19
ནམ༌ཁའེ༌ ནང༌ང༌ གྱལ༌ཁའེ༌ ལུ༌ ཏངས༌།
19:1 ནེ༌ 10
1 ཏེ༌ སྟིང༌ནེ༌ ངའེ༌ ནམ༌ཁའེ༌ ནང༌ང༌ མི༌ཚོགས༌ ཆེན༌མོའེ༌ ཀུ༌ཅོ༌ ཙོགས༌ ཚོར༌ ཀ༌གུན༌ནི༌ ཟེར༌ར༌རག༌,
"གཙོ༌བོའ༌ སྟོད༌པ༌ ཕུལ༌ཤིག༌,
ཐར༌པ༌, ཟིར༌རྗིད༌ དང༌ ཝང༌
ང༌དང༌ངི༌ དཀོན༌མཆོག༌གི༌ ཨིན༌ནོག༌།
2 ཁོང༌ངི༌ ཁྲིམས༌ཅད༌གུན༌ ནི༌ འོས༌པ༌ དང༌ དྲང༌པོ༌ ཨིན༌ནོག༌།
ཁོང༌ངི༌ ཏེ༌ ཟུགས༌ཙོང༌མ༌ ཇིགས༌པོ༌ གྱལ༌ས༌ བ༌བེ༌ལོན༌ལ༌ ཁྲིམས༌ཅད༌ ཛདས༌,
ཀ༌བོའེ༌ ལུས༌བྲེལ༌ ངན༌པའེ༌ ལས༌གུན༌ནི༌
ཇིག༌རྟེན༌པ༌གུན༌ལ༌ སྡིག༌པའེ༌ ལམ༌མི༌ཀ༌ གྲུལ༌ཅུགས༌།
དཀོན༌མཆོག༌གི༌ ཏེ༌ བུ༌མོ༌བོའ༌, ཁོང༌ངི༌ ཞབ༌སྟོག༌པ༌གུན༌
སད༌ཅེས༌སི༌ ཚབས༌ལ༌ ལན༌སལ༌ཏེ༌ ཨིན༌ནོག༌།"
3 ཁོང༌གུན༌ནི༌ ཡང༌སྐྱར༌ ཤེད༌ དང༌ ཟེརས༌,
"གཙོ༌བོའ༌ སྟོད༌པ༌ ཕུལ༌ཤིག༌,
ཏེ༌ གྱལ༌སའེ༌ ནང༌ནེ༌ ཏུད༌པ༌ ཏུས༌གྱུན༌ནེ༌གྱུན༌ བིང༌ཨིན༌།"
4 ཏེ༌ནེ༌ ཏེ༌ སྤོན༌བོ༌ 24 དང༌ སྲོག༌ ཡོད༌ཁན༌ ཞི༌བོའེ༌ ཞུགས༌ཁྲིས༌སི༌ཀ༌ ཞུགས༌ཁན༌ དཀོན༌མཆོག༌གི༌ སྐུན༌དུན༌ལ༌ ཆག༌ཕུལས༌ ཡང༌ ཁོང༌ང༌ ཅོལ༌ཨིན༌ མོལས༌,
"ཨ༌མེན༌, གཙོ༌བོའ༌ སྟོད༌པ༌ ཕུལ༌ཤིག༌།"
5 ཏེ༌ནེ༌ གྱལ༌ཁྲིས༌སི༌ ཀ༌ནེ༌ འི༌ སུང༌སྐད༌པོ༌ ཚོར༌,
"དཀོན༌མཆོག༌གི༌ ཞབ༌སྟོག༌པ༌, དཀོན༌མཆོག༌ག༌ ཇིགས༌ཁན༌,
ཉམ༌ཤུང༌ དང༌ ཇིགས༌པོ༌ ཚང༌མའེ༌ ང༌དང༌ངི༌ དཀོན༌མཆོག༌ག༌ སྟོད༌པ༌ ཕུལ༌ཤིག༌།"
6 ཏེ༌ནེ༌ ངའེ༌ མི༌ཚོགས༌ ཆེན༌མོ༌, ཆུ༌ ཀྲག༌པོ༌ གྱུག༌ཁན༌, བྲུག༌ ཀྲག༌པོ༌ ལྡིར༌ཁན༌ནི༌ སྐད༌ ཙོགས༌སི༌ སྐད༌ཅིག༌གི༌ མོལ༌ཨིན༌ ཚོར༌,
