1 Kawd ren thuq liq
Awg meh he lehq phehq peg che awg lawn
Kawd ren thuq med vawr, Kawd ren thuq lad chuhd ghig he lehq Sar ror niq lad chuhd ghig awg kanr huh cawg che yaog. Med che ve awr lehr, paw sa jad lehq med nged huhd daq pa daq kig awg kaw jen phehq che yaog. Haeg jad che med liz phehq lehq u ve haq te lehq Rod maq muhd mig ted kag gha lia lo awg meh buhg jad che med phehq che yaog. Kawd ren thuq Khreq yad awg mor awr lehr, Khreq yad awg suhx phehq che haq te lehq, a saq teq che khuhn su heh maq te kae tug te har jad che yaog. Kheh te cheaq te lehq, Khreq yad awg mor khuhn phehq har lehq soq saq che awg ceng phehq tuhaz mad che yaog.
Buhq var he lehq buhq che awg yand
Liq che te koz khuhn gha mawg che he lehq awg kawd teq co khuhn ve bon hox bon nax teq pa koz che heh te lehq, cuh yad Pawd loq awr lehr liq che haq buhq var lehz koz che yaog. Liq che te koz awr lehr, Pawd loq Ed fed suq med khuhn chehd che seh khuhq gag vehr lehd teag huh, A.D. 55 khuhq kheh thad huh buhq lar che yaog.
A yed ir che awg lawn he lehq awg lawn kha peg
Liq che te koz awr lehr, Khreq yad teq pa ve a saq teq khad khuhn phehq tuhaz che phehq har che awg lawn teq pa haq koz lar che yaog. Kheh te cheaq te lehq, vend bax chuhd kha ax che awg lawn he lehq daq che kehg che a saq teq khad ir lag muh lag che awg lawn haq koz lar che yaog. Pawd loq awr lehr, i hehd Khreq yad teq pa gha phud chehd che awg ceng teq pa haq te lehq, i hehd awg pun yawd duhd khix jad che haq mawg gha che yaog. Che ve haq te lehq, yawd awg cehg mag Ghig sa ve yawg huhx var phehq che haq liz a nig gha mawg che yaog. Mad awr ve phehq har che awg ceng haq caz daq che awg lawn teq pa haq lehax mar chehd liz, a nig haq che he lehq gha kad jaw chehd che mar khad ted pehg pehar liz cawg che yaog. Mar khad che ve teq pa awr lehr, ka nad nux 13 khuhn (Haq pehd che awg lawn) he lehq ka nad nux 15 khuhn (Kawq teq tuag che awg lawn) cawg che yaog.
Awg lawn nux
1. Awg kawd ve tawd: Ghig sa haq chid muh lehq laq kuhr cax ax che tawd (1:1-9)
2. Khreq yad awg mor khuhn phaz daq gid daq che (1:10-4:21)
3. Daq che awg lid awg khad he lehq bon lid sinx khad haq te yaq che awg lawn (5:1-6:20)
4. Awg phad mawd awg mid ma he daq che awg lawn (7:1-40)
5. Te kenr te cawd che he lehq maq te kenr maq te cawd che (8:1-11:1)
6. Teq geha bon lawg thad te tug awg ceng (11:2-14:40)
a. A kor pi bon lawg che khuhn te kenr te cawd che awg ceng (11:2-16)
b. Jawd mawd Yer suq ve pawehd caor cad che awg lawn (11:17-34)
c. Co ha phawd awr ve laq sawnr (12:1-14:40)
7. Suh kig lo kawq teq tuag che awg lawn mar khad (15:1-58)
8. Awg leh med yug cuq lar che tawd: Kawd ren thuq Khreq yad awg mor te cawd che awg ceng he lehq Pawd loq yawd awg ton duhd law lehq te gad che kanx (16:1-24)
1
Awg chawd teq pa haq duhd nuhd che tawd
1 Ngag awr lehr Yer suq Khreq ve cuh yad Pawd loq yaog. Ghig sa ve a lor cawd cheaq te lehq, cuh yad te tug yawd ngag haq kug yug che yaog.
2 Nig hehd Kawd ren thuq med khuhn chehd che Ghig sa ve Khreq yad awg mor haq ngag he lehq a vix a nax Sud tenr, liq che buhq fea che yaog. Nig hehd awr lehr Yer suq Khreq haq te lehq daq vehr kehg vehr che yaog. A nig ved Jawd mawd Yer suq Khreq ve awg meh haq kha kug che awg kag gha lia lo chehd che chaw awg gha lia geh teq geha Khreq yad phehaq tug, Ghig sa nig hehd haq kug yug lar peor. Yer suq awr lehr a nig ved Jawd mawd lehax ma hez. I hehd ve Jawd mawd liz phehq che yaog.
