17
ཟུགས༌ཙོང༌མ༌ དང༌ ཇིགས༌ནང༌ཅན༌ནི༌ སེམས༌ཅན༌།
17:1 ནེ༌ 13
1 གོར༌མོ༌ ཡོད༌ཁན༌ནི༌ ཕོ༌ཉ༌ རྡུན༌ནི༌ ཕྲོ༌ནེ༌ ཅིག༌ ང༌ ཡོད༌ས༌ སྐྱོད༌ཏེ༌ མོལས༌, "འི༌རུ༌ ཡོང༌, ལྩངས༌པོ༌ མང༌པོའེ༌ ཐའ༌མ༌ ཆགས༌ཏེ༌ ཡོད༌ཁན༌ནི༌ མིང༌ཅན༌ བུ༌མོ༌ ཟུགས༌ཙོང༌མའ༌ ཆད༌པ༌ ཕོག༌ཅེས༌པོ༌ ཁྱོ༌རང༌ང༌ ངའེ༌ ལྟན༌ཨིན༌།
2 ཇིག༌རྟེན༌ནི༌ གྱལ༌པོ༌ ཚང༌མའེ༌, ཏེ༌ བུ༌མོ༌ ཉམ༌པོ༌ ལུས༌བྲེལ༌ ངན༌པ༌ ཅོས༌, ཡང༌ ར༌རོས༌ཁན༌ཞིག༌, སམ༌བ༌ མེད༌ཁན༌ གྱུར༌ར༌ ཙོགས༌ལ༌ ཇིག༌རྟེན༌པ༌ ཏད༌པ༌ མེད༌ཁན༌གུན༌, ཏེ༌ བུ༌མོའེ༌ སྕོད༌པ༌ ངན༌པའེ༌ སྟིང༌རང༌ནེ༌ སོང༌།"
3 སེམས༌ཉིད༌དི༌ ནང༌ང༌ ངའ༌ ཏེ༌ ཕོ༌ཉ༌བོའེ༌ རི༌སྟོང༌ཞིག༌ག༌ ཁྲིད༌ཏེ༌ ཁྱེར༌ར༌ ཛདས༌། ཏེ༌རུ༌ ང༌ ཇིགས༌ནང༌ཅན༌ནི༌ སེམས༌ཅན༌ མར༌པོ༌ཞིག༌ག༌ ཞོན༌ཁན༌ནི༌ བུ༌མོ༌ཞིག༌ ཐོང༌, ཏེ༌ སེམས༌ཅན༌བོའ༌ གོ༌ རྡུན༌ དང༌ རཱ༌ཅོ༌ རྕུ༌ དུག༌, ཡང༌ ཟུགས༌པོ༌ གང༌པོའེ༌ཀ༌ དཀོན༌མཆོག༌ག༌ དད༌ལོག༌ ཞུ༌ཁན༌ནི༌ མིང༌གུན༌ བྲིས༌ཏེ༌ དུག༌།
4 ཏེ༌ བུ༌མོའེ༌ མར༌པོ༌ དང༌ ངོན༌པོ༌ དོག༌གི༌ ཀོས༌ མ༌ ལྡེ༌མོ༌ཞིག༌ གོན༌ཏེ༌ སེར༌, མུ༌ཏིག༌, རིན༌ཅན༌ ཁྲ༌རྡོ༌ ཡོད༌ཁན༌ནི༌ གྱན༌ཆ༌ ཏགས༌ཏེ༌ ལག༌པའེ༌ ནང༌ང༌ ཁོའེ༌ ལུས༌བྲེལ༌ ངན༌པའེ༌ ཁམ༌ལོག༌ དང༌ ཚི༌ཏུ༌ ལས༌གུན༌ གངས༌ཏེ༌ ཡོད༌ཁན༌ནི༌ སེར༌རི༌ ཀོ༌རེ༌ ཁུར༌ཏེ༌ དུག༌།
