18
བ༌བེ༌ལོན༌ནི༌ གྱལ༌ས༌ ཇིགས༌པོ༌ ཁྲེས༌ཏོར༌ ཛདས༌།
18:1-8
1 ཏེ༌ སྟིང༌ནེ༌ ངའེ༌ ཡང༌ ཕོ༌ཉ༌ཞིག༌ མ༌ ཝང༌ ཆེན༌མོ༌ ཉམ༌པོ༌ ནམ༌ཁའ༌ནེ༌ བབས༌ཨིན༌ ཐོང༌, ཡང༌ ཁོང༌ངི༌ ལྡངས༌སི༌ ཇིག༌རྟེན༌ གང༌པོ༌ འོད༌དི༌ གང༌།
2 ཏེ༌ ཕོ༌ཉ༌བོའེ༌ ཀུ༌ཅོ༌ སྲན༌ཏྲེ༌ སལ༌ཨིན༌ མོལས༌, “མིང༌ཅན༌ བ༌བེ༌ལོན༌ནི༌ གྱལ༌ས༌བོ༌ ཁྲེས༌ཏོར༌ སོང༌ཏེ༌ ཏེ༌བོ༌ རྡུད༌གུན༌ དུག༌སའེ༌ ནས༌ས༌, གོང༌ཞུགས༌གུན༌ནི༌ བྲང༌ས༌ ཡང༌ ཚི༌ཏུ༌ དང༌ ཁམ༌ལོག༌ ཅ༌གུན༌ནི༌ ཚངས༌ གྱུར༌།
3 ཇིག༌རྟེན༌པ༌ ཚང༌མ༌ ཏེ༌ བུ༌མོའེ༌ ལུས༌བྲེལ༌ ངན༌པའེ༌ ཆང༌ ཐུངས༌ཏེ༌ ར༌རོས༌ཏེ༌ དུག༌། ཇིག༌རྟེན༌ནི༌ གྱལ༌པོ༌ ཚང༌མའེ༌, ཏེ༌ བུ༌མོ༌ ཉམ༌པོ༌ ལུས༌བྲེལ༌ ངན༌པ༌ བོརས༌། ཡང༌ ཏེ༌ བུ༌མོའེ༌ གྱུ༌ནོར༌ མང༌པོའེ༌ ཝང༌བོའེ༌, ཇིག༌རྟེན༌ནི༌ ཚོང༌པ༌གུན༌ ཆུག༌པོ༌ གྱུར༌།”
4 ཏེ༌ནེ༌ ང༌ ནམ༌ཁའ༌ནེ༌ ཡང༌ སུང༌སྐད༌ཅིག༌གི༌ མོལ༌ཨིན༌ ཚོར༌,
“ངའེ༌ མི༌གུན༌, ཏེ༌ བུ༌མོའེ༌ སྡིག༌པའེ༌ ནང༌ང༌ དྲེས༌ མི༌དྲེས༌ཤེས༌སི༌ ཕིའ༌,
ཏེ༌ གྱལ༌སའེ༌ ནང༌ནེ༌ བིང༌ཏེ༌ ཡོང༌ཤིག༌,
ཏེ༌ མ༌ནེ༌ ཁྱོ༌ཞ༌གུན༌ནའང༌, ཏེ༌ བུ༌མོ༌ ཉམ༌པོ༌ ཆད༌པ༌ ཕོག༌ཨིན༌།
5 ཅིའ༌ཟེར༌ན༌ ཏེ༌ བུ༌མོའེ༌ སྡིག༌པ༌གུན༌ མང༌པོ༌ སོང༌ཏེ༌ ནམ༌ཁའ༌ ཚོག༌པའང༌ ལེབས༌ཏེ༌ ཨིན༌ནོག༌།
ཡང༌ དཀོན༌མཆོག༌གི༌ ཁོའེ༌ ལས༌ ངན༌པ༌གུན༌ རྗེད༌ད༌ མ༌ཛདས༌།
