14
ཡོར༌དཱན༌ ལྩངས༌པོའེ༌ ནུབ༌ ཆོགས༌སི༌ ས༌ཀྱད༌ བགོས༌།
14:1-5
1 ཨིས༌ར༌ཨེལ༌ལི༌ ལུས༌ཏེ༌ ཡོད༌ཁན༌ནི༌ མི༌སྡེ༌གུན༌ལ༌ ཀེ༌ནན༌ནི༌ འི༌ ས༌ཀྱད༌གུན༌ ནོར༌སྐལ༌ལ༌ ཐོབ༌ ཀ༌བོ༌ བླ༌མ༌ ཨེ༌ལི༌འ༌ཟར༌, ནུན༌ནི༌ བུ༌ཚ༌ ཡོ༌ཤུའ༌ དང༌ སྡེ༌ ཚང༌མའེ༌ སྤོན༌བོ༌གུན༌ནི༌ ཁོང༌གུན༌ལ༌ བགོས༌ཏེ༌ ཏངས༌།
2 ཡ༌ཝའེ༌ མོ༌ཟེས༌ལ༌ བཀའ༌ སལ༌ཁན༌ ནང༌ཞིན༌ སྡེ༌ 9 དང༌ ཕེད༌པོའ༌ ནོར༌སྐལ༌ལི༌ ས༌ཀྱད༌ ཁོང༌གུན༌ནི༌ ཏག༌རིལ༌ གྱུད༌ཏེ༌ བགོས༌།
3 མོ༌ཟེས༌སི༌ སྡེ༌ ཉིས༌ དང༌ ཕེད༌པོའ༌ ས༌ཀྱད༌ ཡོར༌དཱན༌ ལྩངས༌པོའེ༌ ཤར༌ ཆོགས༌ལ༌ ཏང༌ཏེ༌ ཨིན༌པིན༌ ཨིན༌ནའང༌ ཁོང༌ངི༌ ལི༌ཝི༌ མི༌སྡེའ༌ ས༌ཀྱད༌ མ༌ཏངས༌།
4 ཡོ༌སེབ༌བི༌ པུར༌གྱུད༌གུན༌ སྡེ༌ ཉིས༌ ཡོད༌པིན༌, མ༌ནས༌ས༌ དང༌ ཨེཕ༌ར༌ཡིམ༌། ལི༌ཝི༌པ༌གུན༌ལ༌ ས༌ཀྱད༌དི༌ སྐལ༌ལ༌ མ༌ཏངས༌ ཨིན༌ནའང༌ ཁོང༌གུན༌ལ༌ དུག༌སའེ༌ གྲོང༌ཁྱེར༌ དང༌ ཁོང༌གུན༌ནི༌ སེམས༌ཅན༌གུན༌ནི༌ རྩ༌ཁའེ༌ ཕིའ༌ ས༌ཀྱད༌ ཏངས༌།
5 ཡ༌ཝའེ༌ མོ༌ཟེས༌ལ༌ བཀའ༌ སལ༌ཁན༌ ནང༌ཞིན༌ ཨིས༌ར༌ཨེལ༌པ༌གུན༌ནི༌ ས༌ཀྱད༌གུན༌ བགོས༌།
ཀེ༌ལེབ༌བ༌ ཧེབ༌རོན༌ནི༌ གྱལ༌ས༌ ཏངས༌།
14:6-15
6 ཀེ༌ནས༌པ༌ ཡེ༌ཕུན༌ནེཧའེ༌ བུ༌ཚ༌ ཀེ༌ལེབ༌, ཡ༌ཧུ༌དཱ༌ སྡེའེ༌ མི༌ ཁག༌ཅིག༌ ཉམ༌པོ༌ གིལ༌གལ༌ལི༌ ནང༌ང༌ ཡོ༌ཤུའ༌ ཡོད༌ས༌ ཡོངས༌ ཡང༌ ཁོའ༌ ཟེརས༌, “ཡ༌ཝའེ༌ ཀ༌དེཤ༌ བར༌ནེའ༌ ནང༌ང༌ ང༌དང༌ ཉིས༌ཀའེ༌ སྐོར༌ལ༌ དཀོན༌མཆོག༌གི༌ མི༌ མོ༌ཟེས༌ལ༌ མོལ༌ཁན༌བོ༌ ཨིད༌ཏུ༌ ཛད༌།
7 ཡ༌ཝའེ༌ ཞབས༌ཏོག༌པ༌ མོ༌ཟེས༌སི༌ ང༌ ཀ༌དེཤ༌ བར༌ནེའ༌ནེ༌ ཀེ༌ནན༌ནི༌ ས༌ཀྱད༌པོ༌ ལྟའ༌ལ༌ ལམ༌ཅུག༌ ཟ༌ནེ༌ ང༌ ལོ༌ ཞིབ༌ཅུ༌ ཆའད༌པིན༌། ལོགས༌ཏེ༌ ཡོངས༌ཏེ༌ ངའེ༌ ཏེ༌ ནས༌སའེ༌ སྐོར༌ལ༌ ཀྲང༌པོ༌ ནས༌ཚུལ༌ ཤད༌པིན༌།
8 ཨིན༌ནའང༌ ངའེ༌ སྤུན༌ ང༌ ཉམ༌པོ༌ ཆའ༌ཁན༌གུན༌ནི༌, ཨིས༌ར༌ཨེལ༌པ༌གུན༌ནི༌ ནང༌ང༌ ཇིགས༌ནང༌ སྐྱེ༌ཅུགས༌། ཏེ༌ནེའང༌ ཡ༌ཝ༌ ངའེ༌ དཀོན༌མཆོག༌གི༌ འི༌ ནས༌ས༌ ང༌དང༌ང༌ སལ༌ལ༌ ཛད༌ཅེས༌པོའ༌ ངའེ༌ སྙིང༌ ཐག༌པ༌ནེ༌ ཨིད༌ཤེས༌ ཅོས༌པིན༌།
