌ ཡ༌ ལི༌ཝི༌པ༌ སུའི༌ བྲིས༌ཏེ༌ ཨིན༌ནའང༌ འི༌ སྤེ༌ཆའེ༌ ནང༌ང༌ ཤད༌ཁན༌ནི༌ གྱལ༌རབས༌གུན༌ མིག༌ནེ༌ ཐོང༌ཁན༌ ཡོ༌ཤུའེ༌ ཕྲོ༌པ༌ ཞིག༌གི༌ ཡ༌ ཕྲོ༌པའེ༌ ཀ༌ནེ༌ ཚོར༌ཁན༌ ཞིག༌གི༌ བྲིས༌ཏེ༌ ཨིན༌ནོག༌། ཏེན༌ན༌བོའེ༌ཕིའ༌ ཏེ༌ ནང༌ང༌ བྲིས༌ཁན༌གུན༌ ཀྲང༌པོ༌ དང༌ ནོར༌ཁྲུལ༌ མེད༌པ༌ ཨིན༌ནོག༌།
མ༌ཤི༌ཀ༌པའེ༌ ཆོས༌སི༌ ནང༌ང༌ ཁས༌པ༌ མང༌པོའེ༌ འི༌ སྤེ༌ཆ༌བོ༌ ཡེ༌ཤུ༌ མ༌ཤི༌ཀ༌ ལྟམས༌སི༌སང༌ སྔོན༌ནི༌ ལོ༌ 1370 ནེ༌ 1360 པར༌རི༌ ནང༌ང༌ བྲིས༌ཁན༌བོ༌ སམ༌མ༌ནོག༌, ཡང༌ན༌ གྱལ༌པོ༌ ས༌འུལ༌ དང༌ གྱལ༌པོ༌ དཱ༌བིད༌དི༌ ཏུས༌སི༌སང༌ སྔུན༌ལ༌, ཨིས༌ར༌ཨེལ༌པ༌གུན༌ སྐྱོབ༌ཁན༌ ཨོཐ༌ནི༌འེལ༌ལི༌ ཏུས༌ལ༌ ནམ༌ ཡ༌ཝའེ༌ ཁོ༌ ཨིས༌ར༌ཨེལ༌པ༌གུན༌ གྲ༌འོ༌ ཀ༌ནེ༌ སྐྱོབ༌བ༌ ལམ༌ཅུག༌ག༌ ཛདས༌།
ཡོ༌ཤུའེ༌ འི༌ སྤེ༌ཆ༌ ཨིས༌ར༌ཨེལ༌པ༌གུན༌ལ༌ དཀོན༌མཆོག༌གི༌ ཆད༌དོན༌ ཁའ༌ ཉན༌ཏེ༌ ཏེ༌བོ༌ནེ༌ ཐག༌རིང༌ང༌ མི༌ཆ༌ཅེས༌ལ༌ སྤོས༌པ༌ ཏང༌ང༌ལ༌ བྲིས༌ཏེ༌ ཨིན༌ནོག༌། འི༌ སྤེ༌ཆའེ༌ ཨིས༌ར༌ཨེལ༌པ༌གུན༌ནི༌ དཀོན༌མཆོག༌ ཡ༌ཝ༌ ཁོང༌རང༌ངི༌ ཞལ༌ཆད༌ དང༌ ཆད༌དོན༌ གུན༌ནི༌ ནང༌ང༌ ཨིད༌ཤེས༌ཅན༌ དང༌ ཀྲང༌པོ༌ ཞུགས༌ཁན༌བོ༌ ལབ༌བ༌ནོག༌། ཁོང༌ངི༌ ཨིས༌ར༌ཨེལ༌པ༌གུན༌ལ༌ ཀེ༌ནན༌ནི༌ ས༌ཀྱད༌ སལ༌ལ༌ ཛད༌ཅེས༌ ཡང༌ གྲ༌འོ༌གུན༌ལ༌ ཕམ༌ཀལ༌ཅེས༌སི༌ ནང༌ང༌ ཁོང༌གུན༌ལ༌ རོགས༌ ཛད༌ཅེས༌སི༌ ཞལ༌ཆད༌པོ༌ དྲན༌དྲ༌ ཛདས༌།