3 A nig ved Awr pa Ghig sa he lehq Jawd mawd Yer suq Khreq ve awg bon awg sinx he lehq duhd sa gad sa tug nig hehd geh cawg vid-oq.
Awg bon teq pa haq gha cheaq te lehq Ghig sa haq chid muh che
4 Nig hehd haq te lehq ngag Ghig sa haq khar thad liz chid muh chehd che yaog. Awg lawn ghod ver, Yer suq Khreq awg khuhn nig hehd Ghig sa ve awg bon haq gha che yaog.
5 Yer suq Khreq haq te lehq, tawd yaw che lehd ma koz, sir vix che lehd ma koz, awg ceng gha lia awg khuhn nig hehd saw peh lawq vehr che yaog.
6 Khreq awg lawn ngag sax khiz khanr che awr lehr, awg cehg mag yaog lehz nig hehd gha sir peor.
7 Kheh te cheaq te lehq, a nig ved Jawd mawd Yer suq Khreq kawq tuhaz che haq law chehd huh, nig hehd awg khuhn co ha phawd awr ve laq sawnr ted cear liz ma yawnd kae che yaog.
8 A nig ved Jawd mawd Yer suq Khreq ve awg ni awg khuhn, nig hehd vend bax tar kig maq gha cawg tug, awg leh med kha gag yawd nig hehd haq yeg vid gha tug yaog.
9 Ghig sa awr lehr kar tiq yeg jad che yaog. Yawd ved Yad phu phehq che, a nig ved Jawd mawd Yer suq Khreq haq nig hehd awg chawd gha te daq tug, yawd nig hehd haq kug yug lar che yaog.
Khreq phaz daq pehg daq lar cheawg la
10 A vix a nax teq paog, a nig ved Jawd mawd Yer suq Khreq ve awg meh awg khuhn, ngag nig hehd haq che kheh te lawg khawx che yaog. Nig hehd tawd yaw daq che hawr daq vid-oq. Awg mor sawnr daq pehg daq che tad cawg vid-oq. Kheh ma khuhd, ni ma teq sir lehax te lehq, duhd khad te khad lehax cawg che awg khuhn nig hehd cawd daq hawr daq che ted ceng kha peh cawg vid-oq.
11 Awg lawn ghod ver, ngag ved a vix a nax teq paog, nig hehd awg khuhn yaq daq jiz daq che cawg che yaog lehz Khar lawd iq ve yehg yad ka yad teq pa ngag haq koz ax che yaog.
12 Ngag koz gad che awr lehr che kheh yaog. Nig hehd koz che, Ngag awr lehr Pawd loq ve chaw yaog, Ngag awr lehr Ar pawd loq ve chaw yaog, Ngag awr lehr Per troq ve chaw yaog, Ngag awr lehr Khreq ve chaw yaog lehz, nig hehd te ghad lehq te ghad koz daq chehd che yaog.
13 Khreq awr lehr phaz daq pehg daq lar che lehq la. Pawd loq awr lehr nig hehd awg pun laq kan thag huh khanr suh che lehq la. Ma hez ver, Pawd loq ve awg meh awg khuhn nig hehd baz tiz sar khanr yug che lehq la.
14 Kar lid puq he lehq Gar yuq, ix mag haq ma hez ver, nig hehd awg khuhn chaw te ghad-e haq liz ngag baz tiz sar ma pid cheaq te lehq ngag ha lehg che yaog.
15 Kheh te lehq, ngag ved awg meh awg khuhn baz tiz sar khanr yug peor, lehz chaw te ghad-eg liz koz maq gha.
16 (Sar ter phanr ve yehg yad ka yad teq pa haq liz ngag baz tiz sar pid che yaog. Che awg khod-aq awg kag awr ve chaw haq baz tiz sar pid che haq ngag ma duhd nuhd.)
17 Awg lawn ghod ver, baz tiz sar pid tug awg pun Khreq ngag haq cuh peha lar che ma hez. Kheh ma khuhd, ha lehg che bon khuhd mar vid tug ngag haq cuh peha lar che yaog. Ha lehg che bon khuhd mar vid ver, Khreq ve laq kan kand pax maq gha yawnd veh tug, chaw yad ve cud yiq ma yiq ir che tawd khuhd yaw lehq mar vid che ma hez.