9 ཏེན༌ན༌ ཞག༌ག༌ མོ༌ཟེས༌སི༌ ངའ༌ ཁ༌ཆད༌ ཛད༌ཏེ༌ མོལས༌, ‘ཏེ༌ ནས༌ས༌ ལྟའ༌ ཆ༌ ཟ༌ནེ༌ ཁྱོ༌རང༌ངི༌ རྐང༌པ༌ བོར༌ཁན༌ ས༌ཀྱད༌ ཏུས༌གྱུན༌ནི༌ཕིའ༌ ཁྱོ༌རང༌ དང༌ ཁྱོ༌རང༌ངི༌ པུར༌གྱུད༌གུན༌ལ༌ ཐོབ༌ཅེས༌ཅན༌ནི༌ ནོར༌སྐལ༌བོ༌ ཨིན༌ ཅིའ༌ཟེར༌ན༌ ཁྱོ༌རང༌ངི༌ ཡ༌ཝ༌ ངའེ༌ དཀོན༌མཆོག༌གི༌ཀ༌ སྙིང༌ ཐག༌པ༌ནེ༌ ཨིད༌ཤེས༌ ཅོས༌།’ ”
10 “ཏ༌ ཉེ༌རང༌ངི༌ ཟིགས༌སའང༌ ཨིས༌ར༌ཨེལ༌པ༌གུན༌ ཐང༌སྟོང༌ངི༌ ནང༌ང༌ ཁོར༌ཨིན༌ ཡོད༌ཏུས༌ མོ༌ཟེས༌སི༌ ཁ༌ཆད༌ ཛད༌པ༌ནེ༌ དག༌ས༌ ཚག༌པ༌ ལོ༌ 45 ཡ༌ཝའེ༌ ང༌ སོན༌ཏེའ༌ བོར༌ར༌ ཛདས༌། དི༌རིང༌ ང༌ ལོ༌ 85 སོང༌ཏེ༌ ཨིན༌།
11 མོ༌ཟེས༌སི༌ ལམ༌ཅུག༌ ཟ༌ནེ༌ ཤེད༌ཅན༌ ཡོད༌ཁན༌ ཙོགས༌ ངའ༌ དག༌སའང༌ ཨིན༌, ཏེ༌ ཟ༌ནེ༌ ཙོགས༌ ཏ༌རུང༌ངའང༌ མག༌ ཏང༌ང༌ ཆ༌ཅེས༌སི༌ ཤེད༌ ངའེ༌ ནང༌ང༌ ཡོད༌།
12 ཏེ༌ ཞག༌ག༌ ཡ༌ཝའེ༌ ཁ༌ཆད༌ ཛད༌ཁན༌ནི༌ འི༌ རི༌ཡུལ༌བོ༌ ཏ༌ ངའ༌ སལ༌། ཏེ༌རུ༌ ཨ༌ནཀ༌པ༌གུན༌ གྱང༌སྐོར༌ ཐོན༌པོ༌ཅན༌ནི༌ གྱལ༌སའེ༌ ནང༌ང༌ དུག༌ཁན༌བོ༌ ཉེ༌རང༌ང༌ ཚོར༌ཏེ༌ ཨིན༌ནོག༌། ཨིན༌ནའང༌ ཡ༌ཝའེ༌ རོགས༌ ཉམ༌པོ༌ ངའེ༌ ཁོང༌གུན༌ ཏེ༌ ས༌ཀྱད༌ནེ༌ ཕིང༌ཨིན༌ ཀ༌ཟུག༌ ཡ༌ཝའེ༌ མོལ༌ལ༌ ཛདས༌།”
13 ཡོ༌ཤུའེ༌ ཀེ༌ལེབ༌བ༌ ཅིན༌ལབས༌ སལ༌ཅེས༌ལ༌ ཡ༌ཝའ༌ མོས༌ལམ༌ ཞུས༌ ཡང༌ ཧེབ༌རོན༌ནི༌ གྱལ༌ས༌ ཁོའ༌ ནོར༌སྐལ༌ལ༌ ཏངས༌།
14 ཏེ༌ནེ༌ ཕར༌ལ༌ ཧེབ༌རོན༌ ཀེ༌ལེབ༌བི༌ པུར༌གྱུད༌གུན༌ནི༌ ས༌ཀྱད༌ གྱུར༌ ཡང༌ དག༌སའང༌ ཨིན༌ནོག༌, ཅིའ༌ཟེར༌ན༌ ཁོའེ༌ སྙིང༌ ཐག༌པ༌ནེ༌ ཨིས༌ར༌ཨེལ༌པའེ༌ དཀོན༌མཆོག༌ ཡ༌ཝའེ༌ཀ༌ ཨིད༌ཤེས༌ ཅོས༌།
15 ཀེ༌ལེབ༌བི༌ ཧེབ༌རོན༌ ལེན༌ནི༌སང༌ སྔུན༌ལ༌ ཏེ༌བོའ༌ ཨ༌ནཀ༌པའེ༌ སྤའ༌འོ༌ ཀྲག༌པོ༌ ཞིག༌གི༌ མིང༌ངི༌ གྱབ༌ནེ༌ ཀི༌རི༌འཐ༌ ཨར༌བའ༌ ཟེར༌རད༌པིན༌།
ཏེ༌ནེ༌ ཕར༌ལ༌ ཏེ༌ ས༌ཀྱད༌དི༌ ནང༌ང༌ མག༌ མ༌ཆ༌ ཞི༌དེ༌ ལུས༌།