9
Unum nggu anernga
1 Umum irherhe idzidzɛrhe ru Ukiristo isi igbɛrmum angwĩ, amɛnmum adɛyiwake umum ru ubok Ipfu Isarsatangge.
2 Umum iwe ru nggaa idamɛn nu igũ ighong ra amɛnmum aka asi ímaake.
3 Ngge iba imɛ̃ɛ̃ngge, umum ibee umbɔ atsuka umum ikponum na agau umum nggu Ukiristo ri ifɔrh angwɛ̃mɛn, aner unangmum,
4 aner Uisrairha. Unum asɛng umbɔ awe angwɛ̃nga. Unga adɛyiwe umbɔ igɔngnga na adzowe umbɔ ibibemuwenga. Umbɔ ayɛi Ikpem, umbɔ adzowe igɔng ri Iya-Num, nu ayɛi ibibemuwenga.
5 Uibrahim, Uishaku, nu Uyakubu awu atokambɔ ri iyor, Ukiristo iganga awu unang Uisrairha. Ukiristo awu Unum uwu abina kishoo, na awe ri idorh ugbagbaa! Iwerimi.
6 Isi iwengge ugɛ ibibemuwe-Num nggu anera iki igba, asi iwea anang Uisrairha kishoo awe aner Unum.
7 Ikɛi asi iwea anang Uibrahim kishoo awe ungwɛ̃ Uibrahim. Unum agɔr Uibrahim agɛ, <<Awu ru Uishaku ukpekũ ungo iki ikpo unang hã umum iki inbemuwa.>>
8 Agben akɛrɛ agɛ asi iwea angwɛ̃ abirabɛ Uibrahim aka amar ri iyor awu angwɛ̃ Unum, awu angwɛ̃ ibibemuwe ukpekũ awe angwɛ̃ Uibrahim.
9 Ibibemuwe ha irherhe riminɛ, igɛ, <<Ri ivang iyɛrɛ ra amɛk aka aba, umum ibvui ĩbamum, Usaratu awuri imar ungwɛ̃.>>
10 Asi iwea ake ukpekũ, bɔr angwɛ̃ Urifkatu utesmbɔ awu unying, utɛmɛn Uishaku.
11-12 Unga anasi imara akãrhghwɛ̃ awɛkaci ha, use umbɔ atɔ̃mbɔ itser iyiki ize use iyiki ibewe, Unum adɛyiwe Urifkatu agɛ, <<Uwuku ukũa awuri itɔ̃we itser ru uwuku ucia.>> Akɛrɛ adɛyiwa ugɛ Unum ani isɛng abirabɛ unga aka abee, isi iwengge ru ubok itsermbɔ.
13 Ru nyaku itsɛng Arherhu-Num iki igɔr ugɛ, <<Umum ibemu Uyakubu, ni ikpɛ̃mum Isuwa.>>
14 Umɛn iwuri igɔr ugɛ use? Unum asi irhikunga nukpɔ? Ishingge!
15 Unga agɔr Umusa agɛ,
<<Umum iwuri igũ atorh unerwi umum iki igũ atorh,
ni icorhuwe uwuruwi umum iki icorhuwe.>>
16 Nggee, awu Unum unga ani igũ atorh, asi iwea itser unera use ititɛ̃wãnga.
17 Itsɛng Arherhu-Num igɔr Ufir'auna igɛ, <<Umum itsu ungo uwu uyɛrhe, ru umum ikũ ungo idɛyiwe ijeemum ni isɔme itsokmum ru upfunga kishoo.>>
18 Nggee, Unum awuri igũ atorh unerwi unga aka abee igũ atorh, ikɛi abvure amɛn uwuruwi unga aka ibvure.
Avɔm Unum nu imimutanga
19 Bɔr uwɔɔ ru umbi awuri igɔr umum agɛ, <<Awu use utsu Unum anyã avaumɛn? Ungaa adɛ̃ɛ̃ akpɛ̃ ubinkpi unga aka abee?>>
20 Bɔr ungo uwu ungamɔ, unera, ungo iki iwe ru uning nggu Unum? Ubinkpi umbɔ aka akũ abĩ adzin usi ídɛ̃ɛ̃ ugɔrkpɔ uwuku udzin ukpɔ ugɛ, <<Awu use utsu ungo udzin umum rimi?>>
21 Uner uwuku udzin anũi abĩ, asi iwea ri ijee iyiki ikũ abĩ hã akorhu ubinkpi unga aka abee? Unga awea ri ijee iyiki idzin anũi iyi itser ugarh use iyi itser iyiki isheru ugarh.
22 Rimi hã awu idzidzɛrhe Unum aka akorhe. Unga aka abee idɛyiwe avɔmnga, ikɛi adɛyiwe ijeenga. Bɔr unga adɔngamɛn nggu abirabɛ avɔmnga aka imɛ̃ igba ru umbɔ ni itsĩme umbɔ.
23 Unga akorha akɛrɛ ha ri idɛyiwe ikpikpoinga ra abirabɛ unga aka agũ atorh, abirabɛ unga aka asɛng ri idɛyiwe ikpikpoinga ishaisha.
24 Uko umɛn, unga aka ayisa, asi iwea ra abi Uyahuda ukpekũ bɔr nggu atsen abi Uyahuda ikɛi.
25 Ru nyaka unga aka arherhe ru ubvur Uhosiya agɛ,
<<Umbɔ asi iwembɔ anermum,
bɔr umum iwuri iyisa umbɔ anermum,
ikɛi asi iwea uwu umum iki ibema,
bɔr umum iyisa unga uwu umum iki ibema.>>
26 Na agɔr agɛ,
<<Ngge iwuri ikorhungge uku kpengkpeng ra anangkɛ umbɔ aka agɔr umbɔ agɛ,
<Umbi asi iwembi anermum,>
awuri iyisa umbɔ <angwɛ̃ Unum uwu urhɛ.> >>
27 Uishaya adũwũ udũwã ri itsi abi Uisrairha agɛ,
<<Uko irhɛ abi Uisrairha iwe ru nyaku uzuzeu azɛ̃ akagɔng,
abika abɔr ukpekũ awuri ikpo ififɔrh.
28 Uteijee awuri itsu ufainga ru upfung iki ifefetem idiki unying.>>
29 Ru nyaku Uishaya aka arherhe agɛ,
<<Agɛ Uteijee uner ijee kishoo
asi inekanga umɛn anang,
umɛn iwuri iwe ru nyaka Usɔdɔm,
umɛn iwuri iwe ru nyaku Ugomora.>>
Ida imangmang abi Uisrairha
30 Ude umɛn igɔr ugɛ use? Ugɛ atsen abi Uyahuda aka asi ibeembɔ irhirhika, aka akpombɔ ngge, irhirhikayɛ iki iwe ri imangmang.
31 Abi Uisrairha aka atɛ̃wã abee Unum anyanga umbɔ awu abika arhika ri idɔsi Íkpem, bɔr asi ikpombɔ.
32 Awu use ikɛn? Ubinkutsu, umbɔ asi ibeembɔ ngge ri imangmang bɔr umbɔ abeea ngge ri itser. Umɔ umbɔ adana nu <<utarh ukpuku ukwɛr itok.>>
33 Ru nyaku itsɛng Arherhu-Num iki igɔr ugɛ,
<<Unyã, umum iden utarh ru Usihiyona,
ukpuku itsu anera adani itok
nu ifa iyiki itsu anera agbeigba,
bɔr ubɛn uwuruwi aka awe ru imangmang ru unga
asi íhwaa atsak.>>