10
Na mateana beto na pepa tavijongo iketena
1 Beto isa sa qa batia mule sa kai goto mateana neneqina sa lagere vei pa noka. Sa tapopoko pana lei sisa beto sa vailivutai pa nare batuna sa na bibigo, na isumatana sa tolanga vei na tapo, beto na nenena sa vei na iku sa vuvurungu memea.
2 Sa araruaona pa limana sa kai pepa tavijongona na iketena beto na tarevatana. Beto na nene kale matuana sa turunia pa ivere, goto na nene kale merina sa turunia pa peso,
3 beto sa kukuku vevela vei na kurumu ngangarana na laione. Pa liguna sa vevela isa, sa qai pererekata ka vitu paka oka.
4 Pa ligudi qai jola ka vitu paka oka, sa ma podalai kukuti qau sara, ba qa nongoria mule kai ovovele sa lagere vei pa noka pira sau, <<Muke ule votunia sisa qai pojai ira ka vitu paka oka; beto ko muke kutiria,>> sau.
5 Beto sa na mateana isa sa kole turu pa ivere beto pa peso sa alaka saenia pa noka sa na lima matuana,
6 beto sa maulu pana isongona na Tamasa, na toa jolana kamua na kamua, isa sa vapodakia na oka beto doru sakasa pa leona, na peso beto doru sakasa pa leona, beto na ivere beto doru sakasa pa leona. Pira sau sa na mateana, <<Kopira minake sovai lalaona sa na totoso!
7 Goto totonai mina ivua na mateana vinavitu sa na ona kuvili, sa mina vagore votua na Tamasa sa nona nyorogua golomona, isa vei sa tei pojaniria tu isa ira na ona nabulu tinoni kokorotai,>> sau.
8 Beto sa na ovovele qa nongoria sa lagere vei pa noka sa pira saunisiu, <<Mu lao ko mu tekua sa na pepa tavijongo revatana pana limana na mateana isa sa turu pa ivere beto pa peso,>> sau.
9 Poni qa lao sa tana mateana, ko qa pojania ko mi vanisiu na pepa tavijongo iketena qau. Poni pira saunisiu sisa, <<Pia, tekua ko mu gania. Kode mina pasa ilili pa iapamu sina, ba pa mangamu sa kode mina lomoso jonga vei na muji,>> sau.
10 Ko qa tekua ara sa na pepa tavijongo iketena pana limana na mateana, ko qa gania. Ko pa mangaqu sa qa valilingi veinia tugu na muji, ba totonai tu qa ponyolo betoa poni sa sa ilili pasa pana iapaqu.
11 Beto sa kai ule vanisiu mutu sa pira sa vei, <<Kopira muna kai kokoroto tariniria mule ao sira soku minete tinoni, na puku tinoni, ira okokoto dia parangana, beto ira na babangara.>>