7
ཁོང༌རང༌ངི༌ མི༌གུན༌ དཀོན༌མཆོག༌གི༌ སྐྱོབ༌ཨིན༌།
7:1 ནེ༌ 8
1 ཏེ༌ སྟིང༌ནེ༌ ང༌ ཐོང༌, ཇིག༌རྟེན༌ནི༌ ཀྲུ༌ཞི༌ཀའེ༌ཀ༌ ཕོ༌ཉ༌ ཞི༌ ལངས༌ཏེ༌ ས༌ཀྱད༌ ཡ༌ གྱ༌ཚོ༌ ཡ༌ ལྕང༌མ༌ གུན༌ནི༌ཀ༌ གྱུག༌ མི༌གྱུག༌ཅེས༌ལ༌, ཇིག༌རྟེན༌ནི༌ ལུངས༌པོ༌ ཞི༌ཀོ༌ གགས༌ཏེ༌ བོར༌ར༌ ཛད༌ཏེ༌ དུག༌།
2 ཏེ༌ནེ༌ ངའེ༌, ལག༌པའེ༌ ནང༌ང༌ སོན༌པོ༌ དཀོན༌མཆོག༌གི༌ ཐེ༌ཙེ༌ ཁུར༌ཁན༌ནི༌ ཕོ༌ཉ༌ ལྔ༌པ༌བོ༌ ཤར༌ ཆོགས༌ནེ༌ བིང༌ང༌ ཐོང༌། འི༌ ཕོ༌ཉའེ༌, ས༌ཀྱད༌ དང༌ གྱ༌ཚོ༌ གུན༌ལ༌ ནོད༌པ༌ ཏང༌ཅེས༌སི༌ ཝང༌ སལ༌ལ༌ ཛད༌ཁན༌ནི༌ ཕོ༌ཉ༌ ཇིག༌རྟེན༌ནི༌ ཀྲུ༌ཞི༌ཀའེ༌ཀ༌ ལངས༌ཏེ༌ ཡོད༌ཁན༌གུན༌ལ༌, སྐད༌ ཆེན༌མོའེ༌ ནང༌ང༌ མོལས༌,
3 "ང༌དང༌ངི༌ ང༌ཏི༌ དཀོན༌མཆོག༌གི༌ ཡོག༌པོ༌གུན༌ནི༌ ཐོད༌པའེ༌ཀ༌ ཐེ༌ཙེ༌ ཏང༌ཏང༌ ཚག༌པ༌ ས༌ཀྱད༌, ཡ༌ གྱ༌ཚོ༌, ཡ༌ ལྕང༌མ༌ གུན༌ལ༌ ནོད༌པ༌ མ༌ཏང༌ཤིག༌།"
4 ཏེ༌ནེ༌ ང༌ ཐེ༌ཙེ༌ ཏང༌ཚར༌ཁན༌གུན༌ནི༌ ཀྲངས༌ཀ༌བོ༌ ཚོར༌, ཀ༌བོ༌ ལག༌ཅིག༌ དང༌ སྟོང༌ཞིབ༌ཅུ༌ ཞབ༌ཞི༌ དུག༌, ཀ༌གུན༌ ཨིས༌ར༌ཨེལ༌ལི༌ སྡེ༌ ཚང༌མའེ༌ ནང༌ནེ༌
5 ཡུ༌དཱའེ༌ སྡེ༌ནེ༌ སྟོང༌ཅུག༌ཉིས༌,
རུ༌བེན༌ནི༌ སྡེ༌ནེ༌ སྟོང༌ཅུག༌ཉིས༌,
གཱད༌དི༌ སྡེ༌ནེ༌ སྟོང༌ཅུག༌ཉིས༌,
6 ཨ༌ཤེར༌རི༌ སྡེ༌ནེ༌ སྟོང༌ཅུག༌ཉིས༌,
ནབ༌ཐལ༌ལིའི༌ སྡེ༌ནེ༌ སྟོང༌ཅུག༌ཉིས༌,
མ༌ན༌ཤེའེ༌ སྡེ༌ནེ༌ སྟོང༌ཅུག༌ཉིས༌,
7 ཤི༌མི༌འོན༌ནི༌ སྡེ༌ནེ༌ སྟོང༌ཅུག༌ཉིས༌,