6 ཁོའེ༌ ཞན༌མ༌གུན༌ལ༌ ངན༌པ༌ ཅོ༌ཁན༌ ཙོགས༌, ཁོ༌ ཉམ༌པོ༌ ཅོས༌།
ཁོའེ༌ ཅོ༌ཁན༌ནི༌ ཉི༌ལྡབ༌བོ༌ ཁོ༌ ཉམ༌པོ༌ ཅོས༌།
ཡང༌ ཁོའེ༌ ནགས༌སི༌ ཀོ༌རེ༌ ཐུང༌ཅུག༌ཁན༌བོ༌ ཉི༌ལྡབ༌ ཅོས༌ཏེ༌
ཁོའ༌ ཐུང༌ཅུག༌།
7 ཏེ༌ བུ༌མོའེ༌ ཁོ༌རང༌ང༌ སྤལ༌ དང༌ གྱུ༌ནོར༌ ཐོབ༌ཁན༌
དྲན༌དྲ༌ ཁོའ༌ བར༌དོ༌ དང༌ རྡུག༌ངལ༌ ཏོང༌,
ཅིའ༌ཟེར༌ན༌ ཏེ༌ བུ༌མོའེ༌ ཁོ༌རང༌ངི༌ སྙིང༌ངི༌ ནང༌ང༌ ཕོ༌སོ༌ ཅོས༌ཏེ༌,
‘ང༌ ནི༌ གྱལ༌མོ༌ ཁྲིས༌སི༌ཀ༌ དུགས༌ཏེ༌ ཨིན༌།
ང༌ ནི༌ ཨ༌ནེ༌མ༌རང༌མོ༌ མན༌, ཡང༌ ངའ༌ མ༌ནེ༌ ཚེར༌ཁ༌ ཅོ༌ མི༌གོས༌’ ཟེར༌དུག༌།
8 ཏེན༌ན༌བོའེ༌ཕིའ༌ ཞག༌ཅིག༌གི༌ ནང༌ང༌ ངའེ༌ ཏེ༌ གྱལ༌སའེ༌ མི༌གུན༌ལ༌ ཟུ༌མོ༌, ཤི༌ཅེས༌,
སེམས༌ཚེར༌ དང༌ མུ༌གེ༌ གུན༌ནི༌ ཆད༌པ༌ ཕབ༌ཨིན༌།
མེ༌ ཏེ༌ གྱལ༌ས༌བོ༌ སྲག༌ ཏང༌ཨིན༌,
ཅིའ༌ཟེར༌ན༌ ཏེ༌ གྱལ༌སའ༌, ཁྲིམས༌ཅད༌ སལ༌ཁན༌ནི༌ གཙོ༌བོ༌ དཀོན༌མཆོག༌ ནི༌ སྟོབས༌ཅན༌ ཨིན༌།”
བ༌བེ༌ལོན༌ནི༌ ཕིའ༌ ངུས༌།
18:9-24
9 ཏེ༌ བུ༌མོ༌ ཉམ༌པོ༌ ལུས༌བྲེལ༌ ངན༌པ༌ དང༌ ཁོའེ༌ གྱུ༌ནོར༌གུན༌ནི༌ཀ༌ ཐད༌པོ༌ ཅོ༌ཁན༌ནི༌ ཇིག༌རྟེན༌ནི༌ གྱལ༌པོ༌གུན༌ནི༌, བ༌བེ༌ལོན༌ནི༌ ཏུད༌པ༌ བིང༌ཨིན༌ ཐོངས༌ཏེ༌ ཁོའེ༌ ཕིའ༌ ཉ༌ངན༌ ཅོས༌ཏེ༌ ངུ༌ཨིན༌།
10 ཏེ༌གུན༌ནི༌ ཏེ༌ བུ༌མོ༌བོའེ༌ ཆད༌པ༌ སྲན༌ཏྲེ༌བོ༌ ཐོང༌ཏེ༌ ཇིགས༌ཏེ༌ ཐག༌རིང༌ང༌ དུགས༌ཏེ༌ ངུ༌ཨིན༌ཞིག༌ ཟེརས༌, “ཝ༌ ཀྲག༌པོ༌ གྱལ༌ས༌ ཙམ༌ཤིག༌གི༌ ཇིགས༌ནང༌ ཇིགས༌ནང༌, བ༌བེ༌ལོན༌ གྱལ༌ས༌ ཇིགས༌པོ༌, ཏུས༌ མ༌ ཉུ༌ངུན༌ཞིག༌གི༌ ནང༌ང༌ དཀོན༌མཆོག༌གི༌ ཁྱོ༌རང༌ང༌ ཆད༌པ༌ སལས༌།”