5 ཏེ༌ བུ༌མོའེ༌ ཐོད༌པའེ༌ཀ༌ ཧ༌གོ༌ཅེས༌ལ༌ མ༌ ཀགས༌པོ༌ ཡོད༌ཁན༌ནི༌, མིང༌ཞིག༌ བྲིས༌ཏེ༌ དུག༌། ཏེ༌བོ༌ ནི༌,
"མིང༌ཅན༌ བ༌བེ༌ལོན༌ནི༌ གྱལ༌ས༌ ཇིགས༌པོ༌བོ༌ ནི༌ ཟུགས༌ཙོང༌མ༌ བུ༌མོ༌གུན༌ དང༌
ཇིག༌རྟེན༌པ༌གུན༌ནི༌ ཁམ༌ལོག༌ ལས༌གུན༌ནི༌ ཨ༌མ༌ ཨིན༌ནོག༌།"
6 ངའེ༌ ཐོང༌, ཏེ༌ བུ༌མོ༌བོ༌ དཀོན༌མཆོག༌གི༌ མི༌གུན༌ནི༌ ཁྲག༌ ཐུངས༌ཏེ༌ ར༌རོས༌ཏེ༌ དུག༌, ཀ༌གུན༌ ཡེ༌ཤུའི༌ སྤང༌པོ༌ ཏང༌ཅེས༌པོའེ༌ སད༌ཏེ༌ ཨིན༌པིན༌། ཏེ༌བོ༌ ཐོང༌ཏེ༌ ངའ༌ ཧ༌ལས༌ ཡང༌ ཧན༌གྲང༌ སོང༌།
7 ཕོ༌ཉའེ༌ ང༌ མོལས༌, "ཁྱོ༌རང༌ ཅིའ༌ ཧ༌ལས༌ཏེ༌ ཧན༌གྲང༌ ཆད༌? ངའེ༌ ཁྱོ༌རང༌ང༌ ཏེ༌ བུ༌མོ༌བོ༌ དང༌ ཁོ༌ ཞོན༌ཏེ༌ ཡོད༌ཁན༌ནི༌ གོ༌ རྡུན༌ དང༌ རཱ༌ཅོ༌ རྕུ༌ ཡོད༌ཁན༌ནི༌ ཇིགས༌ནང༌ཅན༌ནི༌ སེམས༌ཅན༌ ཉིས༌ཀོའེ༌ སང༌ཝ༌བོ༌ ཧ༌གོ༌ཅུག༌ཨིན༌།
8 ཁྱོ༌རང༌ངི༌ ཐོང༌ཁན༌ ཇིགས༌ནང༌ཅན༌ནི༌ སེམས༌ཅན༌བོ༌ སྔུན༌མ༌ཞིག༌ སོན༌ཏེའ༌ ཡོད༌པིན༌, དག༌ས༌ མེད༌ཏེ༌ ཨིན༌ནོག༌, ཨིན༌ནའང༌ ཁོ༌ ཐིལ༌ མེད༌ཁན༌ནི༌ ཏིང༌ཅན༌ ས༌དོང༌ངི༌ ནང༌ནེ༌ བིང༌ཨིན༌, ཡང༌ དཀོན༌མཆོག༌གི༌ ཁོ༌ ཏུས༌གྱུན༌ནི༌ ཕིའ༌ ཁྲེས༌སྟོར༌ ཛད༌ཨིན༌། ཇིག༌རྟེན༌ མ༌ཆགས༌སི༌ སང༌ སྔུན༌ལ༌, ཐའ༌མེད༌པའེ༌ མི༌ཚེའེ༌ སྤེ༌ཆའེ༌ ནང༌ང༌ མིང༌ བྲིས༌ཏེ༌ མེད༌ཁན༌ ཇིག༌རྟེན༌པ༌གུན༌ནི༌ ཏེ༌ ཇིགས༌ནང༌ཅན༌ནི༌ སེམས༌ཅན༌བོ༌ ཐོང༌ང༌ཅིག༌ ཧ༌ལས༌ཨིན༌, ཅིའ༌ཟེར༌ན༌ ཁོ༌ སྔུན༌མ༌ཞིག༌ ཡོད༌པིན༌, དག༌ས༌ མེད༌ཏེ༌ ཨིན༌ནོག༌, ཨིན༌ནའང༌ ཡང༌སྐྱར༌ ཡོང༌ཨིན༌།"
