11
བྱང༌ ཆོགས༌སི༌ མག༌མི༌གུན༌ལ༌ ཕམ༌ཀལས༌།
11:1-23
1 ཧ༌ཟོར༌རི༌ གྱལ༌པོ༌ ཡ༌བིན༌ལ༌ ཨིས༌ར༌ཨེལ༌པ༌ གྱལ༌ཁ༌ ཐོབ༌ཁན༌ ཚང༌མའེ༌ ནས༌ཚུལ༌ ཚོར༌ར༌ཅིག༌ ཁོའེ༌ མ༌དོན༌ནི༌ གྱལ༌པོ༌ ཡོ༌བབ༌, ཤིམ༌རོན༌ནི༌ གྱལ༌པོ༌ དང༌ ཨཀ༌ཤཕ༌ཕི༌ གྱལ༌པོ༌,
2 བྱང༌ ཆོགས༌སི༌ རི༌ ཡུལ༌ལི༌ གྱལ༌པོ༌གུན༌, གཱ༌ལིལ༌ལི༌ ཚོའེ༌ ལྷོ༌ ཆོགས༌ དང༌ ནུབ༌ ཆོགས༌སི༌ རི༌ཡུལ༌ ཡོར༌དཱན༌ ལུང༌པའེ༌ གྱལ༌པོ༌གུན༌, ནུབ༌ ཆོགས༌སི༌ ན༌ཕོཐ༌ དོར༌རི༌ གྱལ༌པོ༌གུན༌,
3 ཀེ༌ནན༌ནི༌ ཤར༌ དང༌ ནུབ༌བི༌ གྱལ༌པོ༌གུན༌, རི༌ཡུལ༌ལི༌ ནང༌ང༌ ཡོད༌ཁན༌ ཨ༌མོར༌པ༌, ཧེད༌པ༌, པེ༌རིཟ༌པ༌ དང༌ ཡེ༌བས༌པ༌ ཡང༌ མིཟ༌པཧ༌ ཡུལ༌ཇོངས༌སི༌ ནང༌ང༌ རི༌ ཧེར༌མོན༌ནི༌ ཡོག༌ག༌ དུག༌ཁན༌ ཧིཝ༌པའེ༌ གྱལ༌པོ༌གུན༌ལ༌ ཨིས༌ར༌ཨེལ༌པ༌གུན༌ནི༌ གྱབ༌གལ༌ལ༌ ནོལ༌ལ༌ ཡོང༌ཅེས༌ལ༌ ལོན༌ ཀལས༌།
4 ཏེ༌ གྱལ༌པོ༌ ཚང༌མ༌ མག༌མི༌, རྟ༌ དང༌ རྟ༌རེལ༌ མ༌མང༌པོ༌ ཉམ༌པོ༌ ནོལ༌ལ༌ ཡོངས༌། ཁོང༌གུན༌ནི༌ མག༌མི༌གུན༌ ཛོམ༌མ༌ཅིག༌ ཚོའེ༌ ཐའ༌མའེ༌ པེ༌མ༌ དང༌ ཙོགས༌ མ༌མང༌པོ༌ ཡོད༌པིན༌།
5 ཏེ༌ གྱལ༌པོ༌ ཚང༌མའེ༌ མག༌མི༌ ཛོམས༌ཏེ༌ ཨིས༌ར༌ཨེལ༌པ༌གུན༌ལ༌ ནོལ༌ཅེས༌ལ༌ མེ༌རོམ༌མི༌ ཆུའི༌ ཉེ༌མོའ༌ ཀུར༌ ཙུགས༌ཏེ༌ དུགས༌།
6 ཏེ༌ནེ༌ ཡ༌ཝའེ༌ ཡོ༌ཤུའ༌ མོལས༌, “ཁོང༌གུན༌ལ༌ མ༌ཇིགས༌ ཅིའ༌ཟེར༌ན༌ ཐོ༌རེ༌ འིན༌ན༌ ཏུས༌ལ༌ ངའེ༌ ཁོང༌ ཚང༌མ༌ ཨིས༌ར༌ཨེལ༌པ༌གུན༌ནི༌ ལག༌ག༌ སྟད༌ཏེ༌ སད༌ཨིན༌། ཁྱོ༌ཞའེ༌ ཁོང༌གུན༌ནི༌ རྟ༌གུན༌ ཞ༌འོ༌ ཅོས༌ཏེ༌ རྟ༌རེལ༌གུན༌ མེའ༌ སྲག༌གོས༌།”