11 ཇིག༌རྟེན༌ནི༌ ཚོང༌པ༌གུན༌ནིའང༌ བ༌བེ༌ལོན༌ནི༌ ཕིའ༌ ངུ༌ཨིན༌, ཚེར༌ཁ༌ ཅོ༌ཨིན༌, ཅིའ༌ཟེར༌ན༌ ཏ༌ནེ༌ཕར༌ལ༌ ཁོང༌གུན༌ནི༌ ཅ༌ལག༌ ཉོ༌ཁན༌ སུ༌ཞིག༌གའང༌ མི༌ལུས༌།
12 སྤེར༌ན༌ སེར༌, མུལ༌, ཁྲ༌རྡོ༌ རིན༌ཅན༌, མུ༌ཏིག༌, རིན༌ཅན༌ གྱལ༌པོ༌གུན༌ནི༌ ཀོས༌ དང༌ ཀོ༌ཤེན༌, ཏྲི༌ཞིམ༌ ཤིང༌ངི༌ རིགས༌ ཚང༌མ༌, ལང༌པོ༌ཆེ༌ སོའ༌ ཅོ༌ཁན༌ནི༌ ཅ༌ལག༌གུན༌, རིན༌ཅན༌ ཤིང༌གུན༌, ར༌གན༌, ལྕགས༌ དང༌ རྡོའ༌ ཀ༌མ༌རུ༌,
13 ཡང༌ དལ༌ཅི༌ནི༌, ཚ༌མིག༌, སྤོས༌, མའེར༌ ཏྲི༌ཞིམ༌ཅན༌ནི༌ མར༌, ཕརང༌ཀེན༌སེནས༌ ཏྲི༌ཞིམ༌ཅན༌ནི༌ སྤོས༌, རྒུན༌ཆང༌ དང༌ ཨོ༌ལིཝ༌ཝི༌ མར༌ནག༌, མེ༌ད༌ དང༌ ཀྲོའེ༌ཕེ༌, བ༌ལང༌, ལུག༌, རྟ༌ དང༌ ཤིང༌རྟ༌ གུན༌ དང༌, ཚེ༌ཡོག༌གུན༌, འི༌ ཚང༌མ༌ གྱལ༌སའེ༌ ནང༌ང༌ ཉོབ༌ཚོང༌ ཏང༌ཅེས༌སི༌ ཕིའ༌ ཁྱོང༌ངད༌པིན༌།
14 ཡང༌ ཚོང༌པ༌གུན༌ནི༌ ཏ༌རུང༌ངའང༌ སྐད༌ ཆེན༌མོ༌ ཉམ༌པོ༌ ཟེརས༌, “ཝ༌ བ༌བེ༌ལོན༌, ཁྱོ༌རང༌ངི༌ དོད༌པ༌ ཅོ༌ཁན༌ནི༌ ཤིང༌ཏོག༌གུན༌ མེད༌ཁན༌ སོང༌ཏེ༌ ཨིན༌ནོག༌། ཁྱོ༌རང༌ངི༌ ཆུག༌ངོམས༌ དང༌ གྱུ༌ནོར༌ ཚང༌མ༌ སྟོར༌ ཡང༌ ལོགས༌ཏེ༌ མ༌ནེ༌ མི༌ཐོབ༌།”
