2
ཨིས༌ར༌ཨེལ༌པ༌ ཉིས༌ཀོ༌ དང༌ ར༌ཧབ༌།
2:1-24
1 ཏེ༌ནེ༌ ཡོ༌ཤུའེ༌ སང༌ཝའེ༌ ཐོག༌ནེ༌ གྱལ༌སའེ༌ སྲུང༌སྐྱོབ༌ ལྟའ༌ལ༌ ཤིཏ༌ཏིམ༌ ནེ༌ མི༌ ཉིས༌ ཀལ༌ཏེ༌ ཟེརས༌, “ཡོར༌དཱན༌ ལྩངས༌པོའེ༌ འ༌ངོ༌ ཆོགས༌སི༌ ས༌ཀྱད༌, མིག༌སལ༌ལི༌ ཡེ༌རི༌ཀོའེ༌ ནང༌ང༌ སོང༌ཏེ༌ སྟག༌ཅད༌ ཅོས༌།” ཏེ༌ནེ༌ ཁོང༌ ཉིས༌ཀོ༌ སོང༌ ཡང༌ ཟུགས༌ཙོང༌མ༌ ར༌ཧབ༌བི༌ ཁང༌པའེ༌ ནང༌ང༌ ཏེ༌ ཚན༌བོ༌ དུགས༌།
2 ཨིན༌ནའང༌ ཡེ༌རི༌ཀོའེ༌ གྱལ༌པོའ༌ ཨིས༌ར༌ཨེལ༌པ༌ ཁ༌ཅིག༌ ཏེ༌ ཚན༌ལ༌ སང༌ཝའེ༌ ཐོག༌ནེ༌ ཁོའེ༌ ཡུལ༌ལ༌ སྟག༌ཅད༌ ཅོའ༌ ཡོང༌ཁན༌བོ༌ གྱུས༌སོང༌།
3 ཏེ༌ནེ༌ གྱལ༌པོའེ༌ ར༌ཧབ༌བ༌ ལོན༌ ཀལ༌ཏེ༌ ཟེརས༌, “ཁྱོ༌རང༌ངི༌ ཁང༌པའ༌ ཡོང༌ཁན༌ནི༌ མི༌གུན༌ ཁྲིད༌ཏེ༌ ཁྱོང༌ ཅིའ༌ཟེར༌ན༌ ཁོང༌གུན༌ སང༌ཝའེ༌ ཐོག༌ནེ༌ ང༌དང༌ངི༌ ཡུལ༌ལི༌ སྲུང༌སྐྱོབ༌ ཚང༌མ༌ གྱུས༌ ཅོའ༌ལ༌ ཡོངས༌ཏེ༌ ཨིན༌ནོག༌།”
4 ཨིན༌ནའང༌ ར༌ཧབ༌བི༌ མི༌ ཉིས༌ཀོ༌ སྦས༌ཏེ༌ བོརས༌། ཁོའེ༌ ལོན༌ ཁྱོང༌ཁན༌གུན༌ལ༌ ལན༌ཏངས༌, “འོ༌ན༌ མི༌ ཉིས༌ འི༌རུ༌ ཡོངས༌ ཨིན༌ནའང༌ ཁོང༌གུན༌ ཀ༌ནེ༌ ཡོངས༌ཏེ༌ ཨིན༌ ང༌ གྱུས༌མེད༌།
5 མུན༌ཅུ༌རུབ༌ཀྱིས༌ལ༌ གྱས༌སྒོ༌ ཅུག༌གི༌ སང༌ སྔུན༌ལ༌ ཁོང༌གུན༌ གྱལ༌ས༌ ནེ༌ བིང༌ཏེ༌ སོང༌། ཁོང༌གུན༌ ཀ༌ངོ༌ ཆོགས༌ལ༌ སོང༌ ང༌ གྱུས༌མེད༌, ཀལ༌ཏེས༌ ཉེ༌ཞའ༌ གྱོགས༌པ༌ ཆ༌ན༌ ཁོང༌གུན༌ ཟུམ༌ ཉན༌ཅེས༌ ཨིན༌ནོག༌།”