འི༌ སྤེ༌ཆ༌ ཁག༌ ཞི༌ ནང༌ང༌ བགོས༌ཏེ༌ ཨིན༌ནོག༌། གོ༌མའེ༌ ལིའུ༌ 12 པོ༌ ཀེ༌ནན༌ནི༌ ས༌ཀྱད༌ ང༌ཡོག༌ག༌ ཁྱོང༌ཅེས༌སི༌ སྐོར༌, ལིའུ༌ 13 ནེ༌ 22 སི༌ ནང༌ང༌ ཀེ༌ནན༌ནི༌ ས༌ཀྱད༌ ཨིས༌ར༌ཨེལ༌ལི༌ མི༌སྡེ༌ ཚང༌མའེ༌ ནང༌ང༌ བགོས༌ཁན༌ནི༌ སྐོར༌, སྟིང༌ཇུག༌གི༌ ལིའུ༌ 23 དང༌ 24 ནང༌ང༌ ཨིས༌ར༌ཨེལ༌པ༌གུན༌ལ༌ དཀོན༌མཆོག༌གི༌ ཆད༌དོན༌ ཉམ༌པོ༌ ཨིད༌ཤེས༌ཅན༌ དུག༌ཅེས༌ལ༌ སྤོས༌པ༌ དང༌ སྤང༌ཕུད༌ཁན༌ནི༌ སྐོར༌ ཨིན༌ནོག༌། ལིའུ༌ 24 སྟིང༌ཇུག༌ག༌ ཡོ༌ཤུའ༌ ཀྲོངས༌ཁན༌ནི༌ སྐོར༌ བྲིས༌ཏེ༌ ཡོད༌ཏེ༌ ཨིན༌ནོག༌།
1
ཡ༌ཝའེ༌ ཡོ༌ཤུའ༌ བཀའ༌ སལས༌།
1:1-9
1 ཡ༌ཝའེ༌ ཞབས༌ཏོག༌པ༌ མོ༌ཟེས༌ ཀྲོངས༌ཏེ༌ སྟིང༌ནེ༌, མོ༌ཟེས༌ལ༌ རོགས༌ཅོ༌ཁན༌ ནུན༌ནི༌ བུ༌ཚ༌ ཡོ༌ཤུའ༌ ཡ༌ཝའེ༌ མོལས༌,
2 “ངའ༌ ཞབས༌ཏོག༌ ཞུ༌ཁན༌ མོ༌ཟེས༌ ཤི༌ཏེ༌ མེད༌, ཏ༌ ཁྱོ༌རང༌ དང༌ ཨིས༌ར༌ཨེལ༌པ༌ ཚང༌མ༌ ཡོར༌དཱན༌ ལྩངས༌པོ༌ རྒལ༌ཅེས༌ལ༌ གྲལ༌གྲིག༌ ཅོས༌ ཡང༌ གོ༌ཁྲིད༌ ཅོས༌ཏེ༌ ཁྱོ༌ཞའ༌ ངའེ༌ ཏང༌ཅེས༌ཅན༌ནི༌ ས༌ཀྱད༌ལ༌ ཁོང༌གུན༌ ཁྱེར༌།
3 མོ༌ཟེས༌ལ༌ ཁ༌ཆད༌ ཅོ༌ཁན༌ ནང༌ཞིན༌, ངའེ༌ ཁྱོ༌ཞའེ༌ རྐང༌པ༌ བོར༌ཅེས༌ཅན༌ནི༌ ས༌ཀྱད༌ ཚང༌མ༌ ཁྱོ༌ཞའ༌ ཏང༌ཨིན༌།
