16
དཀོན༌མཆོག༌གི༌ ཐུགས༌སྲོའེ༌ གོར༌མོ༌ རྡུན༌།
16:1 ནེ༌ 21
1 ཏེ༌ནེ༌ ངའེ༌ ཆོད༌ཁང༌ངི༌ ནང༌ནེ༌ སྐད༌ ཆེན༌མོ༌ཞིག༌གི༌ ཕོ༌ཉ༌ རྡུན༌ཀོའ༌ ཟེར༌ཨིན༌ ཚོར༌, "སོང༌ཏེ༌ དཀོན༌མཆོག༌གི༌ ཐུགས༌སྲོ༌ སྐངས༌ཁན༌ནི༌ གོར༌མོ༌ རྡུན༌ཀ༌ ཇིག༌རྟེན༌ནི༌ཀ༌ ཕོས༌ཏོང།"
2 ཏེ༌ནེ༌ ཕོ༌ཉ༌ ཏང༌པོ༌བོ༌ སོང༌ཏེ༌ ཁོ༌རང༌ངི༌ གོར༌མོའེ༌ ནང༌ང༌ ཡོད༌ཁན༌བོ༌ ཇིག༌རྟེན༌ནི༌ཀ༌ ཕོས༌ཏངས༌། ཏེ༌ ཇིགས༌ནང༌ཅན༌ནི༌ སེམས༌ཅན༌ནི༌ སྟགས༌ ཡོད༌ཁན༌ ཡང༌ ཏེ༌བོའེ༌ སྐུན༌དྲའ༌ ཅོལ༌ཁན༌ གུན༌ནི༌ ཟུགས༌པོའེ༌ཀ༌ ཇིགས༌ཤེས༌ དང༌ ཟུག༌ཟེར༌ སྲན༌ཏྲེ༌ཅན༌ནི༌ ཆུར༌གང༌ བིང༌།
3 ཏེ༌ནེ༌ ཕོ༌ཉ༌ ཉིས༌པའེ༌ གོར༌མོའེ༌ ནང༌ང༌ ཡོད༌ཁན༌བོ༌ གྱ༌ཚོའེ༌ཀ༌ ལུགས༌པ༌, གྱ༌ཚོ༌ གང༌པོ༌ མི༌ ཤི༌ཁན༌ནི༌ ཁྲག༌ ཙོགས༌ ནག༌པོ༌ གྱུར༌, ཡང༌ གྱ༌ཚོའེ༌ ནང༌ང༌ ཡོད༌ཁན༌ནི༌ སྲོག༌ ཡོད༌ཁན༌ ཚང༌མ༌ ཤི༌།
4 ཏེ༌ནེ༌ ཕོ༌ཉ༌ སུམ༌པའེ༌ གོར༌མོའེ༌ ནང༌ང༌ ཡོད༌ཁན༌བོ༌ ལྩངས༌པོ༌ དང༌ ཆུ༌མིག༌ གུན༌ནི༌ཀ༌ ལུགས༌པ༌, ཏེ༌ ཆུ༌གུན༌ནའང༌ ཁྲག༌ག༌ གྱུར༌།
5 ཡང༌ ངའེ༌ ཆུ༌གུན༌ནི༌ཀ༌ ཝང༌ཆ༌ ཡོད༌ཁན༌ནི༌ ཕོ༌ཉ༌བོའེ༌ ཟེར༌ཨིན༌ ཚོར༌,
"ཉེ༌རང༌ངི༌ ཁྲིམས༌ཅད༌གུན༌ དྲང༌པོ༌ ཨིན༌།
ཉེ༌རང༌ ཞུགས༌ཏེ༌ ཡོད༌, ཡང༌ ཞུགས༌ཏེ༌ ཡོད༌པིན༌,
ཡང༌ ཉེ༌རང༌ དམ༌པ༌ ཞུགས༌ཏེ༌ ཨིན༌,