7 ཏེ༌ནེ༌ ཡོ༌ཤུའ༌ དང༌ ཁོའེ༌ མག༌མི༌ ཚང༌མ༌ མེ༌རོམ༌མི༌ ཆུའི༌ ཉེ༌མོའ༌ སོང༌ཏེ༌ ཧུན༌མེད༌ལ༌ ཁོང༌གུན༌ནི༌ཀ༌ སྤུང༌གོལ༌ ཅོས༌།
8 ཡང༌ ཡ༌ཝའེ༌ ཁོང༌གུན༌ ཨིས༌ར༌ཨེལ༌པ༌གུན༌ནི༌ ལག༌ག༌ སྟདས༌། ཁོང༌གུན༌ནི༌ གྲ༌འོ༌གུན༌ལ༌ བྱང༌ ཆོགས༌སི༌ སི༌དོན༌ གྱལ༌ས༌ དང༌ མིས༌རེ༌ཕོཐ༌ མཱའིམ༌ ཡང༌ ཤར༌ ཆོགས༌ལ༌ མིཟ༌པཧ༌ ལུང༌པ༌ ཚོག༌པ༌ ཏེད༌ཏེ༌ ཁྱེརས༌ ཡང༌ ཁོང༌གུན༌ལ༌ ཕམ༌ཀལ༌ཏེ༌ ཁོང༌ ཅིག༌གའང༌ སོན༌ཏེའ༌ མ༌བོརས༌།
9 ཡ༌ཝའེ༌ མོལ༌ཁན༌ ནང༌ཞིན༌ ཡོ༌ཤུའེ༌ གྲ༌འོའེ༌ རྟ༌གུན༌ ཞ༌འོ༌ ཅོས༌ཏེ༌ རྟ༌རེལ༌གུན༌ མེའ༌ ཏུག༌ཅུགས༌།
10 ཏེ༌ནེ༌ ཡོ༌ཤུའ༌ དང༌ ཁོའེ༌ མག༌མི༌གུན༌ ལོགས༌ཏེ༌ ཧ༌ཟོར༌ལ༌ སོང༌ ཡང༌ ཏེ༌བོ༌ ང༌ཡོག༌ག༌ ཁྱོངས༌ཏེ༌ གྱལ༌པོ༌ སདས༌། ༼ཧ༌ཟོར༌རི༌ གྱལ༌པོའེ༌ ཏེ༌ གྱལ༌ཁམས༌ ཚང༌མའེ༌ཀ༌ ཝང༌སྲུལ༌ལད༌པིན༌།༽
11 ཨིས༌ར༌ཨེལ༌པ༌གུན༌ནི༌ གྱལ༌སའེ༌ ནང༌ང༌ ཡོད༌ཁན༌ ཚང༌མ༌ མེད༌ཁན༌ ཅོས༌, ཅིག༌གའང༌ སོན༌ཏེའ༌ མ༌བོརས༌, ཅིག༌གའང༌ མ༌ཕུདས༌ ཡང༌ ཡོ༌ཤུའེ༌ གྱལ༌ས༌བོ༌ མེའ༌ ཏུག༌ཅུགས༌།
12 ཡོ༌ཤུའེ༌ ཏེ༌ གྱལ༌པོ༌ ཚང༌མ༌ དང༌ ཁོང༌གུན༌ནི༌ གྱལ༌ས༌ ཚང༌མ༌ ང༌ཡོག༌ག༌ ལེནས༌ ཡང༌ ཁོང༌ ཚང༌མ༌ སད༌ཏེ༌ སིང༌ མེད༌ཁན༌ ཅོས༌ ཀ༌ཟུག༌ ཡ༌ཝའེ༌ ཞབས༌ཏོག༌པ༌ མོ༌ཟེས༌སི༌ བཀའ༌ སལ༌ཏེ༌ ཨིན༌པིན༌།