6 ༼བུ༌མོའེ༌ མི༌ ཉིས༌ཀོ༌ ཁང༌པའེ༌ ཁེ༌ཐོག༌ག༌ ཁྱེར༌ཏེ༌ ཐོག༌གི༌ཀ༌ ཏིངས༌ཏེ༌ ཡོད༌ཁན༌ རྩའེ༌ ཡོག༌ག༌ ཀབས༌ཏེ༌ བོརས༌།༽
7 གྱལ༌པོའེ༌ ལོན༌ ཁྱོང༌ཁན༌གུན༌ གྱལ༌ས༌ ནེ༌ བིང༌ཏེ༌ ཆ༌ ཚར༌ར༌ཅིག༌ གྱས༌སྒོ༌ ཅུགས༌། ཏེ༌ མི༌གུན༌ ཙལ༌ཨིན༌ ཁོང༌གུན༌ ལམ༌ གྱུད༌ཏེ༌ ཡོར༌དཱན༌ ལྩངས༌པོ༌, རྒལ༌ཏེ༌ ཆ༌སའེ༌ ནས༌ས༌ ཚག༌པ༌ སོང༌།
8 ལྟའ༌ ཡོང༌ཁན༌གུན༌ ཉིད༌ ཏང༌ངི༌ སང༌ སྔུན༌ལ༌, ར༌ཧབ༌ ཁོང༌གུན༌ ཡོད༌ས༌ སོང༌
9 ཡང༌ ཟེརས༌, “ཡ༌ཝའེ༌ འི༌ ས༌ཀྱད༌ ཁྱོ༌ཞའ༌ སལ༌ཏེ༌ ཁྱོ༌ཞ༌གུན༌ནི༌ ཇིགས༌ནང༌ ང༌ཞའེ༌ཀ༌ བབས༌ཏེ༌ ཨིན༌ཁན༌བོ༌ ང༌ གྱུས༌ཡོད༌། འི༌ ས༌ཆའེ༌ ནང༌ང༌ དུག༌ཁན༌ ཚང༌མ༌ ཁྱོ༌ཞ༌གུན༌ལ༌ མ༌ སྲན༌ཏྲེ༌ ཇིགས༌ཏེ༌ ཡོད༌།
10 ཡ༌ཝའེ༌ ཁྱོ༌ཞ༌གུན༌ ཨི༌ཇིབ༌ ནེ༌ བིངས༌ཏེ༌ ཡོང༌ ཟ༌ནེ༌ ཁྱོ༌ཞའེ༌ ཕིའ༌ ཚོ༌ མར༌པོའེ༌ ཆུ༌ སྐམས༌ཅུག༌ག༌ ཛད༌ཁན༌ ཡང༌ ཁྱོ༌ཞའེ༌ ཡོར༌དཱན༌ནི༌ ལྩངས༌པོའེ༌ ཤར༌ ཆོགས༌སི༌ ཨ༌མོར༌པ༌ གྱལ༌པོ༌ སི༌ཧོན༌ དང༌ ཨོག༌ ཡང༌ ཁོང༌གུན༌ནི༌ མི༌ ཚང༌མ༌ ཁྲེས༌ཏོར༌ ཅོ༌ཁན༌བོ༌ ང༌ཞ༌གུན༌ནི༌ ཚོར༌།
11 ཏེ༌གུན༌ ཚོར༌ཏེ༌ ང༌ཞའེ༌ སྙིང༌ ཇིགས༌པའེ༌ གངས༌ ཡང༌ ནོལ༌ཅེས༌སི༌ སྤོས༌པ༌ མེད༌ཁན༌ སོང༌ ཅིའ༌ཟེར༌ན༌ ཁྱོ༌ཞའེ༌ དཀོན༌མཆོག༌ ཡ༌ཝའེ༌ ནམ༌ཁའ༌ དང༌ ཇིག༌རྟེན༌ ཉིས༌ཀོའེ༌ཀ༌ ཝང༌ སྲུལ༌ལ༌ ཛད༌ད༌ནོག༌།
