8
ཐེ༌ཙེ༌ རྡུན༌པ༌ ཅགས༌།
8:1 ནེ༌ 5
1 ལུ༌གུའི༌ ཐེ༌ཙེ༌ རྡུན༌པ༌བོ༌ ཅགས༌ཏེ༌ ཕེའ༌ཅིག༌, ནམ༌ཁའེ༌ ནང༌ང༌ ཆུ༌ཚོད༌ ཕེད༌ ཟམ༌ཤིག༌ ཅའང༌ སྐད༌ མེད༌པ༌ ཇམ༌ཐིང༌ངེ༌ ལུས༌།
2 ཏེ༌ནེ༌ ངའེ༌ དཀོན༌མཆོག༌གི༌ སྐུན༌དུན༌ལ༌ ལངས༌ཏེ༌ ཞུགས༌ཁན༌ནི༌ ཕོ༌ཉ༌ རྡུན༌ ཐོང༌, ཡང༌ ཁོང༌གུན༌ལ༌ ཏུང༌ རེ༌རེ༌ སལ༌ལ༌ ཛདས༌།
3 སེར༌རི༌ སྤོས༌སི༌ ནོད༌ ནམས༌ཁན༌ནི༌ ཞན༌ ཕོ༌ཉ༌ཞིག༌ སྐྱོད༌ཏེ༌ ཆོད༌ཁྲིའི༌ དུན༌ལ༌ ལངས༌ཏེ༌ ཞུགས༌། ཁོའ༌ སྤོས༌ མང༌པོ༌ཞིག༌ དཀོན༌མཆོག༌གི༌ མི༌གུན༌ནི༌ མོས༌ལམ༌མི༌ ནང༌ང༌ སྲེས༌ཏེ༌ ཞུགས༌ཁྲིས༌སི༌ དུན༌ལ༌ ཡོད༌ཁན༌ནི༌ སེར༌རི༌ ཆོད༌ཁྲི༌ཀ༌ ཕུལ༌ལ༌ སལས༌།
4 སྤོས༌སི༌ ཏྲི༌ཞིམ༌ཅན༌ནི༌ ཏུད༌པ༌བོ༌ དཀོན༌མཆོག༌གི༌ མི༌གུན༌ནི༌ མོས༌ལམ༌ དང༌ སྲེས༌ཏེ༌ ཕོ༌ཉའེ༌ ཕུལ༌ཁན༌ནི༌ ཆོད༌ཁྲིའི༌ ཀ༌ནེ༌ དཀོན༌མཆོག༌ ཆོགས༌ལ༌ ཀེན༌ལ༌ སོང༌།
5 ཏེ༌ནེ༌ ཏེ༌ ཕོ༌ཉ༌བོའེ༌ སེར༌རི༌ སྤོས༌སི༌ ནོད༌པོ༌ ནམས༌ཏེ༌ ཆོད༌ཁྲི༌ ཀ༌ནེ༌ སོ༌ལའེ༌ མེ༌ སྐངས༌ཏེ༌ ཇིག༌རྟེན༌ནི༌ཀ༌ ཕངས༌པ༌, ཇིག༌རྟེན༌ནི༌ཀ༌ སྐམ༌ལག༌གི༌ འོད༌, བྲུག༌ལྡིར༌ཁན༌ནི༌ སྐད༌ དང༌ སང༌གུལ༌ ཡོངས༌།
ཏུང༌ རྡུན༌།
8:6 ནེ༌ 13
6 ཏེ༌ སྟིང༌ནེ༌ ཏུང༌ རྡུན༌ ཡོད༌ཁན༌ནི༌ ཕོ༌ཉ༌ རྡུན༌ཀོའེ༌ ཏེ༌གུན༌ ཕུ༌ཅེས༌ལ༌ གྲལ༌གྲིག༌ ཅོས༌།
7 ཕོ༌ཉ༌ ཏང༌པོ༌བོའེ༌ ཏུང༌ ཕུའ༌ཅིག༌, ཁྲག༌ དྲེས༌ཁན༌ནི༌ སེ༌ར༌རུ༌ དང༌ མེ༌ ཇིག༌རྟེན༌ནི༌ཀ༌ བབས༌, ཀ༌བོའེ༌ ཇིག༌རྟེན༌ནི༌ ཁག༌ སུམ༌མི༌ ནང༌ནེ༌ ཁག༌ ཅིག༌གི༌ ནང༌ང༌ ཡོད༌ཁན༌ནི༌ སྤང༌ སྔོན༌པོ༌ དང༌ ལྕང༌མ༌ ཚང༌མ༌ མེའ༌ སྲགས༌ཏངས༌།