ལི༌ཝིའི༌ སྡེ༌ནེ༌ སྟོང༌ཅུག༌ཉིས༌,
ཨིས༌ས༌ཁར༌རི༌ སྡེ༌ནེ༌ སྟོང༌ཅུག༌ཉིས༌,
8 ཟེ༌བུ༌ལོན༌ནི༌ སྡེ༌ནེ༌ སྟོང༌ཅུག༌ཉིས༌,
ཡོ༌སེབ༌བི༌ སྡེ༌ནེ༌ སྟོང༌ཅུག༌ཉིས༌, ཡང༌
བེན༌ཡཱ༌མིན༌ནི༌ སྡེ༌ནེ༌ སྟོང༌ཅུག༌ཉིས༌ ཨིན༌ནོག༌།
མི༌ཚོགས༌ ཆེན༌མོའེ༌ སྟོད༌པ༌།
7:9 ནེ༌ 17
9 ཏེ༌ སྟིང༌ནེ༌ ངའེ༌ སུ༌ཞིག༌གིའང༌ རྩི༌ མི༌ཉན༌ཅེས༌སི༌ མི༌ཚོགས༌ ཆེན༌མོ༌ཞིག༌ ཐོང༌, ཀ༌གུན༌ གྱལ༌ཁག༌, རིགས༌, མི༌ དང༌ སྐད༌རིག༌ ཚང༌མ༌ནེ༌ ཞུགས༌ཁྲིས༌ དང༌ ལུ༌གུའི༌ དུན༌ལ༌ ལངས༌ཏེ༌ དུག༌པིན༌། ཏེ༌གུན༌ནི༌ ཀོས༌ ཀར༌པོ༌ གོན༌ཏེ༌, ཁ༌སོར༌ ལྕང༌མའེ༌ ཡལ༌ག༌གུན༌ ལག༌པའེ༌ ནང༌ང༌ ཁུར༌ཏེ༌,
10 སྐད༌ ཆེན༌མོའེ༌ ནང༌ང༌ ཟེརས༌,
"ཐར༌པ༌ ནི༌ ཞུགས༌ཁྲིས༌སི༌ཀ༌ ཞུགས༌ཁན༌
དཀོན༌མཆོག༌ དང༌ ལུ༌གུ༌ ཉིས༌ཀོའེ༌ནེ༌ ཐོབ༌བ༌ནོག༌།
11 ཞུགས༌ཁྲིས༌, འུ༌སྐྱོང༌ གུན༌ དང༌ སྲོག༌ ཡོད༌ཁན༌ ཞི༌ཀོའ༌ ཐའ༌ནེ༌ སྐོར༌ཏེ༌ ཕོ༌ཉ༌ ཚང༌མ༌ ཞངས༌ཏེ༌ དུག༌། ཁོང༌ ཚང༌མའེ༌ ཞུགས༌ཁྲིས༌སི༌ དུན༌ལ༌ ཆག༌ཕུལ༌ཨིན༌ དཀོན༌མཆོག༌ག༌ ཅོལས༌།
12 ཁོང༌གུན༌ནི༌ མོལས༌,
"ཨ༌མེན༌།
སྟོད༌པ༌, སྤལ༌, ཤེས༌རབས༌, ཐུག༌རྗེ༌,
རྩི༌ཝ༌, ཝང༌ དང༌, ཤེད༌ གུན༌ ཏུས༌གྱུན༌ནེ༌གྱུན༌,
ང༌དང༌གུན༌ནི༌ དཀོན༌མཆོག༌གི༌ ཨིན༌ནོག༌, ཨ༌མེན༌།"
13 ཏེ༌ནེ༌ འུ༌སྐྱོང༌ ཅིག༌གི༌ ངའ༌ ཏྲིའ༌རག༌, "འི༌ ཀོས༌ ཀར༌པོ༌ གོན༌ཁན༌གུན༌ སུ༌ ཨིན༌ནོག༌? ཡང༌ ཀ༌ནེ༌ ཡོངས༌ཏེ༌ ཨིན༌ནོག༌?"