4 ལྷོ༌ ཆོགས༌སི༌ ཐང༌སྟོང༌ ནེ༌ བྱང༌ ཆོགས༌སི༌ ལེ༌བ༌ནོན༌ནི༌ རི༌གུན༌ ཚོག༌པ༌ ཡང༌ ཤར༌ ཆོགས༌སི༌ ལྩངས༌པོ༌ ཆེན༌མོ༌ ཡུཕ༌རེ༌ཀྲས༌ ནེ༌ ནུབ༌ ཆོགས༌སི༌ མེ༌གྲི༌ཀྲེ༌རིའན༌ནི༌ ཚོ༌ ཚོག༌པ༌ ཁྱོ༌ཞའེ༌ ས༌ཀྱད༌ ཁྱེད༌ཨིན༌, ཏེ༌ ནང༌ང༌ ཧེད༌པ༌གུན༌ནི༌ ཡུལ༌ ཚང༌མ༌ ཐེས༌ཏེ༌ ཨིན༌ནོག༌།
5 ཡོ༌ཤུའ༌, ཁྱོ༌རང༌ངི༌ མི༌ཚེའེ༌ གང༌པོའེ༌ ནང༌ང༌ ཁྱོ༌རང༌ང༌ མག༌ ཏངས༌ཏེ༌ སུ༌ཞིག༌གིའང༌ ཕམ༌ཀལ༌ མི༌ཉན༌། མོ༌ཟེས༌ ཉམ༌པོ༌ དུག༌ག༌ ཙོགས༌ལ༌ ང༌ ཏུས༌གྱུན༌ ཁྱོ༌རང༌ ཉམ༌པོ༌ དུག༌ཨིན༌། ངའེ༌ ཁྱོ༌རང༌ མ༌ནེ༌ མི༌ཕང༌།”
6 “སེམས༌སི༌ ནང༌ང༌ ཤེད༌ཅན༌ གྱུར༌ཏེ༌ སྤོས༌པ༌ ལེན༌ ཅིའ༌ཟེར༌ན༌ ངའེ༌ ནའ༌ ཁུར༌ཏེ༌ ཁྱོ༌ཞའེ༌ ཕ༌མེས༌པོ༌གུན༌ལ༌ ཏང༌ཅེས༌སི༌ ས༌ཆའེ༌ ནང༌ང༌ ཁྱོ༌རང༌ངི༌ གོ༌ཁྲིད༌ ཅོས༌ཏེ༌ འི༌ མི༌གུན༌ ཁྱེར༌ཅེས༌ ཨིན༌ནོག༌།
7 ཤེད༌ཅན༌ གྱུར༌ཏེ༌ སྤོས༌པ༌ ཀྲག༌པོ༌ ལེན༌། ངའེ༌ ཞབས༌ཏོག༌པ༌ མོ༌ཟེས༌སི༌ ཁྱོ༌རང༌ང༌ ཏངས༌ཁན༌ནི༌ ཁྲིམས༌ ཚང༌མ༌ ཁའ༌ཉན༌ཅེས༌ ཏན༌ཏན༌ ཅོས༌། ཏེ༌གུན༌ནེ༌ གྱུར༌ཏེ༌ ཡས༌པ༌ ཡ༌ ཡོ༌མ༌ མ༌ཆ༌ ཏེ༌ནེ༌ ཁྱོ༌རང༌ ཀ༌རུ༌ ཆ༌ནའང༌ ཁྲངས༌པོ༌ ལུས༌ཨིན༌།
8 མི༌གུན༌ ཛོམས༌ས༌ འི༌ ཁྲིམས༌སི༌ སྤེ༌ཆ༌ ཏུས༌གྱུན༌ ཁྱོ༌རང༌ངི༌ སིལ༌གོས༌། ཉིན༌ཚན༌ མེད༌པ༌ ཏེ༌གུན༌ ཇངས༌ཏེ༌ ཏེ༌ནང༌ང༌ བྲིས༌ཏེ༌ ཡོད༌ཁན༌ ཚང༌མ༌ ཁྱོ༌རང༌ངི༌ ཅོ༌ཅེས༌ལ༌ ནང༌ང༌ བོར༌། ཏེ༌ནེ༌ ཁྱོ༌རང༌ ཁྲངས༌པོ༌ ལུས༌ཏེ༌ ཡར༌གྱས༌ ཆེན༌།