12 ངའེ༌ ཁྱོ༌ཞའ༌ སྙིང༌རྗེ༌ སྟན༌ པ༌སང༌ ཏ༌ ཁྱོ༌ཞའེ༌ ང༌ དང༌ ངའེ༌ ནང༌ཚངས༌ལ༌ སྙིང༌རྗེ༌ སྟན༌ཅེས༌, ཡ༌ཝའེ༌ ཚན༌ནི༌ ནང༌ང༌ ནའ༌ ཁུར༌ར༌ ཛད༌ ཡང༌ ཏན༌ཏན༌ ཆ༌ཅེས༌ལ༌ ང༌ སྟགས༌ཤིག༌ སལ༌།
13 ཁྱོ༌ཞ༌གུན༌ནི༌ ངའེ༌ ཨ༌བ༌ དང༌ ཨ༌མ༌, ངའེ༌ ཨ༌ཅོ༌ནོ༌ དང༌ ཨ༌ཅེ༌ ནོ༌མོ༌ ཡང༌ ཁོང༌གུན༌ནི༌ ནང༌ཚངས༌ སད༌ མ༌སད༌ད༌ སྐྱོབ༌ཅེས༌སི༌ ཁ༌ཆད༌ ཅོས༌།”
14 མི༌ ཉིས༌ཀོའེ༌ བུ༌མོ༌བོའ༌ ཟེརས༌, “ང༌ཞའེ༌ ཁྱོ༌ཞའ༌ མ༌སྐྱོབ༌ན༌, དཀོན༌མཆོག༌གི༌ ང༌ཞའེ༌ སྲོག༌ ལེན༌ཤིག༌། ཀལ༌ཏེས༌ ཁྱོ༌རང༌ངི༌ ང༌ཞ༌གུན༌ནི༌ ལས༌སི༌ ཐབ༌ལྡིངས༌པོ༌ སུའང༌ མ༌ཤད༌ན༌ ཡ༌ཝའེ༌ འི༌ ས༌ཀྱད༌པོ༌ ང༌ཞའ༌ སལ༌ལ༌ཅིག༌ ང༌ཞའ༌ ཁྱོ༌རང༌ ཉམ༌པོ༌ སྙིང༌རྗེ༌ཅན༌ དང༌ ཨིད༌ཤེས༌ཅན༌ ལུས༌ཨིན༌།”
15 ར༌ཧབ༌བི༌ ཁང༌པ༌ གྱལ༌སའེ༌ རྩིག༌པའེ༌ཀ༌ ཡོད༌ པ༌སང༌ ཁོའེ༌ ཀར༌ཁུང༌ ནེ༌ ཐག༌པ༌ ཏངས༌ཏེ༌ ཁོང༌གུན༌ གྱལ༌སའེ༌ ཕི༌ལོག༌ ཆོགས༌ལ༌ ཕབས༌།
16 བུ༌མོའེ༌ ཁོང༌གུན༌ལ༌ ཟེརས༌, “ཙལ༌ཁན༌གུན༌ལ༌ ཁྱོ༌ཞའ༌ མི༌ ཐོབ༌ཅེས༌སི༌ ཕིའ༌ རི༌ ཆོགས༌ལ༌ སོང༌ཏེ༌ ཞག༌མ༌ སུམ༌ ཨིབས༌ཏེ༌ དུག༌, ཙལ༌ཁན༌གུན༌ ལོགས༌ཏེ༌ ཡོང༌ང༌ཅིག༌ ཁྱོ༌ཞའ༌ ལོགས༌ཏེ༌ སོང༌ཤིག༌།”
17 ཁོང༌གུན༌ནི༌ བུ༌མོའ༌ ཟེརས༌, “ཀལ༌ཏེས༌ ཁྱོ༌རང༌ངི༌ ང༌ཞའེ༌ ཟེར༌ཁན༌བོ༌ མ༌ཅོ༌ན༌, ཁྱོ༌རང༌ང༌ ཅོ༌ཁན༌ནི༌ ཁ༌ཆད༌པོའེ༌ ཀ༌ནེ༌ ང༌ཞའ༌ བུད༌ཏེ༌ ཨིན༌།