13 ཨིན༌ནའང༌ ཡོ༌ཤུའེ༌ མེའ༌ ཏུག༌ཁན༌ ཧ༌ཟོར༌རི༌ གྱལ༌ས༌ ཅིག༌པོ༌ མ༌སྟོག༌ ཨིས༌ར༌ཨེལ༌པ༌གུན༌ནི༌ མག༌གི༌ ནང༌ང༌ ཤིག༌ཁན༌ གྱལ༌སའེ༌ རོ༌ཏོའི༌ཀ༌ རྩིགས༌ཏེ༌ ཡོད༌ཁན༌ ཞན༌ གྱལ༌ས༌གུན༌ མེའ༌ མ༌ ཏུགས༌།
14 ཨིས༌ར༌ཨེལ༌པ༌གུན༌ནི༌ ཏེ༌ གྱལ༌ས༌གུན༌ནེ༌ ཅོམས༌ཁན༌ནི༌ ཅ༌ལག༌ དང༌ ཀྲུད༌ཏྲོ༌ གུན༌ ཁོང༌རང༌གུན༌ནི༌ ཕིའ༌ ཁྱེརས༌། ཨིན༌ནའང༌ མི༌ཚང༌མ༌ སདས༌, ཅིག༌གའང༌ སོན༌ཏེའ༌ མ༌བོརས༌།
15 ཡ༌ཝའེ༌ ཁོང༌ངི༌ ཞབས༌ཏོག༌པ༌ མོ༌ཟེས༌ལ༌ བཀའ༌ སལ༌ཁན༌ ཙོགས༌ལ༌ མོ༌ཟེས༌སི༌ ཡོ༌ཤུའ༌ བཀའ༌ ཏངས༌ ཡང༌ ཡོ༌ཤུའེ༌ བཀའ༌ ནང༌ཞིན༌ ཅོས༌། ཡ༌ཝའེ༌ མོ༌ཟེས༌ལ༌ བཀའ༌ སལ༌ཁན༌ ཚང༌མ༌ ཁོའེ༌ ཅའང༌ ལུས༌ མ༌ཅུག༌ག༌ ཅོས༌།
16 ཡོ༌ཤུའེ༌ ཡུལ༌ཇོངས༌ གང༌པོ༌ ཁོ༌རང༌ངི༌ ང༌ཡོག༌ག༌ ཁྱོངས༌, ཡང༌ན༌ རི༌ཡུལ༌, ནེ༌གེཝ༌ གང༌པོ༌, གོ༌ཤེན༌ནི༌ ནས༌ས༌ གང༌པོ༌, ནུབ༌ ཆོགས༌སི༌ རི༌ ཡུལ༌གུན༌, ཡོར༌དཱན༌ ལུང༌པ༌, ཨིས༌ར༌ཨེལ༌ལི༌ རི༌གུན༌ དང༌ གཱ༌ལིལ༌ལིའི༌ རི༌ ཡུལ༌གུན༌,
17 ཨིས༌ར༌ཨེལ༌ལི༌ ས༌ཀྱད༌ ཧ༌ལག༌གི༌ རི༌ནེ༌ ལྷོ༌ ཆོགས༌སི༌ རི༌ཡུལ༌ སེ༌འིར༌, ཧེར༌མོན༌ རི༌ ཡོག༌ག༌ ལེ༌བ༌ནོན༌ནི༌ ལུང༌པའེ༌ ནང༌ང༌ ཡོད༌ཁན༌ བའལ༌ གཱད༌ ཚག༌པ༌། ཡོ༌ཤུའེ༌ ཏེ༌ ཡུལ༌ གང༌པོ༌ ང༌ཡོག༌ག༌ ཁྱོངས༌ཏེ༌ ཏེ༌གུན༌ནི༌ གྱལ༌པོ༌ དང༌ མི༌ ཚང༌མ༌ སདས༌།
18 ཏེ༌ གྱལ༌པོ༌ ཚང༌མ༌ ཉམ༌པོ༌ ཏུས༌ མང༌པོ༌ ཞིག༌ ཡོ༌ཤུའེ༌ མག༌ ཏངས༌།