9 ངའེ༌ ཁྱོ༌རང༌ང༌ བཀའ༌ ཏང༌ངད༌, ཤེད༌ཅན༌ གྱུར༌ཏེ༌ སྤོས༌པ༌ ལེན༌། ཇིགས༌ མ༌ཇིགས༌ ཡ༌ སེམ༌ཤུག༌ ཆག༌ མ༌ཅུག༌ ཅིའ༌ཟེར༌ན༌ ཡ༌ཝ༌ ཁྱོ༌རང༌ངི༌ དཀོན༌མཆོག༌ ཁྱོ༌རང༌ ཀ༌རུ༌ ཆ༌ནའང༌ ཉམ༌པོ༌ ཡོད༌།”
ཡོ༌ཤུའེ༌ སྤུང༌གོལ༌ལི༌ ཕིའ༌ གྲལ༌གྲིག༌ ཅོས༌།
1:10-18
10 ཏེ༌ནེ༌ ཡོ༌ཤུའེ༌ ཨིས༌ར༌ཨེལ༌པའེ༌ གོ༌སྐྱོང༌གུན༌ལ༌ བཀའ༌ ཏངས༌,
11 “ཀུར༌ ཙུག༌ཏེ༌ ཡོད༌སའེ༌ ནས༌ས༌ ཚང༌མ༌ སོང༌ཏེ༌ མི༌གུན༌ལ༌ ཟན༌ གྲལ༌གྲིག༌ ཅོ༌ཅེས༌ལ༌ ཟེར༌ ཅིའ༌ཟེར༌ན༌ ཞག༌ སུམ༌པའེ༌ ཞག༌ག༌ ང༌དང༌གུན༌ ཡོར༌དཱན༌ ལྩངས༌པོ༌ རྒལ༌ཏེ༌ ཡ༌ཝ༌ ང༌དང༌ངི༌ དཀོན༌མཆོག༌གི༌ ང༌དང༌ང༌ སལ༌ཅེས༌ཅན༌ནི༌ ས༌ཀྱད༌པོ༌ ལེན༌ན༌ལ༌ ཆ༌ཅེས༌ ཨིན༌ནོག༌།”
12 ཏེ༌ནེ༌ ཡོ༌ཤུའེ༌ རུ༌བེན༌ དང༌ གཱད༌དི༌ སྡེ༌ གང༌པོ༌ ཡང༌ མ༌ནས༌སའེ༌ སྡེ༌ ཕེད༌པོའ༌ བོདས༌ ཡང༌ ཟེརས༌,
13 “ཡ༌ཝའེ༌ ཞབས༌ཏོག༌པ༌ མོ༌ཟེས༌སི༌ ཁྱོ༌ཞའ༌ བཀའ༌ སལ༌ཁན༌བོ༌ ཨིད༌ཏུ༌ ཅོ༌ཤིག༌། ང༌དང༌གུན༌ནི༌ དཀོན༌མཆོག༌ ཡ༌ཝའེ༌ ཁྱོ༌ཞའ༌ ཚུགས༌ཏེ༌ དུག༌ཅེས༌ལ༌ འི༌ ས༌ཀྱད༌པོ༌ སལ༌ལ༌ ཛད༌ཏེ༌ ཨིན༌ནོག༌།