15 ཏེ༌ གྱལ༌སའེ༌ ནང༌ང༌ ཚོང༌ ཏངས༌ཏེ༌ ཆུག༌པོ༌ གྱུར༌ཁན༌ ཚོང༌པ༌གུན༌, ཇིགས༌ནང༌ཅན༌ནི༌ ཏེ༌ གྱལ༌སའེ༌ ཆད༌པའ༌ ཇིགས༌ པ༌སང༌ ཐག༌རིང༌ང༌ དུགས༌ཏེ༌ ངུ༌ཨིན༌ ཉ༌ངན༌ ཅོ༌ཨིན༌
16 ཡང༌ ཚེར༌ཁ༌ ཅོས༌ཏེ༌ ཟེར༌ཨིན༌, “ཝ༌ ཀྲག༌པོ༌ གྱལ༌ས༌ ཙམ༌ཤིག༌གི༌ ཇིགས༌ནང༌ ཇིགས༌ནང༌། ཀོས༌ལག༌ རིན༌ཅན༌ ཀར༌པོ༌, སྔོན༌པོ༌ དང༌ མར༌པོ༌, ཡང༌ སེར༌, རིན༌ཅན༌ ཕྲའེ༌ རིགས༌ དང༌ མུ༌ཏིག༌ ཏགས༌ཁན༌ནི༌ བུ༌མོའེ༌
17 གྱུ༌ནོར༌གུན༌ སྲིབ༌ཅིག༌གི༌ ནང༌ང༌, མེད༌ཁན༌ སོང༌།”
ཏེ༌ གྲུ༌ཟིང༌གུན༌ནི༌ འུ༌སྐྱོང༌, ཏེ༌ནང༌ང༌ གྲུལ༌ཁན༌ནི༌ མི༌གུན༌, གྲུ༌ཟིང༌ སྲུལ༌ཁན༌ དང༌ ཚོ༌ གྱུད༌ཏེ༌ པེ༌ནེ༌ ཅོ༌ཁན༌ གུན༌, མའ༌ ཐག༌རིང༌ཞིག༌ག༌ ལངས༌ཏེ༌ དུག༌ཨིན༌།
18 གྱལ༌ས༌བོ༌ མེའ༌ ཞེན༌ཏེ༌ ཏུད༌པ༌ བིང༌ཨིན༌ ཐོང༌ ཟ༌ནེ༌, ཁོང༌གུན༌ནི༌ ངུ༌ཨིན༌ ཟེར༌ཨིན༌, “འི༌ གྱལ༌ས༌ ཙོགས༌སི༌ ཇིགས༌པོ༌ གྱལ༌ས༌ཞིག༌ མ༌ནེ༌ མེད༌གྲོ༌།”
19 ཁོང༌གུན༌ནི༌ ངུ༌ཨིན༌ ཚེར༌ཁ༌ སྟན༌ཅེས༌ལ༌ རང༌ངི༌ གོའེ༌ཀ༌ ཐལ༌བ༌ ཡོགས༌ཏེ༌ ཟེར༌ཨིན༌, “ཝ༌ ཀྲག༌པོ༌ གྱལ༌ས༌ ཙམ༌ཤིག༌གི༌ ཇིགས༌ནང༌ ཇིགས༌ནང༌། གྲུ༌ཟིང༌ངི༌ དག༌པོ༌ ཚང༌མ༌ ཏེ༌ གྱལ༌སའེ༌ གྱུ༌ནོར༌, ཚོ༌ གྱུད༌ཏེ༌ འི༌ངོ༌ འ༌ངོའ༌ སྐྱལ༌ཅེས༌པོའེ༌ ཆུག༌པོ༌ གྱུར༌ཏེ༌ ཨིན༌པིན༌། ཁོའེ༌ ནོར༌གུན༌ སྲིབ༌ཅིག༌གི༌ ནང༌ང༌, མེད༌ཁན༌ ཛདས༌།”