ཅིའ༌ཞུ༌ན༌ ཉེ༌རང༌ངི༌ འོས༌པའེ༌ ཁྲིམས༌ཅད༌གུན༌ ཛད༌ཏེ༌ ཨིན༌ནོག༌།
6 ཁོང༌གུན༌ནི༌ དཀོན༌མཆོག༌གི༌ མི༌ དང༌ ལུང༌སྟོན༌པ༌ གུན༌ནི༌ ཁྲག༌ ཕོས༌ པ༌སང༌,
ཉེ༌རང༌ངི༌ ཁོང༌གུན༌ལ༌ ཁྲག༌ ཐུང༌ང༌ སལས༌, ཀ༌བོ༌ འོས༌པ༌ ཨིན༌།
7 ཏེ༌ནེ༌ ངའེ༌ ཆོད༌ཁྲི༌ ཀ༌ནེ༌ སྐད༌ཅིག༌གི༌,
"ཀྱེ༌ གཙོ༌བོ༌ དཀོན༌མཆོག༌ ཀུན༌ཝང༌
དེན༌བའ༌ ཉེ༌རང༌ངི༌ ཁྲིམས༌ཅད༌གུན༌ འོས༌པ༌
དང༌ དྲང༌པོ༌ ཨིན༌ནོག༌" མོལ༌ཨིན༌ ཚོར༌།
8 ཏེ༌ནེ༌ ཕོ༌ཉ༌ ཞི༌པའེ༌ གོར༌མོའེ༌ ནང༌ང༌ ཡོད༌ཁན༌བོ༌ ཉི༌མའེ༌ཀ༌ ཕོས༌ པ༌སང༌, ཏེ༌བོའེ༌ ཚད༌པོའེ༌ མི༌ཚང༌མ༌ མེའ༌ ཚིག༌ཅུགས༌།
9 ཨིན༌ནའང༌ ཏེ༌ ཚད༌དི༌ ཚིག༌ཁན༌ ཚང༌མའེ༌, ཁོ༌རང༌ངི༌ སྡིག༌པ༌གུན༌ནི༌ཀ༌ གྱོད༌པ༌ ཅོས༌ཏེ༌ འི༌ རྡུག༌ངལ༌ ཚང༌མའེ༌ཀ༌ ཝང༌ཆ༌ ཡོད༌ཁན༌ནི༌ དཀོན༌མཆོག༌ག༌ རྩི༌ཝ༌ མ༌ཅོའ༌, ཁོང༌ངི༌ ཚན༌བོའ༌ རྔན༌ ཏབ༌དུག༌།
10 ཏེ༌ནེ༌ ཕོ༌ཉ༌ ལྔ༌པའེ༌ གོར༌མོའེ༌ ནང༌ང༌ ཡོད༌ཁན༌བོ༌ ཇིགས༌ནང༌ཅན༌ནི༌ སེམས༌ཅན༌ནི༌ ཁྲིས༌སི༌ཀ༌ ལུགས༌ཏངས༌པ༌ ཁོའེ༌ གྱལ༌སྲིད༌ གང༌པོ༌ མུན༌གྲིག༌གི༌ ཀབས༌ ཏངས༌། ཁོའེ༌ ཁའ༌ཉན༌ཁན༌གུན༌ནི༌ ཟུག༌ཟེར༌ ཆེན༌མོ༌ ཡོང༌ཅེས༌པོའེ༌, རང༌ངི༌ ལྕེ༌གུན༌ལ༌ སོ༌ག༌ ཏབས༌།
11 ཡང༌ ཁོང༌གུན༌ལ༌ རྡུག༌ངལ༌ ཆེན༌མོ༌ དང༌ ཆུར༌གང༌ ཡོད༌ཅེས༌པོའེ༌, ཁོང༌གུན༌ནི༌ ནམ༌ཁའ༌ ཞུགས༌ཁན༌ནི༌ དཀོན༌མཆོག༌ག༌ རྔན༌ ཏབས༌, ཨིན༌ནའང༌ ཁོང༌རང༌གུན༌ནི༌ ལས༌ ངན༌པ༌གུན༌ནི༌ཀ༌ གྱོད༌པ༌ ཅོས༌ཏེ༌ དཀོན༌མཆོག༌ ཆོགས༌ལ༌ སེམ༌ མ༌གྱུརས༌།
