9
ཏུང༌ ལྔ༌པ༌ ཕུས༌།
9:1 ནེ༌ 21
1 ཕོ༌ཉ༌ ལྔ༌པ༌བོའེ༌ ཏུང༌ ཕུའ༌ཅིག༌, ངའེ༌ ནམ༌ཁའ༌ནེ༌ ཇིག༌རྟེན༌ནི༌ཀ༌ བུད༌ཏེ༌ ཡོད༌ཁན༌ནི༌ སྐར༌མ༌ ཞིག༌ ཐོང༌, ཀ༌བོའ༌ ཐིལ༌ མེད༌ཁན༌ནི༌ ཏིང༌ཅན༌ ས༌དོང༌ངི༌ ཕེ༌ཀུ༌ལིག༌པོ༌ སལ༌ལ༌ ཛད༌ཏེ༌ དུག༌།
2 ཁོའེ༌ ཏེ༌བོ༌ ཕེའ༌ཅིག༌, ཏེ༌ནང༌ནེ༌ མེ༌ ཆེན༌མོ༌ ཞེན༌ཁན༌ ཙོགས༌སི༌ ཏུད༌པ༌ བིང༌, ཏེ༌ ཏུད༌པ༌བོའེ༌ ཉི༌མའེ༌ འོད༌ དང༌ ནམ༌བོ༌ ཀབས༌པ༌ མུན༌གྲིག༌ སོང༌།
3 ཏེ༌ ཏུད༌པའེ༌ ནང༌ནེ༌ པར༌པར༌ཙེ༌ མང༌པོ༌ བིང༌ཏེ༌ ཇིག༌རྟེན༌ནི༌ཀ༌ བུད༌, ཏེ༌གུན༌ལ༌ སྡིག༌པ༌རཱ༌ཙེ༌ ༼ཡང༌ན༌ བིད༌ཆུ༌༽ ཙོགས༌ ཐམ༌ཤེས༌སི༌ ཁྱུད༌ སལ༌ཏེ༌ དུག༌།
4 ཡང༌ ཏེ༌གུན༌ལ༌, "རྩཱ༌ ཡ༌ ངོན༌པོ༌, ཡ༌ ལྕང༌མ༌ གུན༌ལ༌ ནོད༌པ༌ མ༌སྐྱལ༌, ཨིན༌ནའང༌ ཐོད༌པའེ༌ཀ༌ དཀོན༌མཆོག༌གི༌ ཐེ༌ཙེ༌ མེད༌ཁན༌ནི༌ མི༌གུན༌ལ༌ ནགས༌ སྟོན༌", མོལ༌ཏེ༌ བཀའ༌ སལས༌།
5 ཏེ༌གུན༌ལ༌ ཁོང༌གུན༌ སད༌ མ༌སད༌ད༌, ཟླ༌ཝ༌ ལྔ༌, རྡུག༌ངལ༌ མང༌པོ༌ ཏངས༌ཏེ༌ ནགས༌ ལྟན༌ཅེས༌སི༌ ཝང༌ སལས༌, ཀ༌བོ༌ སྡིག༌པ༌རཱ༌ཙེའེ༌ ཐམས༌ཏེ༌ ནགས༌ ཐོང༌ཁན༌ ཙོགས༌ ཡོང༌ཨིན༌།
6 ཏེ༌ཏུས༌ལ༌ མི༌གུན༌ནི༌ ཤི༌ཅེས༌ ཙལ༌ཨིན༌, ཨིན༌ནའང༌ ཁོང༌གུན༌ལ༌ མ༌ནེ༌ མི༌ཐོབ༌། ཤི༌ཅེས༌སི༌ དོད༌པ༌ ཅོ༌ཨིན༌, ཨིན༌ནའང༌ ཤི༌ཅེས༌པོ༌ ཁོང༌གུན༌ནེ༌ ཐག༌རིང༌ང༌ ཤོར༌ཏེ༌ ཆེན༌།
7 ཏེ༌ པར༌པར༌ཙེ༌གུན༌ མག༌གི༌ ཕིའ༌ གྲལ༌གྲིག༌ ཡོད༌ཁན༌ནི༌ རྟ༌ ཙོགས༌ དུག༌, ཏེ༌གུན༌ནི༌ གོའེ༌ཀ༌ གོན༌ཁན༌བོ༌ སེར༌རི༌ ཐོར༌ཤོག༌ ཙོགས༌ ཡང༌ ལྡོང༌ གུན༌ མི༌ ལྡོང༌ ཙོགས༌ དུག༌།