"གཙོ༌བོའ༌ སྟོད༌པ༌ ཕུལ༌ཤིག༌,
གཙོ༌བོ༌ ང༌དང༌ངི༌ དཀོན༌མཆོག༌ ཀུན༌ཝང༌ངི༌ ཝང༌སྲུལ༌ལ༌ ཛད༌དུག༌།
7 ཡོང༌ཤིག༌, ང༌དང༌གུན༌ནི༌ ཐད༌པོ༌ དང༌ སྐྱིད༌པོ༌ ཅོ༌ཨིན༌,
ཡང༌ ང༌དང༌གུན༌ནི༌ དཀོན༌མཆོག༌ག༌ སྤལ༌ ཏོང༌ཤིག༌།
ཅིའ༌ཞུ༌ན༌ ལུ༌གུའི༌ བག༌སྟོན༌ནི༌ ཏུས༌པོ༌ རན༌ ཚར༌ཏེ༌
ཁོང༌ངི༌ བག༌མའེ༌ ཁོང༌རང༌ ཁོང༌ངི༌ ཕིའ༌ གྲལ༌གྲིག༌ ཛད༌ཏེ༌ ཨིན༌ནོག༌།
8 བག༌མའ༌ ཀོས༌ལག༌ རིན༌ཅན༌: ཀར༌པོ༌ དང༌ རྩང༌མ༌
གོན༌ན༌ལ༌ སལས༌།" ༼ཀོས༌ལག༌ རིན༌ཅན༌བོ༌ ནི༌, དཀོན༌མཆོག༌གི༌
མི༌གུན༌ནི༌ ཆག༌ལས༌ དྲང༌པོ༌གུན༌ ཨིན༌ནོག༌༽།
9 ཏེ༌ནེ༌ ཕོ༌ཉའེ༌ ང༌ མོལ༌ལ༌རག༌, "འི༌བོ༌ བྲིས༌, ལུ༌གུའི༌ བག༌སྟོན༌ནི༌ གྲོན༌ལ༌ བོད༌ཁན༌གུན༌ ཅིན༌ལབས༌ཅན༌ ཨིན༌།" ཁོང༌ངི༌ ཡང༌སྐྱར༌ མོལས༌, "ཏེ༌གུན༌ དཀོན༌མཆོག༌གི༌ མོལ༌ཁན༌ནི༌ བཀའ༌གུན༌ ཨིན༌ནོག༌།"
10 ཏེ༌ནེ༌ ངའེ༌ ཁོང༌ང༌ ཅོལ༌ཅེས༌ལ༌ ཁོང༌ངི༌ ཞབས༌སི༌ཀ༌ གྱེལ༌པིན༌། ཨིན༌ནའང༌ ཁོང༌ངི༌ མོལས༌, "ངའ༌ ཅོལ༌ མ༌ཅོལ༌། ཡེ༌ཤུའི༌ སྐོར༌ལ༌ སྤང༌པོ༌ ཏང༌ཅེས༌སི༌ ནང༌ང༌ སྟན༌པོ༌ དུག༌ཁན༌ ཁྱོ༌རང༌ དང༌ ཁྱོ༌རང༌ངི༌ སྤུན༌གུན༌ ཙོགས༌ ངའང༌ དཀོན༌མཆོག༌གི༌ ཞབ༌སྟོག༌པ༌ཞིག༌ ཨིན༌། དཀོན༌མཆོག༌ ཅིག༌པོའ༌ ཅོལ༌, ཅིའ༌ཟེར༌ན༌ དཀོན༌མཆོག༌གི༌ ཐུག༌ཉིད༌དི༌ ཡེ༌ཤུའི༌ སྐོར༌ལ༌ སྤང༌པོ༌ ཞན༌མ༌གུན༌ལ༌ ཏང༌ཅེས༌སི༌ ཁྱུད༌ སལ༌ལ༌ནོག༌།"
རྟ༌ ཀར༌པོའེ༌ཀ༌ ཞོན༌ཁན༌།
19:11 ནེ༌ 21