12 ཏེ༌ནེ༌ ཕོ༌ཉ༌ དྲུག༌པའེ༌ གོར༌མོའེ༌ ནང༌ང༌ ཡོད༌ཁན༌བོ༌ ཡུཕ༌རེ༌ཀྲས༌སི༌ ལྩངས༌པོ༌ ཆེན༌མོའེ༌ ནང༌ང༌ ཕོས༌ པ༌སང༌, ལྩངས༌པོ༌བོ༌ སྐམས༌, ཏེ༌བོའེ༌ ཞས༌ཏེ༌ ཤར༌ ཆོགས༌སི༌ གྱལ༌པོ༌གུན༌ལ༌ ཁོ༌རང༌གུན༌ནི༌ མག༌མི༌གུན༌ གག༌སྐྱིལ༌ མེད༌པ༌, ལྷོ༌ ཆོགས༌ལ༌ ཁྱོང༌ཉན༌།
13 ཡང༌ ངའེ༌ བྲུག༌, ཇིགས༌ནང༌ཅན༌ནི༌ སེམས༌ཅན༌ དང༌ ཟུས༌མའེ༌ ལུང༌སྟོན༌པ༌ སུམ༌ཀོའེ༌ ཁའ༌ནེ༌ བལ༌པ༌ ཙོགས༌སི༌ ཚི༌ཏུ༌ སེམས༌ཉིད༌གུན༌ བིང༌ཨིན༌ ཐོང༌།
14 ཏེ༌གུན༌ ཧ༌ལས༌ཤེས༌སི༌ སྟགས༌གུན༌ ལྟན༌ཅེས༌ལ༌ ཁྱུད༌ ཡོད༌ཁན༌ནི༌ རྡུད༌གུན༌ནི༌ སེམ༌ཉིད༌གུན༌ ཨིན༌ནོག༌, ཡང༌ ཏེ༌གུན༌ ཇིག༌རྟེན༌ནི༌ཀ༌ གྱལ༌པོ༌ ཚང༌མ༌ ཡོད༌ས༌ སོང༌ཏེ༌ གཙོ༌བོ༌ དཀོན༌མཆོག༌གི༌ གྱབ༌གལ༌ལ༌ དཀོན༌མཆོག༌ ཀུན༌ཝང༌ངི༌ ཀྲག༌པོ༌ ཁྲིམས༌ཅད༌དི༌ ཞག༌ག༌, མག༌ ཏང༌ཅེས༌ལ༌ ཛོམ༌ཅུགས༌།
15-16 ཁོང༌གུན༌ནི༌ གྱལ༌པོ༌ ཚང༌མ༌ ཨིབ༌རི༌པའེ༌ སྐད༌དི༌ ནང༌ང༌ ཨར༌མ༌གེ༌དོན༌ ཟེར༌ཁན༌ནི༌ ནས༌ས༌བོའེ༌ཀ༌ ཛོམ༌ཅུགས༌།
གཙོ༌བོ༌ ཡེ༌ཤུའི༌ མོལས༌ "ལྟོས༌ཤིག༌, ང༌ ཧུན༌མེད༌ལ༌ རྐུན༌མ༌ ཙོགས༌ལ༌ ཡོང༌ ཟ༌ནེ༌, ལྗེར༌ཉལ༌ལ༌ ཁྲེལ༌བ༌ མི༌ཆ༌ཅེས༌སི༌ ཕིའ༌, ཤང༌ ཅོས༌ཏེ༌ ཀོས༌ལག༌ གྲལ༌གྲིག༌ བོར༌ཁན༌གུན༌ ཅིན༌ལབས༌ཅན༌ ཨིན༌།