9 ཕོ༌ཉའེ༌ ཏ༌རུང༌ངའང༌ མོལས༌, "འི༌གུན༌ ཧ༌གོ༌ཅེས༌ལ༌ ཁྱོ༌ཞ༌གུན༌ ཤེས༌རབས༌ཅན༌ རིག༌ ཡོང༌གོས༌: ཇིགས༌ནང༌ཅན༌ནི༌ སེམས༌ཅན༌ནི༌ གོ༌ རྡུན༌ཀོ༌ ནི༌ རི༌ ཆུ༌ངུན༌ རྡུན༌ ཨིན༌ནོག༌, ཀ༌བོའེ༌ཀ༌ ཏེ༌ བུ༌མོ༌བོ༌ དུགས༌ཏེ༌ ཝང༌སྲུལ༌ལད༌། ཏེ༌ གོ༌ རྡུན༌ཀོ༌ ནི༌ གྱལ༌པོ༌ རྡུན༌ནའང༌ ཨིན༌ནོག༌།
10 གྱལ༌པོ༌ ལྔ༌བོ༌ ཤི༌ཏེ༌ དྲུག༌པ༌བོའེ༌ ཝང༌སྲུལ༌ཨིན༌ ཨིན༌ནོག༌, ཡང༌ རྡུན༌པ༌བོ༌ ནི༌ བིང༌ཅེས༌ ཨིན༌ནོག༌། ཨིན༌ནའང༌ ཁོའེ༌ ཝང༌སྲུལ༌ཅེས༌སི༌ ཏུས༌པོ༌ ཉུ༌ངུན༌ཞིག༌ མ༌ནེ༌ མི༌ཡོང༌།
11 སྔུན༌མ༌ཞིག༌ སོན༌ཏེའ༌ ཡོད༌ཁན༌ ཇིགས༌ནང༌ཅན༌ནི༌ སེམས༌ཅན༌ མར༌པོ༌, ཨིན༌ནའང༌ དག༌ས༌ མེད༌ཁན༌བོ༌ ནི༌ གྱལ༌པོ༌ རྒྱད༌པ༌བོ༌ ཨིན༌ནོག༌། ཁོའེ༌ ཞན༌ རྡུན༌ཀོ༌ ཙོགས༌ལ༌ ཝང༌སྲུལ༌ཨིན༌, ཨིན༌ནའང༌ དཀོན༌མཆོག༌གི༌ ཁོའང༌ ཁྲེས༌སྟོར༌ ཅོའ༌ ཛད༌ཨིན༌།
12 ཁྱོ༌རང༌ང༌ ཐོང༌ཁན༌ནི༌ རཱ༌ཅོ༌ རྕུ༌བོ༌ ནི༌ ཏ༌རུང༌ ཚོག༌པ༌ ཝང༌ མ༌སྲུལ༌ཁན༌ནི༌ གྱལ༌པོ༌ རྕུ༌ ཨིན༌ནོག༌། ཡང༌ ཏེ༌གུན༌ལ༌ ཇིགས༌ནང༌ཅན༌ནི༌ སེམས༌ཅན༌ ཉམ༌པོ༌ ཏུས༌ ཉུ༌ངུན༌ཞིག༌གི༌ ཕིའ༌ ཝང༌སྲུལ༌ཅེས༌ལ༌ ཝང༌ཆ༌ ཏང༌ཨིན༌།
13 ཏེ༌ གྱལ༌པོ༌གུན༌ནི༌ ཇིགས༌ནང༌ཅན༌ནི༌ སེམས༌ཅན༌ལ༌ ཁོ༌རང༌གུན༌ནི༌ ཁྱུད༌ དང༌ ཝང༌ཆ༌ གུན༌ ཏང༌ཅེས༌ལ༌ ཁའ༌ཆམས༌ཨིན༌།"
ལུ༌གུའ༌ གྱལ༌ཁའ༌ ཐོབ༌།
17:14 ནེ༌ 18