18 ང༌ཞའ༌ འི༌ ས༌ཀྱད༌དི༌ ནང༌ང༌ ཡོང༌ ཟ༌ནེ༌ ཁྱོ༌རང༌ངི༌ ང༌ཞའ༌ ཕབས༌ཁན༌ནི༌ ཀར༌ཁུང༌ངི༌ཀ༌ འི༌ རས༌ མར༌པོ༌བོ༌ ཏགས༌ཏེ༌ ཁྱོ༌རང༌ངི༌ ཨ༌བ༌ དང༌ ཨ༌མ༌, ཨ༌ཅོ༌ནོ༌ ཡང༌ ཁྱོ༌རང༌ངི༌ ཉེན༌གྲུང༌ ཚང༌མ༌ ཁྱོ༌རང༌ངི༌ ཁང༌པའེ༌ ནང༌ང༌ ཁྱོང༌གོས༌།
19 ཀལ༌ཏེས༌ སུ༌ཞིག༌ ཕི༌ལོག༌ག༌ སོང༌ཏེ༌ ལམ༌མི༌ཀ༌ སད༌ན༌ ཏེ༌བོ༌ ང༌ཞའེ༌ སྐྱོན༌ མན༌, ཨིན༌ནའང༌ སུ༌ཞིག༌གི༌ འི༌ ཁང༌པའེ༌ ནང༌ང༌ ཡོད༌ཁན༌གུན༌ནི༌ཀ༌ ལག༌པ༌ རྐྱངས༌ཏེ༌ སད༌ན༌, ཏེ༌བོ༌ ཕིའ༌ ང༌ཞའ༌ ནོངས༌ཅན༌ གྱུར༌ཨིན༌།
20 ཁྱོ༌རང༌ངི༌ ང༌ཞའེ༌ ཐབ༌ལྡིངས༌གུན༌ ཤད༌ན༌, ཏེ༌ནེ༌ ང༌ཞ༌གུན༌ འི༌ ནའ༌ ཁུར༌ཁན༌བོའེ༌ ཀ༌ནེ༌ བུད༌ཏེ༌ ཨིན༌ནོག༌།”
21 བུ༌མོའེ༌ ལན༌ཏངས༌, “ཁྱོ༌ཞའེ༌ ཟེར༌ཁན༌བོ༌ ངའེ༌ ཅོ༌ཨིན༌།” ཁོའེ༌ ཁོང༌གུན༌ ལོགས༌ཏེ༌ ལམ༌ཅུགས༌ ཡང༌ རས༌ མར༌པོ༌བོ༌ ཀར༌ཁུང༌ངི༌ཀ༌ ཏགས༌།
22 ཙལ༌ཁན༌གུན༌ནི༌ ཀ༌རུང༌ས༌ ཙལ༌ཏེ༌ ཁོང༌གུན༌ མ༌ཐོབ༌བ༌ ལོགས༌ཏེ༌ ཆ༌ཆ༌ ཚག༌པ༌ ཨིས༌ར༌ཨེལ༌པ༌ ཉིས༌ཀོ༌ རི༌ ནང༌ང༌ ཨིབས༌ཏེ༌ ཞག༌མ༌ སུམ༌ དུགས༌།
23 ཏེ༌ནེ༌ ཁོང༌ ཉིས༌ཀོ༌ རི༌ནེ༌ བབས༌ཏེ༌ ཡོངས༌ ཡང༌ ཡོར༌དཱན༌ ལྩངས༌པོ༌ རྒལ༌ཏེ༌ ཡོ༌ཤུའ༌ ཡོད༌ས༌ སོང༌ ཡང༌ ཁོང༌གུན༌ ཉམ༌པོ༌ ཇུང༌ཁན༌ ཚང༌མ༌ ཁོའ༌ ཤདས༌།
24 ཁོང༌གུན༌ནི༌ ཟེརས༌, “ཏན༌ཏན༌ ཡ༌ཝའེ༌ ང༌དང༌གུན༌ལ༌ ཏེ༌ ས༌ཀྱད༌ གང༌པོ༌ སལ༌ཏེ༌ ཨིན༌ནོག༌ ཅིའ༌ཟེར༌ན༌ ཏེ༌རུ༌ དུག༌ཁན༌ མི༌ཚང༌མ༌ ང༌དང༌གུན༌ལ༌ མ༌སྲན༌ཏྲེ༌ ཇིགས༌ཏེ༌ དུག༌།”