10
ཕོ༌ཉ༌ དང༌ ཤོག༌རིལ༌ ༼སྤེ༌ཆ༌༽ ཆུ༌ངུན༌།
10:1 ནེ༌ 11
1 ཏེ༌ནེ༌ ངའེ༌ ཡང༌ ཕོ༌ཉ༌ མ༌ཇིགས༌པོ༌ཞིག༌ ནམ༌ཁའ༌ནེ༌ བབས༌ཨིན༌ ཐོང༌། ཁོང༌ངི༌ སྲིན༌ནི༌ ཀོས༌ལག༌ གོན༌ཏེ༌ ཁོང༌ངི༌ གོ༌བོ༌ ཟའ༌ཆུ༌ཐུང༌ངི༌ སྐོར༌ཏེ༌ དུག༌། ཁོང༌ངི༌ ཞལ༌དོང༌ ནི༌, ཉི༌མ༌ ཙོགས༌ལ༌ ལྡང༌ཤན༌ ཡང༌ ཞབས༌གུན༌ མེ༌ བར༌ཨིན༌ ཡོད༌ཁན༌ནི༌ རྡུང༌མ༌ ཙོགས༌ དུག༌།
2 ཁོང༌ངི༌ ཆག༌ག༌ ཕེས༌ཁན༌ནི༌ ཤོག༌རིལ༌ ཆུ༌ངུན༌ཞིག༌ ནམས༌ཏེ༌ དུག༌། ཁོང༌ངི༌ ཞབས༌ ཡས༌པ༌བོ༌ གྱ༌ཚོའེ༌ཀ༌ ཡང༌ ཡོ༌མ༌བོ༌ ས༌ སྐམ༌པོའེ༌ཀ༌ བོར༌ར༌ ཛད༌ཏེ༌ དུག༌།
3 ཏེ༌ ཕོ༌ཉ༌བོའེ༌ སིང༌གེ༌ ཙོགས༌ལ༌ ཀུ༌ཅོ༌ སྲན༌ཏྲེ༌ སལས༌, ཡང༌ ཁོང༌ངི༌ ཀུ༌ཅོ༌ སལ༌ལ༌ཅིག༌, བྲུག༌ལྡིར༌ཁན༌ རྡུན༌ཀོའེ༌ ལན༌སལས༌།
4 བྲུག༌ལྡིར༌ རྡུན༌ནི༌ མོལ༌ཁན༌གུན༌ ངའེ༌ བྲི༌ཅེས༌ ཡོད༌པིན༌, ཨིན༌ནའང༌ ངའེ༌ ནམ༌ཁའ༌ནེ༌ སྐད༌ཅིག༌གི༌, "ཏེ༌ བྲུག༌ལྡིར༌ རྡུན༌ནི༌ མོལ༌ཁན༌ ཚང༌མ༌ སང༌ཝའེ༌ ནང༌ང༌ བོར༌, ཏེ༌གུན༌ བྲི༌ མ༌བྲི༌" མོལ༌ཨིན༌ ཚོར༌།
5 ཏེ༌ནེ༌ གྱ༌ཚོ༌ དང༌ ས༌ སྐམ༌པོའེ༌ཀ༌ ཞངས༌ཏེ༌ ཡོད༌ཁན༌ནི༌ ཕོ༌ཉའེ༌, རང༌ངི༌ ཆག༌ ཡས༌པ༌བོ༌ ནམ༌ཁའ༌ ཆོགས༌ལ༌ ཐོན༌པོའ༌ རྐྱངས༌།
6 ཡང༌ ཁོའེ༌ ཏུས༌གྱུན༌ནེ༌གྱུན༌ ཞུགས༌ཁན༌ནི༌ དཀོན༌མཆོག༌གི༌ ནའ༌ ཁུརས༌, ཁོང༌ངི༌ ནམ༌ཁའ༌ དང༌ ཏེ༌ནང༌ང༌ ཡོད༌ཁན༌ ཚང༌མ༌, ཇིག༌རྟེན༌ དང༌ ཏེ༌ནང༌ང༌ ཡོད༌ཁན༌ ཚང༌མ༌, ཡང༌ ཚོ༌ དང༌ ཏེ༌ནང༌ང༌ ཡོད༌ཁན༌ ཚང༌མ༌ ཅོའ༌ ཛད༌ཏེ༌ ཨིན༌། ཏེ༌ ཕོ༌ཉའེ༌ མོལས༌, "ཏ༌ ཁོང༌ སྲུངས༌ཏེ༌ དུག༌ག༌ མི༌ཛད༌།