14 ཇིགས༌ནང༌ཅན༌ནི༌ སེམས༌ཅན༌ དང༌ གྱལ༌པོ༌ རྕུ༌ཀོའེ༌ ལུ༌གུ༌ ཉམ༌པོ༌ མག༌ ཏང༌ཨིན༌, ཨིན༌ནའང༌ ལུ༌གུའ༌ ཏེ༌གུན༌ནི༌ཀ༌ གྱལ༌ཁའ༌ ཐོབ༌ཨིན༌། ཅིའ༌ཟེར༌ན༌ ཁོང༌ ནི༌ གཙོ༌བོ༌གུན༌ནི༌ གཙོ༌བོ༌ དང༌ གྱལ༌པོ༌གུན༌ནི༌ གྱལ༌པོ༌ ཞུགས༌ཏེ༌ ཨིན༌ནོག༌། ཁོང༌ངི༌ བོད༌ད༌ ཛད༌ཏེ༌ ལྡམ༌མ༌ ཛད༌ཏེ༌ ཁོང༌ངི༌ ནང༌ང༌ ཨིད༌ཤེས༌ ཅོ༌ཁན༌གུན༌ ཁོང༌ ཉམ༌པོ༌ དུག༌ཨིན༌།
15 ཏེ༌ནེ༌ ཏེ༌ ཕོ༌ཉ༌བོའེ༌ ངའ༌ མོལ༌ལ༌རག༌, "ཏེ༌ ཟུགས༌ཙོང༌མ༌ དུགས༌ཏེ༌ ཡོད༌ཁན༌ནི༌ ལྩངས༌པོ༌གུན༌ ནི༌ མི༌གུན༌, མི༌ཚོགས༌གུན༌, གྱལ༌ཁམས༌གུན༌ དང༌ སྐད༌རིགས༌གུན༌ ཨིན༌ནོག༌།
16 རཱ༌ཅོ༌ རྕུ༌ དང༌ ཇིགས༌ནང༌ཅན༌ནི༌ སེམས༌ཅན༌ནི༌, ཏེ༌ ཟུགས༌ཙོང༌མའ༌ ནཕ༌རད༌ ཅོ༌ཨིན༌། ཁོང༌གུན༌ནི༌ ཁོའེ༌ ཀ༌ནེ༌ ཅི༌ཚང༌མ༌ ཀོགས༌ཏེ༌ ཁོ༌ ལྗེར༌ཉལ༌ ཅོ༌ཨིན༌, ཡང༌ ཁོའེ༌ ཤ༌གུན༌ ཟོས༌ཏེ༌ ལག༌ལུས༌གུན༌ མེའ༌ སྲག༌ཨིན༌།
17 དཀོན༌མཆོག༌གི༌ ཐུགས༌ཐད༌པོ༌ གྲུབ༌ཅེས༌ལ༌, ཁོང༌ངི༌ ཏེ༌ ཝང༌སྲུལ༌པ༌གུན༌ནི༌ སྙིང༌ངི༌ ནང༌ང༌ ཐབ༌ཤིག༌ ལྡིང༌ང༌ ཛདས༌། དཀོན༌མཆོག༌གི༌ བཀའ༌གུན༌ དྲན༌དྲ༌ གྲུབ༌ཅེས༌སི༌ ཕིའ༌ ཁོང༌གུན༌ནི༌ ཝང༌ཆ༌གུན༌ ཇིགས༌ནང༌ཅན༌ནི༌ སེམས༌ཅན༌བོའ༌ ཏང༌ཅེས༌ལ༌ ཁའ༌ཆམས༌ ཅུག༌ག༌ ཛད༌ཨིན༌།
18 ཡང༌ ཁྱོ༌རང༌ངི༌ ཐོང༌ཁན༌ནི༌ བུ༌མོ༌བོ༌ ནི༌ ཇིག༌རྟེན༌ནི༌ གྱལ༌པོ༌གུན༌ནི༌ཀ༌ ཝང༌སྲུལ༌ཨིན༌ ཡོད༌ཁན༌ནི༌ གྱལ༌ས༌ ཇིགས༌པོ༌བོ༌ ཨིན༌ནོག༌།