8 ཏེ༌གུན༌ལ༌ བུ༌མོ༌ ཙོགས༌ སྲ༌ ཡང༌ སོ༌གུན༌ སིང༌གེ༌ སོ༌ ཙོགས༌ དུག༌།
9 ཏེ༌གུན༌ནི༌ སྲན༌ཏྲེ༌ ལྕགས༌སི༌ མག༌ཆས༌ ཀྲང༌ངི༌ཀ༌ གོན༌ཏེ༌ ཁོང༌ངི༌ ཤོག༌པ༌གུན༌ནི༌ སྐད༌བོ༌ མག༌གི༌ ཏུས༌ལ༌ ཤིང༌ངི༌ རྟ༌རེལ༌ མང༌པོའེ༌ སྐད༌ ཙོགས༌ རག༌།
10 ཏེ༌གུན༌ནི༌ རྔ༌མའི༌ ཐམ༌ཤེས༌པོ༌ ནི༌, སྡིག༌པ༌རཱ༌ཙེ༌ ཐམས༌ཁན༌ ཙོགས༌ ཀ༌བོའ༌ ཟླ༌ཝ༌ ལྔ༌ མི༌གུན༌ལ༌ ནགས༌ ལྟན༌ཅེས༌སི༌ ཁྱུད༌ དུག༌།
11 ཐིལ༌ མེད༌ཁན༌ནི༌ ཏིང༌ཅན༌ ས༌དོང༌ངི༌ ཕོ༌ཉ༌ ནི༌, ཏེ༌གུན༌ནི༌ གྱལ༌པོ༌, ཀ༌བོའེ༌ མིང༌བོའ༌ ཨིབ༌རི༌པའེ༌ སྐད༌དི༌ ནང༌ང༌ "ཨ༌བད༌དོན༌" དང༌ གིརིས༌སི༌ སྐད༌དི༌ ནང༌ང༌ "ཨ༌པོལ༌ལི༌ཨོན༌" ཡང༌ན༌ ཁྲེས༌སྟོར༌ ཅོ༌ཁན༌ ཟེར༌ར༌ནོག༌།
12 ཇིགས༌པ༌ ཏང༌པོ༌བོ༌ ནི༌ བུད༌ཚར༌, ཨིན༌ནའང༌ ལྟོས༌སའང༌ ཡང༌ ཇིགས༌པ༌ ཉིས༌ ལེབ༌ཅེས༌དུག༌།
13 ཕོ༌ཉ༌ དྲུག༌པའེ༌ ཏུང༌ ཕུའ༌ཅིག༌, ངའ༌ དཀོན༌མཆོག༌གི༌ དུན༌ལ༌ ཡོད༌ཁན༌ནི༌ སེར༌རི༌ ཆོད༌ཁྲི༌ རཱ༌ཅོ༌ ཞི༌ཀོའེ༌ ཀ༌ནེ༌ སྐད༌ཞིག༌ ཚོར༌།
14 ཡང༌ ཏེ༌ སྐད༌པོའེ༌ ཏུང༌ ཐམས༌ཏེ༌ ཡོད༌ཁན༌ནི༌ ཕོ༌ཉ༌ དྲུག༌པ༌བོའ༌ མོལས༌, "ལྩངས༌པོ༌ ཆེན༌མོ༌ ཡུཕ༌རེ༌ཀྲས༌ གྱུགས༌སེ༌ ནས༌སའེ༌ཀ༌ ཅིངས༌ཏེ༌ ཡོད༌ཁན༌ནི༌ ཕོ༌ཉ༌ ཞི༌ཀོ༌ ཕུད༌།"
15 ཏེ༌ ཕོ༌ཉ༌ ཞི༌ཀོ༌, ཏེན༌ན༌ ཏུས༌, ཞག༌, ཟླ༌ཝ༌ དང༌ ལོའེ༌ ཕིའ༌ གྲལ༌གྲིག༌ ཛད༌ཏེ༌ ཇིག༌རྟེན༌པ༌གུན༌ནི༌ ཁག༌ སུམ༌མི༌ ནང༌ནེ༌ ཁག༌ཅིག༌ སད༌ཅེས༌ལ༌ ཕུད༌ཏེ༌ ཨིན༌།