7 ཨིན༌ནའང༌ ཕོ༌ཉ༌ རྡུན༌པ༌བོའེ༌ ཁོ༌རང༌ངི༌ ཏུང༌ ཕུའ༌ཅིག༌, དཀོན༌མཆོག༌གི༌ སང༌ཝའེ༌ ཐབས༌པོ༌ དྲན༌དྲ༌ གྲུབ༌ཨིན༌, ཀ༌ཟུག༌ ཁོང༌ངི༌ ཁོང༌རང༌ངི༌ ཞབ༌སྟོག༌པ༌ ལུང༌སྟོན༌པ༌གུན༌ལ༌ མོལ༌ཏེ༌ ཨིན༌པིན༌།"
8 ཏེ༌ནེ༌ ནམ༌ཁའ༌ནེ༌ ཚོར༌ཁན༌ནི༌ སྐད༌པོའེ༌, ང༌ ཡང༌ མོལ༌ལ༌རག༌, "དུན༌ལ༌ སོང༌ཏེ༌ གྱ༌ཚོ༌ དང༌ ས༌ སྐམ༌པོའེ༌ཀ༌ ལངས༌ཏེ༌ ཡོད༌ཁན༌ནི༌ ཕོ༌ཉ༌བོའེ༌ ལག༌ནེ༌ ཏེ༌ ཤོག༌རིལ༌ ཕེས༌ཏེ༌ ཡོད༌ཁན༌བོ༌ ལེན༌།"
9 ཏེ༌ནེ༌ ང༌ ཏེ༌ ཕོ༌ཉ༌བོའེ༌ དུན༌ལ༌ སོང༌ཏེ༌ ཁོང༌ང༌, ཏེ༌ ཤོག༌རིལ༌ ཆུ༌ངུན༌ ཕེས༌ཁན༌བོ༌ སལ༌ ཟེར༌ཏེ༌ ཞུ༌ཝ༌ ཕུལ༌པིན༌། ཁོང༌ངི༌ མོལ༌ལ༌རག༌, "འི༌བོ༌ ལེན༌ ཡང༌ ཟོས༌ཏོང༌, ཏེ༌བོ༌ ཁྱོ༌རང༌ངི༌ ཁའེ༌ ནང༌ང༌ རང༌རྩི༌ ཙོགས༌ ངར༌མོ༌, ཨིན༌ནའང༌ གྲོད༌པའེ༌ ནང༌ང༌ ཁན༌ཀྲེ༌ གྱུར༌ཨིན༌།"
10 ངའེ༌ ཏེ༌ ཕོ༌ཉ༌བོའེ༌ ཆག༌ནེ༌ ཤོག༌རིལ༌བོ༌ ལེན༌ཏེ༌ ཟོས༌པ༌, ངའེ༌ ཁའེ༌ ནང༌ང༌ ཏེ༌བོ༌ ངར༌མོ༌ རག༌པིན༌, ཨིན༌ནའང༌ སྨིད༌ད༌ཅིག༌, ཁན༌ཀྲེ༌ གྱུར༌ཏེ༌ ངའེ༌ གྲོད༌པ༌ ནགས༌ སྟནས༌།
11 ཏེ༌ནེ༌ ངའ༌ མོལ༌ལ༌རག༌, "མི༌གུན༌, མིར༌གྱུད༌གུན༌, སྐད༌རིགས༌གུན༌ དང༌, གྱལ༌པོ༌གུན༌ནི༌ སྐོར༌ལ༌ ཁྱོ༌རང༌ངི༌ ཡང༌སྐྱར༌ ལུང༌སྟན༌ ཏང༌གོས༌།