11 ཏེ༌ནེ༌ ངའ༌ ནམ༌ཁའ༌ བེས༌ཏེ༌ ཐོང༌, རྟ༌ ཀར༌པོ༌ ཡང༌ ཏེ༌བོའེ༌ཀ༌ ཞོན༌ཁན༌བོའེ༌ ཚན༌ལ༌ ཨིད༌ཤེས༌ཅན༌ དང༌ དྲང༌པོ༌ ཞུ༌རུག༌, ཅིའ༌ཟེར༌ན༌ ཁོང༌ངི༌, འོས༌པ༌ ཉམ༌པོ༌ ཁྲིམས༌ཅད༌ ཛད༌ཏེ༌ དྲང༌པོའེ༌ མག༌པོ༌ སལ༌ལ༌ ཛད༌དུག༌།
12 ཁོང༌ངི༌ མིག༌ ནི༌, མེའེ༌ མེ༌ལྡབ༌ ཙོགས༌ ཡང༌ ཁོང༌ངི༌ ཨུའི༌ཀ༌ ཐོར༌ཤོག༌ མང༌པོ༌ཞིག༌ དུག༌། ཁོང༌ངི༌ཀ༌ བྲིས༌ཏེ༌ ཡོད༌ཁན༌ནི༌ མིང༌ངི༌ དོན༌བོ༌ ཁོང༌རང༌ མན༌པ༌ ཡང༌སུའང༌ ཤེས༌ས༌ མི༌དུག༌།
13 ཁོང༌ངི༌ ཁྲག༌གི༌ ནང༌ང༌ ཅུགས༌ཏེ༌ ཡོད༌ཁན༌ནི༌ ནམ༌ཟའ༌ གོན༌ཏེ༌ དུག༌, ཡང༌ ཁོང༌ངི༌ ཚན༌ལ༌ དཀོན༌མཆོག༌གི༌ བཀའ༌ ཞུ༌རུག༌།
14 ནམ༌ཁའེ༌ མག༌མི༌, རྟ༌ ཀར༌པོའ༌ ཞོན༌ཏེ༌ ཀོས༌ལག༌ ཀར༌པོ༌ རྩང༌མ༌ རིན༌ཅན༌ གོན༌ཏེ༌ ཡོད༌ཁན༌གུན༌ ཁོང༌ངི༌ སྟིང༌རང༌ནེ༌ ཡོང༌དུག༌།
15 ཡང༌ ཨིད༌ཤེས༌ཅན༌ དང༌ དྲང༌པོ༌ ཞུ༌ཁན༌བོའེ༌ ཞལ༌ནེ༌ ར༌འི༌ ནོན༌པོ༌ཞིག༌ བིང༌དུག༌, ཀ༌བོ༌ ཁོང༌ངི༌ གྱལ༌ཁམས༌གུན༌ལ༌ ཕམ༌ཀལ༌ཅེས༌སི༌ ཕིའ༌ ཀོལ༌ཨིན༌། ཡང༌ "ཁོང༌ངི༌ ཆ༌ཚང༌ ཝང༌ཆ༌ ཉམ༌པོ༌ ཝང༌སྲུལ༌ལ༌ ཛད༌ཨིན༌།" ཀུན༌ཝང༌ དཀོན༌མཆོག༌གི༌ ཐུགས༌སྲོ༌ ཆེན༌མོའེ༌ ནས༌སའེ༌ ནང༌ང༌ རྟ༌ ཀར༌པོའ༌ ཞོན༌ཁན༌བོའེ༌ ཏེ༌གུན༌ རྒུན༌ ཙོགས༌ལ༌ ཙིར༌ར༌ ཛད༌ཨིན༌།
16 ཁོང༌ངི༌ ཤ༌ལྡིག༌ དང༌ ཀོས༌སི༌ཀ༌ འི༌ མིང༌བོ༌ བྲིས༌ཏེ༌ དུག༌, "གྱལ༌པོ༌གུན༌ནི༌ གྱལ༌པོ༌ དང༌ གཙོ༌བོ༌གུན༌ནི༌ གཙོ༌བོ༌།"