Khreq Ghig sa ve kand pax he lehq cud yiq phehq che
18 Awg lawn ghod ver, laq kan awg lawn mar vid che awr lehr, lug vehr sez vehr chehd che chaw teq pa awg pun cud yiq mad cawg che tawd khuhd phehq che yaog. Kheh ma khuhd, laq kan awr lehr a nig thaer khuhq che haq gha chehd che chaw teq pa awg pun Ghig sa ve kand pax phehq che yaog.
19 Liq phu khuhn buhq lar che heh,
“Cud yiq cawg che chaw teq pa ve cud yiq haq ngag te lug lehq,
sir vix che chaw teq pa ve sir vix che haq ngag tawr lar tug yaog,”
lehz buhq lar che yaog.
20 Cud yiq cawg var khar lo le. Awg lid tawd khuhd sir var khar lo le. A meha ve awg yand awg khuhn awg lawn laex ceng sir lehq tawd ghawg daq var khar lo le. Ghig sa awr lehr, mig gig ve cud yiq haq cud yiq mad cawg che awg ceng phehq vid che ma hez hawg la.
21 Awg lawn ghod ver, mig gig yad awr lehr, a sug yawd ved cud yiq ma yiq haq te lehq Ghig sa haq sir che ma hez. Che awr lehr, Ghig sa duhd chez lar che cud yiq phehq che yaog. Kheh te lehq, cud yiq mad cawg lehz su sawnr che a nig mar vid che bon khuhd haq yonr che chaw teq pa haq thaer khuhq vid tug Ghig sa ni ma cawd che yaog.
22 Yud daq chaw teq pa awr lehr, and tug awg hez teq pa haq lawg lehq, Her lar saq chaw teq pa awr lehr, cud yiq haq ca che yaog.
23 Kheh ma khuhd a nig awr lehr, laq kan thag huh khanr suh che Khreq te ghad ve awg lawn bon mar vid che yaog. Awg lawn che awr lehr, Yud daq chaw teq pa awg pun khi thid pog lehq par kuhd tug te lehq, bid saz a naz chaw teq pa awg pun cud yiq mad cawg che ted ceng phehq che yaog.
24 Kheh ma khuhd, kha kug yug lar che chaw teq pa awg pun, Yud daq chaw lehd ma koz, Her lar saq chaw lehd ma koz, Khreq awr lehr Ghig sa ve kand pax he lehq Ghig sa ve cud yiq phehq che yaog.
25 Awg lawn ghod ver, Ghig sa ve cud yiq mad cawg che ted ceng awr lehr, chaw yad ve cud yiq ma yiq haq keh lex lehq cud yiq cawg che yaog. Ghig sa ve ghad nud che ted ceng awr lehr, chaw yad ve ghad ir che haq keh lex lehq awg ghad ir che yaog.
26 A vix a nax teq paog, Ghig sa nig hehd haq kug yug che awg lawn haq duhd ngawx ser. Mig gig phawd awr haq sawnr ver, kug lar che chaw teq pa awg khuhn, cud yiq ma yiq cawg che chaw teq pa mad che ma hez. Kand pax ir che chaw teq pa liz mad che ma hez. Jawd mawd ve awg ceng awg khad teq pa liz mad che ma hez.
27 Kheh ma khuhd, cud yiq cawg che chaw teq pa haq yaq taw vid gha tug, mig gig khod-aq lo cud yiq mad cawg che chaw teq pa haq Ghig sa lez yug che yaog. Awg ghad ir che chaw teq pa haq yaq taw vid gha tug, mig gig khod-aq lo awg ghad nud che chaw teq pa haq Ghig sa lez yug che yaog.
28 Ghig sa mig gig khod-aq lo awg mig awg phond mad cawg che awg ceng, su sawnr kha lar che awg ceng he lehq teq chaweh cuhx kig mad cawg che awg ceng teq pa haq Ghig sa lez yug lehq awg mig awg phond cawg lehq a yed ir che awg ceng teq pa haq te mehx che yaog.
29 Kheh te cheaq te lehq, Ghig sa mehz khuhd suhr chaw te ghad-eg liz ni ma ir kig mad cawg.
30 Ghig sa haq te lehq, Yer suq Khreq awg khuhn nig hehd gha chehd che yaog. A nig awg pun cud yiq ma yiq, thed che cawd che, daq che kehg che he lehq thaer khuhq che ted ceng, Ghig sa awr lehr Yer suq haq phehaq vid che yaog.
31 Kheh te lehq, Liq phu khuhn buhq lar che heh, Ni ma ir che chaw awr lehr, Jawd mawd Ghig sa awg khuhn lehax ni ma ir vid-oq, lehz buhq lar che yaog.