8 ཕོ༌ཉ༌ ཉིས༌པའེ༌ ཏུང༌ ཕུའ༌ཅིག༌, མེའ༌ བར༌ཨིན༌ ཡོད༌ཁན༌ནི༌ རི༌ ཆེན༌མོ༌ ཙོགས༌ཤིག༌ གྱ༌ཚོའེ༌ ནང༌ང༌ ཕངས༌ཏངས༌, ཀ༌བོའེ༌ གྱ༌ཚོའེ༌ ཁག༌ སུམ༌མི༌ ནང༌ནེ༌ ཁག༌ ཅིག༌པོ༌ ཁྲག༌ག༌ གྱུར༌།
9 ཏེ༌ གྱ༌ཚོའེ༌ ནང༌ང༌ ཡོད༌ཁན༌ནི༌ སེམས༌ཅན༌ ཁག༌ སུམ༌མི༌ ནང༌ནེ༌ ཁག༌ ཅིག༌པོ༌ ཤི༌, ཡང༌ ཏེ༌ གྱ༌ཚོའེ༌ ནང༌ང༌ ཡོད༌ཁན༌ནི༌ གྲུ༌ཟིང༌ ཁག༌ སུམ༌མི༌ ནང༌ནེ༌ ཁག༌ཅིག༌ མེད༌ཁན༌ སོང༌།
10 ཏེ༌ནེ༌ ཕོ༌ཉ༌ སུམ༌པ༌བོའེ༌ ཏུང༌ ཕུའ༌ཅིག༌, ནམ༌ཁའ༌ནེ༌ པམ༌བར༌རི༌ མེ༌ ཙོགས༌ ཡོད༌ཁན༌ནི༌ སྐར༌མ༌ ཆེན༌མོ༌ཞིག༌, ལྩངས༌པོ༌ དང༌ ཆུ༌མིག༌ ཁག༌ སུམ༌མི༌ ནང༌ནེ༌ ཁག༌ ཅིག༌གི༌ཀ༌ བུད༌།
11 ཏེ༌ སྐར༌མ༌བོའེ༌ མིང༌ང༌ ཁན༌ཀྲེ༌ ཟེར༌དུག༌, ཀ༌བོའེ༌ ཆུ༌ ཁག༌ སུམ༌མི༌ ནང༌ནེ༌ ཁག༌ ཅིག༌པོ༌ ཁན༌ཀྲེ༌ གྱུར༌ཅུགས༌, ཡང༌ ཁན༌ཀྲེ༌ གྱུར༌ཁན༌ནི༌ ཆུ༌བོ༌ ཐུངས༌ཏེ༌ མི༌ མང༌པོ༌ཞིག༌ ཤི༌།
12 ཏེ༌ནེ༌ ཕོ༌ཉ༌ ཞི༌པའེ༌ ཏུང༌ ཕུའ༌ཅིག༌, ཉི༌མའ༌, ཟླ༌ཝའ༌ དང༌ སྐར༌མའེ༌ ཁག༌ སུམ༌མི༌ ནང༌ནེ༌ ཁག༌ཅིག༌ ཀབས༌ ཏངས༌, ཡང༌ མུན༌གྲིག༌ གྱུར༌། ཉི༌མའ༌ དང༌ ཚན༌ནི༌ ཁག༌ སུམ༌མི༌ ནང༌ནེ༌ ཁག༌ ཅིག༌པོ༌ འོད༌ མེད༌པ༌ ལུས༌།
13 ཏེ༌ནེ༌ ངའེ༌ ལྟས༌པ༌ ནམ༌ཁའེ༌ སྐྱིལ༌ལ༌ འུར༌ཨིན༌ ཡོད༌ཁན༌ནི༌ ལག༌གི༌, སྐད༌ ཆེན༌མོའེ༌ ནང༌ང༌ ཟེར༌ཨིན༌ ཚོར༌, "ཇིག༌རྟེན༌ནི༌ ནང༌ང༌ ཏད༌པ༌ མེད༌ཁན༌ནི༌ མི༌གུན༌ལ༌ ཇིགས༌པ༌, ཇིགས༌པ༌, ཇིགས༌པ༌, ལུས༌ཁན༌ནི༌ ཕོ༌ཉ༌ སུམ༌ཀོའེ༌ ཏུང༌བོ༌ ཕུའ༌ཅིག༌, ཅི༌ མི༌ཆའ༌!"