20 སྐད༌ཅིག༌གི༌ མོལས༌, “ནམ༌ཁའེ༌ ནང༌ང༌ ཡོད༌ཁན༌གུན༌, ཏེ༌ གྱལ༌ས༌ ཁྲེས༌ཏོར༌ ཆའ༌ཁན༌བོའེ༌ཀ༌ ཐད༌པོ༌ ཅོ༌ཤིག༌། དཀོན༌མཆོག༌གི༌ མི༌གུན༌, སྐུ༌ཚབས༌གུན༌ དང༌ ལུང༌སྟོན༌པ༌གུན༌ ཐད༌པོ༌ ཅོ༌ཤིག༌། ཅིའ༌ཟེར༌ན༌ ཁྱོ༌ཞའ༌ གྱབ༌གལ༌ ཅོ༌ཅེས༌པོའེ༌ དཀོན༌མཆོག༌གི༌ ཁོའ༌ ཁྲིམས༌ཅད༌ ཛད༌ཏེ༌ ཨིན༌ནོག༌།”
21 ཏེ༌ནེ༌ ཕོ༌ཉ༌ ཇིགས༌པོ༌ཞིག༌གི༌ རན༌ཐག༌གི༌ རྡོའ༌ ཙོགས༌ཤིག༌ ཁུར༌ཏེ༌, ཏེ༌བོ༌ གྱ༌ཚོའེ༌ ནང༌ང༌ ཕངས༌ཏངས༌ ཡང༌ མོལས༌, “ཏེན༌ན༌ ཙོགས༌སི༌ ཤེད༌ ཉམ༌པོ༌ བ༌བེ༌ལོན༌ནི༌ གྱལ༌ས༌ ཇིགས༌པོ༌བོའང༌ ཐུར༌ལ༌ མ༌ནེ༌ མི༌ཐོབ༌ཅེས༌སི༌ ཕིའ༌ ཕང༌ཨིན༌,
22 ཏར༌ ཡོད༌ཁན༌ནི༌ རོལ༌མོའི༌ སྐད༌, ལུ༌ཏང༌ཁན༌, ལིང༌བུ༌ ཕུ༌ཁན༌, ཏུང༌ ཕུ༌ཁན༌ གུན༌ ཏེ༌ གྱལ༌སའེ༌ ནང༌ང༌ ཡང༌སྐྱར༌ མ༌ནེ༌ མི༌ཚོར༌། ལས༌ སྣ༌ཚོགས༌ ཅོ༌ཁན༌ནི༌ མི༌གུན༌ ཡང༌སྐྱར༌ མ༌ནེ༌ མི༌ཐོབ༌། རན༌ཐག༌གི༌ སྐད༌དའང༌ ཡང༌སྐྱར༌ མ༌ནེ༌ མི༌ཚོར༌།
23 སྐྱོང༌ཙེ༌ འོད༌པོ༌ ཡང༌སྐྱར༌ མ༌ནེ༌ མི༌ཐོང༌། ཐད༌པོ༌ཅན༌ནི༌ མག༌པ༌ དང༌ བག༌མའི༌ སྐད༌གུན༌ནའང༌ ཡང༌སྐྱར༌ མི༌ཚོར༌། ཁྱོ༌རང༌ངི༌ ཚོང༌པ༌གུན༌ ཇིག༌རྟེན༌ གང༌པོའེ༌ ནང༌ང༌ ཚང༌མའེ༌སང༌ མིང༌ཅན༌ དང༌ ཝང༌ཅན༌ གུན༌ ཨིན༌པིན༌། ཡང༌ ཁྱོ༌རང༌ངི༌ ཆོས༌ངན༌ ཅོས༌ཏེ༌, ཇིག༌རྟེན༌པ༌ ཚང༌མ༌ལ༌ གོབ༌སྐོར༌ ཏངས༌།
24 ཁྱོ༌རང༌ངི༌ སྲང༌གུན༌ནི༌ ནང༌ང༌ དཀོན༌མཆོག༌གི༌ ལུང༌སྟོན༌པ༌ དང༌ ཁོང༌ངི༌ཀ༌ ཏད༌པ༌ ཅོ༌ཁན༌གུན༌ནི༌ ཁྲག༌ མ༌ཚད༌ ཇིག༌རྟེན༌ནི༌ཀ༌ མི༌ སད༌ཁན༌ ཚང༌མའེ༌ ཁྲག༌ གྱུག༌དུག༌།”