☰ Uroma 10
10
1 Umbi angwɛ̃mɛn nu anapumɛn, ubinkpi amɛnmum aka abee nu ifɛn-Nummum iwu ugɛ abi Uisrairha ama akpo ififɔrh. 2 Umum iwemum ri ideka ri itsimbɔ ugɛ adzowukumbɔ amɛnmbɔ ru Unum, bɔr idzowe amɛnmbɔ isi iwengge ri ihwihwɛng. 3 Umbɔ asi ihwɛngmbɔ irhirhikayɛ iki idzek ru Unum, nggee umbɔ abee itsu atsimbɔ awe abika arhika na asi ineke Unum atsu umbɔ awe abika arhika. 4 Ukiristo awe imimasha Íkpem ngge itsú ubɛn unerwi aka awe ri imangmang ama awe uwuku usheru uvau.
Ififɔrh iwu iyi ubɛn unera
5 Umusa atsɛng riminɛ irhirhika iki ikpo ri idɔsi Íkpem, agɔr agɛ, <<Uner uwuku udɔsi ikpem iyɛrɛ awuri ibɛka.>>* 6 Bɔr irhirhika iki iwe ri imangmang igɔr igɛ, <<Niba ugɔrɔ ra amɛnngo ugɛ, <Ungamɔ awuri ifũ ra afã akũ Ukiristo acipuwa?>† 7 Use <Ungamɔ awuri itsĩ ra anang abika akpe asoyiwe Ukiristo ra akpe?> ‡>> 8 Irhirhika ha igɔr igɛ,
<<Urhɛm hã akhapa ru ungo,
uwe ra angwĩngo nu ra amɛnngo.>>§
Ake awe, arherhe imangmang umɛn iki ĩdũwã ake. 9 Ungo uba urherhungo nggu angwĩngo ugɛ, <<Uyesu awu Uteijee,>> nu uweɔ ri imangmang ra amɛnngo ugɛ Unum asoyiwe unga ra akpe, ungo uwuri ikpoɔ ififɔrh. 10 Ubinkutsu idzowe imangmang nggu amɛnngo ngge itsú ungo ushiɔ ru uvau ra asu Unum, nu ukũ angwĩngo urherhe ngge itsú ungo ukpo ififɔrh. 11 Ru nyaki itsɛng Arherhu-Num iki igɔr igɛ, <<Ubɛn unera aka awe ru imangmang ru unga asi ígũa atsak.>>* 12 Ubinkutsu umɛn iwe ubina unying, uwɔɔ asi inanga uwɔɔ, abi Uyahuda nu atsen abi Uyahuda awu unying. Uteijee ha awe Uteijee anera kishoo na atsuke idorh ru kishoo uwuku ufɛna unga. 13 Itsɛng Arherhu-Num igɔr igɛ, <<Ubɛn unerwi aka ayisi itsok Uteijee awuri ikpoa ififɔrh.>>†
14 Bɔr anera akorhu uguse na ayisu Unum umbɔ aba ashimbɔ ri imangmang ru unga? Awuri ikorha aguse na awe ru imangmang ru uwuruwi umbɔ aba anasi igũmbɔ isarhe ri itsinga? Awuri ikorha aguse na agũ, unera aba asi idzowuka umbɔ isarhe? 15 Awuri ikorha aguse na adzowe isarhe, umbɔ aba asi idenukumbɔ umbɔ? Ru nyaku itsɛng Arherhu-Num iki igɔr ugɛ, <<Adak abika akũ Isarhe Iyiki Ize awu azezerake!>>‡
16 Bɔr asi iwea kishoo abi Uisrairha aka ayɛi Isarhe Iyiki Ize ha. Ubinkutsu Uishaya arherhe agɛ, <<A Uteijee, ungamɔ awe ru imangmang ri isarhamɛn?>>§ 17 Nggee imangmang idzek ri igũ isarhe, igũ isarhe ri itsi Ukiristo. 18 Bɔr umum irhusa, abi Uisrairha anasi igũmbɔ? Aka agũmbɔ, itsɛng Arherhu-Num igɔr igɛ,
<<Irhak arherhambɔ iki idɔsu abĩã kishoo,
írhɛmmbɔ iki itsĩngge ru upfunga kishoo.>>*
19 Ikɛi umum ibvui irhusa, abi Uisrairha asi ihwɛngmbɔ? Ĩĩ, ahwɛngmbɔ, uko ri inggbaashia, Umusa agɔr agɛ,
<<Umum iwuri itsu umbi agũ unyɛ̃ɛ̃ abirabɛ umbi aka asi inyanga umbɔ awembɔ ubin,
umum iwuri itsu umbi agũ avɔm ru ubok abirabɛ aka ashimbɔ ri ihwihwɛngmbɔ.>>†
20 Nu Uishaya arherhe nggu ikeramɛn agɛ,
<<Abirabɛ aka asi ibeembɔ umum, akpo umum,
umum idzeka ra abirabɛ aka asi ibeembɔ umum.>>‡
21 Bɔr ri itsi abi Uisrairha, unga agɔr agɛ,
<<Kishoo unuma umum ibera abokmum iyɛi anera
abika asheri ididɔsa nu abika akpɛ̃ igigũ.>>§
* 10:5 Àka anyã ikɛi: Urha 18.5. † 10:6 Àka anyã ikɛi: Iva 30.13. ‡ 10:7 Àka anyã ikɛi: Iva 30.13. § 10:8 Àka anyã ikɛi: Iva 30.14. * 10:11 Àka anyã ikɛi: Uish 28.16. † 10:13 Àka anyã ikɛi: Uyow 2.32. ‡ 10:15 Àka anyã ikɛi: Uish 52.7. § 10:16 Àka anyã ikɛi: Uish 53.1. * 10:18 Àka anyã ikɛi: Amb 19.4. † 10:19 Àka anyã ikɛi: Iva 32.21. ‡ 10:20 Àka anyã ikɛi: Uish 65.1. § 10:21 Àka anyã ikɛi: Uish 65.2.
☰