11
Karu tinoni pogoso nongoro tana Tamasa
1 Ego qa taiania ara sa kai gou tiku sa dogoro vei na kolu papadana, beto qa tagarunu sara, pira sau, <<Mu turu ko mu padai sa na zelepade madina tana Tamasa, na idi vavavakukuvuna, beto mu anyeria sira qai vatarasae pa leona.
2 Ba munake padai sa na kakabarena na zelepade madina. Muna loa vakolea sisa, ura sa tei taianiria tu ira na tinoni karovodi sa na ia isa, ko kode mai tete anyanyunia ira sa na gusu madina ka madengavulu karu popu.
3 Beto kode mana garunu laoniria ara sira karu qua tinoni vavakato ko mai vasae poko babati karedi qai vavasaeria na tinoni qai takulanga, beto ko mai kole ule votunia sa na nongoro tana Tamasa pana kai tina karu gogoto vonomongavuluputa rane ira,>> sau.
4 Ko ira karu tinoni vavakato aipira sa na karu gou olive beto karu tuturuna juke qai turu pa moena na Bangara sa bangarania na peso.
5 Ko vei na tinoni mina nyorogua vapalekaria, poni sa na iku tu mina votu pana mangadi ira karu mina vurungu paleria sira na dia kana. Ko na tinoni mina nyorogua vapalekaria sa kode mina tavamate vei tugu isa.
6 Ira sa qai taiania sa na neqi, ko mai boka pateia sa na oka ko minake gore sa na okoro pana totoso mai ulule votunia ira na nongoro tana Tamasa. Qai isongia tugu vei sa na neqi ko mai boka pelukunia na orungu sa na pie, beto ko mai boka vavagosoroni okokoto oja sa na peso. Kode mai boka roiti vei pira sira pana ai totoso mai nyoroguania.
7 Totonai mai vaokoto betoa ira karu sa na vavakatonia na nongoro tana Tamasa, sa mina votu sale vei pa leo pou oqili kepore vinabetona sa na manugu piruna made nenena, ko mina rajaria sira karu, ko mina vakilasaria beto mina vamateria.
8 Ko na kokobu tinidi ira karu tinoni vavakato aipira sa mai kole vuvusudia pana lodaka soana lavata pa gusu lavata poreveveina pana ia ketakoi sa tavamate pa korosi na dia Bangara. Qai vaisongo vavapadania pa Sodomo beto pa Ijipi sa ketakoi.
9 Ko kue rane kobuna sa mai kole dodogoria ira na tinoni pa okoto minete tinoni, pa okoto bubutu, ira okotodia parangana, beto ira na okoto puku tinoni sa na kokobudi ira karu beto mai daidia tugu golomoria.
10 Ko ira doru tinoni pa peso sa mai qerania ira sa na matedi ira karu, ko mai roiti inevanga beto mai vaibei lao lame vaivana, ura ira karu tinoni kokorotai pira sa qai vagosoroniria na vitigi sira doru tinoni qai suvere pa peso.
11 Ba sa jola kue rane kobuna sa na gagala toana sa koko vei tana Tamasa sa tomeria sira karu, ko qai gasa turu. Ko qai matagutu vivitigi sira qai batiria ira karu.
12 Beto qai nongoria ira karu tinoni kokorotai aipira sa kai ovovele lavata sa lagere vei pa noka, pira sau, <<Mei sale lani!>> sau. Poni sa isa tugu qai korapa dodorodia ira na dia kana, sa qai koi pa lei sae gu pa noka sira karu.
13 Ko pana totoso tugu isa sa sa raja sa kai nunu lavatana jola, ko sa vukele tajegara sa na kobuna vinamanoga na gugusu lavata isa, ko ira ka vitu tina tinoni sa qai mate. Goto ira na tinoni qai suvere jola sa sa koi vei vairia na matagutu poni qai vatarasaea gu ira sa na Tamasa lavata pa noka.
14 Na takulanga vinarua sa sa koni jola ba vera tu, na takulanga vinaue sa nake sovaina beto mina lame!
Na kuvili vinavitu
15 Beto sa ivua na mateana vinavitu sa na ona kuvili, poni sa qai tanongoro sira na ovovele vevela pa noka, pira qarigu,
<<Na binangara pa kasia gusu
sa kopira na ona na oda Bangara beto na ona Karisito,
ko na Tamasa mina kole Bangara kamua na kamua,>> qarigu.
16 Ko ira ka rabete ka made tinoni mamata qai kole toqo pana dia totoqona bangara pana moena na Tamasa, sa qai kokopo todongo gore pa peso, beto qai vatarasaea sa na Tamasa,
17 pira qarigu,
<<Bangara, na Tamasa vivamu jola,
qu korapa kopira beto qu kole perangana tu,
qe paranga jongana lao tamu.
Ura qu vadogoronigei na mua neqi lavatana
ko kopira qu tei bangara tu!
18 Ira na pupuku tinoni sa qai tagigiri,
ba na totoso tagigiri tamu sa sa kamua gu sa kopira.
Sa kamua gu sa na totoso muna tutiniria
ira doru tinoni qai tei mate tu.
Sa kamua gu sa na totoso mai tatabara
sira na mua nabulu na tinoni kokorotai,
beto dorudi ira na mua tinoni,
ira qai pangaganigo, na ikete na lavata.
Sa kamua gu sa na totoso mai tapipiara
sira na tinoni pipiara pa peso,>> qarigu.
19 Beto sa tarevanga sa na atakamanana na zelepade madina tana Tamasa pa noka, beto sa tabata pa leona nona zelepade madina sa na Bokese Vinaego. Beto sa mamalara kakapi vasiboro sa na kapi, sa tanongoro na kukuku, beto qai pererekata sa na paka oka, sa jou na nunu beto qai vukele gore lagere sa na kakabu aisi.