17 ཡང༌ ཕོ༌ཉ༌ རྡུན༌པའེ༌ གོར༌མོའེ༌ ནང༌ང༌ ཡོད༌ཁན༌བོ༌ ལུངས༌པོའེ༌ ནང༌ང༌ ཕོས༌པ༌, ཆོད༌ཁང༌ངི༌ ནང༌ནེ༌ དཀོན༌མཆོག༌གི༌ ཞུགས༌ཁྲིས༌སི༌ ཀ༌ནེ༌ སྐད༌ ཆེན༌མོ༌ཞིག༌ བྱུངས༌ཏེ༌ མོལས༌, "ཏ༌ གྲུབ༌ ཚར༌།"
18 ཏེ༌ནེ༌ སྐམ༌ལག༌གི༌ འོད༌, བྲུག༌ལྡིར༌ཁན༌ནི༌ སྐད༌ ཡང༌ ཏེ༌ཟུག༌ སང༌གུལ༌ ཇིགས༌པ༌ཞིག༌ ཇིག༌རྟེན༌ནི༌ཀ༌ ཡོངས༌, ཀ༌བོ༌ འི༌ ཇིག༌རྟེན༌ནི༌ཀ༌ མི༌ ཛད༌པ༌ནེ༌ ཕར༌ལ༌ དག༌ས༌ ཚོག༌པ༌ མ༌ནེ༌ མ༌ཡོངས༌ཁན༌ཞིག༌།
19 མིང༌ཅན༌ནི༌ བ༌བེ༌ལོན༌ནི༌ གྱལ༌ས༌བོ༌ པོ༌སུམ༌མ༌ བུད༌, ཡང༌ གྱལ༌ཁམས༌ ཚང༌མའེ༌ གྱལ༌ས༌གུན༌ནའང༌ རྡིབས༌ཏེ༌ སོང༌། དཀོན༌མཆོག༌གི༌ བ༌བེ༌ལོན༌པ༌གུན༌ནི༌ སྡིག༌པ༌གུན༌ ཞེད༌ མ༌ཞེད༌ པ༌སང༌, ཁོང༌ངི༌ ཁོང༌གུན༌ལ༌ ཁོང༌ངི༌ མའ༌ ཐུགས༌སྲོ༌ སྲན༌ཏྲེ༌ ཆང༌ངི༌ གངས༌ཏེ༌ ཡོད༌ཁན༌ནི༌ དོན༌སྐྱོག༌པོ༌ ཐུང༌ ཅུག༌ག༌ ཛདས༌།
20 ཡང༌ སང༌གུལ༌ལི༌ ཞས༌ཏེ༌ ཚོ༌ལིང༌ ༼ཡང༌ན༌ ཆུའི༌ སྐོར༌ཏེ༌ ཡོད༌ཁན༌ནི༌ ས༌ཆ༌༽ ཚང༌མ༌ ཚོའེ༌ ནང༌ང༌ ནུབ༌ཏེ༌ སོང༌, ཡང༌ རི༌གུན༌ སྟོར༌ཏེ༌ མ༌ནེ༌ མ༌ཐོང༌།
21 སེར༌ར༌རུ༌ རེ༌རེ༌ ཧ༌ལམ༌ ཀྱི༌ལོ༌ 45 ལྕིན༌ཏྲེ༌ ཡོད༌ཁན༌, ནམ༌ནེ༌ མི༌གུན༌ནི༌ཀ༌ བབས༌། ཏེ༌ སེར༌ར༌རུའི༌ ཇིགས༌ནང༌ཅན༌ནི༌ རྡུག༌ངལ༌ ཐོང༌ཅེས༌པོའེ༌ ཁོང༌གུན༌ནི༌ དཀོན༌མཆོག༌ག༌ རྔན༌ ཏབས༌།