14 ཁྱོ༌ཞའེ༌ ན༌མ༌, ཕྲུ༌གུ༌ དང༌ སེམས༌ཅན༌ ཚང༌མ༌ འི༌ཀ༌ མོ༌ཟེས༌སི༌ ཁྱོ༌ཞའ༌ སལ༌ཁན༌ ཡོར༌དཱན༌ ལྩངས༌པོའེ༌ ཤར༌ ཆོགས༌ལ༌ དུག༌ཅུག༌ ཨིན༌ནའང༌ ཁྱོ༌ཞའེ༌ མི༌ གྱལ༌ལ༌ ནོལ༌ཁན༌ ཚང༌མ༌ ཚོན༌ཆ༌ ཁུར༌ཏེ༌ ཡོར༌དཱན༌ ལྩངས༌པོའེ༌ འ༌ངོ༌ ཆོགས༌ལ༌ ཞན༌ སྡེ༌གུན༌ནི༌ སང༌ སྔུན༌ལ༌ སོང༌ཏེ༌ ཁྱོ༌ཞ༌རང༌ངི༌ སྤུན༌གུན༌ལ༌ རོགས༌ ཅོ༌གོས༌,
15 ནམ༌ཚོག༌པ༌ ཡ༌ཝའེ༌ ཁྱོ༌ཞའ༌ སལ༌ཁན༌ ཙོགས༌ ཁོང༌གུན༌ལ༌ ངལ༌ཚོ༌ མི༌སལ༌ ཡང༌ ནམ༌ཚོག༌པ༌ ཡ༌ཝ༌ དཀོན༌མཆོག༌གི༌ ཁོང༌གུན༌ལ༌ སལ༌ཅེས༌ཅན༌ནི༌ ས༌ཀྱད༌པོ༌ ཁོང༌གུན༌ནི༌ མི༌ལེན༌། ཏེ༌སྟིང༌ནེ༌ མོ༌ཟེས༌སི༌ ཁྱོ༌ཞའ༌ སལ༌ཁན༌ ཡོར༌དཱན༌ ལྩངས༌པོའེ༌ ཤར༌ ཆོགས༌སི༌ འི༌ ས༌ཆའེ༌ ནང༌ང༌ ཞི༌དེ༌ ཉམ༌པོ༌ དུག༌ག༌ ཁྱོ༌ཞའ༌ ལོགས༌ཏེ༌ ཆ༌ནའང༌ གྲིག༌།”
16 ཁོང༌གུན༌ནི༌ ཡོ༌ཤུའ༌ ལན༌ཏངས༌, “ཉེ༌རང༌ངི༌ ང༌ཞའ༌ བཀའ༌ སལ༌ཁན༌ ཚང༌མ༌ ང༌ཞའེ༌ ཅོ༌ཨིན༌ ཡང༌ ཉེ༌རང༌ངི༌ ང༌ཞའ༌ ཀ༌རུ༌ ལམ༌ཅུག༌ནའང༌ ང༌ཞ༌གུན༌ ཆེན༌།
17 ཏུས༌གྱུན༌ ང༌ཞ༌གུན༌ནི༌ མོ༌ཟེས༌སི༌ ཁའ༌ ཉན༌ན༌ ཙོགས༌ལ༌ ཉེ༌རང༌ངི༌ ཁའ༌ ཉན༌ཨིན༌ ཡང༌ མོ༌ཟེས༌ ཉམ༌པོ༌ ཞུག༌ས༌ ཙོགས༌ལ༌ ཡ༌ཝ༌ ཉེ༌རང༌ངི༌ དཀོན༌མཆོག༌ ཉེ༌རང༌ ཉམ༌པོ༌ ཞུགས༌ཤིག༌།
18 ཉེ༌རང༌ངི༌ བཀའ༌ ཏང༌ཁན༌གུན༌ལ༌ ཁའ༌ མ༌ཉན༌ན༌ ཉེ༌རང༌ངི༌ གོ༌ཁྲིད༌ ཅོ༌ཁན༌ནི༌ གྱབ༌གལ༌ ཅོ༌ཁན༌ ཚང༌མ༌ སད༌ཨིན༌། ཤེད༌ཅན༌ གྱུར༌ ཡང༌ སྤོས༌པ༌ ལེན༌།”