17 ཏེ༌ནེ༌ ངའེ༌ ཕོ༌ཉ༌ཞིག༌ ཉི༌མའེ༌ཀ༌ ཞངས༌ཏེ༌ ཐོང༌, ཁོང༌ངི༌ ནམ༌ ཐོམ༌པའེ༌ ནང༌ང༌ འུར༌ཨིན༌ ཡོད༌ཁན༌ནི༌ ཅ༌གུན༌ལ༌ སྐད༌ ཆེན༌མོ༌ ཉམ༌པོ༌ བོད༌ད༌ ཛདས༌, "ཡོང༌ དཀོན༌མཆོག༌གི༌ དོན༌ཏང༌ ཆེན༌མོའེ༌ ཕིའ༌ འི༌ཀ༌ ཛོམ༌ཤིག༌།
18 གྱལ༌པོ༌, མག༌མི༌ སྤོན༌བོ༌, མག༌མི༌ ཀྲག༌པོ༌, རྟ༌གུན༌ དང༌ ཏེ༌གུན༌ལ༌ ཞོན༌ཁན༌, རང༌ཝང༌ཅན༌ དང༌ ཚེ༌ཡོག༌, ཉམ༌ཤུང༌ དང༌ ཇིགས༌པོ༌ ཚང༌མའེ༌ ཤ༌གུན༌ ཟའ༌ལ༌ ཡོང༌ཤིག༌།"
19 ཏེ༌ནེ༌ ངའེ༌ ཏེ༌ ཇིགས༌ནང༌ཅན༌ནི༌ སེམས༌ཅན༌, ཇིག༌རྟེན༌ནི༌ གྱལ༌པོ༌གུན༌ ཡང༌ ཏེ༌གུན༌ནི༌ མག༌མི༌གུན༌, རྟ༌ ཀར༌པོའེ༌ཀ༌ ཞོན༌ཁན༌ དང༌ ཁོང༌ངི༌ མག༌མི༌ གུན༌ནི༌ གྱབ༌གལ༌ལ༌ ནོལ༌ཅེས༌ལ༌ ཛོམ༌ཨིན༌ ཐོང༌།
20 ཨིན༌ནའང༌ ཏེ༌ ཇིགས༌ནང༌ཅན༌ནི༌ སེམས༌ཅན༌ དང༌ ཁོའེ༌ ལུང༌སྟོན༌པ༌ ཟུས༌མ༌བོ༌ ཟུམས༌, ཀ༌བོའེ༌ ཇིགས༌ནང༌ཅན༌ནི༌ སེམས༌ཅན༌བོའེ༌ ཚབས༌ལ༌ ཧ༌ལས༌ཤེས༌སི༌ ལྟས༌ མིན༌དྲ༌ མིན༌དྲ༌ ལྟན༌ནད༌པིན༌། ཏེ༌ ལྟས༌གུན༌ནི༌ མི༌གུན༌ལ༌ གོབ༌སྐོར༌ ཏངས༌ པ༌སང༌, ཁོང༌གུན༌ནི༌ ཇིགས༌ནང༌ཅན༌ནི༌ སེམས༌ཅན༌ནི༌ སྟགས༌པོ༌ ཅོ༌ཅུགས༌ཏེ༌ ཁོའེ༌ སྐུན༌དྲ༌བོའ༌ ཆག༌ཕུལས༌ ཡང༌ ཅོལས༌། ཇིགས༌ནང༌ཅན༌ནི༌ སེམས༌ཅན༌ དང༌ ཁོའེ༌ ལུང༌སྟོན༌པ༌ ཟུས༌མ༌ ཉིས༌ཀོ༌ སོན༌ཏེའ༌ ཏུག༌ཅན༌ནི༌ རྡོའ༌ མེའ༌ ཞེན༌ཨིན༌ ཡོད༌ཁན༌ནི༌ ཚོའེ༌ ནང༌ང༌ ཕངས༌།
21 ཡང༌ རྟ༌ ཀར༌པོའེ༌ཀ༌ ཞོན༌ཏེ༌ ཡོད༌ཁན༌བོའེ༌ ཞལ༌ནེ༌ བིང༌ཨིན༌ ཡོད༌ཁན༌ནི༌ ར༌འི༌བོ༌ ཉམ༌པོ༌ ཁོའེ༌ མག༌མི༌ ཚང༌མ༌ སདས༌། ཡང༌ ཤ༌ ཟའ༌ཁན༌ནི༌ ཅ༌ ཚང༌མའེ༌ ཁོང༌གུན༌ནི༌ རོ༌གུན༌ ཚིམས༌ཚིམས༌ ཟོས༌།