14 ངའེ༌ ཁོང༌ང༌, "སྤོན༌བོ༌ལེ༌, ངའ༌ གྱུས༌མེད༌ ཨིན༌ནའང༌ ཉེ༌རང༌ངི༌ ཁྱེན༌ན༌ནོག༌" ཞུས༌པིན༌། ཁོང༌ངི༌ མོལ༌ལ༌རག༌, "འི༌གུན༌ རྡུག༌ངལ༌ མ༌ ཆེན༌མོ༌ནེ༌ བིངས༌ཏེ༌ ཡོང༌ཁན༌གུན༌ ཨིན༌ནོག༌། ཁོང༌གུན༌ནི༌ ཁོ༌རང༌གུན༌ནི༌ ཀོས༌གུན༌ ལུ༌གུའི༌ སྐུ༌ཁྲག༌གི༌ ནང༌ང༌ ཁྲུས༌ཏེ༌ ཀར༌པོ༌ ཅོས༌ཏེ༌ ཨིན༌ནོག༌།"
15 "ཏེན༌ན༌བོའེ༌ཕིའ༌ ཁོང༌གུན༌ནི༌ དཀོན༌མཆོག༌གི༌ ཞུགས༌ཁྲིས༌སི༌ དུན༌ལ༌ ལངས༌ཏེ༌
དཀོན༌མཆོག༌གི༌ ཆོད༌ཁང༌ངི༌ ནང༌ང༌ ཉིན༌ཚན༌ མེད༌པ༌ ཁོང༌ང༌ ཞབ༌སྟོག༌ ཞུའ༌ནོག༌།
ཡང༌ ཞུགས༌ཁྲིས༌སི༌ཀ༌ ཞུགས༌ཏེ༌ ཡོད༌ཁན༌བོའེ༌, ཀུར༌ ཙོགས༌ལ༌ ཁོང༌གུན༌ ཀབས༌ཏེ༌ སྐྱོབ༌བ༌ ཛད༌ཨིན༌།
16 ཁོང༌གུན༌ མ༌ནེ༌ མི༌སྟོགས༌, ཡ༌ མི༌སྐོམས༌,
མ༌ཚད༌ ཉི༌མའེ༌ ཚད༌, ཡ༌ ཚད༌ ཀྲག༌པོའེ༌ ཞས༌ཏེ༌ ཁོང༌གུན༌ ཚིག༌ མི༌ཚིག༌།
17 ཅིའ༌ཟེར༌ན༌ ཞུགས༌ཁྲིས༌སི༌ སྐྱིལ༌ལ༌ ལངས༌ཏེ༌ ཡོད༌ཁན༌ནི༌ ལུ༌གུ༌ ནི༌,
ཁོང༌གུན༌ སྐྱོབ༌ཁན༌ནི༌ ལུག༌རྫི༌ ཨིན༌ནོག༌། ཁོང༌ངི༌, ཁོང༌གུན༌ སྲོག༌ སལ༌ཁན༌ནི༌
ཆུ༌མིག༌གུན༌ནི༌ དུན༌ལ༌ ཁྲིད༌ཏེ༌ ཁྱེར༌ར༌ ཛད༌ཨིན༌།
ཡང༌ དཀོན༌མཆོག༌གི༌ ཁོང༌གུན༌ནི༌ ཆི༌མ༌ ཕིའ༌ ཛད༌ཨིན༌།