19 གི༌བེ༌འོན༌ནི༌ ནས༌སའེ༌ ནང༌ང༌ དུག༌ཁན༌ ཧེད༌པ༌གུན༌ མ༌སྟོག༌ ཞན༌ གྱལ༌ཁམས༌ སུའིང༌ ཨིས༌ར༌ཨེལ༌པ༌གུན༌ ཉམ༌པོ༌ ཞི༌དེ༌ ཆད༌དོན༌ མ༌ཅོས༌, ཁོང༌གུན༌ནི༌ མག༌ ཏངས༌ཏེ༌ ཏེ༌ ནས༌ས༌ ཚང༌མ༌ ང༌ཡོག༌ག༌ ལེནས༌།
20 ཡ༌ཝའེ༌ མོ༌ཟེས༌ལ༌ བཀའ༌ སལ༌ཁན༌ ནང༌ཞིན༌ སྙིང༌རྗེ༌ མ༌ནེ༌ མེད༌པ༌ ཁོང༌གུན༌ སིང༌ མེད༌ཁན༌ ཅོ༌ཅེས༌ལ༌ ཡ༌ཝའེ༌ ཁོང༌གུན༌ནི༌ སྙིང༌ སྐྱོང༌པོ༌ ཛད༌ཏེ༌ ཨིས༌ར༌ཨེལ༌པ༌གུན༌ ཉམ༌པོ༌ ནོལ༌ ཅུག༌ག༌ ཛདས༌།
21 ཏེན༌ན༌ ཏུས༌ལ༌ ཡོ༌ཤུའེ༌ མག༌མི༌གུན༌ནི༌ ཧེབ༌རོན༌, དེ༌བིར༌ དང༌ ཨ༌ནབ༌ གྱལ༌ས༌གུན༌ནི༌ ཉེ༌མོའ༌ རི༌ཡུལ༌ལི༌ ནང༌ང༌ དུག༌ཁན༌ ཨ༌ནཀ༌པ༌ ཚང༌མ༌ མ༌ཚད༌ ཡ༌ཧུ༌དཱ༌ དང༌ ཨིས༌ར༌ཨེལ༌ རི༌ཡུལ༌གུན༌ནི༌ ནང༌ང༌ དུག༌ཁན༌ ཚང༌མའང༌ སད༌ཏེ༌ མེད༌ཁན༌ ཅོས༌། ཡོ༌ཤུའེ༌ ཁོང༌གུན༌ དང༌ ཁོང༌གུན༌ནི༌ གྲོང༌ཁྱེར༌ ཚང༌མ༌ སིང༌ མེད༌ཁན༌ ཅོ༌ཅུགས༌།
22 ཕི༌ལིས༌ཏི༌པའེ༌ ནས༌ས༌ ག༌ཟ༌, གཱད༌, དང༌ ཨཤ༌དོད༌ གུན༌ནི༌ ནང༌ང༌ ལུས༌ཁན༌ ཁ༌ཅིག༌ མ༌སྟོགས༌ ཨིས༌ར༌ཨེལ༌པའེ༌ ས༌ཀྱད༌དི༌ ནང༌ང༌ ཁོང༌གུན༌ནི༌ ཨ༌ནཀ༌པ༌ ཅིག༌གའང༌ སོན༌ཏེའ༌ མ༌བོརས༌།
23 ཡོ༌ཤུའེ༌ ཏེ༌ ས༌ཆའ༌ གང༌པོ༌ ཁོ༌རང༌ངི༌ ཝང༌ངི༌ ཡོག༌ག༌ ཁྱོངས༌ ཀ༌ཟུག༌ ཡ༌ཝའེ༌ མོ༌ཟེས༌ལ༌ བཀའ༌ སལ༌ཏེ༌ ཨིན༌པིན༌, ཡང༌ ནོར༌སྐལ༌ལི༌ ཚུལ༌ལ༌ ཁོང༌ངི༌ ཏེ༌ ས༌ཀྱད༌པོ༌ ཨིས༌ར༌ཨེལ༌པའེ༌ མི༌སྡེ༌གུན༌ལ༌ བགོས༌ཏེ༌ ཏངས༌།
ཏེ༌ སྟིང༌ནེ༌ ཏེ༌ ས༌ཆའེ༌ ནང༌ང༌ མག༌ ཏང༌ཅེས༌ མེད༌ཁན༌ སོང༌ཏེ༌ ཞི༌དེ༌ ལུས༌།