16 ཡང༌ རྟའེ༌ཀ༌ ཞོན༌ཁན༌ནི༌ མག༌མི༌གུན༌ནི༌ ཀྲངས༌ཀ༌ ནི༌, ངའེ༌ ཚོར༌ཅེས༌ལ༌ ཅེ༌ཝ༌ཉི༌ཤུ༌ རག༌ ཡང༌ན༌ ཀ༌རོར༌ ཉི༌ཤུ༌།
17 ཡང༌ ངའེ༌ ཞལ༌ཟིགས༌སི༌ ནང༌ང༌ རྟ༌ དང༌ ཏེ༌ཀ༌ ཞོན༌ཁན༌ གུན༌ ཐོང༌, ཏེ༌གུན༌ནི༌ མག༌ཆས༌གུན༌ མེའེ༌ ཙོགས༌ མར༌པོ༌, ངོན༌པོ༌ དང༌, སེར༌པོ༌, ཡང༌ རྟ༌གུན༌ནི༌ གོ༌ སིང༌གེ༌ གོ༌ ཙོགས༌ དུག༌། ཏེ༌གུན༌ནི༌ ཁའ༌ནེ༌ མེ༌, ཏུད༌པ༌ དང༌ མུ༌ཟི༌ གུན༌ བིང༌དུག༌།
18 ཏེ༌ རྟ༌གུན༌ནི༌ ཁའེ༌ ནང༌ནེ༌ བིང༌ཁན༌ནི༌ ཇིགས༌ནང༌ཅན༌ནི༌ ནས༌ལུག༌ སུམ༌ཀོ༌, ཀ༌བོ༌ མེ༌, ཏུད༌པ༌ དང༌ མུ༌ཟི༌ གུན༌ནི༌ ཇིག༌རྟེན༌ནི༌ ཁག༌ སུམ༌མི༌ ནང༌ནེ༌ ཁག༌ ཅིག༌གི༌ མི༌གུན༌ སད༌ཏེ༌ མེད༌ཁན༌ ཅོས༌།
19 ཏེ༌ རྟ༌གུན༌ནི༌ ཁྱུད༌པོ༌ ནི༌, ཁོང༌གུན༌ནི༌ ཁའ༌ དང༌ རྔ༌མ༌ གུན༌ནི༌ ནང༌ང༌ དུག༌། ཏེ༌གུན༌ནི༌ རྔ༌མ༌ རུལ༌ལི༌ གོ༌ ཙོགས༌ དུག༌, ཀ༌བོ༌ མི༌གུན༌ལ༌ མ༌སྐྱོན༌ ཅོ༌ཅེས༌སི༌ ཕིའ༌ ཀོལ༌དུག༌།
20 ཨིན༌ནའང༌ ཏེ༌ ནས༌ལུག༌ ཇིགས༌པ༌གུན༌ནི༌ ནང༌ང༌ མ༌ཤི༌ཁན༌ ཇིག༌རྟེན༌པ༌གུན༌ནི༌ རང༌ངི༌ ལས༌ ངན༌པ༌གུན༌ནེ༌ གྱོད༌པ༌ མ༌ཅོའ༌, ཏ༌རུང༌ངའང༌ རྡུད༌ ཡང༌ སེར༌, མུལ༌, ར༌གན༌, རྡོའ༌ དང༌ ཤིང༌ གུན༌ནེ༌ ཅོ༌ཁན༌ནི༌ སྐུན༌དྲ༌གུན༌ལ༌ ཅོལ༌དུག༌, ཀ༌གུན༌ལ༌ ཐོང༌ང༌མེད༌, ཡ༌ ཚོར༌ར༌མེད༌, ཡ༌ གྲུལ༌ལའང༌ ཉན༌ན༌མེད༌།
21 ཁོང༌གུན༌ནི༌ མི༌ སད༌ཅེས༌ ཡ༌ ཆོས༌ངན༌ ཅོ༌ཅེས༌ ༼ཡང༌ན༌ ཇའ༌དུ༌ ཅོ༌ཅེས༌༽, ཡ༌ ལུས༌བྲེལ༌ ངན༌པ༌ བོར༌ཅེས༌, ཡ༌ རྐུ༌ཅེས༌ གུན༌ནེ༌ གྱོད༌པ༌ ཅོའ༌ མི༌རུག༌།